‘Sevem Yu Wan Mo Hemia We i Lesin Long Yu’
‘Sevem Yu Wan Mo Hemia We i Lesin Long Yu’
“Lukaot gud long fasin blong yu, mo long ol tok we yu stap tijim ol man long hem. . . . Sipos yu mekem olsem bambae yu save sevem yu, wetem ol man we oli stap lesin long yu.”—1 TIMOTI 4:16.
1, 2. ?Wanem i pusum ol trufala Kristin blong gohed long wok ya blong sevem laef blong man?
LONG wan smol vilej farawe long not saed blong Taelan, wan man wetem woman blong hem we tufala i Witnes blong Jeova, tufala i traem niufala lanwis ya we tufala i lanem, blong storian wetem ol man long ples ya. I no longtaem i pas, tufala ya i bin lanem lanwis ya Lahu, from we tufala i wantem serem gud nius blong Kingdom blong God wetem ol man long vilej ya.
2 Hasban i talem se: “Mi no save olsem wanem blong eksplenem glad mo filing we mifala i gat taem mifala i givhan long ol man ya we oli soem intres. Mifala i rili harem se mifala i joen long wok ya we Revelesen 14:6, 7 i tokbaot, blong talemaot gud nius long ‘olgeta man blong evri kantri, mo laen, mo lanwis.’ I no gat plante ples i stap we gud nius i no go kasem olgeta yet, mo ating ples ya we mitufala i stap long hem, i wan long ol niufala ples ya. Mifala i gat fulap Baebol stadi tumas, we klosap mifala i no naf blong mekem evriwan.” I klia se, man ya wetem woman blong hem, we tufala i misinari, tufala i no wantem sevem tufala nomo, be tufala i wantem sevem ol narafala man ya tu we oli lesin long tufala. Sipos yumi Kristin, ?yu no ting se yumi evriwan i mas gat tingting ya tu?
“Lukaot Gud Long Fasin Blong Yu”
3. ?Blong sevem ol narafala, wanem samting we yumi mas mekem fastaem?
3 Advaes ya we Pol i givim long Timoti se, “Lukaot gud long fasin blong yu, mo long ol tok we yu stap tijim ol man long hem,” i stret long evri Kristin. (1 Timoti 4:16) Tru ya, blong halpem ol narafala blong kasem sef, fastaem, yumi mas lukaot gud long fasin blong yumi wan. ?Olsem wanem yumi save mekem samting ya? Fastaem, i impoten tumas blong yumi stap wekap mo luksave taem ya we yumi stap long hem naoia. Jisas i givim sam saen we bambae i givhan long ol man blong hem blong save wetaem nao “wol ya i finis.” Be nating se i gat ol saen ya, Jisas i talem se bambae yumi no save yet, stret taem ya we en bambae i kam. (Matiu 24:3, 36) From we yumi no gat save long saed ya, ?yumi mas mekem wanem?
4. (a) ?Yumi mas gat wanem tingting naoia we smol taem nomo i stap bifo we wol ya i lus? (b) ?Wanem tingting we yumi mas lukaot se i no kasem yumi?
4 Wanwan long yumi maet i askem se, ‘?Mi mi stap yusum enitaem we mi gat long smol taem we i stap bifo we wol ya i lus, blong sevem mi wan mo olgeta we oli lesin long mi? ?No mi stap tingting se, “From we yumi no save stret taem we en bambae i kam, i no nid blong wari long saed ya”?’ Laswan kwestin ya hem i wan tingting we i denja. Tingting ya i go agensem advaes ya blong Jisas se: “Oltaem yufala i mas rere, from we mi, mi Pikinini blong Man, bambae mi kamtru long taem we yufala i no tingbaot.” (Matiu 24:44) I klia se, naoia i no taem blong lusum glad we yumi gat long wok blong Jeova, mo i no taem tu blong lukluk i go long wol olsem sefples blong yumi no blong harem gud long laef.—Luk 21:34-36.
