Halpem Narafala Blong Wokbaot Long Rod We Jeova i Wantem

“Oltaem mifala i stap prea from yufala, . . . mifala i stap askem long God blong yufala i . . . wokbaot long rod we Jeova i wantem. Nao bambae yufala i save mekem hem i glad mo bambae yufala i stap karem frut long ol gudfala wok we yufala i stap mekem.”​—⁠KOLOSI 1:​9, 10, NW.

1, 2. ?Wanem wan stamba samting we i save karem glad mo mekem yumi harem gud?

 “MIFALA i laef long wan smol haos we i gat wil mo trak i save pulum. Haos ya i stap long wan plantesin. From we mifala i no gat plante samting, mifala i gat moa taem blong talemaot gud nius long ol man ples. Mifala i gat janis blong halpem plante man blong oli givim laef blong olgeta i go long Jeova God.”​—⁠Hemia tok blong wan man mo woman blong hem we tufala i misinari long Saot Afrika.

² I tru se, taem yumi halpem ol narafala, yumi save haremgud tumas. Sam man oli traehad evri dei blong halpem ol sikman, olgeta we oli pua mo olgeta we oli no gat fren​—⁠mo oli haremgud tumas taem oli mekem olsem. Ol trufala Kristin oli sua se beswan rod blong givhan long ol man, hemia blong halpem olgeta blong save Jeova God mo Jisas Kraes. Save ya nomo i save mekem se oli bilif long sakrefaes blong Jisas, mo wokem wan gudfala fasin fren wetem God, nao biaen oli kam naf blong kasem laef we i no save finis. ​—⁠Ol Wok 3:​19-​21; 13⁠:⁠48.

3. ?Yumi nidim blong tingbaot wanem kaen help?

³ ?Be olsem wanem long olgeta we oli stap mekem wok blong God, oli stap folem “Rod blong Masta”? ?Yumi save halpem olgeta tu? (Ol Wok 19⁠:⁠9) Ating yu gat bigfala intres long olgeta, be maet yu no save olsem wanem yu save givhan moa, no givim help long olgeta oltaem. No maet sam samting long laef blong yu i mekem se yu no naf blong halpem olgeta, mo from samting ya maet yu no gat janis blong kasem glad ya we yu save kasem taem yu halpem ol narafala. (Ol Wok 20⁠:35) Yumi save lanem plante samting long saed ya taem yumi ridim buk blong Kolosi.

4. ?Pol i stap wea taem hem i raetem leta i go long ol man Kolosi? (b) ?Olsem wanem Epafras i joen long leta ya we Pol i raetem?

⁴ Taem aposol Pol i raetem leta i go long ol Kristin long Kolosi, hem i stap kalabus long wan haos long Rom. Nating se i olsem, ol man oli save kam luk hem. Pol i yusum eni janis blong talemaot Kingdom blong God. (Ol Wok 28⁠:​16-​31) Ol narafala Kristin oli save kam luk Pol, mo maet sam long olgeta oli bin stap long kalabus wetem hem. (Kolosi 1⁠:​7, 8; 4⁠:10) Wan long olgeta ya hemia Epafras, wan man we i wok strong blong talemaot gud nius. Hem i blong Kolosi, wan taon long Frijia, long flat ples we i stap long is saed blong Efesas, long Esia Maena (we tede hem i Teki). Epafras i bin givhan bigwan blong stanemap kongregesen long Kolosi, mo ol kongregesen long Laodisia mo Hierapolis. (Kolosi 4:​12, 13) ?From wanem Epafras i wokbaot i go long Rom blong luk Pol? ?Mo yumi lanem wanem long ol tok we Pol i raetem long taem ya?

Gudfala Rod Blong Halpem Ol Man Kolosi

5. ?From wanem Pol i raetem ol tok ya long ol man Kolosi?

