?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:

• Profet tok blong Aesea 65:17-19 i talem se “niufala heven mo niufala wol” i mas kamtru. Samting ya i hapen finis taem ol man Jiu oli kam fri long kalabus. ?Olsem wanem nao yumi save se samting ya i mas kamtru bakegen long narafala man biaen?

From we long faswan handred yia K.T., taem aposol Pita mo Jon tufala i raetem sem tok ya bakegen, tufala i stap tokbaot samting we bambae i kamtru long fiuja. Ol blesing ya oli no kam yet. (2 Pita 3:13; Revelesen 21:1-4)—4/15, pej 10-12.

• ?Wanem maet i stamba blong ol stori blong ol man Gris long saed blong ol “haf man, haf God” we oli gat raf fasin?

Taem we bigfala wota i no foldaon yet, sam enjel oli tekem bodi blong man, oli mekem raf fasin, mo oli slip olbaot long wol. Maet afta, ol man Gris oli ademap long stori ya antap bakegen, blong mekem hem i kam naes. (Jenesis 6:1, 2)—4/15, pej 27.

• ?Taem ol Kristin we oli strong oli stap long wan mared, oli mas lukaot gud blong no mekem wanem?

Oli no mas mekem bigfala noes long lafet ya. I nogud oli dring tumas alkol mo danis long bigfala miusik, we man i no moa bos long tingting blong hem. Mo tu, olgeta we oli no invaetem olgeta, oli no mas kam. Sipos i gat toktok se eni man nomo i save kam, oli save kam. Man we i mared i mas meksua se ol Kristin we hem i putumap blong lukaot long lafet ya, bambae oli stap gogo kasem we hem i finis, long wan aoa we i no bitim mak.—5/1, pej 19-22.

• Sam 128:3 i tokbaot ol pikinini olsem “ol yang olif tri” raonabaot long tebel blong wan man. ?Tok ya i minim wanem?

Samtaem ol niufala gru oli kamaot long stamba blong wan olif tri klosap long rus blong hem. Taem bigfala stamba tri i no moa karem plante frut, ol niufala gru oli save kam olsem strong tri raonabaot long stamba tri ya. Long sem fasin, papa mama oli save glad taem oli gat ol gudfala pikinini we oli karem frut long wok blong Jeova tugeta wetem olgeta.—5/15, pej 27.

• ?Wanem nao sam frut we ol pikinini oli kasem taem oli gat wan gudfala famle laef?

Biaen, bambae oli save tinghae long olgeta we oli gat paoa, oli save glad blong mekem stret fasin, mo oli hapi blong joengud wetem ol narafala. Mo tu, wan famle laef olsem ya, i save halpem olgeta blong fren gud wetem God.—6/1, pej 18.

• ?Long wan Kantri blong Is, ol brata oli mekem wanem blong soemaot se olgeta Kristin oli brata?

Olgeta kongregesen oli stadi long wan haf we i talem strong long olgeta se oli no mas yusum ol haenem we i givim ona i go long olgeta. Defren olgeta, evri man oli mas karem sem nem nomo, se ol brata.—6/15, pej 21, 22.

• ?Ol Witnes blong Jeova oli akseptem ol meresin we i kamaot long blad?

Mifala i bilif se rul ya we Baebol i givim se ‘no kakae blad’ i minim se mifala i no mas kasem blad transfiusen. Mo blad we oli seraotem long ol stamba haf olsem plasma, red sel, waet sel, mo platelet, mifala i no save tekem ol stamba haf ya tu. (Ol Wok 15:28, 29) Be sipos oli seraotem ol stamba haf ya moa, i kam ol smosmol haf blong hem nomo, wanwan Kristin nomo i mas mekem disisen blong hem blong tekem meresin ya no nogat. Hem i mas tingbaot wanem we Baebol i talem, mo olsem wanem blong stap fren wetem God.—6/15, pej 29-31.

• ?Yu save faenem pis insaed long tingting blong yu tede?

Yes. Jisas Kraes i stap lidim ol man blong oli mekem trufala wosip wetem Baebol, mo blong oli kasem pis ya we Aesea 32:18 i tokbaot. Antap moa, olgeta we oli kasem pis ya oli gat jans blong haremgud long pis blong olwe long wol, olsem Baebol i talem long Ol Sam 37:11, 29.—7/1, pej 7.

• ?Ol tiokratik wok we George Young i mekem long ol yia bifo, oli givhan olsem wanem?

Stat long 1917, hem i wan man blong karem laet blong gud nius blong Kingdom i go long plante kantri. Minista wok blong hem i mekem se hem i go long Kanada, long ol aelan blong Karibin, long Brasil mo ol narafala kantri blong Saot Amerika kasem Sentrol Amerika, long Spen, long Potugal, long kantri ya we bifo hem i Soviet Yunion, mo long Yunaeted Stet.—7/1, pej 22-27.

• 1 Korin 15:29 (NW) i talem se “ol man oli stap tekem baptaes blong kam ol dedman.” ?Tok ya i minim wanem?

Bigfala poen hemia se taem tabu spirit i makemaot wan Kristin, laef blong hem long wol ya i jenis, gogo bambae hem i finis long wan spesel ded, we kwiktaem nomo biaen, hem i laef bakegen blong go laef long heven.—7/15, pej 17.

• ?Aposol Pol i stap mekem wanem long ol yia we Baebol i no tokbaot hem nating?

Maet hem i stanemap ol kongregesen long Siria mo Silisia, no maet hem i mekem olgeta i kam strong. Plante long ol hadtaem we 2 Korin 11:23-27 i tokbaot, ating oli hapen long ol taem ya, we i soem se hem i stap gohed strong long minista wok.—7/15, pej 26, 27.

• I nogud yumi traehad blong kasem ol mak we yumi no naf nating long olgeta. ?Wanem nao i save halpem yu blong no mekem olsem?

Yu mas rimemba se Jeova i kasem save long yu. Sipos yu prea long hem, bambae hem i save halpem yu blong skelem tingting blong yu, mo bambae yu holem tingting daon. Mo tu, blong kasem wan niufala tingting, yu save toktok wetem wan fren we i strong long saed blong spirit.—8/1, pej 29, 30.