Laef Stori

Mifala i Wok Tugeta Olsem Wan Tim

MELBA BARRY I TALEM STORI YA

Long Julae 2, 1999, mi mo hasban blong mi, mitufala i kam wanples wetem ol Witnes blong Jeova, olsem we plante taem finis mitufala i bin mekem long olgeta 57 yia ya we mitufala i mared. Long Fraede ya, Lloyd i stap givim laswan tok long distrik asembli long Hawai. Wantaem nomo, hem i foldaon. Mifala i traem olgeta rod blong mekem hem i laef bakegen, be hem i ded. *

!OL KRISTIN brata mo sista long Hawai we oli kam long mi blong leftemap tingting blong mi from trabol ya, oli nambawan tumas! Lloyd i bin gat paoa long laef blong plante long olgeta ya mo plante narafala Kristin raonabaot long wol.

Taem we Lloyd i ded, kam kasem naoia, hem i klosap tu yia nao. Mi stap tingbaot ol nambawan taem we mitufala i bin spenem tugeta, plante long ol taem ya mitufala i wok long ol narafala kantri, mo long hedkwota blong ol Witnes blong Jeova long Brooklyn, New York. Mi bin tingtingbak long ol faswan yia blong mi long Sydney, Ostrelia, mo ol traem we mi mo Lloyd mitufala i fesem blong save mared, long stat blong Seken Wol Wo. Be, fastaem, i gud we mi storian long yu olsem wanem mi mi kam wan Witnes mo olsem wanem mi mitim Lloyd long 1939.

Olsem Wanem Mi Kam Wan Witnes

James mo Henrietta Jones oli papa mama blong mi we oli lavem mo keagud long mi. Mi mi gat 14 yia nomo taem we mi finis skul long 1932. Long taem ya, ful wol i kasem Bigfala Hadtaem long saed blong mane. Mi stat blong wok blong givhan long papa mama blong mi wetem tufala smol sista blong mi. Sam yia i pas, mi gat wan wok long ofis we mi kasem gud pei from, mo mi lukaot long sam gel we oli wok wetem mi.

 Long 1935, Mama i karem wan buk long wan Witnes blong Jeova mo i no longtaem hem i bilif fulwan se hem i faenem trutok. Mifala ol narawan long famle, mifala i ting se hem i lusum hed. Be, wan dei, mi luk buklet ya we taetel blong hem se Where Are the Dead? mo hem i pulum intres blong mi. Ale, mi ridim long fasin haed. !Samting ya i jenisim laef blong mi! Mi stat folem Mama i go long wan miting blong medel wik, we oli kolem Baebol Stadi. Long miting ya oli stap yusum buk ya Model Study, we insaed long hem i gat ol kwestin mo ol ansa wetem ol vas blong Baebol we i sapotem ol ansa. Biaen, oli wokem tri moa buk olsem.

Raonabaot long taem ya, long Eprel 1938, Joseph F. Rutherford, wan brata we i wok long hedkwota blong ol Witnes blong Jeova, i visitim Sydney. Hem i faswan taem long mi blong lesin long wan pablik tok, we hem nao i givim. Plan i stap finis se brata ya bambae i givim tok blong hem long Sydney Taon Hol, be ol man we oli agensem mifala oli wokem rod blong blokem mifala blong no yusum haos ya. Nating se i olsem, hem i givim tok ya long Bigfala Stad blong plei spot long Sydney. From we ol man oli bin agensem mifala olsem, 10,000 man oli kam blong harem tok ya. Namba ya i bigwan taem yumi tingbaot se, long taem ya, i gat 1,300 Witnes nomo long Ostrelia.

Smol taem afta, mi joen long wok blong prij we hem i fastaem blong mi, mo mi no kasem trening nating. Taem grup blong mifala i kasem teritori blong mifala blong prij, brata we i lidim mifala i talem long mi se, “Bambae yu yu go long haos hemia longwe.” Mi mi fraet tumas mekem se taem woman blong haos ya i openem doa, mi askem long hem se, “?Plis yu save talem long mi, wanem taem naoia?” Hem i go insaed, i jekem taem, mo i kambak blong talem long mi. Storian i finis long ples ya nomo. Mi gobak long trak.

Be, mi no lego wok ya, mo i no longtaem, mi stat blong serem mesej blong Kingdom oltaem long ol narafala. (Matiu 24⁠:14) Long Maj 1939, mi givim laef blong mi i go long Jeova mo tekem baptaes long wan bigfala besin blong swim we i stap long haos blong Dorothy Hutchings, klosap long mifala. I no gat brata blong mekem ol wok long kongregesen blong mifala. From samting ya, i no longtaem afta we mi baptaes oli givim ol wok long mi we i blong ol Kristin man nomo.