⁵ Epafras i traehad, i go long Rom blong toktok wetem Pol long saed blong wanem we i stap gohed insaed long kongregesen blong Kolosi. Epafras i tokbaot ol Kristin ya se, oli holem bilif, oli gat lav, mo oli wok strong blong talemaot gud nius. (Kolosi 1:​4-8) Be tu, ating Epafras i talemaot sam wari we hem i gat long saed blong sam nogud samting we oli save spolem Kristin laef blong ol man Kolosi. Tabu spirit i lidim Pol blong raetem wan leta we i tok agensem sam long ol tingting we ol giaman tija oli stap talemaot. Hem i pulum tingting blong olgeta i go moa long stamba wok blong Jisas Kraes. * ?Olsem wanem Pol i givhan long olgeta? ?Hem i tokbaot nomo ol stamba trutok blong Baebol? ?Wanem narafala rod we hem i folem blong halpem ol Kristin long Kolosi, mo yumi lanem wanem long fasin ya blong hem blong halpem ol narafala?

6. ?Pol i makem wanem poen long leta we hem i raetem i go long ol man Kolosi?

 ⁶ Long fashaf blong leta blong Pol, hem i tokbaot wan rod blong halpem narafala, we maet samtaem yumi no tingbaot. Hemia wan gudfala rod we yumi save folem blong givhan long olgeta we oli stap longwe. Pol mo Epafras we tufala i stap longwe long Kolosi, tufala i folem rod ya. Pol i talem se: “Oltaem, taem mitufala i stap prea from yufala, mitufala i stap talem tangkiu long God ya we i Papa blong Jisas Kraes, Masta blong yumi.” Tufala i stap mekem ol prea we oli stret long nid blong ol Kristin long Kolosi. Pol i gohed se: “From samting ya, oltaem mitufala i stap prea from yufala, i stat long taem ya we mitufala i kasem nius blong yufala fastaem. Mitufala i stap askem long God, blong Tabu Spirit i mekem yufala i waes, yufala i luksave olgeta samting we God i wantem, blong bambae yufala i savegud olgeta.”​—⁠Kolosi 1:​3, 9.

7, 8. ?Plante long ol prea we yumi mekem yumi wanwan mo wetem kongregesen oli tokbaot wanem samting?

⁷ Yumi save se Jeova i man blong “ansa long ol prea,” taswe yumi save sua se hem i rere blong harem ol prea blong yumi we oli laenap wetem tingting blong hem. (Ol Sam 65⁠:2; 86⁠:6; Ol Proveb 15:​8, 29; 1 Jon 5:​14) ?Be taem yumi prea from ol narafala, ol prea ya oli mas olsem wanem?

⁸ Plante taem, maet yumi tingbaot mo prea from fulwan grup blong ‘ol brata blong yumi long evri ples long wol.’ (1 Pita 5⁠:⁠9) No maet yumi prea long Jeova from ol Kristin mo ol narafala man we oli laef long wan ples we i kasem wan bigfala trabol. Taem ol disaepol long faswan handred yia oli harem nius se ol man Judia oli sot long kakae, ating oli prea plante from ol brata blong olgeta bifo we oli sanem mane blong givhan long olgeta. (Ol Wok 11⁠:​27-​30) Tede, long ol Kristin miting, yumi harem plante taem we ol brata oli prea from olgeta brata long fulwol no from wan grup blong ol brata. Ale long taem ya yumi mas kasem save mo talem “Amen.”​—⁠1 Korin 14⁠:⁠16.

Mekem Ol Prea We Oli Klia Moa

9, 10. (a) ?Wanem eksampol i soem se i stret blong yusum nem blong man we yumi stap prea from? (b) ?Olsem wanem ol brata oli bin prea from Pol?

⁹ Baebol i givim sam eksampol long saed blong sam prea we oli klia moa. Tingbaot ol tok blong Jisas long Luk 22⁠:​31, 32. Ol 11 trufala aposol blong hem oli stap klosap long hem. Olgeta evriwan oli nidim we God i givhan long olgeta long ol hadtaem we bambae oli kam, mo Jisas i prea from olgeta. (Jon 17:​9-​14) Be taem hem i prea, hem i tokbaot klia ol nid blong Pita. I gat sam narafala eksampol: Elisa i prea long God blong i halpem wan man blong wok blong hem. (2 King 6:​15-​17) Aposol Jon i prea from Gaeas blong i no sik mo blong gohed gud oltaem long Kristin laef blong hem. (3 Jon 1, 2) Mo sam narafala man bakegen oli tokbaot klia sam grup blong man long prea blong olgeta.​—⁠Job 42:​7, 8; Luk 6:​28; Ol Wok 7:​60; 1 Timoti 2:​1, 2.

