Ripot Long Wok Blong Kingdom

“Yu Yu Gat Plante Save Long Saed Blong Baebol”

TAEM Jisas i gat 12 yia nomo, hem i no fraet blong storeyan wetem ol lida blong skul long Jerusalem, mo ‘olgeta evriwan we oli harem hem oli sapraes tumas long save blong hem, mo long ol ansa blong hem.’ (Luk 2:47) I sem mak tede, plante yangfala we oli mekem wok blong Jeova, oli no fraet blong storeyan wetem ol tija mo ol fren blong olgeta long saed blong God mo Baebol, mo plante taem olgeta tu oli glad bigwan from gudfala frut we oli kasem.

Tiffany, we hem i gat 14 yia, i stap long wan klas we oli bin tokbaot profet tok blong Daniel 9:24-26, long saed blong ol 70 wik blong ol yia. Tija ya i no tekem plante taem blong eksplenem profet tok ya, hem i toktok smol nomo long saed blong sam poen insaed long ol vas ya.

Fastaem, Tiffany i fraet blong putum han blong hem i go antap. Hem i talem se: “Be, wan samting i mekem se mi harem nogud from tija i no eksplenem gud ol vas ya. Mi sek we wantaem nomo, mi putum han blong mi i go antap.” Tija i sapraes blong luk se wan studen long klas i wantem tokbaot profet tok ya, from we bighaf blong ol studen ya oli bin faenem se profet tok ya i strong tumas blong kasem save long hem.

Nao Tiffany i gat jans blong eksplenem profet tok ya, hem i girap long fored blong klas mo i toktok, nating se hem i no gat ol buk no not blong givhan long hem. Taem hem i finis, i no gat wan noes nating long klasrum. Tiffany i seksek smol. Be wantaem nomo, olgeta long klas blong hem oli klapem han blong olgeta bigwan.

Tija i talem bakegen mo bakegen se: “Mi mi sapraes tumas, Tiffany, mi rili sapraes tumas.” Hem i talem se, hem i save se i mas gat moa samting blong talem long saed blong ol vas ya, be Tiffany i faswan blong eksplenem ol vas ya long hem long wan fasin we i klia gud. Taem lesen i finis, hem i askem long Tiffany olsem wanem hem i savegud Baebol.

Tiffany i ansa se: “Hemia from we mi mi wan Witnes blong Jeova. Papa mama blong mi tufala i bin eksplenem profet tok ya plante taem long mi blong mi kasem save long hem.”

Ol fren blong hem long klas tu oli sapraes long save we hem i gat long saed blong Baebol. Wan studen i talem long Tiffany se: “Naoia mi save from wanem yufala ol Witnes blong Jeova yufala i stap prij long ol haos wanwan; hemia from we yufala i gat plante save long saed blong Baebol.” Ol narafala studen oli promes se neva bambae oli jikim hem bakegen from bilif blong hem.

Taem Tiffany i talem stori ya long papa mama blong hem, tufala i pulum hem blong soem buk ya Save Blong Lidim Yu Long Laef We i No Save Finis long tija blong hem. Taem hem i mekem samting ya mo tija i luk haf ya long saed blong profet tok blong Daniel, hem i glad tumas blong karem buk ya.

Tru ya, taem ol yangfala Kristin, oli no fraet blong tokbaot wanem we papa mama i tijim olgeta long saed blong God mo Baebol, oli save presem mo givim ona long Jeova mo tu oli save kasem blesing from.—Matiu 21:15, 16.