?From Wanem Yu Mekem Wok Blong God?
?From Wanem Yu Mekem Wok Blong God?
Wan dei, wan king we i onagud long God i talem long pikinini boe blong hem, se: “Yu mas save God blong papa blong yu, yu mas obei long hem, mo yu mas mekem wok blong hem wetem fulhat blong yu, we tingting blong yu i glad.” (1 Kronikel 28:9, NW ) Jeova i wantem se ol man blong hem oli mekem wok blong hem wetem glad mo bigfala tangkiu we i kamaot long hat blong olgeta.
YUMI ol Witnes blong Jeova, yumi save talem se taem yumi kasem save mining blong ol promes blong Baebol, yumi glad we yumi glad tumas. Evri dei, yumi lanem ol niufala samting long saed blong ol stamba tingting blong God. Taem yumi lanem moa long saed blong Jeova, yumi wantem moa blong mekem wok blong hem ‘wetem fulhat blong yumi, we tingting blong yumi i glad.’
Plante Witnes blong Jeova oli stap gohed blong mekem wok blong Jeova wetem bigfala glad. Be sam Kristin we fastaem oli gohedgud, sloslou oli fogetem ol samting we i pusum olgeta blong mekem wok blong God. ?Samting ya i bin hapen long yu? Sipos yes, yu no letem tingting blong yu i foldaon. Yu save kasembak glad blong yu. ?Olsem wanem?
Tingbaot Ol Blesing
Fastaem, tingting dip long ol blesing we Jeova God i stap givim long yu evri dei. Tingbaot ol gudgudfala presen we hem i givim: ol defdefren samting we hem i wokem long wol ya, we yumi evriwan i save haremgud from, nomata we yumi rij no nogat. Tingbaot ol defdefren kaen kakae mo dring we yu gat raonabaot long yu, gudfala helt we maet yu gat, save blong yu long Baebol, mo tingbaot presen ya we i bigfala moa, hemia laef blong Pikinini blong hem. Ded blong Jisas nao i mekem rod blong yumi save mekem wok blong God wetem wan tingting we i no jajem yumi. (Jon 3:16; Jemes 1:17) Sipos yu tingting dip oltaem long ol gudgudfala fasin blong God, bambae yu tinghae moa long hem. Biaen, bigfala tangkiu we yu gat long God from ol samting we hem i mekem, bambae i pusum yu blong mekem wok blong hem. Ale bambae yu gat filing olsem man blong raetem Sam we i talem se: “Hae God, yu yu God blong mifala. Yu yu mekem plante samting finis blong givhan long mifala. I no gat narafala god we i olsem yu. Yu mekem plante gudfala plan blong mifala i folem. Mi mi no save tokbaot olgeta evriwan, oli plante tumas.”—Ol Sam 40:5.
Deved we i raetem ol tok ya, hem i kasem plante trabol long laef blong hem. Taem Deved i yangfala, hem i mas ronwe mo haed oltaem from we King Sol mo ol man blong hem oli stap ronem hem, oli wantem kilim hem i ded. (1 Samuel 23:7, 8, 19-23) Antap long hemia, Deved i gat ol slak fasin we hem i mas traehad blong winim. Hem i tokbaot samting ya long Ol Sam namba 40. Hem i talem se: “Naoia plante trabol oli stap kam raon long mi. Oli plante tumas, mi mi no save kaontem. Ol sin blong mi i kavremap mi, mo naoia mi no moa save lukluk. Oli plante tumas, i winim ol hea long hed blong mi.” (Sam 40:12) Deved i kasem ol trabol, be hem i no letem ol trabol ya oli winim hem. No gat. Oltaem hem i stap tingting long ol blesing we Jeova i givim, mo hem i luk se ol blesing ya oli plante moa i winim ol trabol we hem i kasem.
Taem yu harem se ol problem long laef oli kam plante tumas, no yu harem se yu no naf, i gud blong mekem olsem Deved, tingbaot ol blesing we yu stap kasem. I sua se bigfala tangkiu we yu gat long Jeova from ol blesing ya i bin pusum yu blong givim laef blong yu long hem. Tingting ya i save givhan long yu blong kasembak glad we yu bin lusum, mo i save halpem yu blong mekem wok blong God wetem hat we i fulap long tangkiu.
