Laef Stori

Jeova i Givim Paoa Long Mi Long Ful Laef Blong Mi

FORREST LEE I TALEM STORI YA

Polis i tekemaot ol gramafon blong mifala wetem olgeta buk we mifala i gat long saed blong Baebol. Seken Bigfala Faet Blong Wol i givim gudfala eskius long ol man we oli agensem mifala, blong pulum niufala jenerol we i rul long kantri blong Kanada, blong putum tabu long wok blong ol Witnes blong Jeova. Samting ya i hapen long Julae 4, 1940.

MIFALA i no fraet long samting we i jes hapen long mifala. Mifala i go tekem sam moa buk bakegen long ples we mifala i stap kipim ol buk long hem, nao mifala i gohed long wok blong prij. Bambae mi neva fogetem samting we Papa i talem long taem ya: “Yumi no save stop from smol samting olsem. Jeova i givim oda long yumi blong prij.” Long taem ya, mi mi wan yangfala blong ten yia we i gat fulap paoa. Be kam kasem tede, strong tingting we Papa i gat mo faea we i laet long hem blong mekem wok blong prij, oli mekem mi mi tingbaot oltaem se God blong yumi, Jeova, i givim paoa long ol man we oli stap tru long hem.

Nekis taem we polis i stopem mifala, oli no tekemaot ol buk nomo be oli tekem Papa tu i go kalabus, mekem se Mama i stap hem wan blong lukaot long fofala pikinini long haos. Hemia i hapen long Septemba 1940 long Saskatchewan. Smoltaem biaen, skul i sakemaot mi from we mi folem tingting blong mi we Baebol i trenem blong no salut long flag mo no singim sing blong kantri. Mi gohed long edukesen blong mi taem mi skul long haos nomo, mo mi joen moa long wok blong prij.

Long 1948 wan tok i singaot olgeta paenia, ol Witnes blong Jeova we oli prij fultaem, blong oli go long is haf blong Kanada, klosap long solwota. Taswe, mi mi go blong paenia long Halifax, Nova Scotia, mo Cape Wolfe, hemia long aelan blong Prince Edward. Wan yia biaen, mi agri taem ol brata oli singaot mi blong go wok tu wik long branj ofis blong ol Witnes blong Jeova long Toronto. Be tufala wik ya oli jenis i kam sikis yia mo oli karem plante blesing long mi. Biaen mi mitim Myrna, we i lavem Jeova olsem mi, mo mitufala i mared long Desemba 1955. Mitufala  i go stap long Milton, Ontario, mo i no longtaem biaen, wan kongregesen i stanap long ples ya. Mitufala i yusum rum we i stap aninit long haos blong mifala blong mekem Haos Kingdom long hem.

Wantem Blong Mekem Wok Blong Prij i Go Moa

Long ol yia we oli kam biaen, mitufala i gat sikis pikinini we oli bon wan afta long narawan. Fasbon hem i wan gel we nem blong hem Miriam. Biaen i gat Charmaine, Mark, Annette, Grant, mo laswan hemia Glen. Plante taem we mi kamhom afta long wok, mi faenem olgeta pikinini ya oli stap sidaon raon long ples blong faea, oli stap lesin long Myrna we i ridim wan haf blong Baebol long olgeta. Hem i talem ol defren stori blong Baebol long ol pikinini blong mitufala blong mekem se oli lavem Jeova wetem fulhat blong olgeta. From we Myrna i rere blong givhan long mi long saed ya, olgeta pikinini blong mitufala oli kasem wan gud save long saed blong Baebol taem oli yang yet.

Fasin blong Papa blong wok strong long wok blong prij i olsem wan faea we i laet insaed long hem. Samting ya i makem gud tingting mo hat blong mi. (Ol Proveb 22:⁠6) Taswe, long 1968, taem Sosaeti i askem sam famle blong ol Witnes blong Jeova blong go stap long Sentrol mo Saot Amerika blong givhan long wok blong prij long ol ples ya, famle blong mifala i wantem go. Long taem ya, ol pikinini blong mitufala oli gat yia we i stat long 5 kasem 13, mo i no gat wan long mifala we i save toktok lanwis blong Spen. Afta we mi lesin long advaes we ol brata oli givim, mi wokbaot mi wan i go long ol defren kantri blong jekem se laef long ol ples ya i olsem wanem. Taem mi kambak long trep ya, mifala evriwan long famle i prea wanples mo tingbaot ol defren jus we i stap mo biaen mifala i tekem disisen blong go long Nicaragua.