¹⁰ Ol leta blong Pol oli soem se i impoten tumas blong mekem ol prea we oli klia moa. Hem i askem ol brata blong prea from hem wan, no hem wetem ol narafala brata we oli stap wetem hem. Kolosi 4:​2, 3 i talem se: “Oltaem yufala i mas prea we tingting blong yufala i no slak. Tingting blong yufala i mas klia gud, mo oltaem yufala i mas talem tangkiu long God. Mo taem yufala i prea, plis yufala i prea from mifala tu, blong God bambae i openem rod long mifala blong mifala i save talemaot ol tok ya blong Kraes we fastaem i blong haed. Naoia mi mi stap long kalabus, be from samting ya nomo.” Tingbaot ol narafala eksampol we oli stap long ol vas olsem Rom 15⁠:30; 1 Tesalonaeka 5:​25; 2 Tesalonaeka 3⁠:1; Hibrus 13⁠:⁠18.

11. ?Taem Epafras i stap long Rom, hem i prea from hu?

¹¹ Epafras we i stap wetem Pol long Rom, hem tu i mekem olsem. “Epafras ya we hem tu i wan man blong yufala, hem tu i talem halo long yufala, . . . oltaem hem i stap prea strong from yufala.” (Kolosi 4:​12) Tok ya “strong” i save minim “faet strong,” olsem ol man blong resis long taem bifo. ?Epafras i stap prea strong from ol man blong bilif long fulwol no hem i stap prea from ol trufala man blong wosip we oli stap olbaot long Esia Maena? Pol i soemaot se Epafras i stap prea from ol brata long Kolosi. Epafras i save wanem we i stap hapen long laef blong ol Kristin ya. Yumi no save nem blong olgeta evriwan, mo yumi no save wanem problem we oli stap fesem, be tingbaot sam long ol samting we maet i stap hapen long laef blong olgeta. Maet yangfala Linus i stap faet agensem ol traem we oli kamaot from waes blong wol we plante man long taem ya oli stap  folem. Mo maet Rufus i nidim strong tingting blong lego ol fasin we hem i stap folem bifo, taem hem i joen long skul blong ol man Jiu. ?Mo olsem wanem long Persis? Hasban blong hem i no bilif, taswe maet hem i nidim blong stanap strong mo gat waes blong tijim ol pikinini blong hem long ol tok blong Masta. Mo tingbaot Asingkritas. Ating hem i nidim we narafala i leftemap tingting blong hem from we hem i gat wan sik we i mekem trabol long hem longtaem finis. Epafras i savegud olgeta we oli stap long kongregesen blong hem, mo hem i prea strong from olgeta. Hem mo Pol, tufala i wantem se ol Kristin ya oli wokbaot long rod we Jeova i wantem.

12. ?Olsem wanem yumi save mekem ol tok blong yumi oli klia moa taem yumi prea from narafala?

¹² Eksampol ya i soemaot wan rod we yumi save folem blong halpem ol narafala. Olsem yumi luk finis, ol prea we yumi mekem long ol Kristin miting, plante taem oli kavremap fulap samting from we i gat defdefren kaen man we oli lesin. Be taem yumi prea yumi wan no yumi wetem ol famle blong yumi, yumi save mekem ol tok blong yumi oli klia moa. Maet samtaem yumi askem God blong lidim mo blesem wok blong olgeta seket elda mo olgeta elda blong kongregesen. ?Be, samtaem yumi save klia moa long samting we yumi askem? Eksampol, taem yu prea maet yu save talem nem blong seket elda we i stap visitim kongregesen blong yu no nem blong brata we i lidim Buk Stadi blong yu. Filipae 2:​25-​28 mo 1 Timoti 5:​23 i soem se Pol i talemaot nem blong Timoti mo Epafrodaetas taem hem i wari long helt blong tufala. ?Yumi save mekem sem mak? Taem yumi prea, i gud yumi talem nem blong wan we yumi save se hem i sik. Long rod ya yumi soem se yumi intres long hem.