Plante taem mifala i holem ol miting long haos blong ol brata, be long ol narafala taem, mifala i rentem wan haos blong mekem ol pablik tok. Wan naesfala yang brata long Betel, hemia branj ofis blong mifala, i kam long smol kongregesen blong mifala blong givim wan tok. Mi no save nating se hem i gat wan narafala risen blong kam. Hem i wantem save moa long saed blong mi. Yes, long rod ya nao mi mitim Lloyd.

Mitim Ol Famle Blong Lloyd

I no longtaem, mi wantem blong mekem wok blong Jeova fultaem. Be, taem mi raet i go blong mekem paenia (joen long fultaem wok blong prij), oli askem long mi sipos mi laekem blong wok long Betel. Ale, long Septemba 1939, manis ya we Seken Wol Wo i stat, mi kam wan memba blong Betel famle long Strathfield, wan eria afsaed long bigfala taon blong Sydney.

Long Disemba 1939, mi mekem wan trep i go long Niusilan blong joen long wan asembli. Lloyd, hem i blong Niusilan, taswe hem tu i go. Mitufala i ron long sem sip, mo mitufala i stat blong save gud mitufala. Lloyd i mekem rod blong mi mas mitim mama mo papa mo tufala yangfala sista blong hem long asembli ya long Wellington, mo afta long haos blong olgeta long Christchurch.

Oli Putum Tabu Long Wok Blong Mifala

Long Sarede, Jenuware 18, 1941, ol haeman blong gavman oli draevem samwe sikis blak trak i kam long branj ofis blong karemaot ol samting long branj. Mi mi stap wok long smol gad haos we i stap long rod blong go insaed long Betel, from samting ya mi nao mi faswan blong luk olgeta. Samwe long 18 aoa bifo, mifala i bin harem nius se bambae oli putum tabu long wok blong mifala, taswe mifala i karem klosap olgeta buk mo ol pepa i gowe long branj. Long wik we i kam biaen, oli putum faef memba blong Betel famle i go long kalabus, Lloyd i wan long olgeta ya.

 Mi save se ol brata long kalabus oli rili nidim kakae long saed blong spirit. Blong leftemap tingting blong Lloyd, mi mekem disisen blong raetem “ol leta blong lav.” Mi statem ol leta ya wetem ol swit tok olsem we ol man oli stap mekem taem oli raetem leta blong lav. Be long medel blong ol leta ya mi raetemdaon evri haf blong Wajtaoa, ale mi finisim leta ya bakegen wetem sam toktok blong soem se mi lavem hem. Afta we fo mo haf manis i pas, oli letem Lloyd i gofri.

Mared Mo Fultaem Wok

Long 1940, mama blong Lloyd i visitim Ostrelia, mo Lloyd i talem long hem se, mitufala i stap tingbaot blong mared. Mama blong hem i toktok long hem blong blokem hem from we i luk olsem se en blong wol ya i klosap. (Matiu 24:​3-​14) Lloyd i talemaot samting ya tu long ol fren blong hem, be evriwan oli traem pulum hem blong no tingbaot mared naoia. Taswe, wan dei, long Februari 1942, taem i no gat man i save, Lloyd i tekem mi wetem fo Witnes. Mifala i go long ofis blong saenem pepa, mo mitufala i mared. Long taem ya, loa blong Ostrelia i no givim raet yet long ol Witnes blong Jeova blong oli mekem mared.

Mitufala i no moa save gohed long wok blong Betel olsem mared man mo woman. Be, nating se i olsem oli askem sipos mitufala i laekem blong mekem wok blong spesel paenia. Mitufala i glad blong go wok long wan smol taon we nem blong hem Wagga Wagga. Oli putum tabu yet long wok blong mifala blong prij, mo mifala i no gat mane, taswe mifala i mas putum ol trabol blong mifala long Jeova nomo.​—⁠Ol Sam 55:⁠22.

Blong go long ol eria afsaed long taon, mitufala i ron long baskel we tu man i save sidaon long hem. Mitufala i mitim sam gudfala man, mo mitufala i toktok longtaem wetem olgeta. I no gat plante we oli glad blong mekem Baebol stadi. Be, wan man blong stoa i glad tumas long wok we mitufala i stap mekem, ale hem i givim ol frut mo ol ligim evri wik long mitufala. Afta we mitufala i spenem sikis manis long Wagga Wagga, oli singaotem mitufala blong gobak long Betel.

Famle blong Betel i aot long ofis long Strathfield long Mei 1942, mo i muf i go long sam haos blong ol brata. Blong mekem se ol man oli no save faenemaot olgeta, oltaem oli muf long wan haos i go  long narafala haos afta we sam wik i pas. Taem mi mo Lloyd mitufala i gobak long Betel long Ogis, mitufala i joen wetem olgeta long wan long ol haos ya. Wok blong mitufala long dei, hemia blong wok long ol mesin blong prentem buk we oli bin putum long haos ya. Biaen, long Jun 1943, oli karemaot tabu long wok blong mifala.