5. ?Wanem eksampel we ol witnes blong Jeova bifo Kristin taem oli soemaot?
5 Wan narafala rod we yumi save soemaot se yumi stap lukaot gud long fasin blong yumi, hemia taem yumi stanap strong longtaem olsem ol Kristin we oli holem bilif. Ol man blong God long taem bifo oli stanap strong longtaem, nating sipos oli stap klosap nomo long taem we bambae oli sef no nogat. Pol i tokbaot eksampel blong ol witnes we oli laef bifo long taem blong ol Kristin, olsem Ebel, Inok, Noa, Ebraham, mo Sera. Ale, hem i makem poen ya se: “Olgeta man ya oli stap bilif strong long God, be taem oli ded, oli no kasem ol samting ya yet we God i promes finis blong givim long olgeta. Olgeta oli stap luk ol samting ya olsem we ol samting ya oli stap longwe yet long olgeta, be oli glad tumas blong luk. Nao olgeta oli stap talemaot we oli stap long wol ya, be i olsem we oli strenja nomo, wol ya i no prapa ples blong olgeta.” Oli no letem wan samting i pulum olgeta blong traem kasem wan laef we i gud, mo oli no letem ol rabis fasin raonabaot long olgeta i winim olgeta, be oli stap wet nomo blong luk taem ya we ‘ol samting ya we God i promes blong givim long olgeta,’ bambae oli kamtru.—Hibrus 11:13; 12:1.
6. ?Olsem wanem tingting ya blong kasem sef i gat paoa long fasin blong laef blong ol Kristin long faswan handred yia?
6 Ol Kristin blong faswan handred yia, olgeta tu oli tingbaot wol ya olsem wan ples we oli “strenja” nomo long hem. (1 Pita 2:11) Ol trufala Kristin we oli kasem sef long taem we Jerusalem i lus long 70 K.T., oli no stop blong prij mo oli no gobak folem fasin blong laef long wol. Oli save se olgeta we oli gohed blong holem bilif bambae oli save kasem sef long fasin we i bigwan moa. Yes, plante yia biaen, hemia long yia 98 K.T., aposol Jon i raetem se: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.”—1 Jon 2:17, 28.
7. ?Olsem wanem ol Witnes blong Jeova long taem blong yumi oli soemaot se oli stanap strong longtaem?
7 Tede tu, ol Witnes blong Jeova oli gohed strong long ol Kristin wok, nating se oli bin fesem plante bigfala hadtaem. ?Fasin blong olgeta blong stanap strong longtaem, i blong nating nomo? No gat, from we Jisas i mekem tingting blong yumi i sua fulwan se: “Man we i stanap strong gogo kasem en, bambae God i sevem hem,” nating sipos hemia long en blong rabis wol ya no long en blong laef blong yumi naoia. Taem we ol dedman oli laef bakegen, Jeova bambae i rimemba ol gudfala man blong hem we oli ded finis, mo bambae hem i givim pei long olgeta.—Matiu 24:13, NW; Hibrus 6:10.
8. ?Olsem wanem yumi save soemaot se yumi gat tangkiu from fasin blong ol Kristin bifo, we oli stanap strong longtaem?
8 Mo tu, yumi glad tumas from we ol Kristin we oli holem bilif long taem bifo oli no tingbaot nomo blong sevem laef blong olgeta. Yumi ya we yumi lanem moa long saed blong Kingdom blong God tru long olgeta ya, yumi glad se oli stanap strong blong folem oda ya blong Jisas se: “Yufala i mas go long ol man long olgeta ples long wol, blong pulum olgeta oli kam man blong mi. . . . Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:19, 20) Long olgeta taem we yumi gat jans yet, yumi mas gohed blong soemaot fasin tangkiu taem yumi prij long ol man we oli no harem gud nius. Be, wok blong prij hemia faswan haf nomo long wok ya blong mekem disaepol.
‘Lukaot Gud Long Ol Tok We Yu Stap Tijim’
9. ?Olsem wanem wan gudfala tingting i save halpem yumi blong statem ol Baebol stadi?
