Ol Kastom Blong Krismas—?Oli Folem Ol Kristin Fasin?

BIGFALA holide blong Krismas i stap kam klosap. ?Samting ya i minim wanem long tingting blong yu, famle blong yu, mo ol fren blong yu? ?Hem i wan spesel taem blong wosipim God, no hem i wan taem blong lafet mo taem blong harem gud nomo? ?Hem i wan taem blong tingbaot dei we Jisas Kraes i bon no wan taem blong ting nating long ol Kristin fasin?

Taem yu stap ridim ol kwestin ya, rimemba se maet ol kastom blong Krismas long kantri we yu stap long hem, oli defren long wan narafala kantri. Wan eksampol, long Meksiko mo ol narafala kantri blong Latin-Amerika, nem ya Krismas i no sem mak. Wan diksonari i talemaot se nem ya Krismas long Inglis “i kamaot long olfala Inglis tok ya Christes Masse, no Lames blong Kraes.” Be, long ol kantri blong Latin-Amerika oli singaotem taem ya se La Navidad, no Taem we Bebi i Bon, we i minim Kraes. Tekem smol taem blong tingbaot sam kastom blong Meksiko. Samting ya bambae i halpem yu wan blong gat tingting we i stret long saed blong holide ya.

Ol Posadas, “Trifala Waes Man Ya,” Mo Nacimiento

Lafet i stat long Desemba 16 wetem posadas. Buk ya Mexico’s Feasts of Life i talem se: “Taem blong posadas hemia ol naen dei blong majik we i go kasem Krismas. Hemia ol dei blong tingbaot wokbaot blong Josef mo Meri insaed long taon blong Betlehem, mo taem ya we ol man oli soem kaen fasin long tufala mo oli givim wan ples blong slip long tufala. Ol famle mo ol fren oli kam tugeta evri naet blong mekem ol pleplei blong soemaot ol sem samting we oli bin hapen long ol wanwan dei ya bifo we Jisas i bon.”

Folem kastom blong olgeta, ol man oli karem ol pija blong Meri mo Josef i go long wan haos mo oli singsing blong askem wan ples blong slip, no posada. Olgeta we oli stap long haos bambae oli singsing i gobak long olgeta ya we oli karem ol pija, gogo kasem we oli letem olgeta oli kam insaed long haos. Ale, wan smol lafet i stat, long taem ya oli fasem ae blong sam long olgeta mo oli givim stik long olgeta. Wan afta narawan oli mas traem blong brekem piñata, hemia wan bigfala graon pot we i flas gud we oli hangem long wan rop. Taem graon pot ya i brok, olgeta we oli joen long lafet oli tekem ol samting we i stap insaed (olsem loli, frut, mo ol samting olsem). Biaen i gat smol kakae mo dring, wetem miusik mo danis. I gat eit lafet blong posada we oli mekem long Disemba 16 go kasem Disemba 23. Long namba 24, oli mekem lafet blong Nochebuena (naet bifo long Krismas), mo ol famle oli traehad blong stap tugeta long taem ya blong mekem wan spesel kakae.

I no longtaem biaen, hem i Dei blong Niu Yia, wan taem blong lafet we ol man oli mekem tumas noes long hem. Long sapa blong Jenuware 5, hemia taem we ol Tres Reyes Magos (“trifala waes man”) oli karem ol pleplei blong ol pikinini i kam. Fulmak blong Niu Yia, hemia wan lafet we oli mekem long Jenuware 6, mo oli kakae rosca de Reyes (kek we i olsem ring). Taem oli kakae kek ya, wan man bambae i faenem wan smol doli insaed long kek blong hem. Smol doli ya i pija blong bebi Jisas. Man we i faenem doli ya hem nao bambae i rerem laswan lafet we evriwan bambae i joen long hem long Februari 2. (Long sam ples i gat tri smol doli, we oli olsem saen blong “trifala waes man ya.”) Ating yu luksave se lafet ya we i joen wetem Krismas, i gohed blong plante dei.

