Laef Stori

Wokem Wan Laef We i Isi Blong Mekem Wok Blong Jeova

CLARA GERBER MOYER I TALEM STORI YA

Mi mi gat 92 yia mo klosap mi no moa save wokbaot, be tingting blong mi i kliagud yet mo mi save rimemba gud ol samting. !Mi tangkiu tumas long jans we mi gat blong mekem wok blong Jeova stat long taem we mi pikinini yet! Samting we i givhan bigwan long mi blong kasem jans ya we i olsem wan bokis blong mane, hemia from we mi mekem laef blong mi i isi mo i no fasfas wetem plante samting.

MI BON long Ogis 18, 1907, long Alliance, Ohio, Yunaeted Stet. Mi fasbon blong faef pikinini. Taem mi gat eit yia, wan fultaem paenia blong ol Baebol studen, hemia nem blong ol Witnes blong Jeova long taem ya, i kam long baskel blong hem kasem mifala long plantesin blong buluk blong mifala. Hem i mitim mama blong mi, Laura Gerber, long haos, mo hem i askem sipos mama i save from wanem rabis fasin i stap long wol. Hemia wan kwestin we longtaem finis, Mama i wantem kasem ansa blong hem.

Mama i go toktok wetem Papa, we i stap long bigfala storum, nao hem i odarem ol sikis buk blong Studies in the Scriptures. Mama i ridim olgeta buk ya wantaem mo hem i sapraes tumas long ol trutok blong Baebol we hem i lanem. Hem i stadi gud long Buk namba 6, we nem blong hem The New Creation, mo hem i kasem save klia se wanwan man i mas folem Kristin fasin ya blong baptaes long wota. Hem i no save olsem wanem blong faenem ol Baebol Studen, taswe hem i askem Papa blong baptaesem hem long smol reva blong plantesin blong mifala, nating se hemia long koltaem blong Maj 1916.

I no longtaem afta long samting ya, Mama i luk wan toktok long niuspepa we i talemaot se bambae i gat wan tok we ol man blong pablik oli save kam lesin long hem long wan haos we oli kolem Daughters of Veterans Hall long taon blong Alliance. Nem blong tok ya “Bigfala Plan Blong God Long Ol Yia We Oli Pas.” Wantaem nomo Mama i rere blong go, from we Buk namba 1 long Studies in the Scriptures i karem sem nem olsem stamba tok ya. Ale, fulwan famle blong mifala i sidaon long kat we hos i pulum, blong go long faswan miting ya blong mifala.  Stat long taem ya mifala i go long olgeta miting we oli stap long haos blong ol brata long Sande mo Wenesde naet. Smoltaem biaen, Mama i baptaes bakegen, wan memba blong Kristin kongregesen nao i mekem baptaes blong hem. Papa, we oltaem hem i bisi long ol wok blong plantesin, i stat intres tu long stadi blong Baebol, mo hem i baptaes sam yia biaen.

Mitim Olgeta We Oli Lidim Wok

Long Jun 10, 1917, J. F. Rutherford, we i presiden blong Watch Tower Society long taem ya, i kam long taon blong Alliance blong givim tok ya “?From Wanem Ol Kantri Oli Faet?” Mi gat naen yia mo mi folem papa mama blong mi long taem ya, wetem tufala smol brata blong mi, Willie mo Charles. I gat plante man oli kam, we namba blong olgeta i bitim wan handred. Afta we Brata Rutherford i givim tok blong hem finis, bighaf blong olgeta we oli kam long taem ya, oli tekem foto afsaed long Columbia Theater, haos ya we brata i mekem tok blong hem long hem. Long wik we i kam biaen, long semfala haos ya, A. H. Macmillan i givim wan tok we i tokbaot “Kingdom Blong God i Stap Kam.” I wan blesing long mifala blong gat ol brata ya oli visitim smol taon blong mifala.

Ol Bigfala Asembli We Mi No Save Fogetem

Faswan asembli we mi joen long hem, hem i long 1918 long Atwater, Ohio, sam kilometa nomo longwe long Alliance. Mama i askem wan brata we i wok blong Sosaeti, sipos mi mi bigwan naf blong tekem baptaes. Mi tingting se mi bin mekem wan strongfala promes long God blong mekem wok blong hem, taswe mi kasem raet blong tekem baptaes long dei ya long wan smol reva klosap long wan plantesin blong ol apol tri. Mi jenisim klos blong mi long wan haos tapolen we ol brata oli putumap blong olgeta we bambae oli tekem baptaes, ale mi tekem baptaes wetem wan olfala, hevi dres we ol woman oli stap werem blong slip.

