!Go Long Pasifik—Blong wok!

 OL JEA long intenasnal epot long Brisbane mo Sydney, Ostrelia, i fulap wetem ol man we oli harem gud tumas. Wan grup blong 46 man oli mas flae i go long Samoa, long wan ples we i gat san oltaem, blong mitim 39 narafala man we oli kam long Niu Silan, Hawai, mo Yunaeted Stet. Ol bokis we oli karem oli defren olgeta. Insaed long ol bokis ya, i gat ol tul olsem ol hama, ol so, mo ol dril, be i no ol samting we oltaem, ol man oli karem wetem olgeta taem oli mekem trep i go long wan naesfala aelan blong Pasifik. Be biaen, trep we oli mekem i winim ol narafala trep.

Olgeta nomo oli pem rod blong olgeta blong go. Bambae oli spenem tu wik blong givhan long wan program blong bildim haos, we Regional Engineering Office long branj blong ol Witnes blong Jeova long Ostrelia i lukaot. Oli no kasem pei from wok ya. Namba blong kongregesen blong ol Witnes blong Jeova long ol aelan blong Pasifik i stap gru kwik. Taswe ol brata sista oli givim presen mane blong givhan long program ya blong bildim ol Haos Kingdom, Haos Asembli, haos blong misinari, mo ol branj no ol ofis blong translesen. I gud yumi toktok wetem sam long olgeta we oli bin joen long wok blong bildim ol Haos Kingdom long prapa kantri blong olgeta.

Max, we i kamaot long Cowra long New South Wales, Ostrelia, hem i wan man blong putum ruf blong haos. Hem i mared mo i gat faef pikinini. Arnold i blong Hawai. Hem mo waef blong hem, tufala i gat tu boe, mo Arnold i wan fultaem paenia tu. Hem i mekem sem wok olsem Max, hem i wok olsem wan elda long kongregesen long ples blong hem. I klia se ol man ya—mo plante long olgeta we oli joen long program ya—oli kam givhan i no from we oli gat plante fri taem. Nogat. Defren olgeta, ol brata ya wetem famle blong olgeta oli luksave se i nidim help, mo oli wantem mekem wanem we oli naf blong mekem.

Ol Brata Blong Ol Defren Kantri Oli Mekem Wan Bigfala Wok

Wan ples we i nidim ol brata blong givhan, hemia Tuvalu. Tuvalu i wan kantri long Pasifik we i gat naen smol aelan we oli kamaot long korel, hem i klosap long ekweta mo i stap long notwes blong Samoa. Tuvalu i gat raonabaot 10,500 man long hem. Bigfala blong ol aelan ya, i klosap 2.5 skwea kilometa. Long 1994, 61 Witnes we oli stap long ples ya, oli rili nidim wan niufala Haos Kingdom mo wan bigfala ofis blong translesen.

Long kantri ya blong Pasifik we ples i hot, oli mas bildim ol haos we oli strong blong stanap agensem ol strong hariken. Be i no gat plante gudfala samting blong bildim haos long ol aelan ya. ?Weples bambae oli faenem ol gudfala samting blong bildim haos? Evri samting—olsem ruf  blong haos, mo ol strap, ol samting olsem ol tebel mo jea, kaliko blong windo, toelet mo paep blong swim, mo tu ol skru mo ol nil—ol brata long Ostrelia oli putum long kontena mo sanem long sip i kam long Tuvalu.

Bifo we ol samting ya oli kasem Tuvalu, wan smol grup we oli kam fastaem oli rerem ples we bambae bilding i stap long hem, mo oli putum fandesen. Nao ol narafala brata we oli kam afta, oli stanemap, pentem, mo finisim gud ol bilding ya.