Wok Long Nicaragua

Taem Oktoba 1970 i kam, mifala i stap finis long niufala hom blong mifala, mo tri wik biaen, mi kasem wan smol tok blong mekem long program blong miting blong kongregesen. Mi traehad bigwan wetem smol save we mi gat long lanwis Spen, nao long en blong tok ya mi askem evriwan long kongregesen blong kam long haos blong mifala long haf pas 9 long Sarede moning blong mekem wan cerveza. Mi mi wantem talem servicio, we i minim wok blong prij, be mi mestem nao mi talem narafala tok ya we i minim se evriwan i mas kam long haos blong mifala blong dring bia. !Tru tumas, i no isi blong lanem niufala lanwis ya!

Fastaem, mi raetem long han blong mi, olgeta tok we bambae mi talem, mo mi lanem baehat taem mi stap wokbaot i go long ol haos wanwan. Long toktok blong mi, mi stap talem se, “Taem man i tekem buk ya mifala i mekem fri Baebol stadi wetem hem long haos blong hem nomo.” Wan man we i agri long wanem we mi mi talem, hem i eksplenem long mi biaen se, hem i mas kam long miting blong mifala blong faenemaot wanem samting ya we mi bin talem long hem. Man ya i kam wan Witnes blong Jeova. !Olsem we aposol Pol i talem, i klia nomo se  God nao i stap mekem ol sid blong trutok oli gru long hat blong ol man we tingting blong olgeta i stap daon!​—⁠1 Korin 3:⁠7.

Afta we mifala i stap klosap tu yia long bigfala taon ya Managua, Sosaeti i askem mifala blong muf i go long saot blong Nicaragua. Long ples ya mifala i wok wetem kongregesen we i stap long Rivas mo ol narafala smosmol grup blong man we oli stap longwe long taon mo we oli intres long trutok. Pedro Peña, wan olfala Witnes we i stanap strong longtaem long bilif, i folem mi taem mi go blong visitim ol smosmol grup ya longwe. Wan long ol grup ya i stap long wan aelan blong volkeno long medel blong Lek Nicaragua. I gat wan famle nomo long ples ya we oli Witnes blong Jeova.

Nating se famle ya i no gat plante samting long laef, hem i traehad bigwan blong soem tangkiu long mifala we i kam. Taem mifala i kam kasem ples blong olgeta long naet, kakae i rere finis. Mifala i stap wetem olgeta blong wan wik. Plante long ol man long aelan ya oli laekem Baebol mo oli glad blong serem kakae blong olgeta wetem mifala. Mifala i glad tumas, taem 101 man oli kam long pablik tok long Sande.

Long wan narafala taem, mi luksave se Jeova i rili stap givhan long mifala wetem paoa blong hem. Hemia taem we mifala i mas go visitim wan grup blong man we oli intres long trutok, long ol bigfala hil klosap long mak we i seraotem Nicaragua long Costa Rica. Long dei we mifala i mas aot, Pedro i kam blong pikimap mi, be mi stap ledaon long bed from we mi kasem malaria. Mi talem long Pedro se bambae mi no save go. Hem i putum han blong hem long hed blong mi, nao i talem se: “I tru se yu fiva strong, be, yu mas kam. Ol brata oli stap wet long yumi.” Ale, hem i prea wetem fulhat blong hem, neva bifo mi bin harem wan man i prea olsem.

Biaen, mi talem se: “Yu go karem wan fresco (wan dring we oli mekem long jus blong frut) blong yu. Bambae mi rere long ten menet.” Tu famle oli stap long ples ya we mitufala i mas go visitim, mo oli lukaotgud long mitufala. Long nekis dei, mitufala i go prij wetem olgeta, nating se fiva i mekem bodi blong mi i slak tumas. Taem miting blong Sande i kam, mo mi luk we bitim wan handred man oli stap, samting ya i rili leftemap tingting blong mi.

Mifala i Muf Bakegen

Long 1975, namba seven pikinini blong mitufala i bon. Nem blong hem Vaughn. Long yia we i kam biaen, mifala i mas gobak long Kanada from sam problem long saed blong mane. I no isi blong lego Nicaragua, from we long ples ya mifala i rili bin luksave paoa blong Jeova we i stap givhan long mifala. Long taem we mifala i lego kantri ya, i gat bitim 500 man long eria we kongregesen blong mifala i lukaot long hem, we oli stap kam long ol miting.

Bifo long samting ya, taem gel blong mitufala, Miriam, mo mi, mitufala i statem wok blong spesel paenia long Nicaragua, Miriam i askem long mi se: “Papa. ?Sipos wan dei yufala i mas gobak long Kanada, bambae yu save letem mi mi stap long ples ya?” Mi neva ting se bambae mifala i nidim blong gobak samtaem, taswe mi bin talem long hem se: “!O yes, i oraet nomo!” From samting ya, taem mifala i lego Nicaragua, Miriam i stap mo i gohed wetem wok blong prij fultaem. Biaen hem i mared wetem Andrew Reed. Long 1984, tufala i joen long klas namba 77 long Gilead Skul, hemia wan misinari skul blong ol Witnes blong Jeova we i stap long Brooklyn, New York. Naoia, Miriam mo hasban blong hem, tufala i wok olsem misinari long Dominikan Ripablik. Hemia nao wok we Miriam i bin wantem tumas blong mekem bifo, taem hem i luk nambawan eksampol blong ol misinari long Nicaragua.

