?Ol Skul Bambae Oli Putum Pis Long Wol?

STAT long Ogis 28 kasem Ogis 31, 2000, moa long 500 lida blong skul we oli kamaot long 73 kantri, oli mit long New York Siti. Oli kam wanples blong holem miting ya blong Yunaeted Nesen, we oli kolem, “The Millennium World Peace Summit of Religious and Spiritual Leaders.” Ol lida ya​—⁠samfala oli kavremap hed blong olgeta wetem kaliko, sam oli werem ol klos we oli yala, sam narafala oli putum ol hat we i gat feta, mo sam narafala bakegen oli putum ol longlongfala blak klos. Ol lida ya oli kamaot long ol skul olsem Bahai, Budis, Hindu, Islam, Jain, Juda, Sinto, Sik, Tao, Soroastrian, mo ol skul blong Krisendom.

Ol lida ya oli kam wanples long Yunaeted Nesen long tufala faswan dei blong ol fo dei blong miting ya. Be, i no Yunaeted Nesen we i stanemap no i givim mane blong mekem miting ya. Sam narafala ogenaesesen oli mekem samting ya. Nating se i olsem, Yunaeted Nesen mo ol lida blong skul oli tokbaot poen ya se, i impoten tumas blong oli wok tugeta blong finisim fasin pua, fasin blong agensem narafala from kala, sakem doti long win, wota, mo graon, faet, mo ol tul blong faet we oli denja tumas.

Long miting ya, oli saenem wan pepa we stamba blong hem se “Commitment to Global Peace.” Oli luksave se “samtaem ol skul nao oli stamba” blong ol faet. Nating se i olsem, ol tok long pepa ya i talem se olgeta we oli saen, bambae oli “wok tugeta wetem Yunaeted Nesen . . . blong putum pis.” Be, i no gat ol klia plan we i soemaot olsem wanem oli save mekem samting ya.

Long seken dei, Bawa Jain, sekretari-jenerol blong miting ya, i finisim tok blong hem taem hem i eksplenem se, sam yia we i pas hem i bin luk wan pija we oli pentem long bilding blong Yunaeted Nesen. Pija ya i soem wan man we i longfala i bitim ofis blong sekretari blong Yunaeted Nesen. Hem i stap noknok long bilding ya olsem we bilding ya i wan doa. Aninit long pija ya, wan toktok i stap we i talem se: “Prins Blong Pis.” Masta Jain i talem se: “Taem mi luk [pija ya], hem i pulum intres blong mi bigwan. Mi bin askem ol defren man blong talem mining blong [pija ya] long mi. Mi ting se tede nao, mi kasem ansa blong hem. Ol lida blong ol defren skul blong wol we yufala i kam tugeta long ples ya, i soemaot long mi se, [hemia] nao prins blong pis we i stap noknok long doa blong Yunaeted Nesen.”

Tingting blong Baebol i defren long saed ya. Baebol i soem se Prins Blong Pis hem i Jisas Kraes. Bambae hem i putum pis long olgeta ples long wol. Bambae hem i yusum Kingdom blong God blong mekem olsem, be i no ol traehad we ol lida blong politik no skul oli stap mekem. Kingdom ya, hemia gavman blong God long heven, i naf blong mekem ol man we oli obei, oli joengud mo bambae hem i mekem ol samting we God i wantem oli kamaot long wol ya.​—⁠Aesea 9⁠:6; Matiu 6:​9, 10.