Ronaldo we i laef long Brasil, i kasem wan bigfala aksiden wetem ol famle blong hem long wan trak. Sore tumas ol famle ya evriwan oli ded, be Ronaldo nomo i laef, mo hem i talem se: “Mi bin stap 2 manis long hospital, bifo we mi kasem nius se ol famle blong mi, oli ded.”

Hem i gohed i se: “Fastaem, mi no bilif se papa mo mama blong mi tufala i ded. Mi stap tingbaot se, ?olsem wanem olgeta evriwan oli ded? Ale, taem mi kasem save se samting ya i tru, mi mi sek mo mi harem nogud bigwan. Mi mi neva harem nogud olsem. Taem we mi stap mi wan, mi harem se laef blong mi i blong nating nomo, from mi no luk wan famle blong mi. Blong plante manis, klosap evri dei mi stap krae. Mi ting se hem i fol blong mi, from mi letem narafala i draevem trak. Mi stap tingting se sipos mi bin draevem trak, maet tede mi save luk olgeta yet.”

“Afta 16 yia i pas, naoia mi glad bakegen mo laef blong mi i gohed gud bakegen. Nating se i olsem, be bambae i tekem taem blong mi fogetem trabol ya.”

Yu no mas fraet blong soemaot se yu harem nogud, taem wan famle blong yu i ded. Baebol i talem se, i gat “taem blong man i krae.” (Prija 3:1, 4) Ronaldo i talem se: “Taem mi harem se mi wantem krae, mi no holemtaet mi, mi krae nomo. Sipos no, bambae mi harem nogud moa.” I tru, yumi evriwan i gat defdefren filing. Taswe, sipos yu no save krae taem yu harem nogud, yu no mas fosem yu blong krae.

Yu no mas stap yu wan oltaem. (Ol Proveb 18:1) Ronaldo i talem se: “Oltaem mi traehad blong joen wetem ol narafala, mo mi welkamem ol man we oli kam visitim mi. Mo tu, mi talemaot ol filing blong mi long woman blong mi mo olgeta we mi fren gud wetem olgeta.”

Yu no mas harem nogud, sipos wan man i talem wan tok we i spolem filing blong yu. Maet hem i talem ol kaen tok olsem se, “i moa gud olsem.” Ronaldo i talem se: “Sam toktok we ol man oli talem blong leftemap tingting blong mi, oli mekem mi mi harem nogud.” I moa gud blong folem wanem we Baebol i talem, i bitim we yu lesin long ol krangke tok. Baebol i talem se: “I nogud yu stap lesin long evri toktok we man i stap talem.”—Prija 7:21.

Yu lanem trutok long saed blong ol dedman. Ronaldo i talem se: “Long Prija 9:5, Baebol i soemaot se taem wan man i ded, hem i no moa save wan samting. Save ya i mekem se mi gat pis long tingting. Mo tu, Baebol i tijim se, ol man we oli ded, bambae oli laef bakegen. Taswe, taem mi stap tingbaot ol famle blong mi we oli ded, olsem se oli go visitim wan aelan, mo bambae oli kambak bakegen, samting ya i mekem mi mi harem gud.”—Ol Wok 24:15.

?Yu yu save? Baebol i tokbaot promes ya se wan dei, God “bambae i mekem we ded bambae i go lus olgeta.” *—Aesea 25:8.