13. ?Wanem sam samting we i stret blong tokbaot long ol prea we yumi mekem yumi wan?

¹³ I tru se yumi no mas pusum nus long bisnes blong narafala, be i stret we ol prea blong yumi oli soemaot se yumi rili intres long olgeta we yumi save olgeta mo we yumi kea long olgeta. (1 Timoti 5:​13; 1 Pita 4:​15) Maet wan brata i lusum wok blong hem, mo yumi no save givim wan narafala wok long hem. Nating se i olsem, yumi save talem nem blong hem long prea blong yumi mo askem God blong givhan long hem long hadtaem we hem i kasem. (Ol Sam 37:​25; Ol Proveb 10⁠:⁠3) ?Yumi save wan olfala sista we i neva gat wan hasban mo pikinini from we tingting blong hem i strong blong folem rul ya blong mared nomo long wan “man blong Masta”? (1 Korin 7:​39) Long ol prea blong yu, yu save askem Jeova blong blesem sista ya mo halpem hem blong gohed strong long wok blong God. Wan narafala eksampol, hemia se maet tu elda i bin stretem wan brata we i mekem sin. I gud sipos sam samtaem tufala i tokbaot brata ya long prea blong tufala wanwan.

14. ?Olsem wanem yumi save mekem ol prea blong halpem ol narafala?

¹⁴ I gat plante man we yu save tokbaot olgeta long ol prea blong yu. Maet yu save samfala we oli nidim se Jeova i halpem olgeta, i mekem oli harem gud, i givim waes mo tabu spirit long olgeta, no wan long ol frut blong tabu spirit. From we yumi laef longlongwe long yumi, no from sam narafala risen bakegen, maet yu harem se yu no naf blong givim samting we ol narafala oli nidim no maet yu no naf blong go luk olgeta blong givhan long olgeta. Be, yu no mas fogetem blong prea from ol brata mo sista blong yu. Yu save se olgeta ya oli wantem wokbaot long rod we Jeova i wantem, be maet oli nidim we narafala i halpem olgeta blong gohed oltaem long rod ya. Wan rod blong halpem olgeta, hemia ol prea blong yu.​—⁠Ol Sam 18⁠:2; 20:​1, 2; 34⁠:15; 46⁠:1; 121:​1-3.

Wok Blong Mekem Narafala i Strong

15. ?From wanem yumi mas intres long lashaf blong Kolosi?

¹⁵ I tru se ol prea oli no rod ya nomo we yumi save folem blong halpem ol narafala, antap moa olgeta we oli klosap long yumi mo we yumi lavem olgeta tumas. Buk blong Kolosi i mekem poen ya i klia. Plante man blong hae save oli tingting se afta we Pol i tokbaot ol tijing mo givim sam gudfala advaes, hem  i tekem janis long leta ya blong talem halo long olgeta we hem i save olgeta. (Kolosi 4:​7-​18) Be, yumi faenem finis se ol laswan vas blong buk ya oli givim sam gudfala advaes long yumi, mo i gat sam moa samting we buk ya i save tijim yumi long hem.

16, 17. ?Yumi save talem wanem long saed blong ol brata we Kolosi 4:​10, 11 i tokbaot?

¹⁶ Pol i raetem se: “Aristakas ya we i stap kalabus wetem mi, hem i talem halo long yufala, mo Mak ya we i wan brata blong Banabas, hem tu i talem halo long yufala. Yufala i kasem tok blong hem finis. Sipos hem i pas long ples blong yufala, yufala i mas tekem hem, yufala i lukaot gud long hem. Mo Josua Jastas, hem tu i talem halo long yufala. Long olgeta laen blong Isrel we oli Kristin finis [no “we oli sakomsaes finis,” NW ], trifala ya nomo i stap givhan long mi blong talemaot long ol man we God i King, mo olgeta man oli mas obei long hem. Trifala ya i stap mekem mi mi harem gud tumas.”​—⁠Kolosi 4:​10, 11.