Long Septemba 1919, mi mo papa mama blong mi, mifala i pas long tren blong go long Sandusky, Ohio, long Lek Erie. Long ples ya mifala i go long wan bot, mo smoltaem biaen, mifala i kamtru long Cedar Point, ples we wan bigfala asembli bambae i stap long hem. Mifala i no save fogetem asembli ya. Taem mifala i kamdaon long bot ya, i gat wan smol stoa we oli stap salem kakae long hem. Mi tekem wan hambega long ples ya, long taem ya, hemia i rili wan spesel kakae long mi from we i no oltaem we mi gat jans olsem. !Tes blong hem i gud tumas! Namba blong ol man we oli kam long asembli ya blong eit dei, i kasem 7,000 man. I no gat maekrofon long taem ya, taswe mi mas lesin gud.

Long asembli ya oli talemaot se wan niufala magasin i kamaot, we bambae i folem Wajtaoa, nem blong hem The Golden Age (naoia Wekap!). Blong kam long asembli ya, mi mestem faswan wik blong skul, be i no blong nating. Cedar Point i olsem wan hotel, mo i gat ol kuk long wan restoron we oli stap rerem kakae blong olgeta man we oli kam long asembli ya. Be, from sam risen, ol kuk mo man we oli wok long restoron ya oli straek, ale, ol Kristin brata we oli gat save long wok blong rerem kakae, oli tekem ples blong olgeta ya, mo oli wok kwiktaem blong kukum kakae blong olgeta we oli kam long asembli ya. Blong plante yia biaen, ol man blong Jeova oli kukum prapa kakae blong olgeta long taem blong ol asembli.

Long Septemba 1922, mifala i gat jans bakegen blong go long wan narafala asembli blong naen dei long Cedar Point, mo i gat bitim 18,000 man oli kam long taem ya. Hem i long asembli ya nao, we Brata Rutherford i leftemap tingting blong yumi blong “talemaot, talemaot, talemaot, King mo kingdom blong hem.” Sam yia bifo, mi bin statem wok blong prij taem mi seremaot ol traket wetem magasin ya The Golden Age.

Fasin Tangkiu From Wok Blong Prij

Long stat blong 1918, mi joen long wok blong seremaot traket ya The Fall of Babylon long ol plantesin klosap long mifala. From we ples i kolkol, mifala i stap hotem wan ston long stof blong mifala long haos, mo tekem ston ya i go wetem mifala long kat blong mifala, nao mifala i save kipim ol leg blong mifala oli wom wetem ston ya. Mifala i werem ol bigbigfala kot mo ol hat, from we kat blong mifala i gat wan ruf wetem kaliko nomo i hang long tufala saed blong hem, be i no gat wan samting long kat ya we i save mekem ples i wom gud insaed. Be hemia ol taem we mifala i hapi tumas.

Long 1920 wan spesel namba blong buk ya The Finished Mystery, we oli kolem ZG, i kamaot olsem magasin. * Mi mo papa mama blong mi, mifala i go long Alliance wetem buk ya. Long taem ya, evriwan i go hem wan long ol doa, taswe mi fraet lelebet taem mi kam antap long wan vranda we plante man lelebet oli stap sidaon long hem. Afta we mi givim fastok blong mi, wan long ol woman we oli stap i talem se: “Yufala i harem, smol gel ya i save  givim naesfala smol toktok,” ale, hem i tekem wan buk. Long dei ya mi seremaot 13 ZG, hemia fastaem we mi givim longfala toktok long ol haos wanwan.

Taem mi stap long fom tri, Mama i kasem sik blong lang mo hem i stap ledaon nomo long bed i bitim wan manis. Smol sista blong mi, Hazel, i wan bebi yet, taswe mi finis long skul blong go givhan long ol wok long plantesin blong mifala mo blong lukaot long ol smol brata sista blong mi. Nating se i olsem, famle blong mi i tinghae long ol trutok blong Baebol, mo mifala i go oltaem long ol miting blong kongregesen.

Long 1928 long Memoriol blong tingbaot ded blong Kraes, wan traket we nem blong hem “?Wehem Ol Narafala Naen?” i goaot long olgeta man we oli stap long miting ya. Traket ya i tokbaot Luk 17:11-19. Long ples ya Baebol i talem se long ol ten man ya we oli gat leprosi, wan nomo i kambak blong talem tangkiu long Jisas from merikel we hem i mekem long olgeta. Toktok ya i kasem hat blong mi. Mi askem long mi wan se, ‘?Mi mi rili gat fasin tangkiu?’