Long taem ya, nacimiento (ol pija we oli soem taem we Jisas i bon) hem i impoten tu. ?Wanem i hapen long taem ya? Long ol pablik ples mo long ol jos mo ol haos tu, oli wokem ol doli (bigwan no smolwan) long simen, wud, no graon, blong yusum long taem ya. I gat doli blong Josef mo Meri we tufala i nildaon fored long ples blong kakae blong ol anamol we i gat wan bebi, we i jes bon, i slip long hem. Plante taem long pleplei ya i gat ol man blong lukaot sipsip mo Los Reyes Magos (trifala waes man). Ples we ol doli ya oli stap long hem i wan haos blong  ol anamol, mo i gat sam anamol tu oli stap. Be impoten samting long medel blong ol doli ya hemia wan bebi we i jes bon, we long lanwis blong Spen oli singaotem hem se el Niño Dios (Pikinini God). Long dei jes bifo long Krismas, bambae oli putum doli ya, we i pija blong bebi we i jes bon, long ples blong ol anamol wetem ol narafala doli ya.

Faenemaot Moa Long Ol Kastom Blong Bebi Ya We i Jes Bon

Long saed blong lafet blong Krismas, olsem we olgeta man long wol oli savegud, buk ya The Encyclopedia Americana i talem se: “Plante long ol kastom we oli joen wetem Krismas tede, oli no ol prapa kastom blong Krismas. Defren olgeta, ol kastom ya, we Kristin jos i tekem, oli kamaot bifo long taem blong Kraes, mo oli no ol kastom blong ol Kristin. Saturnalia, wan lafet blong ol man Rom we oli mekem long medel blong manis Disemba, i laenap gud wetem ol samting we oli hapen long plante lafet blong Krismas we man i haremgud long hem. Eksampol, plante samting we oli mekem long lafet ya olsem fasin blong givim presen, mo fasin blong bonem ol kandel, ol man oli stap mekem tu long lafet Krismas.”

Long Latin Amerika, ol man oli folem ol kastom ya long saed blong bebi we i bon, wetem sam narafala wan bakegen. Maet yu gat tingting se ‘wea nao stamba’ blong ol kastom ya. I klia se, plante we oli wantem folem Baebol oli luksave se sam long ol kastom oli kamaot nomo long ol seremoni blong ol man Aztec. Wan niuspepa blong Meksiko, El Universal, i talem se: “Ol prija blong ol defren grup blong skul long taem ya, oli faenem se ol lafet long kalenda blong ol kastom blong ol Indian i laenap wetem wosip we i stap long kalenda blong ol Katolik. Ale oli yusum samting ya blong sapotem wok blong prij mo misinari wok blong olgeta. Ol lafet we ol Kristin oli mekem i go long god blong olgeta, i tekem ples blong ol lafet we ol Indian oli stap mekem i go long god blong olgeta bifo we Spen i rulum olgeta. Ol lafet mo kastom blong ol man Yurop oli meks wetem ol lafet blong ol Indian. Frut blong samting ya hemia se ol defren kastom mo bilif oli joen wanples, mo plante niufala tok long lanwis blong Meksiko oli kamaot tru long fasin ya.”

Buk ya The Encyclopedia Americana i eksplenem se: “Ol kastom long saed blong Taem we Bebi i Bon, i wan long ol faswan kastom we i kam wan haf blong lafet blong Krismas . . . Oli talem se Tabu Francis nao i statem fasin ya blong putum pija ya [haos blong ol anamol we Jisas i bon long hem] insaed long ol jos haos.” Stat long taem we Spen i rulum Meksiko, ol man oli mekem ol plei insaed long ol jos blong  soemaot taem ya we Kraes i bon. Ol prija blong grup ya we oli kolem Fransiskan, oli rerem ol pleplei ya blong tijim ol Indian long saed blong bebi Jisas taem hem i bon. Biaen, plante man oli savegud posadas. Nating se oli bin gat wanem tingting long stat, taem oli mekem ol lafet ya, fasin blong mekem ol posadas tede i rili soemaot tingting we i stap biaen long ol lafet ya. Sipos yu stap long Meksiko long stret taem blong lafet ya, bambae yu luksave no haremsave se tok ya we wan man i raetem long niuspepa ya El Universal i tru taem hem i talem se: “Ol posadas oli mas mekem yumi tingbaot wokbaot blong papa mama blong Jisas taem oli stap lukaot wan haos blong Pikinini blong God i bon long hem. Be, tede, ol posadas ya oli kam olsem wan taem nomo blong man i drong, i mekem ol samting we oli go bitim mak, kakae bitim mak, mekem ol samting we oli krangke, mo plante, plante moa fasin blong brekem loa.”

