Stap Lukaot Jeova Wetem Wan Hat We i Reregud

PRIS blong Isrel, Esra, hem i wan man we i nambawan long fasin blong lukaot mo faenem ol save, hem i stadi dip, mekem ol kopi blong loa mo blong tijim Loa. Hem i wan gudfala eksampel blong ol Kristin tede long saed blong mekem wok wetem ful laef. ?Olsem wanem? From we hem i fasgud long God nating se hem i stap long Babilon, taon ya we i fulap long ol giaman god mo wosip long ol rabis spirit.

Be fasin we Esra i gat blong fasgud long God i no kamaot olsem nomo. Hem i wok had from samting ya. I tru, hem i talem long yumi se hem i “mekemrere hat blong hem blong ridimgud loa blong Jeova mo blong mekem hem i wok.”—Esra 7:10, NW.

Olsem Esra, ol man blong Jeova tede oli wantem mekem olgeta samting we Jeova i askem long olgeta nating se oli stap laef long wan wol we i agensem trufala wosip. Taswe i gud blong yumi traem faenem sam rod blong rerem gud hat blong yumi, hemia ol fasin we oli stap dip insaed long yumi—we oli joen wetem ol tingting, ol samting we yumi wantem, mo ol samting we oli pusum yumi—blong “ridimgud loa blong Jeova, mo blong mekem hem i wok.”

Rerem Gud Hat Blong Yumi

“Blong rerem gud” i minim se “blong rere gud fastaem blong samfala samting: blong rere gud blong wan spesel wok, rere blong folem long laef, no blong rerem tingting.” I tru se, sipos yu kasem stret save long Tok blong God mo yu givim laef blong yu long Jeova, hat blong yu i kasem wan mak we yumi save skelem wetem “gudfala graon” we Jisas i tokbaot long parabol blong man ya blong sakem sid.—Matiu 13:18-23.

Be nating se i olsem, yumi nidim blong lukaot gud mo klinim hat blong yumi oltaem. ?From wanem? I gat tu risen. Faswan, from we ol nogud fasin we oli save spolem yumi, oli olsem ol rabis gras long garen, we oli rere blong gru. Samting ya i tru moa naoia long “ol las dei” taem “win” blong wol ya blong Setan i fulap long ol sid blong ol tingting long saed blong bodi we oli blong spolem yumi. (2 Timoti 3:1-5; Efesas 2:2, NW) Seken risen i joen wetem graon hem wan. Sipos graon i stap nomo olsem we yumi no lukaot gud long hem, bambae sloslou i kam drae, i kam strong, mo i no moa save givim gudfala frut. Maet plante man oli no kea mo wokbaot antap long garen mo stanap long graon gogo i kam strong. Pijatok ya i laenap wetem hat blong yumi. Hat blong yumi i no moa save karem gudfala frut sipos yumi no lukaot gud long hem, no sipos ol man we oli no gat intres long yumi long saed blong spirit oli spolem hem.

Taswe hem i impoten tumas, blong yumi evriwan i folem gud advaes we i kamaot long Baebol se: “Samting we yu mas lukaot long hem i bitim ol narafala samting, se hat blong yu. Blokem ol samting we oli save kam spolem hat blong yu, from we hat hem i stamba blong laef.”—Ol Proveb 4:23, NW.

Ol Samting We Oli Mekem “Graon” Blong Hat Blong Yumi i Kam Rij

Yumi traem tingbaot sam samting, no sam fasin, we bambae oli save mekem “graon” blong hat blong yumi i kam moa gud mekem se hat i save gru gud. I tru se, i gat plante samting we oli save mekem hat blong yumi i kam moa gud. Be naoia, bambae yumi lukluk sikis long ol samting ya. Hemia fasin blong luksave ol nid blong yumi long saed blong spirit, tingting daon, fasin blong tok tru, fraet gud long God, bilif, mo lav.

Jisas i talem se: “Olgeta we oli luksave se oli nidim ol samting long saed blong spirit, oli save haremgud.” (Matiu 5:3, NW) Fasin blong luksave ol nid blong yumi long saed blong spirit i mekem se yumi hanggri oltaem blong kakae ol samting long saed blong spirit olsem we taem yumi hanggri long saed blong bodi. Ol man oli bon wetem fasin ya blong wantem tumas kakae long saed blong spirit, from kakae ya nao i givim mining long laef. Tufala  samting oli save mekem se yumi no moa harem se yumi nidim ol samting long saed blong spirit, hemia ol wari blong wol blong Setan, no from we yumi les blong mekem stadi blong yumi wanwan. Taswe, Jisas i talem se: “Man i no save laef long kakae nomo. Evri tok we God i talem, hemia nao samting blong mekem man i laef.”—Matiu 4:4.