Olgeta wok ya oli mekem se wan samting i kamaot long Tuvalu. Wan lida blong skul we i luk ol wok ya, hem i kros tumas, nao i girap, i go talemaot long radio se, !ol Witnes oli stap bildim wan “Taoa blong Babel”! ?Be wanem samting i kamaot? Graeme, wan brata we i kam blong givhan, i talem se: “Long Baebol, taem ol man oli stap bildim Taoa blong Babel, oli faenem se oli no moa kasem save long narawan taem oli toktok. God i mekem lanwis blong olgeta i fasfas, taswe oli lego wok blong olgeta, mo oli livim taoa ya we i no finis gud. Hemia i defren olgeta long saed blong ol man blong Jeova God. Nating se ol lanwis mo ol kastom blong olgeta oli defren, oltaem oli finisim gud ol wok we oli mekem.” (Jenesis 11:1-9) Mo hemia nao wanem we i hapen—long tu wik nomo oli finisim bilding ya. Yes, i gat 163 man evriwan oli kam long taem blong dedikesen. Praem minista blong Tuvalu mo waef blong hem, tufala tu i kam.

Taem Doug, brata we i lukaot long wok, i tingting bakegen long wanem we i hapen long taem ya, hem i talem se: “I wan bigfala glad blong wok wetem ol brata blong ol narafala kantri. Mifala i gat ol defren fasin blong mekem samting, defren rod blong toktok, mo tu ol defren fasin blong makem no skelem samting. Nating se i olsem, wan long ol samting ya i no mekem problem long mifala.” Brata ya i bin joen long sam narafala wok olsem finis, taswe hem i gohed i se: “Samting ya i givim strong tingting long mi se, wetem help blong Jeova, ol man blong hem oli save bildimap wan haos long eni ples long wol, nating se ples ya i stap farawe no i hadwok blong bildim haos long hem. Yumi gat plante man we oli gat gudhan blong mekem wok ya, be i sua se tabu spirit blong Jeova nao i mekem se wok i save gohed gud.”

Tabu spirit blong God i pusum ol famle blong ol Witnes long ol aelan ya blong givim kakae mo ples blong slip. Sam long ol famle ya oli no gat plante samting. Mo olgeta we oli kasem kakae mo ples blong slip olsem, oli talem bigfala tangkiu from ol samting ya. Ken, we i blong Melbourne, Ostrelia, i bin mekem sem wok olsem long Franis Polinesia. Hem i talem se: “Mifala i kam olsem slef, be oli mekem i gud long mifala olsem se mifala ol king.” Samtaem, ol Witnes we oli manples oli givhan long wok ya blong bildim haos. Long Solomon Aelan, ol woman oli tanem simen long han nomo. Wan handred man mo woman oli go antap long ol hil we ples i wetwet, mo oli karem moa long 40 tan blong timba, oli tekem i kam daon. Ol yangfala tu oli givhan. Wan man blong wok blong Niu Silan i talem se: “Man, mi rimemba wan yangfala brata blong aelan ya we i karem tu, tri bag simen wantaem. Mo hem i savelem korel long ful dei, we ples i hot mo i ren.”

 Taem ol Witnes we oli manples oli joen long wok ya, samting ya i karem gudfala frut. Ofis blong Watch Tower Sosaeti long Samoa i talemaot se: “Ol brata we oli manples oli lanem sam samting long saed blong bildim ol Haos Kingdom, mo bambae oli save fiksimap ol samting we i kam nogud afta long hariken mo jenisim ol samting we oli kam olfala. Samting ya i save halpem olgeta long ol ples we laef i had.”

Program Blong Bildim Haos i Givim Nambawan Witnes

Colin i stap long Honiara mo hem i luk we oli bildim Haos Asembli. Hem i sapraes tumas from samting ya. Hem i raet i go long branj blong Watch Tower Sosaeti long ples ya long Pijin Inglis se: “Everyone they gettim one mind and no one they cross, they also one family.” Smoltaem biaen, taem hem i gobak long vilej blong hem, Aruligo, we i stap 40 kilometa longwe long Haos Asembli, hem mo famle blong hem oli bildim Haos Kingdom blong olgeta. Biaen oli sanem wan narafala mesej i go long branj ofis se: “Haos Kingdom blong mifala, wetem tebel blong givim pablik tok, i rere finis. ?Olsem wanem? ?Mifala i save holem sam miting long ples ya?” Kwiktaem nomo oli rerem ol plan blong mekem ol miting, mo oltaem, i gat bitim 60 man oli stap kam long miting.

