?Olsem Wanem Blong Wet?

?YU YU save hamas taem ol man oli stap spenem evri yia jes blong wet? Oli wet long wan laen taem oli stap long stoa no long ples blong bensin. Oli wet long kakae long restoron. Oli wet long dokta. Oli wet long bas mo taksi. Yes, plante aoa we man i spenem long laef blong hem, hemia blong wet long ol samting we bambae oli hapen. Wan stadi i soem se, long Jemani, ol man oli lusum samwe long 4.7 bilian aoa evri yia jes blong wet long rod, taem ol trak oli fasfas. Wan man we i ademap olgeta aoa ya i talem se oli stret long fulwan laef blong 7,000 man.

Fasin ya blong wet i save mekem man i harem nogud tumas. Long taem blong yumi, i neva gat inaf taem blong mekem evri samting, mo taem yumi stap tingbaot ol narafala samting we yumi mas mekem, samting ya i mekem se fasin blong wet i save kam wan bigfala traem. Wan taem, Alexander Rose, we hem i wan man blong raetem buk i talem se: “Wan bigfala samting long laef we i mekem man i harem nogud tumas, hemia fasin blong wet.”

Benjamin Franklin, we hem i wan haeman blong Amerika, i luksave se fasin blong wet i mekem man i lusum bigfala mane. Bitim 250 yia bifo, hem i talem se: “Taem i minim mane.” Hemia risen from wanem ol bisnesman oli lukaot rod blong no westem taem long taem blong wok. Sipos oli save wokem moa samting long smol taem nomo, hemia i min se oli winim moa mane. Ol kampani we oli wok wetem pablik, oli hareap blong givhan long ol man. Hemia ol bisnes olsem ol tekawe, ol bang we yu save go karem mane blong yu, be yu no nid blong kamaot long trak, mo ol narafala bisnes olsem. Ol bisnes ya oli save se bambae ol man oli haremgud sipos oli no tekem tumas taem blong olgeta.

Westem Laef Blong Yumi

Wan taem, Ralph Waldo Emerson, we i laef long ol yia 1900, mo we i wan man blong raetem ol naesfala tok, i komplen se: “!Hamas taem we man i lusum long laef blong hem, jes blong wet!” I no longtaem i pas, Lance Morrow, we hem i wan man blong raetem buk, i komplen se fasin blong wet i  mekem hem i kam les mo i harem nogud long bodi blong hem. Be biaen, hem i tokbaot “wan samting we i mekem man i harem moa nogud, mo we i save kamaot from fasin blong wet.” ?Wanem samting ya? “Man i harem nogud tumas taem hem i kasem save se narafala i stilim samting blong hem we i sas tumas, hemia taem, we i wan haf blong laef blong hem, mo nao i lus olgeta.” Sore blong talem, be tok ya i tru tumas. Aoa we yumi lusum from fasin blong wet, i lus we i lus foreva.

I tru se sipos laef blong yumi i longfala moa, bambae fasin blong wet i no save kam bigfala wari. Be laef i sot we i sot. Plante taosen yia bifo, man blong raetem Ol Sam long Baebol i talem se: “Yia blong mifala i save kasem seventi nomo, no sipos bodi blong mifala i stap strong oltaem, mifala i save kasem eiti, be oltaem mifala i stap kasem trabol, mifala i stap harem nogud nomo. Laef blong mifala i save finis kwiktaem nomo, nao mifala i go lus olgeta.” (Ol Sam 90:10) Nomata we yumi laef weples mo yumi wanem kaen man, laef blong yumi—ol dei, ol aoa, mo ol menet we oli stap fored long yumi taem yumi bon—i sot nomo. Be, yumi no save ronwe long ol samting we oli save mekem yumi wet, yumi westem ol taem blong yumi we oli sas tumas.

Lanem Olsem Wanem Blong Wet

Plante long yumi i bin stap long trak wetem wan draeva we oltaem, hem i wantem bitim trak we i stap fored long hem. Plante taem, draeva ya i no nidim blong bitim trak ya, from we hem i no gat wan impoten plan. Be nating se i olsem, hem i no wantem letem narafala draeva i sloem hem. Hem i no gat longfala tingting, taswe hem i no lanem olsem wanem blong wet. ?Hem i mas lanem fasin ya? Yes, fasin blong wet i wan samting we man i mas lanem. I no gat wan man i bon wetem fasin ya. Ol bebi oli wantem se narafala i hareap blong givhan long olgeta taem oli hanggri no taem oli harem nogud. Taem oli kam bigfala nomo, oli jes kasem save se samtaem oli mas wet long samting we oli wantem. Yes, fasin blong wet i wan haf blong laef we yumi no save ronwe long hem. Taswe, man we i save olsem wanem blong wet, hem i soemaot se hem i wan man we i bigman long tingting.

I tru se i gat sam impoten samting long laef, we yumi mas hareap blong mekem. I stret nomo taem wan yangfala hasban i hareap, i tekem waef blong hem i go long hospital blong bonem pikinini. Tufala enjel, we tufala i stap talem strong long Lot blong aot long Sodom, tufala i no save wet taem Lot i stap tektaem. Bigfala trabol i klosap, mo laef blong Lot mo famle blong hem i stap long denja. (Jenesis 19:15, 16) Be plante taem, ol man we oli mas wet, laef blong olgeta i no stap long denja. Long taem olsem, ol samting oli save kam moa gud sipos evriwan oli lanem blong gat longfala tingting—nating sipos yumi wet from we wan man i no naf blong hareap no i no gat intres. Mo tu, bambae i moa isi blong gat longfala tingting sipos evriwan i lanem olsem wanem blong yusumgud taem we oli spenem blong wet. Long bokis we i stap long pej 5, i gat sam gudfala advaes blong mekem se fasin blong wet i karem gudfala frut be i no wan taem blong harem nogud.