Long saed blong bodi yumi nidim blong kakae oltaem, mo skelem sam gudfala kakae we bambae i mekem bodi blong yumi i strong. Samting ya nao i mekem se bodi blong yumi i wantem tumas blong kakae bakegen. Hemia i tru tu long saed blong spirit. Maet yu no ting se yu yu wan man blong stadi, be sipos yu traem ridim tok blong God evri dei mo yu stadi long ol buk we oli stanap long Baebol oltaem, sloslou bambae yu faenem se yu wantem blong mekem olsem oltaem. I tru se, bambae yu wantem tumas we nekis taem blong Baebol stadi i kam kwik. Taswe i nogud blong les no lego kwiktaem, traehad blong wokem wan gudfala fasin blong laekem oltaem blong kakae ol samting long saed blong spirit.

Tingting Daon i Mekem Se Hat i Kam Sofsof

Tingting daon hem i wan impoten samting blong mekem hat i rere. Samting ya nao i mekem se i isi blong narafala i save tijim yumi, mo i mekem se yumi rere blong akseptem ol advaes mo fasin stretem we ol narafala oli givim wetem lav. Tingbaot gudfala eksampel blong King Josaea. Long taem blong rul blong hem oli faenem wan pepa we Loa we God i givim tru long Moses i stap long hem. Taem Josaea i harem ol tok blong Loa ya mo i luksave olsem wanem ol bubu blong hem oli go longwe long trufala wosip, hem i brekem klos blong hem mo i krae long fored blong Jeova. ?From wanem nao Tok blong God i rili tajem hat blong King ya? Stori ya i talem se hat blong hem i “sofsof,” mo hem i mekem tingting blong hem i stap daon taem hem i harem ol tok blong Jeova. Jeova i makem gud tingting daon we Josaea i gat, we hat blong hem i rere blong lesen long ol tok mo Jeova i blesem hem folem samting ya.—2 King 22:11, 18-20.

Tingting daon i mekem se ol disaepol blong Jisas we oli ‘no gat nem, mo oli no skul gud’ oli kasem save mo folem ol trutok long saed blong spirit, be i hadwok long olgeta we “oli waes, mo . . . oli skul gud” be “long fes blong ol man” nomo. (Ol Wok 4:13; Luk 10:21; 1 Korin 1:26) Olgeta ya oli no rere blong akseptem ol tok blong Jeova, from we fasin flas i mekem hat blong olgeta i kam strong. Yumi no sapraes se, Jeova i no laekem nating fasin flas.—Ol Proveb 8:13; Daniel 5:20.

Fasin Blong No Giaman Mo Fraet Gud Long God

Profet Jeremaea i talem se “?Hu man i save savegud [“hat,” NW] blong man? Oltaem nomo, [“hat,” NW] blong man i stap giaman long hem bakegen. I no gat narafala samting we i save giaman olsem, i nogud we i nogud olgeta.” (Jeremaea 17:9) Yumi soemaot fasin ya we hat i save giaman mo trikim yumi long ol defren rod, olsem taem yumi mekem ol eskius from rong we yumi mekem. Mo tu taem yumi mekem olsem se ol nogud slak fasin blong yumi, oli gud mo oli oraet nomo. Be, fasin blong no giaman, bambae i halpem yumi blong winim wan hat we i save trikim yumi. Hem i halpem yumi blong luksave ol fasin we yumi wan i gat blong bambae yumi save traehad blong mekem ol fasin ya oli kamgud moa. Man blong raetem Sam i soemaot fasin ya blong no giaman taem hem i prea se: “Plis yu lukluk long laef blong mi, blong faenemaot se mi mi wanem man, mo yu skelem [“hat,” NW] blong mi.” I klia nomo, se man blong raetem Sam i rerem hat blong hem blong akseptem we Jeova i klinim mo i traem hem. Maet samting ya i minim we hem i mas luksave ol fasin blong hem we oli no klin, blong hem i save wok long olgeta.—Ol Sam 17:3; 26:2.

Fasin blong fraetgud long God, we i joen wetem “no laekem ol fasin nogud,” i wan bigfala samting blong givhan long wok ya blong klinim hat blong yumi. (Ol Proveb 8:13) Nating se yumi luksave lav mo kaen gud fasin blong Jeova, wan man we hem i rili fraet gud long God i save gud tu se Jeova i gat paoa blong givim panis, mo ded tu long olgeta we oli no obei long hem. Jeova i soemaot se olgeta we oli fraetgud long hem bambae oli save obei long hem tu, taem hem i tokbaot ol man Isrel se: “Mi wantem tumas sipos oli wokem hat blong olgeta blong fraetgud long mi mo blong folem ol loa blong mi oltaem, blong mekem se evri samting i save ron gud long laef blong olgeta mo ol pikinini blong olgeta blong olwe!”—Dutronome 5:29, NW.

Taswe i klia se, mak blong fasin fraetgud i no blong mekem we yumi fraet bitim mak long Hemia we i gat olgeta paoa. Be fasin ya i pusum yumi blong obei long Papa blong yumi we i gat lav from we yumi save se hem i wantem tumas blong givhan long yumi. I tru se, fasin blong fraetgud long God olsem ya, i mekem se man i kam gud moa long ol fasin blong hem mo i mekem man i glad bigwan, olsem we Jisas Kraes i soemaot long laef blong hem.—Aesea 11:3; Luk 12:5.