From we ol samting long famle blong mifala i kam gud moa, mi no gat problem long helt mo i no gat wan samting i holembak mi, mi mekem disisen blong aot long haos mo joen long wok blong paenia, hemia nem blong olgeta we oli mekem wok blong prij fultaem. Papa mama blong mi, tufala i leftemap tingting blong mi blong mekem olsem. Ale, ol brata oli sanem mi mo paenia fren blong mi, Agnes Aleta, mitufala i go long ples we bambae mitufala i wok long hem. Long Ogis 28, 1928, mitufala i tekem tren long 9 klok long naet. Mitufala i gat tu bokis nomo wetem ol klos blong mitufala, mo wanwan basket blong putum ol buk blong mitufala. Long stesen blong tren, ol sista blong mi wetem papa mama blong mi oli stap krae, mo mitufala tu i krae. Mi tingting se maet bambae mi neva save luk olgeta bakegen, from we long taem ya mifala i bilif se Amageden i klosap. Long nekis moning, mitufala i kamtru long Brooksville, Kentucky, ples ya nao we bambae mitufala i stap long hem.

Mitufala i rentem wan smol rum long wan haos we i gat plante rum long hem, mo mitufala i pem ol tin blong makaroni we mifala i stap mekem sanwis long hem. Evri dei mitufala i seraot i go long tu defren ples. Mitufala i wok wanwan mo seremaot faef buk blong 1.98 dola long olgeta man we mifala i mitim long ol haos. Sloslou mitufala i kavremap taon ya, mitufala i faenem plante man we oli intres long Baebol.

Long samwe tri manis nomo, mitufala i finisim olgeta haos insaed mo raonabaot long Brooksville mo Augusta tu. Ale, mitufala i muf i go long ol narafala taon ya, Maysville, Paris mo Richmond. Long ol nekis trifala yia, mitufala i kavremap plante ples long Kentucky we oli no gat kongregesen long hem yet. Plante taem ol fren mo famle we oli stap long Ohio, oli stap kam visitim mitufala blong joen wetem mitufala long wok blong prij. Samfala oli kam blong wan wik nomo mo samfala oli stap longtaem moa.

Sam Narafala Asembli We Mi No Save Fogetem

Mi no save fogetem asembli we i stap long Columbus, Ohio, long Julae 24-30, 1931. Hem i long taem ya we mifala i harem se bambae yumi tekem niufala nem ya we i kamaot long Baebol, se, ol Witnes blong Jeova. (Aesea 43:12) Bifo long taem ya, taem ol man oli askem mifala se mifala i blong wanem skul, mifala i ansa se, “Intenasnal Baebol Studen.” Be nem ya i no rili makemaot mifala se mifala i defren long ol narafala skul, from we i gat sam narafala grup blong skul we olgeta tu oli kolem olgeta se Baebol Studen.

Long taem ya, fren blong mi, Agnes, i mared finis, mo mi stap mi wan. Taswe, mi glad tumas taem oli talemaot se olgeta we oli nidim wan fren blong paenia wetem, oli kam long wan ples blong miting afta long asembli ya. Long ples ya mi mitim Bertha mo Elsie Garty mo Bessie Ensminger. Oli gat tu trak mo oli wantem faenem wan narafala paenia sista blong wok wetem olgeta. Mifala i aot long asembli ya tugeta, nating se mifala i neva save mifala bifo.

Long hot taem mifala i wok long olgeta ples blong Pennsylvania. Ale, taem koltaem i kam, mifala i askem blong go long saot blong North Carolina, Virginia, mo Maryland, long ples ya we i no kolkol tumas. Taem koltaem i pas, mifala i gobak long not. Hemia i olsem wan kastom blong evri paenia long taem ya. Long 1934, John Booth mo Rudolph Abbuhl, we tufala i stap folem kastom ya tu, tufala i tekem Ralph Moyer mo smol brata blong hem Willard, tufala i kam long Hazard, Kentucky.

Mi mitim Ralph long plante defren taem, mo mitufala i stat savegud mitufala moa long taem blong wan bigfala asembli long Washington, D.C., we i stap long manis Mei 30–Jun 3, 1935. Mi mo Ralph mitufala i sidaon wanples taem tok ya i kamaot long saed blong ‘bigfala hip blong ol man,’ no ‘bigfala kampani.’ (Revelesen 7:9-14) Kam kasem taem ya mifala i bilif se olgeta we oli haf blong bigfala kampani oli ol man we bambae oli go long heven, be oli no gat bilif we i strong olsem ol 144,000 man.  (Revelesen 14:1-3) !Taswe, mi mi no wantem stap olsem wan memba blong bigfala hip ya!