9 Wok blong yumi i no blong prij nomo be hem i blong tijim man tu. Jisas i givim oda long yumi blong tijim ol man blong folem olgeta tok ya we hem i givim finis long yumi. I tru, long sam teritori, i no gat plante man we oli wantem lanem moa long saed blong Jeova. Be sipos yumi gat nogud tingting long saed blong teritori blong yumi, samting ya i save blokem yumi blong traehad moa blong statem ol Baebol stadi. Yvette i wan paenia sista we i wok long wan teritori we samfala oli talem se i no save karem gudfala frut. Be, hem i luksave se sam narafala we oli kam visitim ples ya mo we oli no gat nogud tingting olsem, oli bin statem sam Baebol stadi. Yvette i traehad blong wokem wan gudfala tingting long saed blong teritori blong hem, ale biaen, hem tu i faenem sam man we oli wantem stadi long Baebol.
10. ?Wanem bigfala wok blong yumi olsem tija blong Baebol?
10 Sam Kristin oli ting se oli no naf blong lidim wan stadi, taswe oli fraet blong askem ol man we oli intres blong stadi Baebol wetem olgeta. Tru ya, i no yumi evriwan we i gat gudhan blong mekem evri samting. Be, yumi no nidim blong skulgud blong kam wan tija we i nafgud blong tijim Tok blong God. Tabu tok we i stap insaed long Baebol i gat bigfala paoa, mo Jisas i talem se ol man we oli olsem sipsip, bambae oli save voes blong trufala Man blong Lukaot long Sipsip, taem we bambae oli harem voes blong hem. Taswe, wok blong yumi hemia nomo blong traem bes blong yumi blong talemaot mesej blong Gudfala Man ya blong Lukaot long Sipsip, Jisas, long fasin we i klia gud.—Jon 10:4, 14.
11. ?Olsem wanem yu save karem moa frut long wok ya blong halpem ol Baebol studen?
11 ?Olsem wanem yu save karem moa frut taem yu talemaot mesej blong Jisas? Fastaem, yu mas savegud wanem we Baebol i talem long saed blong wan tijing we yu wantem serem. Yu mas kasem save long tijing ya bifo we yu save tijim narafala long hem. Mo tu, traem soem respek mo kaen fasin oltaem long taem blong stadi. Ol studen, nating se sam maet oli yangfala yet, oli save lanem moa sipos oli no fraet mo sipos tija i soem respek mo i kaen gud long olgeta.—Ol Proveb 16:21.
12. ?Olsem wanem yu save meksua se wan studen i kasem save long wanem we yu stap tijim long hem?
12 Wok blong yu olsem wan tija i no blong talemaot ol tok blong bambae studen i lanem olgeta baehat. Yu mas halpem studen ya blong kasem save long wanem we hem i stap lanem. Fasin blong studen blong kasem save long wanem we yu talem, i dipen bigwan long edukesen we hem i bin kasem, ol samting we hem i mekem long laef blong hem, mo hamas save we hem i gat finis long saed blong Baebol. Taswe, maet yu askem long yu wan se, ‘?Hem i kasem save long mining blong ol vas blong Baebol we oli stap long buk blong stadi?’ Yu save faenemaot samting ya sipos yu askem sam kwestin we oli pulum hem blong eksplenem wan samting i bitim we hem i givim ol ansa nomo olsem yes mo nogat. (Luk 9:18-20) Be nao, i gat sam studen we oli fraet blong askem kwestin long wan tija. From samting ya, maet oli gohed long stadi be oli no rili kasem save long tijing we oli kasem. Leftemap tingting blong ol studen blong askem kwestin mo talem long yu taem we oli no kasem save fulwan long wan poen.—Mak 4:10; 9:32, 33.
13. ?Olsem wanem yu save halpem wan studen blong kam wan tija?