¹⁷ Long ples ya, Pol i talem nem blong sam brata we i stret blong hem i tingting moa long olgeta. Hem i se, ol man ya oli sakomsaes finis, i minim se oli blong laen blong ol man Jiu. I gat plante man Jiu long Rom we oli sakomsaes finis, mo sam long olgeta oli kam Kristin. Be olgeta ya we Pol i tokbaot olgeta, oli bin halpem hem. I luk olsem se olgeta ya oli no sem blong joen wetem ol Kristin ya we fastaem oli hiten man. Mo ating olgeta ya oli bin joen wetem Pol taem hem i go prij long ol narafala hiten man.​—⁠Rom 11⁠:13; Galesia 1:​16; 2:​11-​14.

18. ?Wanem gudfala toktok we Pol i talem long saed blong sam brata we oli kampani wetem hem?

¹⁸ Makemgud tok ya blong Pol: “Trifala ya nomo i stap givhan long mi.” Hem i yusum wan Grik tok long vas ya, we tok ya i kamaot wan taem nomo long Baebol. Plante man blong tanem Baebol i go long narafala lanwis, oli bin tanem tok ya i kam “leftemap tingting.” Be, i gat wan narafala Grik tok (pa·ra·ka·le’o) we Baebol i yusum blong talem “leftemap tingting.” Pol i bin yusum tok ya long ol narafala vas long leta ya, be long Kolosi 4⁠:​11, hem i yusum wan defren tok.​—⁠Matiu 5⁠:4; Ol Wok 4:​36; 9:​31; 2 Korin 1⁠:4; Kolosi 2⁠:2; 4⁠:⁠8.

19, 20. (a) ?Wanem mining blong tok we Pol i yusum blong tokbaot ol brata we oli givhan long hem long Rom? (b) ?Wanem sam samting we maet ol brata ya oli bin mekem blong halpem Pol?

 ¹⁹ Ol man ya we Pol i talem nem blong olgeta, ating oli bin mekem moa samting blong givhan long hem, oli no jes talem ol toktok nomo blong leftemap tingting blong hem. Long Kolosi 4:​11, Grik tok we oli tanem i kam “givhan,” ol man oli stap yusum samtaem blong tokbaot wan meresin blong kwaetem tingting we i wari. Folem Baebol ya New Life Version, yumi ridim vas ya olsem: “!Olgeta ya oli halpem mi tumas!” Mo Today’s English Version i talem olsem se: “Help we olgeta ya i givim long mi i bigwan tumas.” ?Wanem samting we maet ol Kristin brata ya oli bin mekem blong givhan long Pol?

²⁰ Ol man oli save kam luk Pol, be i gat plante samting we Pol i no save mekem. Hem i no save go aot blong pem ol samting we hem i nidim​—⁠olsem kakae mo klos blong koltaem. Hem i no save kasem ol buk blong stadi, no olting blong raetem leta. (2 Timoti 4:​13) Tingbaot, ating ol brata ya nao oli bin halpem Pol blong kasem ol samting ya. Maet oli go pem kakae blong hem no oli faenem sam narafala samting we hem i nidim. Maet Pol i wantem save nius blong wan kongregesen no i wantem leftemap tingting blong olgeta. From we hem i kalabus, hem i no save mekem olsem, ale, ol brata ya nao oli mas karem tok blong Pol i go long kongregesen mo oli karem nius blong kongregesen i gobak long hem. !Ol samting ya oli rili leftemap tingting blong Pol!

21, 22. (a) ?From wanem yumi intres long ol tok blong Kolosi 4:​11? (b) ?Olsem wanem yumi save folem eksampol blong olgeta ya we oli bin stap wetem Pol?

²¹ Long leta blong Pol, hem i tokbaot ol man ya we oli “givhan” long hem. Samting ya i halpem yumi blong save sam rod blong halpem ol narafala. Sam long olgeta ya, ating oli stap traehad blong wokbaot long rod we Jeova i wantem from we oli folemgud ol rul blong hem, oli kam long ol Kristin miting, mo oli joen long wok blong prij. I stret we yumi talem sam gudfala toktok blong presem olgeta. ?Be yumi save mekem moa? ?Yumi save “givhan” long olgeta olsem we ol man ya bifo oli givhan long Pol?

