?Yu Folem Trutok Wetem Fulhat Blong Yu?

“Yufala i mas letem God i jenisim tingting blong yufala, blong mekem tingting blong yufala i niuwan olgeta. Nao bambae yufala i save jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.”​—⁠ROM 12:⁠2.

1, 2. ?From wanem i no isi blong stap olsem wan trufala Kristin tede?

 LONG ol las dei ya we “laef long wol ya bambae i kam strong tumas,” i no isi blong stap olsem wan trufala Kristin. (2 Timoti 3:⁠1) Tru ya, blong folem eksampol blong Kraes, man i mas winim ol rabis fasin blong wol ya. (1 Jon 5:⁠4) Tingbaot wanem we Jisas i talem long saed blong rod we wan Kristin i folem: “Yufala i mas pas long get ya we i smol nomo blong go insaed. From we get ya we i bigwan, mo rod ya we i isi nomo, hemia i blong go lus. Mo plante man oli stap folem rod ya. Be get ya we i smol nomo, mo rod we i strong, hemia i blong go kasem laef. Mo smol man nomo oli faenem.” Hem i talem tu se: “Man we i wantem kam biaen long mi, hem i mas blokem ol samting we hem nomo i wantem, mo evri dei hem i mas karem [“pos,” NW ] blong hem i biaen long mi.”​—⁠Matiu 7:​13, 14; Luk 9:⁠23.

² Afta we wan Kristin i faenem smol rod ya blong laef, hem i mas faet strong blong stap oltaem long rod ya. ?From wanem hem i mas faet strong? Hemia from we, taem yumi givim laef blong yumi long God mo tekem baptaes, Setan i traehad moa blong kasem yumi long ol giaman trik blong hem. (Efesas 6:​11; futnot, NW ) Hem i luksave ol slak fasin blong yumi nao hem i traem yusum ol slak fasin ya blong spolem bilif blong yumi. From we hem i traem mekem Jisas i foldaon, yumi no mas ting se bambae hem i no traem mekem yumi tu yumi foldaon.​—⁠Matiu 4:​1-11.

Ol Giaman Trik Blong Setan

3. ?Olsem wanem Setan i mekem tingting blong Iv i hafhaf?

³ Wan trik we Setan i yusum, hemia blong mekem tingting blong yumi i hafhaf. Hem i jekemap ol klos blong faet blong yumi blong luk sipos yumi mestem wan. Long stat olgeta, hem i bin yusum rod ya blong trikim Iv, i askem se: “?Olsem wanem long frut blong ol tri long ples ya? ?I tru we God i blokem olgeta se i tabu, yutufala i no save kakae, no i no tru olsem?” (Jenesis 3:⁠1) I olsem we Setan i stap talem se: ‘?Yu ting se God i save putum wan tabu long yu olsem? ?Hem i save blokem yu blong yu no kasem samting ya we i gud tumas? God i talem olsem from we i save se sipos yu kakae frut ya, bambae ae blong yu i open, nao bambae yu kam olsem hem, we yu save ol fasin we i nogud mo ol fasin we i gud.’ Ol tingting ya we oli hafhaf, oli olsem wan sid we Setan i planem long tingting blong Iv, nao hem i wet blong sid ya i karem frut blong hem.​—⁠Jenesis 3:⁠5.

4. ?Wanem ol kwestin we maet oli save spolem tingting blong sam long yumi tede?

⁴ ?Olsem wanem Setan i yusum trik ya tede? Sipos yumi no ridim Baebol, yumi no stadi yumi wan, yumi no prea, mo yumi no joen long Kristin wok blong prij mo ol miting, bambae yumi no naf blong agensem ol tingting we oli hafhaf, we maet oli kamaot from toktok we narafala i talem. Eksampol, maet ol narafala oli pulum yumi blong tingting olsem: “?Yu yu sua se hemia nao trutok we Jisas i bin tijim?” “Yumi stap finis long ol yia 2000. ?I tru se hemia ol las dei?” “?Amageden i rili klosap, no i longwe yet?” ?Sipos ol kwestin ya oli kam long tingting blong yu, yu save mekem wanem blong karemaot olgeta?

5, 6. ?Yumi mas mekem wanem sipos plante kwestin oli kam antap long tingting blong yumi?