Long saed blong mi, ol tok ya blong Papa se “yumi no save stop from smol samting olsem,” i stap yet long hat blong mi. Taswe long 1981, afta we mifala i bin sevem inaf mane, mifala i gobak long Sentrol Amerika, be long Costa Rica. Taem mifala i stap long ples ya, Sosaeti i askem mifala blong joen long wok blong bildim sam niufala branj ofis. Be, long 1985, boe blong mitufala, Grant, i sik bigwan mo mifala i mas gobak long Kanada blong pas long ol spesel dokta. Narafala boe blong mitufala, hemia Glen, i stap long Costa Rica blong givhan long niufala plan blong bildim branj ofis. Tufala gel blong mitufala,  Annette mo Charmaine, tufala i gohed long wok blong spesel paenia. Mifala we i lego Costa Rica, mifala i neva gat tingting se bambae mifala i no moa save kambak, nogat.

Fesem Hadtaem

Long Septemba 17, 1993, skae i klia gud mo san i saen. Mi wetem bigfala boe blong mi, Mark, mitufala i stap wok antap long ruf blong wan haos. Mitufala i wok klosap long mitufala mo mitufala i stap storebaot ol samting long saed blong spirit, olsem oltaem. Nao, maet mi lei tumas long wan saed, ale wantaem nomo mi rol aot long ruf mo mi foldaon i kasem graon. Taem mi wekap bakegen, mi luk ol bigfala laet mo ol man we oli werem waet klos. Mi stap long wan rum long hospital.

From ol tijing blong Baebol, faswan samting we mi talem hemia se: “!Mi no wantem tekem blad!” (Ol Wok 15:​28, 29) Tingting blong mi i kam kwaet taem mi harem Charmaine i talem se: “Yu no wari Papa. Mifala evriwan i stap.” Biaen oli talem long mi se ol dokta oli bin faenem kad blong mi, mo oli neva tingbaot blong fosem mi blong tekem blad. Nek blong mi i brok mo bodi blong mi i no moa save muf, mi no naf tu blong pulum win mi wan.

Naoia we mi no moa save mekem wan samting, mi nidim tumas we Jeova i givim paoa long mi. From we oli pusum wan paep i godaon long maot blong mi blong givhan long mi blong pulum win, samting ya i mekem se mi no moa gat voes. Mi no save toktok. Ol man oli mas lukluk maot blong mi blong kasem save long wanem we mi wantem talem.

Ol kaon blong mifala oli kam antap bigwan. Waef blong mi mo klosap evri pikinini blong mi, oli joen long wok blong prij fultaem. Taswe, mi tingbaot olgeta se maet bambae oli mas lego wok ya blong winim smol mane blong pem ol kaon ya. Be, Mark i faenem wan wok we i mekem se long tri manis nomo, mifala i pembak bighaf blong ol kaon ya. From samting ya, ol narafala memba blong famle oli gat janis blong gohed long wok blong prij fultaem. Mi nomo wetem waef blong mi, mitufala i stop.

Ol wol blong rum blong mi long hospital oli fulap wetem olgeta handred kad mo leta we ol brata sista oli sanem i kam long sikis defren kantri. Jeova i stap givim paoa long mi. Kongregesen tu, i halpem famle blong mi long saed blong kakae long faef manis haf ya we mi stap long hospital. Evri dei, wan Kristin elda i spenem aftenun wetem mi. Hem i ridim wan haf blong Baebol no ol buk long saed blong Baebol, wetem sam ekspiriens tu long mi. Tu memba blong famle blong mi oli joen wetem mi blong rerem ol wanwan miting blong kongregesen, long rod ya mi neva mestem ol kakae long saed blong spirit.

Taem mi stap yet long hospital, ol brata oli mekem plan blong mi go long wan spesel dei asembli. Hospital i jusumaot tu nes we oli nafgud, blong tufala i save go wetem mi long dei ya we bambae mi stap long asembli. !I gud tumas blong stap bakegen wetem ol Kristin brata mo sista blong mi! Bambae  mi neva fogetem taem ya we plante man tumas oli mekem laen blong kam sekhan long mi.

Stanap Strong Long Saed Blong Spirit

Klosap wan yia afta long aksiden ya, mi gobak long haos wetem famle blong mi, be mi nidim yet blong ol nes oli lukaot long mi long dei mo naet. Wan spesel bas i givhan long mi blong go long ol miting, mo mi traehad blong no mestem wan. Be, i tru se blong mekem olsem, mi rili nidim strong tingting. Stat long taem ya we mi kambak long haos, mi no mestem wan distrik asembli yet.

