Wan Kwestin

Long Aesea japta 53, i gat wan profet tok long saed blong Mesaea, we plante man oli savegud long hem. Vas 10 (NW) i talem se: “Jeova hem wan i haremgud taem i smasem hem; i mekem hem i sik.” ?Tok ya i minim wanem?

I isi blong luksave from wanem i save gat wan kwestin long saed blong Aesea 53:10. Ol trufala Kristin oli bilif se God ya we i gat sore mo i kaengud, hem i no save haremgud blong smasem wan man no mekem hem i sik. Baebol i pruvum long yumi se God i no save haremgud long fasin ya blong mekem wan stret man i harem nogud. (Dutronome 32:4, Jeremaea 7:30,31) Samtaem, long ol handred yia we oli pas finis, maet Jeova i letem ol man oli safa from sam risen we i joen wetem waes mo lav blong hem. Be i sua se Jeova i no mekem nambawan pikinini blong hem, Jisas, i safa. ?Taswe, wanem stret mining vas ya?

Yes, yumi save kasem mining blong vas ya sipos yumi ridim fulwan vas, mo makemgud tufala taem we tok ya “haremgud” i kamaot. Long Aesea 53:10, (NW) yumi ridim se: “Jeova hem wan i haremgud taem i smasem hem; i mekem hem i sik. Ded blong hem i wan sakrefaes blong tekemaot ol sin blong ol man. Nao bambae hem i save luk olgeta we bambae oli kamaot biaen long hem. Bambae hem i laef longtaem, mo i mekem ol samting we Jeova i haremgud long hem oli kamtru.”

Fulwan mesej blong Baebol i soemaot se, samting we “bambae Jeova i haremgud long hem,” olsem en blong vas ya i talem, hemia blong yusum Kingdom blong mekem stamba tingting blong hem i kamtru. Olsem nao, bambae Jeova i leftemap hae rul blong hem, mo bambae i tekemaot sin blong olgeta man we oli gat fasin obei. (1 Kronikel 29:11; Ol Sam 83:18; Ol Wok 4:24; Hibrus 2:14, 15; 1 Jon 3:8) Rod we bambae Jeova i yusum blong mekem samting ya, hemia se Pikinini blong God i mas kam olsem wan man, mo givim laef blong hem olsem ransom sakrefaes. Yumi save se long rod ya, Jisas i bin kasem trabol. Baebol i talem long yumi se, “hem i lanem mining blong fasin ya blong obei long God, long ol samting we oli mekem hem i harem nogud long bodi blong hem.” Taswe, Jisas i kasem blesing from olgeta trabol we hem i kasem.—Hibrus 5:7-9.

Jisas i save finis se long nambawan rod ya we hem i folem, bambae hem i kasem sam bigfala trabol we i save mekem hem i harem nogud tumas. Samting ya i klia long tok blong hem we yumi faenem long Jon 12: 23, 24 se: “Mi mi Pikinini blong Man, mo naoia, taem i kamtru finis blong God i leftemap nem blong mi. Tru mi talem long yufala, sid blong wit, man i mas berem long graon. Sipos no, bambae i no save gru, mo i no save gat frut blong hem. Be sipos man i planem, bambae i gat plante frut blong hem.” Yes, Jisas i save se hem i mas stanap strong, kasem mak ya we hem i ded. Stori i gohed i se: “‘Naoia tingting blong mi i hevi tumas. ?Bambae mi save talem olsem wanem? Mi no save talem se “Papa, plis yu no letem ol trabol ya we oli stap kam naoia, oli kasem mi.” Nogat. Mi mi kam long wol ya blong oli kasem mi. Papa, plis yu leftemap nem blong yu.’ Nao wantaem nomo, God i tok, i talem se, ‘Mi mi leftemap nem blong mi finis, mo bambae mi leftemap bakegen.’”—Jon 12:27, 28; Matiu 26:38, 39.

Poen ya i givhan long yumi blong kasem mining blong Aesea 53:10. Jeova i savegud se bambae wan samting i hapen we i olsem se wan samting i “smasem” Pikinini blong hem. Be from we Jeova i stap tingbaot ol nambawan blesing we bambae oli kamaot, nao hem i haremgud long wanem we Jisas i pastru long hem. Olsemia, Jeova i ‘haremgud long fasin ya blong smasem’ Mesaea. Mo Jisas tu i haremgud long olgeta samting we hem save mekem mo i bin mekem. Tru ya, olsem Aesea 53:10 i talem, Jisas “i mekem ol samting we Jeova i haremgud long hem oli kamtru.”