⁵ Jemes i givim wan advaes we i save givhan bigwan long yumi taem hem i raetem se: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem. Be taem yufala i prea, yufala i mas bilif tru, we tingting blong yufala i no hafhaf, from we man we tingting blong hem i hafhaf, hem i olsem wef blong solwota, we win i blu long hem, i mekem i go olbaot. Man we tingting blong hem i hafhaf olsem, we oltaem hem i stap tingbaot blong go long tu rod, i nogud hem i ting se bambae i save  kasem sam samting long Masta blong yumi.”​—⁠Jemes 1:​5-8.

⁶ ?Taswe, bambae yumi mekem wanem? Yumi “mas askem long God” oltaem, long prea, blong i givim bilif long yumi mo i givhan long yumi blong kasem save. Yumi mas askem hem blong i mekem yumi traehad moa blong stadi yumi wan long saed blong eni kwestin no tingting we i hafhaf. Mo tu, yumi save askem sam long olgeta we oli strong long bilif blong oli halpem yumi. Yumi mas sua fulwan se bambae Jeova i givim help we yumi nidim. Jemes i talem tu se: “Yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala. Yufala i mas stap klosap long God, nao hem bambae i kam stap klosap long yufala.” Yes, taem yumi stadi mo prea, yumi save kam klosap moa long God nao yumi no moa gat kwestin long tingting blong yumi.​—⁠Jemes 4:​7, 8.

7, 8. ?Wanem sam stamba samting blong luksave wosip ya we Jisas i bin tijim, mo hu olgeta we oli kasem ol mak ya?

⁷ Eksampol, tingbaot kwestin ya: ?Olsem wanem yumi save se wosip ya we yumi stap folem, hemia nao wosip we Jisas i bin tijim? ?Blong luksave trufala wosip bambae yumi lukluk long wanem? Baebol i makem klia se ol trufala Kristin oli mas lavlavem olgeta. (Jon 13:​34, 35) Oli mas ona long nem blong God, Jeova. (Aesea 12:​4, 5; Matiu 6:⁠9) Mo oli mas talemaot nem ya long olgeta man.​—⁠Eksodas 3:15; Jon 17:⁠26.

⁸ Wan narafala samting we i makemaot trufala wosip, hemia fasin blong tinghae long Tok blong God, Baebol. Nambawan buk ya nomo i soemaot ol fasin blong God mo ol stamba tingting blong hem. (Jon 17:17; 2 Timoti 3:​16, 17) Antap long samting ya, ol trufala Kristin oli talemaot Kingdom blong God. Hemia nomo hop we man i gat blong kasem laef we i no save finis long wan paradaes long wol. (Mak 13:10; Revelesen 21:​1-4) Ol trufala Kristin oli no joen long ol politik blong wol ya we oli fulap long kruked fasin, mo oli no joen long laef blong wol ya we i doti. (Jon 15:19; Jemes 1:27; 4:⁠4) ?Hu tede i rili stanap long saed blong ol samting ya? Ol pruf oli givim wan ansa nomo long kwestin ya se, hemia ol Witnes blong Jeova.

?Olsem Wanem Sipos Tingting We i Hafhaf i Stap Longtaem?

9, 10. ?Yumi save mekem wanem taem ol tingting we oli hafhaf oli stap longtaem long yumi?

⁹ ?Olsem wanem sipos yumi luksave se tingting blong yumi i fasfas tumas long plante kwestin? ?Yumi mas mekem wanem nao? Waes King Solomon i givim ansa: “Pikinini blong mi. Yu mas lanem ol samting ya we mi stap tijim yu long hem, mo yu no mas fogetem ol fasin ya we mi stap talem long yu se yu mas mekem. Yu mas lesin long ol waestok ya, mo yu mas traehad blong haremsave olgeta. Yes, yu mas askem strong long Hae God, blong i mekem yu yu gat save, mo yu mas askem long hem oltaem, blong yu save haremsave mining blong ol strong samting. Oltaem yu mas traehad blong kasem waes ya, olsem we yu save traehad blong faenem silva, no wan narafala samting olsem, we man i bin berem. Sipos yu stap mekem olsem, bambae yu save kasem mining blong tok ya we i talem se, ‘Yu mas tinghevi long Hae God, mo yu mas ona gud  long hem.’ Nao bambae yu save fasin blong hem moa, blong yu savegud hem.”​—⁠Ol Proveb 2:​1-5.

¹⁰ !Tingbaot nambawan samting ya! Sipos yu rere blong lesin mo traehad blong haremsave ol waestok blong God, bambae yu “savegud hem.” Yes, i no hadwok tumas long yumi blong kasem save long Haefala Masta blong heven mo wol. Be, yumi mas rere blong lesin mo tinghevi long ol tok blong hem. Hemia i min se yumi lukluk i go long Jeova tru long prea mo taem yumi stadi yumi wan. Ol sas save we oli haed insaed long Tok blong hem, oli save karemaot eni tingting we i hafhaf mo i save halpem yumi blong luk laet blong trutok.