Rere Blong Wok Long Narafala Kantri

Long Eprel 1947, oli givim ol pepa blong mitufala i fulumap blong go long Wajtaoa Baebol Skul Blong Gilead, we i stap long South Lansing, New York, Yunaeted Stet. Long semtaem ya, oli sanem mitufala blong goraon long ol kongregesen long Ostrelia blong givhan long olgeta blong kam strong long saed blong spirit. Afta we sam manis i pas, mitufala i kasem wan leta we i singaot mitufala blong go long klas namba 11 blong Gilead. Mitufala i gat tri wik blong stretem gud ol bisnes blong mitufala mo hivimap ol samting blong mitufala. Mitufala i lego ol famle mo ol fren long Disemba 1947, mo mitufala i go long New York wetem 15 narafala blong Ostrelia we bambae oli joen long sem klas wetem mitufala.

Ol manis we mitufala i spenem long skul blong Gilead i pas kwiktaem nomo, nao oli talem long mitufala se bambae mitufala i go mekem misinari wok long Japan. I tekem longtaem blong rerem ol pepa blong mitufala blong go long Japan. From samting ya, ol brata oli askem Lloyd bakegen blong mekem wok olsem seket elda blong ol Witnes blong Jeova. Oli sanem mitufala i goraon blong visitim ol kongregesen long Los Angeles i go kasem boda blong Meksiko. Mitufala i no gat trak, taswe evri wik ol Witnes oli soem lav taem oli karem mitufala i go long wan kongregesen afta narawan. Seket ya we mitufala i mas visitim, oli seraotem tede i go long sikis distrik we tri oli blong olgeta we oli toktok Inglis mo trifala narawan oli blong lanwis Spen. Mo wanwan long olgeta distrik ya oli seraotem bakegen long raonabaot ten seket.

Nao long Oktoba 1949, mitufala i tekem wan sip we bifo i stap karem ol ami, mo mitufala i go long Japan. Ol man oli stap long wansaed en blong sip ya, mo ol woman mo ol pikinini oli stap long narafala en blong hem. Jes wan dei nomo bifo we mifala i kasem Yokohama, mifala i fesem wan bigfala win. I klia se bigfala win ya i karemaot ol klaod, from we taem san i girap long nekis dei, Oktoba 31, mifala i save luk Bigfala Hil blong Fuji we i naes tumas. !Hemia i wan naesfala welkam long mitufala long niufala kantri ya we bambae mitufala i wok long hem!

Wok Wetem Ol Man Long Japan

Taem mifala i stap kam klosap long wof, mifala i luk plante handred man we hea blong olgeta i blak. Mifala i harem plante noes, olsem ol samting we oli stap faerap, ale mitufala i tingting se ‘!Ol man ya oli mekem tumas noes!’ Olgeta man ya evriwan oli werem ol sus we oli wokem long wud, nao taem oli stap wokbaot long wof ya we hem tu i wud, oli mekem bigfala noes. Afta we mitufala i spenem wan naet long Yokohama, mitufala i tekem tren i go long Kobe blong mekem misinari wok blong mifala. Don Haslett, wan fren we i stap long klas blong mifala long Gilead, hem i kam fastaem long mifala mo hem i rentem wan haos blong misinari long ples ya. !Haos ya i bigwan mo i naes, i gat tu stori long hem folem stael blong ol haos long Not Amerika​—⁠be i no gat wan samting olsem bed, jea no tebol insaed long haos ya!

Mitufala i katem ol longlongfala gras long yad blong haos ya, mo putum long floa olsem matres blong mitufala i slip long hem. Taem mitufala i statem misinari wok, mitufala i no gat plante samting. Mitufala i pem wan smol stof blong bonem jakol, we ol man Japan oli stap kolem se hibachi. Mitufala i yusum smol stof ya nao blong kipim ples i hot mo blong kuk long hem. Wan naet, Lloyd i faenem tufala misinari ya, Percy mo Ilma Iszlaub, tufala i foldaon i stap long floa. Hem i wekemap tufala bakegen taem hem i openem ol windo blong freswin we i kolkol i kam insaed. Wantaem, klosap mi tu mi foldaon from hed blong mi i raon taem mi stap kuk long stof ya blong bonem jakol. !Yes, i gat sam samting we mifala i mas lan blong yusum!