Ol Miting Blong Kongregesen i Save Givhan
I tru se yumi mas tingting dip long ol gudgudfala fasin blong Jeova, be hemia nomo i no naf. Yumi nidim tu blong joen wetem ol Kristin brata sista. Sipos yumi joen oltaem wetem ol man, woman mo pikinini we oli lavem God mo oli gat strong tingting blong mekem wok blong hem, samting ya bambae i leftemap tingting blong yumi bigwan. Eksampol blong olgeta i save pusum yumi blong mekem wok blong Jeova wetem ful laef blong yumi. Taem yumi go oltaem ol long miting long Haos Kingdom, samting ya tu i save leftemap tingting blong ol narafala.
I tru, taem yumi kambak long haos afta long wan strongfala dei blong wok, no taem tingting blong yumi i foldaon from wan problem no slak fasin, samtaem yumi harem se i no isi blong go long miting long Haos Kingdom. Long taem olsem, maet yumi mas stretem yumi wan, no ‘trenem bodi blong yumi,’ blong yumi obei long tok ya blong joen wetem ol Kristin brata sista.—1 Korin 9:26, 27; Hibrus 10:23-25.
Sipos yumi mekem olsem, hemia i min se yumi rili lavem Jeova. Ol faswan Kristin we oli bigman long tingting, mo we oli gat bigfala lav long God, oli mas mekem wan bigfala traehad blong gohed long wok blong God. (Luk 13:24) Aposol Pol i wan Kristin we i mekem olsem. Hem i talemaot tingting blong hem olsem se: “Mi mi save finis we fasin blong mekem ol gudgudfala samting, hem i no stap long tingting blong mi nating. Hemia i min se mi mi man nomo, mo i no fasin blong mi, blong mi mekem ol gudgudfala samting. I tru, mi gat tingting blong mi, se mi wantem mekem ol gudgudfala fasin, be mi no naf blong mekem. Nao oltaem mi no mekem ol gudgudfala fasin ya we mi wantem mekem, mi stap mekem ol rabis fasin ya, we mi no wantem mekem nating.” (Rom 7:18, 19) Mo hem i talem long ol Kristin long Korin, se: “Mi mi stap talemaot gud nius blong Kraes, be mi no gat raet blong tok flas from samting ya. Hemia i wok blong mi we mi mas mekem. . . . Sipos mi nomo mi jusumaot wok ya, hemia i min se i stret nomo blong mi kasem pei blong mi long hem. Be from we mi mi no jusumaot, hemia i min se Masta blong mi i mekem mi mi olsem slef blong hem.”—1 Korin 9:16, 17.
Pol i olsem plante long yumi, hem i gat sam slak fasin we i mekem se i hadwok blong gohed long ol gudgudfala samting we hem i wantem mekem. Nating se i olsem, hem i faet strong blong blokem ol nogud fasin ya, mo klosap oltaem, hem i winim. Pol i no mekem samting ya long prapa paoa blong hem. Hem i talem se: “Mi save mekem evri samting, long paoa blong Kraes ya we i stap mekem mi mi strong.” (Filipae 4:13.) Jeova nao i givim paoa long Pol. Yu tu, bambae hem i givim paoa long yu blong mekem ol gudfala samting, sipos yu askem hem blong givhan long yu. (Filipae 4:6, 7) Gohed blong “faet strong blong holem trutok ya we yumi bilif long hem finis,” nao Jeova bambae i blesem yu.—Jud 3.
I no yu wan we bambae i mekem faet ya. Long ol kongregesen blong ol Witnes blong Jeova, ol Kristin elda we oli bigman long tingting mo we oli stap gohed blong “faet strong blong holem trutok,” oli rere oltaem blong givhan long yu. Sipos yu askem wan elda blong halpem yu, bambae hem i “toktok gud blong leftemap tingting” blong yu. (1 Tesalonaeka 5:14, NW ) Bambae hem i wantem kam “olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren.”—Aesea 32:2.
“God i stamba blong fasin ya blong lavem man” mo hem i wantem se lav nao i mas pusum ol man blong hem blong mekem wok blong hem. (1 Jon 4:8) Sipos lav we yu gat long God i kam kolkol, traehad blong folem ol advaes olsem yumi tokbaot finis. Bambae yu glad se yu bin mekem olsem.