Wan man blong givim advaes long European Union i luk wok ya long Tuvalu. Hem i talem long wan man blong wok se: “Maet evri man oli talem samting ya long yufala. !Be long tingting blong mi, hemia i wan merikel stret!” Wan woman we i stap wok long ples blong telefon i askem wan sista we i kam blong givhan, i se: “?From wanem yufala evriwan i glad tumas olsem? !I hot tumas long ples ya!” Neva oli luk ol man blong wan Kristin Skul oli wok long fasin we i gud mo oli tingbaot narafala.

Ol Sakrefaes We Oli No Sore From

Baebol i talem long 2 Korin 9:6 se: “Man we i planem plante, hem bambae i kasem plante.” Ol man we oli kam blong wok, famle blong olgeta, mo kongregesen blong olgeta, oli stap gohed blong planem plante wetem gladhat, oli stap halpem ol Witnes long Pasifik. Ross, wan elda long Kincumber klosap long Sydney i talem se: “Kongregesen blong mi i givhan blong pem bitim haf blong tikit blong mi long plen, mo tawean blong mi [brata blong woman blong Ross] i givim $500 bakegen long mi.” Wan narafala man blong wok i salem trak blong hem blong pem rod blong hem. Wan narafala brata bakegen i salem sam pis graon blong hem blong pem rod blong hem. Kevin i nidim $900 bakegen, taswe hem i salem 16 pijin blong hem we oli gat tu yia. !Wan fren blong hem i faenem wan man we i agri blong pem olgeta pijin ya long $900 stret!

Oli askem long Danny mo Cheryl se: “?Yutufala i ting se i stret we yutufala i pem plen mo yutufala i lusum pei blong yutufala we total blong hem i raonabaot $6,000?” Tufala i ansa se: “!Yes! Mo nating sipos praes i antap moa long hemia, bambae hemia i no blong nating.” Alan, we hem i blong Nelson, Niu Silan, i gohed i se: “Mane we mi yusum blong go long Tuvalu i stret blong pem rod blong mi i go long Yurop mo mi gat haf mane i stap yet. Be sipos mi go long Yurop, ?bambae mi kasem ol blesing, mitim plante fren blong ol defren ples, gat jans blong mekem wan samting blong wan narafala i bitim we mi wok blong mi wan? !Nogat! Nating se i olsem, ol brata blong mi we oli manples oli givim moa samting long mi i bitim wanem we mi givim long olgeta.”

Wan narafala samting we i mekem se wok ya i gohed gud, hemia sapot we ol famle oli givim. Sam waef oli save go wetem hasban blong olgeta long ples blong wok mo givhan long wok, be sam narafala waef oli stap nomo blong lukaot long ol pikinini blong olgeta we oli skul, no blong lukaot long ol narafala wok blong famle. Clay i talem se: “Waef blong mi i glad blong lukaot long ol pikinini mo olting long haos taem mi stap longwe. Hem i mekem wan bigfala sakrefaes bitim hemia we mi mekem.” !I tru se ol hasban we oli no save tekem waef blong olgeta i go wetem olgeta, oli save talemaot long fulhat se “Amen” long samting ya!

Afta we oli finisim wok ya long Tuvalu, oli bildim sam narafala Haos Kingdom, Haos Asembli, haos blong ol misinari, mo ol ofis blong translesen long ol ples olsem Fiji, Tonga, Papua Niu Gini, Niukaledoni, mo sam narafala ples bakegen. I gat plante bilding yet blong wokem long Pasifik, mo long sam ples blong Saot Is Esia. ?Bambae i gat i naf man blong wok?

I klia se bambae hemia i no wan problem. Wan leta blong branj ofis long Hawai i talem se: “Evriwan long ples ya we oli bin joen long intenasnal wok blong bildim haos, oli askem mifala blong tingbaot olgeta, taem i gat wan narafala haos i rere blong bildim. Taem oli kasem ples blong olgeta, oli stat blong sevem mane from wok ya.” Program ya i rili gohed gud. Yumi kasem rij blesing long Jeova, taem yumi givim yumi wan blong mekem wok ya we i soem se yumi no tingbaot yumi wan.

[Tok blong pija long pej 9]

Ol samting blong wokem haos

[Tok blong pija long pej 9]

Olgeta wokman long ples blong bildim haos

[Tok blong pija long pej 10]

Taem wok i finis, mifala i glad tumas long wanem we tabu spirit blong God i bin mekem