13 Wan impoten risen we yumi mekem Baebol stadi wetem ol man, hemia blong halpem olgeta blong bambae olgeta tu oli save mekem wok blong tija. (Galesia 6:6) Blong kasem mak ya, taem yu askem kwestin blong tingtingbak long en blong stadi, maet yu save askem hem blong eksplenem wan poen long yu long fasin we i klia gud, olsem we hem i save eksplenem long wan man long wok blong prij. Biaen, taem hem i kasem ol mak blong joen long wok blong prij, yu save tekem hem i go wetem yu blong prij. Bambae i isi moa long hem blong wok wetem yu, mo rod ya bambae i givhan long hem blong winim tras long hem wan gogo kasem taem we hem i naf blong go prij hem wan.
Halpem Ol Studen Blong Fren Wetem Jeova
14. ?Wanem stamba mak we yu wantem kasem long wok ya blong tij, mo wanem i save givhan long yu blong kasem mak ya?
14 Stamba mak we evri Kristin tija i wantem kasem hemia blong halpem ol studen blong wokem wan fasin fren wetem Jeova. Bambae yu kasem mak ya tru long wanem we yu talem, be tu, tru long eksampel blong yu. Taem yumi tijim studen tru long eksampel blong yumi, samting ya i save gat bigfala paoa long hat blong studen ya. Ol aksin oli save karem moa frut i bitim toktok, antap moa taem yumi wantem tijim studen blong gat ol gudfala fasin mo strong tingting blong folem samting we hem i lanem. Sipos hem i luk se olgeta tok mo aksin blong yu oli kamaot from we yu yu gat wan gudfala fasin fren wetem Jeova, maet bambae hem tu i strong moa blong kasem fasin ya blong frengud wetem Jeova.
15. (a) ?From wanem i impoten we studen i wokem wan tingting we i stret blong pusum hem blong mekem wok blong Jeova? (b) ?Olsem wanem yu save halpem wan studen blong hem i gohed blong gru long saed blong spirit?
15 Yu wantem se studen ya i mekem wok blong Jeova, i no from we hem i no wantem ded long Amageden, be from lav we hem i gat long Jeova. Sipos yu halpem hem blong wok wetem gudfala tingting ya we i pusum hem, i olsem we yu stap wokem haos wetem ol samting we faea i no save kakae, nao bambae studen ya i naf blong stanap strong long taem blong traem. (1 Korin 3:10-15) Sipos tingting we i pusum hem i kamaot from we hem i wantem nomo blong mekem olsem yu no wan narafala man, hemia i rong mo bambae i no givim paoa long hem blong agensem ol traem, mo bambae i no givim strong tingting tu long hem blong wantem mekem samting we i stret. Rimemba se, bambae yu no tijim hem blong olwe. Taem yu gat jans, yu mas leftemap tingting blong hem blong ridim Tok blong God evri dei mo tingbaot wanem we hem i ridim, blong kam klosap moa long Jeova. Long rod ya, longtaem afta we yu yu finisim stadi wetem hem, bambae hem i stap gohed blong tekem ‘ol stret toktok’ ya we oli stap long Baebol mo ol buk we oli stanap long Baebol.—2 Timoti 1:13.
16. ?Olsem wanem yu save tijim studen blong prea long fulhat blong hem?
16 Yu save halpem studen ya blong kam klosap moa long Jeova sipos yu tijim hem blong prea long fulhat blong hem. ?Olsem wanem yu save mekem samting ya? Maet yu save pulum hem blong ridim prea blong Jisas, wetem plante narafala prea we oli stap long Baebol, olsem long Ol Sam. (Ol Sam 17, 86, 143; Matiu 6:9, 10) Mo tu, taem studen blong yu i lesin long prea blong yu long stat mo en blong stadi, bambae hem i harem save filing we yu gat long Jeova. Taswe, oltaem ol prea blong yu oli mas soemaot se yu no gat tu fes mo yu tok tru, mo oli no mas bitim mak tu long saed blong filing mo oli mas skelgud long saed blong spirit.
Wok Blong Sevem Pikinini Blong Yu
17. ?Olsem wanem ol papa mama oli save halpem ol pikinini blong olgeta blong stap long rod ya we i go kasem sef?
