?Pis Long Niufala Mileniam?

LONG Septemba 14, 1999, long Paris mo New York, Bigfala Asembli Blong Yunaeted Nesen i talemaot se yia 2000 bambae hem i wan Intenasnal Yia blong Wokem Laef We i Stanap Long Pis. Federico Mayor, we bifo hem i daerekta jenerol blong UNESCO, i askem strong “blong ful wol i wok tugeta blong wokem pis mo kwaet fasin.”

UNESCO i gat wan tok we i talem se “from we ol faet oli stat fastaem long tingting blong ol man, taswe hem i long tingting blong ol man we yumi mas wokem pis.” Folem tok ya, ogenaesesen ya i wantem yusum “edukesen, ol miting, mo fasin blong wokgud tugeta” blong leftemap fasin ya we i stanap long pis. Masta Mayor i talem se i no naf blong “ol man oli gat kwaet fasin, no blong oli agensem faet, be oli mas ol man blong mekem pis.”

Sore tumas, long yia 2000 i no bin gat tumas pis i stap. Nating se ol man oli traehad blong mekem pis, ol samting we oli hapen long taem blong yumi​—⁠mo tu, long yia 2000​—⁠oli soemaot klia se ol man oli no naf blong blokem faet no raf fasin.

Be, i gud blong makem se, pis i joen wetem edukesen. Samwe long 2,700 yia bifo, profet Aesea i talemaot se: “Mi nomo bambae mi tijim yufala, mi mekem we yufala i gat pis, mo yufala i gat gudfala laef.” (Aesea 54⁠:13) Semfala profet i tokbaot wan taem we bambae ol man blong olgeta nesen oli wokbaot i kam long klin wosip blong Jeova God blong Hem i tijim olgeta long ol fasin blong hem. ?Wanem i kamaot from? “Long taem ya, ol man bambae oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet.” (Aesea 2⁠:​2-4) Folem wanem we profet tok ya i talem, ol Witnes blong Jeova long fulwol oli joen long wan wok blong tijim ol man. Wok ya i givhan long plante milian man finis blong lego fasin blong no laekem man from kantri no kala blong olgeta, we hemia nao stamba blong bighaf blong ol faet.

Aninit long Kingdom blong God, bambae ol faet oli finis. Bambae pis mo seftaem oli stap long wol blong oltaem. (Ol Sam 72⁠:7; Daniel 2⁠:44) Long taem ya, ol tok blong man we i raetem Ol Sam bambae i kamtru se: “Yufala i kam, yufala i luk ol samting ya we Hae God i mekem. Yufala i luk ol bigbigfala wok ya we hem i mekem long wol. Hem i stap mekem ol faet i finis long olgeta ples long wol.”​—⁠Ol Sam 46⁠:​8, 9.