11. ?From wanem man blong wok blong Elisa i fraet mo tingting blong hem i hafhaf?

¹¹ I gat wan gudfala eksampol we i soemaot olsem wanem prea i bin halpem wan man blong God we i fraet mo we tingting blong hem i hafhaf. Eksampol ya i stap long 2 King 6:​11-18. I gat sam samting we man blong wok blong Elisa i no luksave long tingting blong hem. Hem i no luksave se ol ami blong heven oli rere blong givhan long profet blong God, taem ol man blong Siria oli hivap raon long hem. Fraet i kasem man blong wok ya, nao hem i singaot se: “!Profet! !Naoia yumi lus finis! ?Bambae yumi mekem olsem wanem?” ?Elisa i talem wanem? “Yu no fraet. Olgeta long saed blong yumi oli plante moa, i winim olgeta ya.” ?Be olsem wanem man blong wok ya bambae i sua fulwan long tok ya? Hem i no save luk ol ami ya wetem prapa ae blong hem.

12. (a) ?Olsem wanem man blong wok ya i no moa gat tingting we i hafhaf? (b) ?Olsem wanem yumi save stretem eni tingting we oli hafhaf?

¹² “[Elisa] i prea se, ‘Hae God. Plis yu openem ae blong man ya, blong hem i luk paoa blong yu.’ Nao Hae God i openem ae blong man ya, mo hem i luk we hil ya we taon i stap long hem i fulap gud long faea we i olsem ol hos wetem ol kat blong faet we oli stap hivap raon long profet ya.” Long taem ya Jeova i mekem se man ya i save luk ol ami blong heven we oli stap raon long Elisa blong blokem hem long ol man nogud. Be, yumi no mas ting se tede bambae God i mekem sem samting ya long yumi. Tingbaot se, man ya we i wok blong profet Elisa i no gat fulwan Baebol yet blong stadi long hem mo mekem bilif blong hem i strong moa. Be yumi ya, yumi gat Baebol. Sipos yumi yusumgud buk ya, bambae bilif blong yumi tu i save kam strong moa. Eksampol, maet yumi save tingbaot ol defren stori blong Baebol we oli tokbaot Jeova we i sidaon long jea blong hem long heven. Ol stori ya oli soemaot klia nomo se Jeova i gat wan ogenaesesen blong hem long heven we i stap givhan long ol man blong hem tede, taem oli stap mekem wok blong tijim ol man long fulwol.​—⁠Aesea 6:​1-4; Esikel 1:​4-28; Daniel 7:​9, 10; Revelesen 4:​1-11; 14:​6, 7.

!Lukaot Long Ol Giaman Trik Blong Setan!

13. ?Wanem samting we Setan i yusum blong traem mekem yumi no moa holemstrong long trutok?

¹³ ?Wanem sam narafala rod we Setan i yusum  blong mekem yumi kam slak long bilif mo yumi no moa strong long trutok? Wan rod hemia olgeta rabis fasin long saed blong seks. Long wol tede, ol man oli krangke long saed blong seks. Fasin blong slip wetem hasban no waef blong narafala, i wan fasin we plante man oli no moa mekem wanwan taem nomo, be evri dei. Hemia i soemaot se laef blong ol man naoia i stanap long ol pleplei nomo mo tingting blong olgeta i strong blong gat gudtaem, nomata wanem frut we maet oli kasem from. Ol film, televisin, mo video kaset oli leftemap ol fasin ya. Ol rabis pija oli kamaot olbaot long ol buk, antap moa long Internet (kompiuta). Yes, trap i rere blong kasem eni man we i intres blong lukluk ol samting ya.​—⁠1 Tesalonaeka 4:​3-5; Jemes 1:​13-15.

14. ?From wanem sam Kristin oli foldaon long ol giaman trik blong Setan?

¹⁴ Sam Kristin we oli bin intres long ol samting olsem, oli foldaon long trap ya. Tingting blong olgeta mo hat blong olgeta i kam doti from we oli lukluk sam nogud pija long saed blong seks. Oli letem Setan i pulum olgeta mo i winim olgeta. Plante taem, fasin ya i mekem oli foldaon bigwan long saed blong spirit. Ol man olsem oli no traehad blong stap “olsem smol pikinini nomo we hem i no save fasin blong mekem sin.” Mo oli no ‘kam olsem we oli bigman finis, long tingting blong olgeta.’ (1 Korin 14:20) Evri yia, plante taosen man oli kakae frut blong disisen we oli tekem blong no fasgud long ol rul mo rod we Tok blong God i soem. Oli no putum mo holemtaet “olgeta klos blong faet, we God i givim” long olgeta.​—⁠Efesas 6:​10-13, NW; Kolosi 3:​5-10; 1 Timoti 1:​18, 19.

