PLANTE man oli singaot Nikaragwa se ples blong ol lek mo ol volkeno. Long kantri ya, i gat wan lek we i bigfala moa i bitim ol narafala lek long Sentrol Amerika, hemia Lek Nikaragwa. Ol man blong ples ya oli singaot lek ya se Cocibolca we i min se “Solwota We i Swit.” I gat plante handred aelan oli stap olbaot long lek ya. Mo hemia wan freswota lek nomo long wol we i gat ol fis blong solwota oli laef long hem, olsem sak, longmaot, mo wan narafala fis we nem blong hem tarpon.

I gat wan ples long Nikaragwa we nem blong hem Moskito Kos. Hem i longwe moa long ol taon, i bitim ol narafala ples long Sentrol Amerika. Hem i kavremap bighaf blong is kos blong Nikaragwa go kasem narafala kantri ya Honduras. Sipos yu wokbaot krosem Moskito Kos, hem i 65 kilometa. Laen ya we nem blong hem Miskito (narafala rod blong talem Moskito), hem i wan nomo long plante laen long Nikaragwa. Ol waetman oli kam long ples ya afta long yia 1500, be laen ya Miskito i stap finis.

Ol man Miskito oli laekem blong joen wanples, mo oli gat ol kastom we oli defren long ol narafala ples. Long lanwis blong olgeta, i no gat ol tok olsem “Masta” mo “Misis.” Long vilej, ol yangfala oli singaot olgeta we oli olfala moa se “Angkel” mo “Anti,” nating se oli famle no nogat. I gat wan olfala  kastom we ol Miskito oli stap folem. Taem wan woman i talem halo long wan fren no famle blong hem, hem i kam klosap long hem mo i mekem fes blong hem i tajem fes blong narafala. Long semtaem, hem i pulum win long nus blong hem.