Ripot Long Wok Blong Kingdom

Halpem Ol Kaen Man Long Netalan

EBRAHAM i wan man we i gat strongfala bilif. Aposol Pol i talem se taem “God i singaot hem,” Ebraham i obei long voes blong God mo “i aot long kantri blong hem, be hem i no save se niufala kantri ya we hem i stap go long hem i stap wea.” Wetem ful famle blong hem, Ebraham “i stap long kantri ya we God i mekem promes blong hem long hem bifo, be hem i wan strenja nomo,” gogo wan handred yia i pas, nao Ebraham i ded.—Hibrus 11:8, 9.

Sem mak tede, plante Witnes blong Jeova oli rere blong muf i go long narafala kantri blong givhan long ples we i gat nid. I gat sam we oli lanem wan narafala lanwis blong talemaot gud nius long ol strenja we oli stap laef long kantri blong olgeta. Eksampel, long ol 15 bilyan man long Netalan, i gat wan bilyan we oli kamaot long ol narafala kantri. Samting ya i ‘openem wan doa blong mekem wan gudfala wok,’ olsem ol ekspiryens we oli kam biaen oli soem.—1 Korin 16:9.

◻ Bahram, we bifo i wan tija blong Kungfu, i kamaot long wan kantri blong Medel Is. Hem i kasem wan Baebol mo sam buk we Watch Tower Society i prentem. Bifo we wan manis i pas, Bahram i luksave se hem i faenem trutok. Hem mo waef blong hem, tufala i stat stadi long Baebol, be i gat wan problem i stap—man ya we i stadi Baebol wetem tufala i no save toktok lanwis blong tufala. Oli talem se long taem ya, i olsem we oli stap toktok “wetem han mo leg blong olgeta,” from we oli stap mekem saen nomo blong eksplenem ol samting. Taem i pas, ale, Bahram mo waef blong hem, tufala i faenem wan kongregesen we oli toktok lanwis blong tufala, nao tufala i gohed gud long saed blong spirit. Naoia, Bahram i baptaes mo hem i wan Witnes.

◻ Wan brata blong Netalan wetem waef blong hem, we tufala i paenia, tufala i storeyan wetem wan man Indonesia, long fored blong wan bigfala stoa. Man ya i sapraes mo i hapi taem tufala ya i storeyan wetem hem long lanwis blong hem. Oli mekem plan blong kam luk hem long haos blong hem. Oli lanem se hem i bin laef long Rasia bitim 20 yia, mo long taem ya hem i kam wan dokta we i savegud ol sik mo problem blong ol woman. Hem i talem se hem i no bilif nating long God, be hem i talem stret se evri taem we hem i givhan long wan woman blong bonem pikinini, hem i stap tingting se “!Bodi blong man i nambawan! !Hemia wan merikel!” Man ya i agri blong stadi long Baebol, mo i no longtaem hem i stat bilif se i gat wan Man we i Wokem evri samting, mo we i rili kea long yumi. (1 Pita 5:6, 7) Naoia hem i wan brata, mo hem i stap wok long wan kongregesen blong Amsterdam we oli toktok lanwis blong Indonesia.

◻ Long wan bigbigfala haba long Rotterdam, wan grup blong paenia i traehad blong storeyan wetem plante man we oli toktok long defren lanwis, taem ol sip blong olgeta oli kam long haba ya. Gudfala frut i kamaot long nambawan wok blong ol paenia ya. Plante boskru, wetem wan kapten, wan haeman blong ami, mo wan man we bifo i wan bodigad, olgeta oli akseptem trutok. Naoia, olgeta tu oli stap talemaot gud nius ya blong Kingdom blong God long fulwol.—Matiu 24:14.

Olsem long ol narafala kantri, ol Witnes blong Jeova long Netalan oli gat strong tingting blong talemaot gud nius ya we i blong stap oltaem nomo. Oli talemaot nius ya long olgeta man long wol, long olgeta blong evri kala, mo kantri, mo laen, mo lanwis.—Revelesen 14:6.