Taem Brata Rutherford i eksplenem se olgeta we oli blong bigfala hip ya oli man we oli pastru long Amageden blong laef long wol ya, plante man oli sapraes. Nao hem i singaot olgeta we oli blong bigfala hip ya blong oli stanap. Mi mi no bin stanap long taem ya, be Ralph hem i stanap. Biaen, save long saed ya i kam klia moa long mi, ale, 1935 hem i laswan yia we mi kakae bred mo dring waen long Memoriol blong tingbaot ded blong Kraes. Be, Mama hem i gohed blong tekpat long Memoriol gogo kasem taem we hem i ded long Novemba 1957.

Wan Fren Blong Oltaem

Mi mo Ralph mitufala i gohed blong raetem leta long mitufala. Mi stap paenia long eria blong Lake Placid, long New York, mo hem i stap long Pennsylvania. Long 1936 hem i wokem wan smol kat we hem i save pulum wetem trak blong hem. Hem i muvum smol kat ya i aot long Pottstown, long Pennsylvania, i go kasem Newark, long New Jersey, blong stap long asembli we i stap long taon ya long Oktoba 16-18. Long sapa, afta long program blong asembli, sam long mifala ol paenia i go luk niufala kat blong Ralph. Mi stap stanap wetem hem insaed long kat ya klosap long sink taem hem i askem se, “?Yu laekem kat ya?”

Taem mi mekem yes wetem hed blong mi, hem i askem se, “?Yu yu wantem laef insaed long smol kat ya?”

Mi ansa se, “Yes.” Nao hem i givim wan smol kis long mi we neva bambae mi fogetem. Sam dei biaen, mitufala i kasem ol pepa blong mared. Long Oktoba 19, wan dei afta long asembli ya, mitufala i go long Brooklyn mo visitim olgeta mesin blong prentem buk blong Watch Tower Society. Ale, mitufala i askem sipos Sosaeti i save givim wan teritori long mitufala blong wok long hem. Grant Suiter nao i lukaot long ol teritori, mo hem i askem hu bambae i wok long teritori ya. Ralph i talem se: “Mitufala i save wok long hem sipos mitufala i mared.”

Brata Suiter i talem se: “Sipos yu kambak long 5 klok long aftenun, maet bambae mifala i save mekem plan blong samting ya.” Taswe, long naet ya mitufala i mared long haos blong wan Witnes long wan eria jes afsaed long Brooklyn. Mitufala i kakae long wan restoron wetem sam fren, ale mitufala i tekem pablik transpot i go kasem kat blong Ralph we i stap long Newark, New Jersey.

Smoltaem biaen, mitufala i folem rod blong go kasem Heathsville, long Virginia, faswan ples we bambae mitufala i paenia long hem tugeta. Mitufala i wokem ol eria blong Northumberland County mo biaen, mitufala i muf i go long Fulton mo Franklin long Pennsylvania. Long 1939, Sosaeti i askem Ralph blong mekem wok blong visitim plante kongregesen. Mitufala i visitim olgeta kongregesen we oli stap long eria blong Tennessee. Wan yia biaen, boe blong mitufala, Allen, i bon, mo long 1941 mitufala i stop long wok blong visitim ol kongregesen. Ale, Sosaeti i sanem mitufala i go long taon blong Marion, Virginia, blong wok olsem spesel paenia. Long taem ya, wan spesel paenia i mas mekem 200 aoa evri manis long wok blong prij.

Mekem Sam Jenis

Long 1943, mi skelem se i stret blong lego wok blong spesel paenia. Laef long wan smol kat, lukaot long pikinini, kukum kakae, wasem klos, mo  spenem 60 aoa long wok blong prij evri manis, hemia samting we mi naf moa blong mekem. Be Ralph i gohed wetem wok blong spesel paenia.

Long 1945, mifala i muf i gobak long Alliance, Ohio, mifala i salem kat ya we mifala i laef long hem blong naen yia finis, mo mifala i muf i go long haos we papa mama blong mi oli stap long hem long plantesin. Hem i long ples ya nao, long vranda blong haos, we gel blong mitufala, Rebekah, i bon long hem. Ralph i faenem wan haftaem wok long taon mo i gohed long wok blong fultaem paenia. Mi mekem smol wok long plantesin mo mi traem evri rod blong halpem Ralph blong gohed long wok blong paenia. Nating se famle blong mi i rere blong givim wan pis graon mo haos long mitufala fri nomo, Ralph i no wantem akseptem samting ya. Hem i wantem se mifala i stap fri we i no gat wan samting i holembak mifala blong gohed fulwan long ol wok blong Kingdom.

