Wan Dokta Blong Ae i Planem Wan Sid

Wan dokta blong ae long Lviv, Yukren, i givhan blong stanemap wan kongregesen blong ol Witnes blong Jeova long Haifa, Isrel. Hemia wan niufala kongregesen we oli toktok lanwis Rasia. ?Olsem wanem dokta ya i givhan blong stanemap kongregesen ya we i stap 2,000 kilometa longwe long kantri blong hem? Stori ya i soemaot se tok blong Baebol we i stap long Prija 11:​6, i tru nomo se: “Yu mas planem ol kakae long garen blong yu long moning, mo long sapa tu, from we yu no save weswan bambae oli gru gud.”

STORI ya i stat long 1990, taem Ella, wan yangfala woman Jiu, i stap long Lviv. Ella mo famle blong hem oli stap rere blong muf i go long Isrel. Be smoltaem bifo we oli aot, Ella i go luk wan dokta blong ae we i wan Witnes blong Jeova. Long taem ya, gavman i putum tabu long wok blong ol Witnes blong Jeova long Yukren. Nating se i olsem, dokta ya i tekem janis blong storian wetem Ella mo i talemaot bilif blong hem we i stanap long Baebol. Ella i sapraes tumas taem i harem se God i gat wan nem. Samting ya i mekem  se Ella i wantem save moa, nao tufala i gat wan nambawan storian long saed blong Baebol.

Ella i laekem stori ya tumas, nao hem i askem long dokta ya sipos tufala i save gohed long sem storian long ol wik we i kam biaen. Intres blong hem i kam bigwan moa, be i gat wan problem i stap. Klosap nao bambae Ella mo famle blong hem oli muf i go long Isrel. !Fulap samting yet we Ella i mas lanem! Blong yusumgud smoltaem we i stap yet, Ella i askem blong stadi Baebol evri dei go kasem we hem i aot. Taem Ella i kasem Isrel fastaem, hem i no gohed long Baebol stadi blong hem. Nating se i olsem, trutok i gru finis long hat blong hem. Long en blong 1990, hem i stat bakegen blong stadi Baebol wetem strong tingting.

Faet i kamaot long Pesian Gulf, mo ol man Irak oli sutum ol roket bom i go long Isrel. Evridei ol man oli storian long saed blong faet ya. Wan dei, taem Ella i stap long stoa, hem i harem we wan famle i stap toktok long lanwis Rasia. Famle ya tu i jes muf i kam long Isrel. Nating se Ella i stap stadi Baebol hem wan, hem i storian wetem famle ya, mo i tokbaot promes blong Baebol long saed blong wan wol we i gat pis. Frut we i kamaot se bubu woman Galina, mama ya Natasha, boe blong hem, Sasha (Ariel), mo gel blong Natasha, Ilana, olgeta evriwan oli joen wetem Ella blong stadi Baebol.

Sasha i faswan long famle we i kasem mak ya blong tekem baptaes​—⁠nating se i gat plante traem. Long skul, wok blong Sasha i moa gud i winim ol narafala studen. Nating se i olsem, oli sakemaot hem long skul from we hem i no wantem tren blong kam wan soldia, we hemia i wan lesen long skul. Kristin tingting we i stap lidim hem i no letem hem blong mekem olsem. (Aesea 2:​2-4) Bisnes ya i kasem Hae Kot blong Isrel long Jerusalem, mo Kot ya i talem se Sasha i mas gobak long skul mo i mas finisim skul blong hem. Nius blong samting ya i kasem plante ples long Isrel. Frut we i kamaot se, plante man Isrel oli save bilif blong ol Witnes blong Jeova. *

Taem Sasha i finis long hae skul, hem i joen long fultaem wok blong prij, wok ya we plante Witnes blong Jeova oli stap mekem. Tede, Sasha i wan spesel paenia mo hem i elda long wan kongregesen. Sista blong hem, Ilana, hem tu i wan fultaem paenia. Mama mo bubu blong tufala, oli kam Witnes blong Jeova we oli baptaes finis. !Sid we dokta blong ae i bin planem, naoia i stap karem frut yet!