 Wan Hat We i Reregud i Rij Long Bilif

Wan hat we i strong long bilif i save se wanem we Jeova i askem no i soemaot tru long Tok blong hem i blong givhan long yumi. (Aesea 48:17, 18) Wan man we i gat wan hat olsem, i save harem gud taem hem i mekem advaes ya long Ol Proveb 3:5,6, i wok long laef blong hem, we i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta [“hat,” NW] blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” Be wan hat we i no gat strong bilif, bambae i no moa wantem blong trastem Jeova. Samting ya i tru moa sipos hem i mas mekem sam sakrefaes blong mekem se i isi moa blong hem i save putum tingting blong hem fulwan long ol samting long saed blong Kingdom. (Matiu 6:33) I tru tumas se, Jeova i lukluk wan hat we i no gat bilif olsem se i “nogud.”—Hibrus 3:12.

Yumi soemaot bilif blong yumi long Jeova long plante defren rod, hemia long ol samting tu we yumi stap mekem long haos blong yumi. Tingbaot eksampel ya we i stap long Galesia 6:7: “Yufala i no mastik long samting ya. I no gat man i save giaman long God. Wanem sid we man i planem fastaem long garen blong hem, be frut blong hem nomo, man ya bambae i mas kakae.” Bambae yumi soemaot bilif blong yumi long saed blong rul ya, long ol samting olsem ol video we yumi stap lukluk, ol buk we yumi ridim, hamas Baebol stadi we yumi mekem, mo tu long ol prea blong yumi. Yes, wan strongfala bilif we i muvum yumi blong planem sid blong “tabu spirit” i wan impoten rod blong gat wan hat we i rere blong akseptem ol tok blong Jeova mo obei long hem.—Galesia 6:8.

Lav—Fasin We i Bigfala Moa

I tru se lav i mekem se graon blong hat blong yumi i rere blong akseptem ol tok blong Jeova i bitim ol narafala fasin. From samting ya taem Pol i skelem lav wetem bilif mo hop, hem i tokbaot lav olsem “nambawan long ol trifala fasin ya.” (1 Korin 13:13) Wan hat we i fulap long lav we i go long God i save harem gud bigwan blong obei long hem. Hat ya i no save harem nogud from ol samting we God i wantem yumi blong mekem. Aposol Jon i talem se: “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.” (1 Jon 5:3) Long ol rod we i sem mak, Jisas i talem se: “Man we i lavem mi, hem bambae i save obei long ol tok blong mi. Mo Papa blong mi bambae i lavem hem.” (Jon 14:23) Makem gud se sipos yumi gat lav long Jeova bambae hem tu i lavem yumi. Yes, Jeova i gat dip lav long olgeta we oli kam klosap long hem wetem lav.

Jeova i save se yumi no stretgud olgeta mo yumi sin agensem hem samtaem. Nating se i olsem, Jeova i no mekem se hem i stap longwe long yumi. Samting we Jeova i stap lukluk long olgeta we oli mekem wok blong hem se “wan hat we i fulwan,” we i muvum yumi blong wantem mekem wok blong hem wetem wan “laef we i glad.” (1 Kronikel 28:9, NW) I tru, Jeova i save se i tekem taem mo bigfala fasin traehad blong wokem ol gudfala fasin long hat blong yumi mo long rod ya blong wokem ol frut blong tabu spirit. (Galesia 5:22, 23) Taswe, hem i gat longfala tingting long yumi from “Hem i save gud we hem i mekem yumi long graon. Oltaem hem i stap tingbaot we yumi kamaot long ases nomo.” (Ol Sam 103:14) Long semfala fasin, Jisas i neva tok strong agensem ol disaepol blong hem from ol mastik blong olgeta be hem i gat longfala tingting blong halpem mo leftemap tingting blong olgeta. Lav, sore, mo longfala tingting blong Jeova mo Jisas i mas pusum yu blong laekem tufala moa.—Luk 7:47; 2 Pita 3:9.

Sipos yu faenem se samtaem i hadwok blong pulumaot sam slak fasin we oli olsem rabis gras, no blong brekem sam nogud fasin we oli olsem graon we i kam strong, yu no mas letem hat blong yu i trabol no tingting i foldaon. Be i gud blong gohed mo wok had blong kam moa gud mo “prea oltaem,” askem Jeova oltaem blong givim tabu spirit blong hem long yu. (Rom 12:12) Wetem help we hem bambae i givim long yu, bambae yu save win taem yu folem eksampel blong Esra blong gat wan hat we i rere “blong ridimgud loa blong Jeova mo blong mekem hem i wok.”

[Tok blong pija long pej 31]

Esra i gohed blong fasgud long God nating se hem i stap long Babilon

[Credit Line blong pija long pej 29]

Garo Nalbandian