Samtaem biaen, long Februari 1997, mi stat bakegen blong toktok smosmol. Sam long ol nes we oli lukaot long mi, oli glad blong lesin taem mi serem wetem olgeta, hop we Baebol i givim long mi. Wan nes i ridim fulwan buk ya Jehovah’s Witnesses​—⁠Proclaimers of God’s Kingdom wetem sam narafala buk blong Watch Tower long mi. Mi yusum wan stik blong wok long wan kompiuta olsem nao mi save raet i go long narafala man. I tru se rod ya i tektaem mo i mekem mi mi taed, be mi harem gud tumas blong yusum rod ya blong gohed blong joen long wok blong prij.

From we ol nev blong mi oli stap soa, samtaem mi save harem i nogud tumas. Be, taem mi serem ol trutok blong Baebol wetem ol narafala, no taem mi harem narafala i ridim ol tok ya long mi, i olsem se samting ya i karemaot soa blong mi blong smoltaem. Wanwan taem, mi prij long rod wetem waef blong mi we i givhan long mi blong eksplenem samting we mi wantem talem taem man i no kasem save. Samtaem mi gat janis blong mekem wok blong haftaem paenia. Mo tu, wok blong Kristin elda i mekem mi mi glad tumas, antap moa taem ol brata oli kam luk mi long ol miting no taem oli visitim mi long haos blong mi mo mi save halpem olgeta mo leftemap tingting blong olgeta.

Mi luksave se tingting blong mi i save foldaon isi nomo. Taswe, enitaem we tingting blong mi i harem nogud, mi prea kwiktaem long God blong kasem glad. Long naet mo long dei mi prea long Jeova blong hem i givim paoa long mi. Oltaem, mi harem gud tumas taem mi kasem wan leta no narafala i visitim mi. Mo tu, taem mi ridim ol Wajtaoa mo Wekap! mi putum tingting blong mi i stap long ol samting we oli gud. Ol nes we oli lukaot long mi, samtaem oli ridim ol magasin ya tu long mi. Afta we mi aksiden, mi bin lesin long riding blong Baebol long kaset, seven taem. Hemia wan long ol rod we Jeova i bin yusum blong givim paoa long mi.​—⁠Ol Sam 41:⁠3.

Jenis ya we i kamaot long laef blong mi i givim taem long mi blong tingting dip long rod we Bigfala Tija blong yumi, Jeova, i stap tijim yumi blong laef. Hem i givim stret save long saed blong ol plan blong hem mo stamba tingting blong hem. Hem i givim wan wok long yumi we i mekem laef blong yumi i gat mining. Hem i givim advaes blong mekem famle i hapi, mo hem i givim fasin luksave blong yumi save wanem blong mekem long taem blong trabol. Jeova i blesem mi bigwan taem hem i givim wan gudfala waef long mi we i strong long bilif. Ol pikinini blong mi tu, oli stap sapotem mi oltaem, mo mi glad tumas se olgeta evriwan oli joen long wok blong prij fultaem. Long Maj 11, 2000, boe blong mitufala, Mark, wetem waef blong hem Allyson, tufala i kasem stefeket long klas 108 long Gilead Skul mo tufala i go mekem wok blong misinari long Nicaragua. Mi mo waef blong mi, mitufala i gat janis blong go long taem ya we tufala i kasem stefeket. Mi rili save talem se ol hadtaem oli jenisim laef blong mi, be oli no jenisim hat blong mi.​—⁠Ol Sam 127:​3, 4.

Mi tangkiu long Jeova from waes we hem i givim long mi, mekem se mi naf blong pasem gudfala presen ya long saed blong spirit we mi bin kasem long papa blong mi, i go long ol pikinini blong mi. Taem mi luk ol pikinini blong mi oli mekem wok blong God wetem sem tingting olsem papa blong mi we i talem se, “Yumi no save stop from smol samting olsem. Jeova i givim oda long yumi blong prij,” samting ya i givim paoa long mi mo i leftemap tingting blong mi. Yes, Jeova i givim paoa long mi mo famle blong mi long ful laef blong mifala.

[Tok blong pija long pej 24]

Wetem Papa, ol brata blong mi, mo sista blong mi, klosap long haos trak we mifala i bin yusum taem mifala i stap paenia. Mi mi stap long raetsaed

[Tok blong pija long pej 26]

Wetem waef blong mi, Myrna

[Tok blong pija long pej 26]

Wan foto blong famle blong mi we mifala i tekem i no longtaem

[Tok blong pija long pej 27]

Mi gohed yet blong raetem leta blong prij long man