17 Long olgeta ya we yumi wantem sevem olgeta, i sua se i gat ol memba blong famle blong yumi tu. Bigfala namba blong ol pikinini blong ol Kristin papa mama, oli “stanap strong long bilif” wetem fulhat blong olgeta. Be, i gat samfala we trutok i no grugud long hat blong olgeta. (1 Pita 5:9; Efesas 3:17; Kolosi 2:7) Plante long ol yangfala ya oli lego Kristin fasin blong laef taem oli kam klosap long yia blong bigman no taem oli kam bigman finis. Sipos yu yu wan papa no mama, ?yu save mekem wanem blong no givim tumas jans long wan samting olsem i hapen? Fastaem, yu save traehad blong mekem se tingting mo filing we i stap long medel blong famle blong yu i wan we evriwan i harem gud long hem. Wan gudfala famle laef i olsem stamba ples we pikinini i save kasem stret tingting long saed blong hu ya i hed, fasin blong tinghae long ol gudfala fasin, mo fasin joengud wetem narawan. (Hibrus 12:9) Taswe, gudfala fasin fren we i stap bitwin ol wanwan memba blong famle, hem i olsem wan gudfala graon we fasin fren bitwin ol pikinini mo Jeova i save gru long hem. (Ol Sam 22:10) Ol famle we oli strong oli mekem samting tugeta olsem wan bodi nomo—ol papa mama oli mekem olsem, nating sipos oli mas yusum taem we oli putum blong olgeta wanwan, blong spenem wetem famle. Long rod ya, eksampel blong yu i save tijim ol pikinini blong mekem ol stret disisen long laef. Papa mama, impoten samting we pikinini blong yu i nidim, i no ol samting long saed blong bodi, be hemia yu—taem blong yu, paoa blong yu, mo lav blong yu. ?Yu yu stap givim ol samting ya long pikinini blong yu?
18. ?Wanem kaen kwestin we ol papa mama oli mas halpem ol pikinini blong olgeta blong faenem ansa blong olgeta?
18 Ol papa mama oli no mas ting se, from we tufala i Kristin, pikinini blong tufala tu bambae i mas kam wan Kristin. No gat. Daniel, wan elda mo papa blong faef pikinini, i talem se: “Ol papa mama oli mas tektaem blong karemaot ol rong tingting we pikinini blong olgeta i kasem evri dei long skul mo long ol narafala ples. Oli mas gat longfala tingting mo halpem ol pikinini blong olgeta blong faenem ansa blong ol kwestin olsem: ‘?Yumi rili stap long taem blong en? ?I tru se i gat wan trufala skul nomo? ?From wanem i nogud blong kampani oltaem wetem wan fren long skul, nating se i luk olsem se hem i gat gudfala fasin? ?I rong oltaem blong slip tugeta bifo mared?’” Papa mama, yu save sua se bambae Jeova i blesem ol traehad blong yu, from we hem tu i gat bigfala intres se ol pikinini blong yu oli stap gud.
19. ?From wanem i moagud we papa mama nao i mekem stadi long pikinini blong olgeta?
19 Sam papa mama maet oli no harem se oli naf blong mekem stadi long pikinini blong olgeta. Be, i no nidim blong yu harem olsem from we i no gat wan narafala man we i naf fulwan blong tijim ol pikinini blong yu olsem we yu yu save mekem. (Efesas 6:4) Taem yu stadi wetem pikinini blong yu, samting ya i givhan long yu blong faenemaot stret wanem i stap long hat mo tingting blong olgeta. ?Toktok blong olgeta i kamaot long hat, no oli talem nomo olsem wan mesin? ?Oli rili bilivim samting we oli stap lanem? ?Oli tingbaot Jeova olsem wan trufala man? Yu save faenem ansa long ol kwestin ya mo sam narafala impoten kwestin bakegen, sipos yu wan yu stadi wetem pikinini blong yu.—2 Timoti 1:5.
