!Obei Long Woning!

LONG Jun 3, 1991, bigfala Hil ya Fugen long Japan, i mekem wan noes olsem tanda we i faerap. Hem i sakemaot win mo ases blong volkeno olsem wan reva we i ron. Win mo ases we oli meks, oli ron i kamdaon long hil ya mo oli hot tumas. Volkeno ya we i faerap i kilim i ded 43 man. Plante long ol man we klosap nomo oli ded, faea i bin givim bigfala kil long olgeta. Samfala oli kraeaot se, “Wota, wota, plis.” Ol man blong stopem faea mo ol polis oli traehad blong halpem olgeta kwiktaem.

TU WIK bifo finis, ol man oli bin luk wan hif blong lava i stap long maot blong bigfala Hil ya Fugen. Taswe ol haeman mo ol man we oli stap long ples ya oli kasem woning finis. Bitim wan wik bifo we trabol ya i hapen, ol man oli bin kasem wan advaes se oli mas muf i kamaot long eria ya. Jes wan dei bifo long taem ya we volkeno i bosta, ol polis oli askem ol man blong nius blong oli no go insaed long eria ya we i denja. Be yet, long aftenun we trabol i hapen, olgeta 43 man ya we mbae oli ded, oli stap long eria ya we i denja.

?From wanem nao samfala oli wantem faenemaot moa long saed blong eria ya no oli wantem gohed blong stap long hem? Sam man blong wokem garen we oli livim haos blong olgeta finis, oli kambak bakegen blong jekem olting blong olgeta mo garen blong olgeta. Tri man we oli stadi long volkeno oli stap traem blong go klosap long volkeno ya blong stadi moa long hem. Sam man blong nius ripot mo ol man blong tekem foto oli no fraet nating blong krosem ol mak blong graon we man i no mas bitim, jes from we oli wantem raetem sam stori long saed blong volkeno ya. Trifala trak we ol man blong nius oli rentem, oli stap long taem ya. Ol polis mo ol man blong stopem faea, oli stap tu blong mekem wok blong olgeta. Wanwan long olgeta i gat prapa risen blong hem blong go insaed long eria ya we i denja—mo frut we i kamaot se olgeta oli lusum laef blong olgeta.

?Yu Yu Stap Long Wan Eria We i Denja?

Maet yumi no stap klosap long wan volkeno we i rere blong faerap. Be, ?olsem wanem nao sipos yumi stap fesem wan bigfala trabol we bambae i spolem wol, mo we i mekem se ful wol i stap olsem wan ples we i denja? Wan buk we i pruvum se hem i gat ol profet tok we man i save dipen long hem, i givim woning long saed blong wan trabol we mbae i kavremap ful wol. Hem i tokbaot samting ya olsem: “San bambae i kam tudak, mo mun bambae i no moa saen. Ol sta bambae oli folfoldaon, mo ol narafala samting long skae we oli strong we i strong, God bambae i muvum  olgeta. . . . Nao olgeta laen blong ol man blong wol bambae oli krae.” (Matiu 24:29,30) Long ples ya hem i stap tokbaot ol bigbigfala samting blong sapraes we oli kamaot long skae, we bambae oli kasem “olgeta laen blong ol man long wol.” Yes, profet tok ya i stap tokbaot wan bigfala trabol we bambae i kasem evri man.

Buk ya blong ol profet tok we man i save dipen long hem, hemia Baebol. I nambawan blong save se ol toktok we oli stap raonabaot long vas ya we i stap antap, oli tokbaot klia olgeta samting we bambae oli mas kamaot gogo kasem taem ya we bigfala trabol i kasem wol. Lava we i stap long maot blong volkeno mo ol narafala saen blong volkeno oli givim risen long ol haeman long bigfala taon blong Shimabara, blong makem eria ya se hem i denja. Long sem fasin, Baebol i givim ol risen blong yumi stap wekap mo blong mekem yumi wanwan i rere blong kasem sef. Yumi save lanem wan bigfala lesen from trabol we i kamaot long bigfala Hil ya Fugen mo yumi naf blong luksave bigfala denja we i stap fored long yumi.

 [Credit Line blong pija long pej 2]

COVER: Yomiuri/Orion Press/Sipa Press

[Credit Line blong pija long pej 3]

Yomiuri/Orion Press/Sipa Press