Tingting ya blong mekem nacimiento i kamaot from ol pleplei we oli mekem long ol jos long taem ya we Spen i rulum Meksiko. Maet sam man oli luk pleplei ya se hem i wan gudfala samting nomo. ?Be hem i soemaot stret wanem we i stap insaed long Baebol? Hemia wan kwestin we i gud blong tingbaot. Jisas mo famle blong hem oli no moa stap long haos blong ol anamol taem olgeta ya we ol man oli kolem olgeta trifala waes man oli kam​—⁠i luk olsem se oli man blong lukluk long sta blong faenemaot fiuja. Taem i pas finis, mo naoia Jisas mo famle blong hem oli stap long wan haos. Bambae yu intres tumas blong makem poen ya taem yu ridim stori ya long buk blong Matiu 2⁠:​1, 11 we Jeova i pulum ol man blong raetem. Mo tu, bambae yu makem se Baebol i no talem hamas man blong lukluk sta we oli stap long taem ya. *

Long Latin Amerika, oli mekem se trifala waes man ya oli tekem ples blong Santa Claus. Nating se i olsem, plante papa mama oli haedem ol pleplei long haos blong olgeta, olsem we ol man long ol narafala kantri oli stap mekem. Ale, long moning blong Jenuware 6, ol pikinini oli mas lukaotem ol pleplei ya we papa mama i haedem. Papa mama oli mekem olsem we trifala waes man ya nao oli bin karem ol pleplei ya i kam. Hemia wan taem we ol man blong salem ol pleplei oli winim bigfala mane, mo sam long olgeta oli kam rij from lafet ya we plante man we oli gat gudhat oli luksave se hem i wan kastom stori nomo. Bighaf blong ol man oli no moa bilif long stori blong ol trifala waes man ya, mo plante pikinini tu oli no moa bilif long hem. Samfala oli harem nogud from we ol man oli no moa stap bilif long stori ya. ?Nating se i olsem, wanem gudfala samting we man i save kasem from wan stori ya we man i folem nomo from kastom blong olgeta no from we oli save winim plante mane long hem?

Ol faswan Kristin oli no mekem lafet blong Krismas, no taem ya we Jisas i bon. Wan insaeklopedia i tokbaot samting ya i se: “Kristin jos blong ol faswan handred yia i no stap mekem lafet ya. Ol Kristin oli mekem lafet nomo blong tingbaot ded blong olgeta we oli bin mekem ol gudfala samting taem oli laef, i bitim dei we oli bon long hem.” Baebol i soemaot se ol lafet blong betde oli fasin blong ol hiten man nomo, mo oli no fasin blong ol trufala man blong wosip long God.”​—⁠Matiu 14:​6-​10.

I tru, samting ya i no minim se i nogud blong lanem mo rimemba ol samting we oli bin hapen long taem ya we Pikinini blong God i bon. Ol trufala pruf we oli stap insaed long Baebol oli givim ol impoten save mo lesen long olgeta we oli wantem mekem samting we God i wantem.

Taem We Jisas i Bon Folem Wanem We Baebol i Talem

Bambae yu faenem ol save we yu save trastem long saed blong taem ya we Jisas i bon, long ol Gospel blong Matiu mo Luk. Ol buk ya oli soem se enjel ya Gabriel i go talem wan mesej long wan yangfala woman we i no mared yet, we nem blong hem Meri, long taon blong Galili long Nasaret. ?Wanem  mesej we hem i talemaot? “Bambae yu yu gat bel, mo bambae yu save bonem wan pikinini boe blong yu, mo bambae yu putum nem blong hem, se Jisas. Hem bambae i wan haeman, mo ol man bambae oli save singaot hem, se Pikinini blong God ya we i hae we i hae. Hae God bambae i mekem hem i King, olsem King Deved, olfala bubu blong hem bifo. Hem bambae i King blong ol laen blong Jekob ya bifo, mo hem bambae i rul, gogo i no save finis.”​—⁠Luk 1:​31-​33.