Long 1950 mifala i muf bakegen i go long Pottstown, Pennsylvania, mo mifala i rentem wan haos blong 25 dola evri manis. Long olgeta 30 yia we oli kam biaen, praes blong rentem haos ya i go antap kasem 75 dola nomo. Mifala i rili luksave se Jeova i stap halpem mifala blong gat wan laef we i isi. (Matiu 6:31-33) Tri dei long wan wik, Ralph i mekem wok blong katem hea mo mustas blong ol man. Evri wik mitufala i stadi Baebol wetem tufala pikinini blong mitufala, mifala i go long ol miting blong kongregesen, mo mifala i joen long wok blong talemaot gud nius blong Kingdom, tugeta olsem wan famle. Ralph i mekem wok blong presiden elda long kongregesen ya we mifala i joen long hem. Taem mifala i traem gat wan laef we i isi, mifala i naf blong mekem plante samting long wok blong Jeova.

Gudfala Fren Blong Mi i Ded

Long Mei 17, 1981, mifala i stap sidaon long Haos Kingdom, mifala i stap lesin long wan tok. Ralph i harem se hem i sik lelebet, ale, hem i wokbaot i go long baksaed blong Haos Kingdom, mo i talem long wan long ol brata blong lukaot, se bambae i karem wan smol mesej i kam long mi blong talem se hem i gobak long haos. Hemia i no fasin blong Ralph, taswe mi askem wan fren blong tekem mi mi gobak long haos kwiktaem. Long wan aoa nomo biaen, Ralph i ded from wan strok we i bigwan tumas. Long semfala moning ya, afta long stadi blong Wajtaoa, ol brata oli talemaot long kongregesen se Ralph i ded.

Long manis ya, Ralph i bin spenem bitim 50 aoa finis long wok blong prij. Olgeta taem we hem i spenem long fultaem wok blong paenia i bitim 46 yia. Hem i mekem Baebol stadi long bitim wan handred man we biaen oli tekem baptaes blong kam ol Witnes blong Jeova. Ol blesing we mifala i kasem long saed blong spirit oli gud tumas. From samting ya, mifala i no sore nating long ol samting we maet mifala i bin lego long olgeta yia we oli pas.

Mi Tangkiu Tumas From Ol Blesing We Mi Kasem

Long ol 18 yia we oli pas, mi laef mi wan, go long miting, prij long ol narafala olsem we mi naf blong mekem, mo stadi long Tok blong God. Naoia mi laef long wan haos blong ol olfala we oli ritaea finis. Mi no gat plante samting blong flasem rum blong mi, mo mi no wantem gat wan televisin. Be mi harem se laef blong mi i fulwan mo i rij long saed blong spirit. Papa mama blong mi mo tufala brata blong mi, oli holem strong long bilif go kasem taem we oli ded. Tufala sista blong mi oli gohed blong wokbaot long rod blong trutok.

Mi glad from we boe blong mi, Allen, i stap olsem wan Kristin elda. Blong plante yia hem i mekem wok blong putumap ol saon sistem long ol Haos Kingdom mo ol Haos Asembli, mo hem i wok long ol ples blong mekem saon long taem blong ol asembli tu. Waef blong hem i wan woman we i wok strong long ol wok blong God, mo tufala boe blong tufala oli mekem wok blong elda tu. Gel blong mi, Rebekah Karres, i spenem bitim 35 yia long fultaem wok blong prij, mo fo long olgeta yia ya hem i bin stap wok long hedkwota blong ol Witnes blong Jeova long Brooklyn. Long ol 25 yia we oli jes pas, hem mo hasban blong hem, tufala i joen long wok blong visitim ol kongregesen long plante ples blong Yunaeted Stet.

Jisas i talem se Kingdom i olsem wan bokis blong mane we i haed mo we man i save faenem. (Matiu 13:44) Mi mi tangkiu tumas we famle blong mi i faenem bokis mane ya plante yia bifo. Hemia i rili wan blesing blong mi, taem mi save luklukbak long bitim 80 yia we mi bin givim ful laef blong mi blong mekem wok blong God—!mo mi no sore nating! Sipos mi gat jans blong statem laef blong mi bakegen, mi wantem folem semfala fasin ya blong laef, from we, yes i tru tumas, ‘God i lavem mi, mo fasin ya, mi mi wantem moa, i winim we mi wantem stap laef.’—Ol Sam 63:3.

[Futnot]

[Tok blong pija long pej 23]

Mifala i harem tok blong Brata Rutherford long 1917 long Alliance, Ohio

[Tok blong pija long pej 23]

Wetem Ralph long fored blong kat ya we hem nomo i bildim

[Tok blong pija long pej 24]

Wetem tufala pikinini blong mi tede