Holemtaet Samting We Yu Gat Finis

15. ?From wanem samfala maet oli faenem i had blong gat tangkiu from presen ya we oli kasem long saed blong spirit?

¹⁵ Jisas i talem se: “Bambae yufala i save trutok, mo trutok ya bambae i mekem yufala i fri man.” (Jon 8:32) Plante Witnes oli mas lego fasin blong laef blong olgeta bifo mo ol fren blong skul we oli gat fastaem. Taswe, maet oli gat moa tangkiu from we oli luksave se trutok i mekem oli fri. Be, sam yangfala we oli bin gruap wetem papa mama we i stap finis long trutok, maet oli faenem i had blong gat tangkiu long presen ya long saed blong spirit we oli kasem finis taem oli smol. Oli neva joen long wan giaman skul mo oli neva laef wetem ol man blong wol ya we oli ronem ol pleplei nomo, tekem ol drag mo mekem nogud fasin long saed blong seks. From samting ya, ol yangfala ya oli no luksave se paradaes long saed blong spirit we yumi stap long hem, i defren olgeta long kruked wol ya blong Setan. !Maet sam yangfala oli letem ol traem oli pulum olgeta blong testem posen blong wol ya blong faenem sipos i gat sam samting blong harem gud we oli stap mestem!​—⁠1 Jon 2:​15-17; Revelesen 18:​1-5.

16. (a) ?Wanem sam kwestin we yumi save askem long yumi wan? (b) ?Tijing we yumi kasem i leftemap tingting blong yumi blong mekem wanem?

¹⁶ ?Yumi rili nidim blong bonem ol fingga blong yumi blong haremsave se i olsem wanem taem man i soa mo i safa? ?Yu no ting se ol nogud frut we i kamaot long laef blong ol narafala i naf blong tijim yumi long samting ya? ?Yumi mas go long “sofmad” blong wol ya blong luk sipos i gat sam samting blong harem gud long hem we yumi stap mestem? (2 Pita 2:​20-22) Pita i mekem ol Kristin blong faswan handred yia oli tingtingbak long taem we oli bin stap long wol blong Setan bifo: “Longtaem tumas yufala i stap folem fasin blong ol man we oli no bilif long God. Bifo, oltaem yufala i stap mekem i nogud wetem woman, yufala i stap wantem ol samting nogud, mo yufala i stap dring we yufala i lusum hed. Bifo, oltaem yufala i stap mekem lafet blong ronem woman, mo blong dring grog blong kam fuldrong. Mo yufala i stap prea long ol narafala god long ol fasin we i no stret nating.” Tru ya, blong luksave se laef i nogud olsem wanem, yumi no nidim blong folem fasin blong ol man long  wol ya, “we oli no tingbaot wan samting, oli jes gohed nomo.” (1 Pita 4:​3, 4) Defren olgeta, yumi lanem ol rul blong Jeova long saed blong stret fasin taem yumi go long ol Haos Kingdom blong yumi, we long ol ples ya yumi kasem tijing blong Baebol. Mo yumi lanem blong yusum prapa tingting blong yumi blong luksave yumi wan se yumi stap long trutok. Nao long rod ya i olsem we yumi folem trutok wetem fulhat blong yumi.​—⁠Josua 1:8; Rom 12:​1, 2; 2 Timoti 3:​14-17.

Nem Blong Yumi i No Wan Tok Nomo We i Makemaot Yumi

17. ?Olsem wanem yumi save stap olsem ol Witnes blong Jeova we oli karem frut long laef blong olgeta?

¹⁷ Sipos yumi folem trutok wetem fulhat blong yumi, bambae yumi traem yusum eni rod blong serem trutok ya wetem ol narafala. Hemia i no min se bambae yumi traem fosem olgeta blong intres long trutok. (Matiu 7⁠:6) Be, i minim se bambae yumi no fraet blong soemaot se yumi Witnes blong Jeova. Sipos wan man i soem smol intres taem hem i askem wan kwestin no i glad blong tekem wan buk we i tokbaot Baebol, bambae yumi rere blong serem hop blong yumi wetem hem. Be i tru se, blong mekem olsem, oltaem yumi mas holem sam buk wetem yumi nomata weples yumi stap long hem​—⁠long haos, long wok, long skul, long stoa, no long ol narafala ples bakegen.​—⁠1 Pita 3:⁠15.