Meri i sek bigwan long mesej ya. Hem i no mared yet, taswe hem i askem se: “Mi mi no save man yet. ?Bambae samting ya i save kamtru olsem wanem?” Enjel ya i ansa long hem i se: “Tabu Spirit bambae i kam long yu, mo paoa blong God ya we i hae we i hae, bambae i kavremap yu olsem wan sado. Nao from samting ya, pikinini ya blong yu bambae i tabu, i blong God, mo ol man bambae oli save singaot hem, se Pikinini blong God.” Naoia we Meri i luksave se hemia samting we God i wantem, hem i talem se: “Mi mi gel blong wok nomo blong Hae God. Mi wantem blong i kamtru long mi olsem we yu yu talem.”​—⁠Luk 1:​34-​38.

Wan enjel i talem long Josef se wan merikel bambae i kamaot blong pikinini ya i bon, mekem se Josef bambae i no moa divos long Meri olsem we hem i tingting blong mekem fastaem, taem hem i lanem se Meri i gat bel. Naoia, hem i rere blong mekem wok ya blong lukaot long Pikinini blong God.​—⁠Matiu 1:​18-​25.

Biaen, Sisa Ogastas i putumap wan loa blong sensas, mekem se Josef mo Meri tufala i mas aot long Nasaret long Galili mo go long Betlehem long Judia, blong oli rejistarem tufala long taon ya blong ol bubu blong tufala. “Mo taem tufala i stap yet long Betlehem, Meri i kasem stret taem blong hem blong bonem pikinini. Nao hem i bonem fasbon pikinini blong hem we hem i boe. Hem i kavremapgud pikinini ya long kaliko, mo i putum hem i stap slip long wan bokis we oltaem ol man oli stap putum gras long hem, blong ol anamol oli kakae. Tufala i mekem olsem, from we long hotel, i no gat rum blong tufala i stap long hem.”​—⁠Luk 2:​1-7.

Luk 2⁠:​8-14 i storebaot wanem we i hapen biaen, i se: “Nao i gat sam man blong ples ya we oli stap afsaed long vilej, oli stap lukaot long ol sipsip blong olgeta, long naet. Nao wan enjel blong Hae God i kamtru long olgeta, mo bigfala laet we i soemaot we Hae God i stap, hem i saen long olgeta. Nao olgeta oli fraet tumas, be enjel ya i talem long olgeta se, ‘Yufala i no fraet. Mi mi gat wan gud nius blong talem long yufala, we i save mekem olgeta man oli harem gud tumas. Long naet ya nomo, long vilej ya blong King Deved bifo, i gat wan pikinini i jes bon, we hem bambae i sevem yufala. Hemia man ya we God i promes finis blong sanem i kam. Hem i Mesaea ya we i Masta blong yumi. Mo saen blong samting ya i olsem. Bambae yufala i save faenem pikinini ya we oli kavremapgud hem long kaliko, nao oli putum hem i stap slip long wan bokis we oltaem ol man oli stap putum gras long hem, blong ol anamol oli kakae.’ Nao wantaem nomo, i gat fulap enjel blong heven oli kam joen wetem enjel ya, nao olgeta oli stap presem God, oli stap singsing se, ‘Long heven antap we antap, olgeta oli stap leftemap nem blong God. Mo long wol ya, pis i stap wetem ol man we God i glad long olgeta.’ ”

Ol Man Blong Lukluk Sta

Stori blong Matiu i tokbaot sam man blong lukluk sta we oli kamaot long Is oli kam long Jerusalem blong lukaot ples we King blong ol man Jiu ya i bon long hem. King Herod i intres tumas long samting ya​—⁠be intres ya i no kamaot from we hem i gat gudfala tingting. “Hem i talem long olgeta se, ‘Yufala i mas go lukaot pikinini ya, gogo yufala i faenem hem. Mo taem yufala i faenem hem, yufala i mas sanem tok i kam long mi, blong mi tu bambae mi go wosipim hem.’ Nao hem i sanem olgeta oli go long Betlehem.” Ol man blong lukluk sta oli faenem yangfala pikinini ya mo “oli openem ol basket blong olgeta, oli tekemaot ol presen blong givim long hem. Oli givim gol, mo frangkinsens, semkaen senta ya we ol pris oli stap bonem long wosip, mo mir, we i wan pomad we praes blong hem i antap tumas.” Be oli no gobak long Herod. “God i toktok long olgeta long wan drim, i blokem olgeta blong oli no gobak long King Herod.” God i yusum wan enjel blong i givim woning long Josef long saed blong ol samting we Herod i wantem mekem. Taswe, Josef mo Meri tufala i ronwe i go long Ijip wetem pikinini blong tufala. Biaen, from we rabis King ya Herod i wantem tumas blong kilim niufala King ya i ded, hem i talemaot se oli mas kilim evri boe long Betlehem. ?Ol weswan boe? Olgeta we yia blong olgeta i no bitim tu yia yet.​—⁠Matiu 2:​1-​16.