Samtaem, man we i no gat longfala tingting, hem i flas, mo i gat tingting ya se hem i impoten tumas blong wet long narafala. Man olsem i mas tingbaot tok ya blong Baebol se: “Man we i gat longfala tingting, hem i moa gud, i winim man we i stap flas.” (Prija 7:8) Fasin flas i wan fasin we i stap spolem yumi, mo wan waes tok blong Baebol i talem se: “Hae God i no wantem nating ol man we oli stap flas, oli stap leftemap olgeta.” (Ol Proveb 16:5) Taswe, sipos yumi wantem lanem longfala tingting—lanem olsem wanem blong wet—yumi mas luklukgud long ol fasin blong yumi mo fasin fren we yumi gat wetem ol man raonabaot long yumi.

Man We i Gat Longfala Tingting Bambae i Kasem Blesing

Bambae i moa isi long yumi blong wet sipos yumi suagud se yumi no stap wet blong nating nomo, mo se samting we yumi stap wet long hem bambae i mas kamtru. From samting ya, i gud blong tingbaot se olgeta trufala man blong Jeova oli stap wet blong luk taem ya, we bambae ol nambawan promes blong hem long Baebol oli kamtru. Eksampel, wan Sam we i kamaot long God i talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” Aposol Jon i talem bakegen promes ya, taem hem i talem se: “Man we i stap mekem ol samting we God i wantem, hem bambae i no save lus samtaem.” (Ol Sam 37:29; 1 Jon 2:17) I klia se, sipos yumi save laef foreva, fasin blong wet i no wan problem long yumi. Be stret naoia, yumi no stap laef foreva. ?Taswe, i stret blong tokbaot laef foreva naoia?

Bifo we yumi ansarem kwestin ya, makemgud se God i wokem faswan papa mama blong yumi, blong tufala i laef foreva. Sin blong tufala, hemia nao  i mekem se tufala mo ol pikinini blong tufala—i minim yumi tu—i lusum hop ya. Be, stret afta we tufala i sin, God i talemaot stamba tingting we hem i gat, blong finisim frut blong fasin blong no obei. Hem i promes se bambae wan “laen” i kam, we hemia i Jisas Kraes.—Jenesis 3:15; Rom 5:18.

Hem i jus blong yumi wanwan sipos yumi wantem haremgud long promes ya blong God no nogat. Blong kasem promes ya, yumi mas gat longfala tingting. Baebol i talem long yumi blong tingbaot man blong wokem garen, sipos yumi wantem lanem longfala tingting ya. Man ya i planem garen blong hem mo biaen hem i mas wet wetem longfala tingting—hem i mekem evri samting blong lukaotgud long garen ya—go kasem we kakae i rere. Nao biaen, hem i kasem pei from longfala tingting blong hem, mo hem i luk frut blong hadwok blong hem. (Jemes 5:7) Aposol Pol i tokbaot wan narafala eksampel long saed blong longfala tingting. Hem i tokbaot ol man mo woman long taem bifo, we oli bilif strong long God. Oli wantem tumas blong luk taem ya we bambae God i mekem ol stamba tingting blong hem oli kamtru, be oli mas wet long stret taem we God i makemaot. Pol i leftemap tingting blong yumi blong folem eksampel blong olgeta ya we oli stap wet “we tingting blong olgeta i longfala, nao oli save kasem ol samting we God i promes blong givim long olgeta.”—Hibrus 6:11, 12.

Yes, fasin blong wet i wan samting we yumi no save ronwe long hem. Be hem i no nid blong kam wan samting blong mekem yumi harem nogud oltaem, nogat. Ol man we oli stap wet blong luk taem ya we bambae ol stamba tingting blong God oli kamtru, oli save harem gud tumas. Taem ya we oli stap spenem blong wet, oli save yusum blong wokem wan gudfala fasin fren wetem God. Oli save yusum taem ya tu blong mekem ol wok we i soemaot bilif blong olgeta. Mo tru long prea, stadi, mo tingting dip, oli save sua se, evri samting we God i promes blong mekem, bambae oli kamtru long stret taem blong hem.

[Bokis blong pija long pej 5]

SAMTING WE YU SAVE MEKEM TAEM YU STAP WET

!Mekem wan plan fastaem! Sipos yu save se bambae yu mas wet, karem sam samting blong ridim, raet, somap, wivim, no mekem wan narafala wok we i givhan long yu.

Yusum taem ya blong tingting dip, wan fasin we i stap kam moa had long wol ya we i bisi tumas.

Putum sam buk klosap long telefon, blong yu save ridim sipos yu mas wet long telefon. Long faef no ten menet, yu save ridim tu no tri pej.

Taem yu stap wet long wan grup, yusum jans ya, sipos i stret, blong storian wetem ol narafala mo tokbaot ol samting we oli leftemap tingting.

Holem wan not buk no wan buk blong ridim long trak blong yu, we yu save yusum taem yu mas wet long narafala.

Sarem ae blong yu, spel smol, no prea.

SIPOS YUMI TINGTING GUD FASTAEM MO MEKEM PLAN, BAMBAE YUMI KASEM GUDFALA FRUT FROM FASIN BLONG WET.