18. ?Sipos yumi soemaot klia se yumi Kristin, yumi wokem wanem rod blong stanap strong agensem ol trik blong Setan?

¹⁸ Taem yumi soemaot klia se yumi Kristin, bambae yumi naf moa blong stanap strong agensem ol trik blong Setan we oli haed. Sipos i gat wan betde no wan lafet blong Krismas no wan lotri long ofis, plante taem ol narafala man blong wok bambae oli talem se, “I no nid blong askem long hem. Hem i wan Witnes blong Jeova ya.” From semfala risen ya, ol man bambae oli lukaot gud blong no talem ol doti tok plei sipos yumi stap raonabaot long olgeta. Yes, taem yumi letem ol man oli save long Kristin bilif blong yumi, hemia i save givhan bigwan long yumi. Olsem aposol Pita i talem: “?Sipos yufala i stap traehad blong mekem ol gudfala fasin, hu man bambae i save spolem yufala? I no gat. Be sipos samtaem ol man oli mekem yufala i stap harem nogud long bodi blong yufala from gudfala fasin blong yufala, be long tingting blong yufala, yufala i save harem gud.”​—⁠1 Pita 3:​13, 14.

19. ?Olsem wanem yumi save se yumi stap long en blong ol las dei?

¹⁹ Mo tu, sipos yumi folem trutok wetem fulhat blong yumi, bambae yumi sua fulwan se yumi rili stap naoia long ol las dei blong wol ya. Bambae yumi save se plante long ol profet tok blong Baebol oli stap kamtru fulwan long taem blong yumi. * Woning blong Pol se ‘long lasdei, laef long wol ya bambae i kam strong tumas,’ i laenap stret wetem olgeta samting nogud we oli bin hapen long ol wan handred yia ya we oli jes pas. (2 Timoti 3:​1-5; Mak 13:​3-37) I no longtaem i pas i bin gat wan stori long niuspepa we i tokbaot ol yia 19 handred. Hem i karem stamba tok ya se “Bambae Yumi Tingbaot Ol Yia Ya Olsem Taem We Man i Wael Olgeta.” Stori ya i talem se: “Long seken haf blong ol yia 19 handred, we ol man oli kilim i ded moa man i bitim ol handred yia we oli pas, ol man oli kaontem se yia 1999 nao i bitim ol narafala yia long namba blong ol man we narafala i kilim olgeta i ded.”

20. ?Naoia i taem blong mekem wanem?

²⁰ Naoia i no taem blong gat wan tingting we i hafhaf. I klia nomo se Jeova i stap blesem bigfala wok ya blong tijim Baebol long ol man long fulwol blong givim witnes olsem we i neva hapen bifo. (Matiu 24⁠:14) Folem trutok wetem fulhat blong yu, mo serem trutok ya wetem ol narafala. Laef we i no save finis long fiuja i dipen bigwan long wanem we yu mekem naoia. Wan man we i les bambae i no save kasem blesing blong Jeova. (Luk 9⁠:62) Be, naoia i taem we yumi mas ‘stanap strong. Yumi no mas slak. Oltaem yumi mas wok strong long ol wok ya blong Masta blong yumi, from we yumi save finis, se taem yumi wok blong Masta ya blong yumi, be wok ya bambae i mas gat frut long hem.’​—⁠1 Korin 15:⁠58.

[Futnot]

?Yu Yu Tingbaot?

• ?Olsem wanem yumi save sakemaot ol kwestin we oli mekem tingting blong yumi i hafhaf?

• ?Yumi lanem wanem from stori blong man blong wok blong Elisa?

• ?Oltaem nomo yumi mas stap wekap blong faet agensem wanem traem?

• ?From wanem yumi no mas haedem se yumi Witnes blong Jeova?

[Kwestin]

[Tok blong pija long pej 10]

Stadi Baebol oltaem mo prea i halpem yumi blong ronemaot ol kwestin we oli mekem tingting blong yumi oli hafhaf

[Tok blong pija long pej 11]

Wan vison i givhan long man blong wok blong Elisa blong i no moa gat tingting we i hafhaf

[Tok blong pija long pej 12]

Long ol Haos Kingdom olsem hemia long Benin, Jeova i tijim yumi long ol bigfala rul blong hem long saed blong fasin we i gud