Long taem ya, Ella i stap gohed gud long Kristin laef blong hem mo smoltaem biaen, hem i go prij long ol haos wanwan. Long faswan haos, Ella i faenem Faina, we hem i jes aot long Yukren i kam long Isrel. Faina i harem nogud tumas long tingting blong hem. Biaen, hem i talem long Ella se bifo we Ella i kilkilim doa blong hem, hem i prea long God se: “Mi mi no save se yu yu hu, be sipos yu yu harem mi, plis yu givhan long mi.” Ella i mekem wan gudfala storian wetem Faina. Faina i askem plante kwestin mo i skelem gud ol ansa we Ella i givim long hem. Biaen, Faina i bilif se ol Witnes blong Jeova oli stap tijim trutok blong Baebol. Ale Faina i jenisim program we hem i stap folem blong stadi long yunivesiti, blong i spenem moa taem wetem kongregesen mo long wok blong prij. Long Mei 1994, Faina i baptaes. Hem tu i joen long wok blong paenia, mo i wok haftaem long kompiuta blong givhan long laef blong hem.

Long Novemba 1994, taem Ella i stap long  wok blong prij, wantaem nomo hem i harem se hem i slak we i slak. Hem i pas long hospital, mo taem oli jekemap hem, oli faenem se hem i gat wan soa long gat blong hem, mekem se hem i stap lusum blad. Long naet blong hem, aeon long blad blong Ella i godaon long 7.2. Wan elda long kongregesen blong Ella, we i jeaman long Hospital Liaison Committee (HLC) long ples ya, i go luk ol dokta mo i tokbaot plante rod blong winim sik we i no nidim blad. * Ol dokta oli katem Ella we oli no givim blad long hem, mo biaen hem i kamgud bakegen.​—⁠Ol Wok 15:​28, 29.

Dokta blong Ella, Karl, wan man Jiu we i bon long Jemani, hem i sapraes tumas. Biaen, Karl i tingbaot se papa mama blong hem, we tufala i laef tru long Holokos, * tufala i save sam Witnes blong Jeova long ol rabis kalabus. Karl i askem plante kwestin. Nating se hem i bisi long wok blong hem, hem i faenem taem blong stadi Baebol oltaem. Long yia we i kam biaen, hem i stat blong joen long ol Kristin miting.

?Sid we dokta blong ae i planem i karem wanem frut? Yumi luk finis wanem we i hapen long Sasha mo famle blong hem. Ella, hem i wan spesel paenia. Dota blong hem, Eina, we i jes kamaot long hae skul, i statem wok blong paenia. Faina tu i wan spesel paenia. Long saed blong Karl, dokta blong Ella, naoia hem i wan Witnes blong Jeova we i baptaes mo i wan man blong givhan. Hem i stap talemaot trutok blong Baebol long ol sikman we hem i stap lukaot long olgeta mo ol narafala man bakegen. Trutok ya we hem i stap talemaot, hem i gat paoa blong sevem man.

Smol grup ya blong man Isrel we oli toktok lanwis Rasia, fastaem i haf nomo blong Haifa Hibru Kongregesen, be naoia hem i kongregesen blong Rasia. Long kongregesen ya, i gat moa long 120 man mo woman we oli wok strong blong talemaot gud nius. Wan long ol samting we i mekem se i gat bigfala namba ya, hemia se wan dokta blong ae long Lviv i tekem janis blong planem wan sid.

[Ol futnot]

[Tok blong pija long pej 29]

(Lukluk niuspepa)

YUKREN

ISREL

[Credit Line]

Mountain High Maps® Copyright © 1997 Digital Wisdom, Inc.

[Tok blong pija long pej 30]

Ella mo gel blong hem, Eina

[Tok blong pija long pej 31]

Wan hapi grup blong ol Witnes long Haifa, we oli toktok lanwis Rasia. Kaontem long lefsaed i go long raetsaed: Sasha, Ilana, Natasha, Galina, Faina, Ella, Eina, mo Karl