“Taem mi mo woman blong mi mitufala i gat problem, hem i go tokbaot long papa mo mama blong hem. Ale papa blong hem i ring long mi blong givim advaes long mi long samting we i hapen. !Mi no glad tumas long samting ya!”—Jemes. *

“Plante taem, mama blong man blong mi i talem se, ‘!Mi tingbaot boe blong mi we!’ Hem i stap talem se hem mo boe blong hem, tufala i fren gud. Tok ya i mekem mi mi harem nogud, i olsem we mi nao mi spolem hem, taem mi maredem boe blong hem.”—Natasha.

?Olsem wanem blong mekem se problem wetem papa mo mama blong yutufala i no kam wan problem blong mared?

Taem man i mared, hem i statem wan niufala famle. Baebol i talem se man we i mared i “mas aot long papa mo mama blong hem, i mas go joen wetem woman blong hem.” Hemia i sem mak tu long woman we i mared. Baebol i talem se, taem wan woman i mared, tufala i kam “wan bodi nomo.” Tufala i statem wan niufala famle.—Matiu 19:5.

Mared blong yu i moa impoten long papa mo mama blong yu. Wan man blong givim advaes long mared, John M. Gottman, i talem se: “Wan long ol impoten samting long mared, hemia se long eni samting we man mo woman i mekem, tufala i mas tingbaot tufala. Taem tufala i mekem olsem, tufala i joen gud mo mared blong tufala i stap gud, mo tufala i no moa joen tumas wetem papa mo mama, mo ol narafala famle.” *

Sam papa mo mama oli faenem i had. Wan man we i jes mared i talem se: “Bifo we mitufala i mared, oltaem woman blong mi i mekem samting we papa mo mama blong hem i askem. Be afta we mitufala i mared, mama blong hem i luksave se i no moa olsem. I no isi blong hem i akseptem samting ya.”

Samfala we oli jes mared tu oli faenem i had. Jemes, we yumi tokbaot hem finis, i talem se: “Papa mo mama blong yutufala oli no olsem ol fren we yu jusum. Taem yu mared, i olsem we wan man i talem long yu se: ‘Yu gat 2 niufala fren, i nomata sipos yu laekem tufala no nogat.’ !Nating se tufala i mekem yu yu kros, be tufala i famle blong yu yet!”

Sipos yu mo woman blong yu, yutufala i no agri long sam samting wetem papa mo mama blong yutufala, yutufala i mas traem stretem trabol ya tugeta. I gud yu folem advaes long Baebol blong “wok had blong mekem pis.”—Ol Sam 34:14.

Naoia bambae yumi tokbaot tri samting we i stap hapen long mared, mo yu traem luk wanem we yu save mekem taem samting olsem i hapen. Long haf ya, ol advaes i go long man mo woman tugeta. Mo ol rul blong Baebol we i stap, oli save givhan long tufala blong winim ol problem wetem papa mo mama.

Woman blong yu i wantem se yu fren gud wetem mama blong hem, be yu yu harem se i had.

Yu traem rod ya: Yu tokbaot problem ya wetem woman blong yu, mo yu mas rere blong agri long tingting blong hem. Samting we i impoten hemia blong tingbaot woman blong yu we yu promes blong lavem hem, be i no mama blong hem. Taem yutufala i stap tokbaot problem ya, yu traem tingbaot 1 no 2 samting we yu save mekem, blong yu fren gud wetem mama blong hem, mo yu mas mekem samting ya. Taem woman blong yu i luk se yu traehad blong fren gud wetem mama blong hem, bambae hem i respektem yu moa.—Rul blong Baebol: 1 Korin 10:24.

Man blong yu i talem se yu laekem moa blong mekem papa mo mama blong yu i glad i bitim hem.

Yu traem rod ya: Yu tokbaot problem ya wetem man blong yu, mo yu traem kasemsave tingting blong hem. Yu no mas mekem man blong yu i harem olsem se yu respektem moa papa mo mama blong yu i bitim hem. (Ol Proveb 23:22) Yu mas talem ol gudfala toktok long hem. Mo hem i mas luksave long ol samting we yu mekem se hem i impoten moa long papa mo mama blong yu. Sipos yu mekem olsem, bambae hem i no gat tingting ya se yu laekem moa papa mo mama blong yu i bitim hem.—Rul blong Baebol: Efesas 5:33.

Woman blong yu i askem advaes long papa mo mama blong hem, be i no long yu.

Yu traem rod ya: Yu storian wetem woman blong yu, mo yutufala i agri long wan tingting se wetaem i stret blong tokbaot wan problem long papa mo mama, mo wetaem i no stret. Yu mas mekem tingting blong yu i kwaet. ?I rili rong blong tokbaot wan problem wetem papa no mama? ?Wetaem i stret blong tokbaot problem ya? Sipos yutufala i agri long wan tingting, bambae smol samting ya i no kam wan bigfala problem.—Rul blong Baebol: Filipae 4:5.