20. ?Olsem wanem ol papa mama oli save mekem famle stadi i wan taem blong harem gud mo we i karem frut?
20 Afta we yu statem famle program blong yu, ?olsem wanem yu save holemtaet program ya? Joseph, wan elda mo papa blong tu smol pikinini, i talem se: “Famle stadi i olsem ol narafala Baebol stadi, hem i wan taem blong harem gud, hem i wan taem we evriwan i wet long hem wetem glad. Blong kasem mak ya long famle blong yumi, yumi no mas tingting tumas long saed blong taem. Stadi blong mifala maet i gohed blong wan aoa, mo samtaem maet mifala i gat ten menet nomo, be nating, mifala i mas stadi. Wan samting we i mekem se stadi blong mifala i wan spesel taem blong wik long tingting blong ol pikinini, hemia from we mifala i mekem ol pleplei we oli laenap wetem ol defren stori long My Book of Bible Stories. * Rod ya i putum tijing i go dip insaed long hat mo i isi blong kasem save, samting ya nao i impoten moa i bitim hamas paragraf we mifala i mekem.”
21. ?Long wanem taem ol papa mama oli save tijim pikinini blong olgeta?
21 I tru se i no long taem blong stadi nomo we yumi mas tijim ol pikinini. (Dutronome 6:5-7) Witnes ya long Taelan, we yumi tokbaot hem long stat blong stadi ya, i talem se: “Taem mi smol, papa blong mi i stap tekem mi mi go wetem hem long wok blong prij, mifala i stap ron long baskel blong go long ol teritori blong kongregesen blong mifala we oli stap farawe. Ol taem ya oli stap klia yet long tingting blong mi. I sua se, gudfala eksampel blong papa mama blong mifala mo fasin blong tufala blong tijim mifala, nomata wanem samting i kamaot long laef, i halpem mifala blong tekem disisen blong joen long fultaem wok blong prij. Mo i sua se ol lesen ya we mifala i lanem i stap dip insaed long mifala. !Naoia mi stap gohed yet blong prij long ol teritori we oli stap farawe!”
22. ?Wanem i save kamaot from we yu ‘lukaot gud long fasin blong yu mo long ol tok we yu tijim man long hem’?
22 Wan dei we i no longtaem nao, bambae Jisas i kam long stret taem blong mekem ol jajmen blong God oli kamtru long wol ya. Biaen, bigfala dei ya bambae i pas mo bambae hem i kam wan samting blong histri nomo, be ol gudfala man blong wok blong Jeova bambae oli gohed oltaem blong mekem wok blong hem we tingting blong olgeta i stap long laef ya we i no save finis. ?Yu yu hop blong stap wetem olgeta ya, wetem ol pikinini mo ol Baebol studen blong yu? Ale, rimemba se: “Yu mas lukaot gud long fasin blong yu, mo long ol tok we yu stap tijim ol man long hem. Oltaem yu mas mekem olgeta fasin ya. Sipos yu mekem olsem bambae yu save sevem yu, wetem ol man we oli stap lesin long yu.”—1 Timoti 4:16.
[Futnot]
^ Wan buk we Watchtower Bible and Tract Society of New York, Inc., i wokem.
?Yu Yu Save Eksplenem?
• ?From we yumi no save stret taem blong God blong jajem ol man, wanem tingting we yumi mas gat?
• ?Long wanem rod yumi save ‘lukaot gud long ol tok we yumi tijim man long hem’?
• ?Olsem wanem yu save halpem wan studen blong frengud wetem Jeova?
• ?From wanem i impoten we ol papa mama oli tekem taem blong tijim pikinini blong olgeta?
[Kwestin]
[Tok blong pija long pej 15]
I isi moa blong lanem samting taem evriwan i soem respek mo kaen fasin
[Tok blong pija long pej 18]
Fasin blong mekem pleplei folem ol stori blong Baebol, olsem hemia blong Solomon we i jajem tufala woman blong rod, i save mekem famle stadi i wan taem blong glad