²² ?Yu yu save wan sista we i bin yusumgud waes blong hem blong folem ol tok blong 1 Korin 7⁠:37? Sipos sista ya i nogat sam famle klosap long hem, i gud we yu tingbaot hem taem yu mo famle blong yu i mekem sam samting tugeta. Maet yu save singaot hem i kam kakae wetem yufala no maet hem i save joen wetem yufala long wan smol lafet we yu mekem  wetem ol famle mo fren blong yu. Maet yu save askem hem blong joen wetem famle blong yu blong go long wan asembli no blong go spel long narafala ples. Ating yu save mekem plan wetem hem blong go pem olting long stoa. Yumi save mekem sem mak tu long ol woman no man we ol hasban no waef blong olgeta i ded, no olgeta we oli no save draev. Yu save glad tumas taem yu harem oli tokbaot ol samting we i hapen long laef blong olgeta mo yu save lanem plante samting from save we oli gat long saed blong kakae no klos blong pikinini. (Levitikas 19⁠:32; Ol Proveb 16⁠:31) Samting ya i save mekem se fasin fren blong yumi i kam strong moa. Nao, bambae oli no fraet blong askem yu blong givhan long olgeta sipos oli nidim blong pem sam meresin long stoa, no narafala samting olsem. Ol brata we oli stap wetem Pol long Rom oli givim help we i stret mo we i leftemap tingting blong Pol. Yu tu, yu save mekem sem mak. Long taem ya bifo mo tede tu, bigfala blesing we i kamaot hemia se lav blong ol brata i kam strong moa, mo yumi wantem moa blong mekem wok blong Jeova tugeta.

23. ?I gud sipos yumi wanwan i spenem taem blong yumi blong mekem wanem samting?

²³ Wanwan long yumi i save tingbaot ol eksampol we yumi bin tokbaot long stadi ya. Ol eksampol ya oli isi nomo, be oli mekem yumi tingbaot wanem we i stap hapen long laef blong ol brata mo sista blong yumi. Olsem nao bambae yumi save “givhan” moa long olgeta. Hemia i no min se yumi kam ol man blong givimaot help long olgeta man. Hemia i no mak blong ol brata ya we Kolosi 4:​10, 11 i tokbaot. Olgeta ya oli man blong “talemaot long ol man we God i King.” Help we oli givim i blong leftemap wok ya fastaem. Hemia sem samting we i mas pusum yumi blong givhan long narafala.

24. ?Wanem stamba risen we i mas pulum yumi blong prea from ol narafala mo givhan long olgeta?

²⁴ Yumi tokbaot ol narafala long ol prea blong yumi, mo yumi traem bes blong yumi blong mekem olgeta oli strong, from we: Yumi bilif se ol brata mo sista blong yumi oli wantem ‘wokbaot long rod we Jeova i wantem, nao oltaem bambae oli save mekem ol fasin we hem i glad long hem.’ (Kolosi 1:​10) Hemia i joen wetem wan narafala samting we Pol i tokbaot taem hem i raetem ol prea we Epafras i mekem blong bambae ol man Kolosi oli ‘stanap strong long bilif blong olgeta, we oli kasemgud fasin blong Masta blong yumi mo oli savegud hem, mo oli strong blong mekem olgeta samting we God i wantem.’ (Kolosi 4:​12) ?Olsem wanem yumi wanwan i save kasem mak ya? Bambae yumi luk.

[Futnot]

?Yu Yu Tingbaot?

• ?Olsem wanem yumi save givhan moa long ol narafala taem yumi mekem prea blong yumi wanwan?

• ?Long wanem rod sam Kristin oli ‘givhan’ long Pol?

• ?Wetaem yumi save ‘givhan’ long narafala?

• ?From wanem yumi wantem prea from ol brata sista blong yumi mo traem faenem rod blong givhan long olgeta?

[Kwestin]

[Tok blong pija long pej 18]

?Yu save singaot wan narafala Kristin blong joen wetem yu mo famle blong yu taem yufala i mekem samting tugeta?

[Credit Line]

Courtesy of Green Chimney’s Farm