Wan Kwestin

Long Rom 12:19 (NW), aposol Pol i talem: “Sipos wan man i mekem i no stret long yufala, bambae yufala i no traem givimbak long hem.” ?Samting ya i minim se ol Kristin oli no mas kam kros?

Blong talem stret, ansa hem i no. Long vas ya, aposol Pol i stap tokbaot kros blong God. Be i tru, samting ya i no minim se i oraet nomo sipos wan Kristin i letem kros i winim hem. No gat. Baebol i givim klia woning long yumi blong agensem fasin kros. Tingbaot sam long ol advaes ya we God i givim.

“I nogud yu kros, i nogud yu faerap, i nogud yu wari. Ol samting ya i rod blong kasem trabol nomo.” (Ol Sam 37:8) “Man we i kros long brata blong hem, i stret blong hem i pas long kot.” (Matiu 5:22) “Fasin blong ol man we oli stap mekem ol rabis samting we tingting blong olgeta i wantem, hem i klia. Olgeta oli stap mekem nogud wetem woman, mo oli stap mekem ol samting blong sem, mo oli stap mekem ol samting we oli nogud olgeta. Olgeta oli stap mekem prea long ol narafala god, mo oli stap mekem ol bisnes blong posen mo kleva. Oli kam enemi, nao oli stap faet, mo oli stap jalus, mo oli stap kros.” (Galesia 5:19, 20) “Yufala i mas lego olgeta fasin blong kros. Yufala i no mas holem kros, mo yufala i no mas kros kwik. Mo taem yufala i kros, yufala i no mas sakem tok blong yufala i go antap, mo yufala i no mas tok nogud long yufala.” (Efesas 4:31) “Yufala evriwan i mas rere oltaem blong lesin, be yufala i no mas hareap blong toktok. Mo yufala i no mas hareap blong kros.” (Jemes 1:19) Antap long samting ya, buk blong Ol Proveb i givim advaes long yumi bakegen mo bakegen, se yumi mas agensem fasin blong kros no fasin blong stap kros kwik from eni smosmol mastik no rong we narafala i mekem.—Ol Proveb 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.

Ol vas raonabaot long Rom 12:19 oli laenap gud wetem advaes ya. Pol i talem se yumi no mas gat tu fes taem yumi soemaot lav long narafala. Hem i talem se yumi mas blesem olgeta we oli stap spolem yumi, traem gat gudfala tingting oltaem long saed blong narafala, no givimbak long man we i mekem nogud long yumi, mo traehad blong stap long pis wetem olgeta man. Nao hem i talem se: “Sipos wan man i mekem i no stret long yufala, bambae yufala i no traem givimbak long hem. Be yufala i mas givim ples long kros, from we Baebol i talem se: ‘Jeova i talem se, Mi nomo mi gat raet blong givim panis. Mi bambae mi givimbak.’”—Rom 12:9, 14, 16-19, NW.

Yes, yumi no mas letem kros i pulum yumi blong givimbak long man we i mekem nogud long yumi. Save we yumi gat long saed blong samting we oli hapen mo tingting we yumi gat long saed blong wanem we i gud mo wanem we i nogud, oli no stret gud olgeta. Sipos yumi letem kros i pulum yumi blong givimbak, bambae yumi mekem i rong plante taem. Fasin ya bambae i kasem mak ya we Enemi blong God, Devel Setan, i wantem yumi blong kasem. Pol i raetem tu se: “Sipos yufala i kros, yufala i no letem we kros ya i lidim yufala, blong yufala i mekem sin. Mo yufala i no stap kros, gogo kasem san i godaon. Yufala i mas no givim janis long Setan.”—Efesas 4:26, 27.

Rod we i moagud, mo we i moa waes, hemia blong letem God i makem stret taem blong givimbak mo hu man we i stret blong givimbak long hem. God i save mekem samting ya from we hem i save evri samting we i hapen, mo eni panis we hem i givim bambae i laenap wetem fasin blong hem we i stretgud olgeta. Yumi save luk se hemia nao mining blong tok blong Pol long Rom 12:19 taem yumi makem se hem i yusum Dutronome 32:35, 41, we i ademap tok ya: “Bambae mi givimbak ol fasin ya we ol enemi ya oli mekem long yufala. Bambae mi givim panis long olgeta.” (Skelem wetem Hibrus 10:30.) Taswe, nating se ol tok “blong God” oli no stap oltaem long Grik hanraet, plante man blong tanem Baebol long taem blong yumi oli putum ol tok ya long Rom 12:19. From samting ya yumi save ridim ol tok olsem “letem God i givimbak” (The Contemporary English Version); “givim ples long kros blong God” (American Standard Version); “letem God i givim panis sipos hem i wantem” (The New Testament in Modern English); “lego ples i stap blong God i givimbak long hemia we i spolem yu.”—The New English Bible.

Nating se ol enemi blong trutok oli tok agensem yumi no oli givim kil long yumi, yumi save soemaot tras long toktok ya we Moses i harem long saed blong fasin blong Jeova God se: “Jeova, Jeova, God we i gat sore mo gladhat, hem i slou blong kam kros, mo hem i fulap long kaen fasin mo trutok. Hem i stap holem kaen gud fasin long plante taosen man, mo i stap fogivim olgeta from ol mastik, ol rong, mo ol sin blong olgeta. Be taem man i mas kasem panis, bambae hem i no blokem panis ya nating.”—Eksodas 34:6, 7.