?Yumi Save Lanem Wanem Long Stori Ya?

Ol man ya blong lukluk sta, we yumi no save stret namba blong olgeta,oli no wosip long trufala God. Baebol ya La Nueva Biblia Latinoamérica (1989 Edition) i talem long wan futnot se: “Ol Waesman ya oli no ol king, be oli man blong talemaot fiuja mo oli pris blong ol hiten skul.” Oli kam nomo folem save blong olgeta long saed blong ol sta we oli stap wosipim. Sipos God i wantem tekem olgeta i go long yangfala pikinini ya, bambae hem i lidim olgeta oli  go long stret ples wantaem. I no nidim blong oli pastru long Jerusalem mo go luk Herod fastaem. Biaen nomo, God i mekem sam samting blong jenisim rod blong ol man ya from we hem i wantem protektem pikinini ya.

Long taem blong Krismas, ol man oli tingbaot stori ya olsem wan kastom stori mo wan samting we i naes nomo long tingting blong man. From samting ya, ol man oli no moa luksave wan samting we i impoten moa: hemia se bebi ya i bon blong i kam wan nambawan King, olsem we enjel i bin talem long Meri mo ol man blong lukaot sipsip. Tru ya, naoia Jisas Kraes hem i no moa wan bebi, no wan pikinini. Hem i King we i stap rul long Kingdom blong God, we i no longtaem bambae i finisim olgeta gavman we oli agensem wil blong God, mo bambae hem i finisim olgeta problem blong ol man. Hemia nao Kingdom we yumi stap askem long Lodsprea.​—⁠Daniel 2:​44; Matiu 6:​9, 10.

Yumi lanem wan samting long ol tok we ol enjel oli talem long ol man blong lukaot sipsip, hemia se evriwan we oli rere blong lesin long mesej blong gud nius oli gat janis blong kasem sef. Oli kam ol man we “God i glad long olgeta.” Ol man oli save kasem plante nambawan blesing blong pis long ful wol aninit long Kingdom blong Jisas Kraes, be oli mas rere fastaem blong mekem samting we God i wantem. ?Lafet blong Krismas i givhan long man blong mekem samting we God i wantem? Plante man we oli wantem mekem samting we Baebol i talem oli faenem se ansa blong kwestin ya i klia nomo.​—⁠Luk 2:​10, 11, 14.

[Futnot]

[Bokis blong pija long pej 4]

SAMFALA BAMBAE OLI SAPRAES

Tom Flynn, we i raetem buk ya The Trouble With Christmas, i tokbaot sam samting we hem i faenemaot afta we hem i spenem plante yia blong mekem dip stadi long Krismas:

“Plante long ol kastom we naoia yumi joenem wetem Krismas, stamba blong olgeta i kamaot long ol kastom blong ol hiten skul bifo long taem blong ol Kristin. Sam long ol kastom i mekem man i tingbaot fasin blong laef blong ol man, seks, no ol samting long skae. Samting ya i save pusum ol man we oli gat gudfala edukesen, no ol man long taem blong yumi we oli gat strong filing agensem ol kastom blong bifo, blong oli sakemaot ol kastom ya taem oli kasem save klia stamba blong olgeta.”​—⁠Pej 19.

Afta we Flynn i raetem plante toktok we i gat pruf, hem i kambak long wan stamba poen ya se: “Wan long ol narakaen samting long saed blong Krismas hemia se smol haf nomo blong hem i rili laenap wetem ol Kristin tijing. Bighaf blong ol kastom blong Krismas oli kamaot bifo Kristin taem, mo ol narafala haf oli kamaot nomo afta long taem blong ol Kristin, be i no gat wan long ol kastom ya we oli kamaot stret long Kristin skul.”​—⁠Pej 155.

[Tok blong pija long pej 7]

Mesej we enjel i talemaot se Jisas i bon, i soemaot wok ya we bambae hem i mekem long fiuja, hemia olsem King we God i jusum