Wan impoten samting hemia blong lanem lanwis, mo mifala i spenem 11 aoa evri dei, gogo wan manis, blong lanem lanwis blong Japan. Biaen mifala i statem wok blong prij wetem tu no tri tok we mifala i raetem. Long faswan dei we mifala i joen long wok ya, mi mitim wan naesfala woman, Miyo Takagi, we i lesin gud long mi. Long olgeta taem we mi gobak blong visitim hem, mitufala i rili traehad blong storian. Mitufala i yusum wan diksonari we i eksplenem ol tok blong Japan i go long Inglis, gogo kasem we woman ya i stadi Baebol. Long  1999, taem mi go long dedikesen blong branj ofis long Japan we oli mekem i kam moa bigwan, mi luk Miyo bakegen, wetem sam narafala we mi bin stadi wetem olgeta. Fifti yia i pas, be oli stap gohed blong wok strong olsem ol man blong talemaot Kingdom, oli stap mekem wanem we oli naf long wok blong Jeova.

Long Kobe, long Eprel 1, 1950, samwe 180 man oli kam blong joen wetem mifala long Memoriol blong ded blong Kraes. Mifala i sapraes taem 35 man oli kam long nekis moning blong joen wetem mifala long wok blong prij. Wanwan long ol misinari i tekem tri no fo long ol niufala wan ya i go wetem hem long wok blong prij. Ol man blong haos oli no toktok wetem mi, from we mi mi blong narafala kantri mo mi no save gud lanwis Japan. Oli toktok nomo wetem olgeta ya blong Japan we oli kam long Memoriol, we mifala i prij tugeta. Ol storian oli gogohed, be mi no save wan samting nating we oli stap tokbaot. Mi glad blong talem se sam long ol niuwan ya oli gru long save mo oli gohed long wok blong prij i kam kasem tede.

Plante Blesing Mo Ol Wok

Mitufala i gohed long misinari wok blong mitufala long Kobe gogo kasem 1952. Long yia ya nao oli sanem mitufala i go long Tokyo, mo long ples ya Lloyd i kasem wok blong lukaotem branj ofis. Long ol taem we i kam, wok ya i mekem se hem i mas go long ol narafala ples long Japan mo long ol narafala kantri. Biaen, long wan visit we hem i mekem i go long Tokyo, Nathan H. Knorr blong hedkwota we i lukaot wok long fulwol, i talem long mi se: “?Yu save weples hasban blong yu bambae i go long nekis trep blong hem? Bambae hem i go long Ostrelia mo Niusilan.” Nao hem i se: “Yu save go tu, sipos yu pem rod blong yu.” !Mi glad tumas from we naen yia i pas finis we mitufala i livim kantri blong mitufala!

Kwiktaem nomo mitufala i raetem leta i go long famle blong mitufala. Mama blong mi i givhan blong pem tikit blong mi. Mi mo Lloyd mitufala i bin bisi long wok blong mitufala, mo mitufala i no gat naf mane blong visitim ol famle blong mitufala. Taswe hemia i olsem wan ansa long ol prea blong mi. Mama i glad tumas blong luk mi. Hem i talem se: “Bambae mi sevem mane blong bambae yu save kambak afta long tri yia.” Mitufala i stap tingbaot samting ya taem mitufala i lego mitufala. Be sore tumas, wan yia biaen, long manis Julae, mama blong mi i ded. !Mi stap tingbaot nambawan taem ya we bambae mi joen wetem hem bakegen long niufala wol!

Long ol yia bifo i kam kasem 1960, wok blong mi hemia blong mekem misinari, be nao mi kasem wan leta we i talem se: “Stat tede, bambae yu wasem, hangem mo aenem ol kaliko blong Betel famle.” I gat samwe twelef man insaed long famle blong mifala long Betel, taswe mi naf blong mekem wok ya mo long semtaem mi gohed long misinari wok blong mi.

Long 1962, oli pulumdaon haos blong mifala we hem i stael blong Japan, mo wan yia biaen oli bildim finisim wan niufala sikis stori Haos Betel. Oli askem mi blong givhan long ol yangfala brata long Betel blong oli mekem rum blong olgeta i stap klin mo blong putum gud ol klos, wasem ol dis mo ol narafala samting olsem. Long kastom blong ol man Japan ol boe oli no lanem olsem wanem blong mekem ol wok insaed long haos. Ol papa mama oli wantem se ol boe oli mas skul gud, taswe ol mama blong olgeta oli mekem evri wok long haos. Be, ol yangfala ya oli luksave se mi mi no stap blong mekem wok olsem mama blong olgeta. Sloslou, plante long olgeta oli lan gud, nao oli kasem moa wok insaed long ogenaesesen.

Wan dei, taem ples i hot bigwan, wan studen we i stadi Baebol, i visitim Betel blong mifala, mo hem i luk we mi stap brasem ples blong swim. Hem i talem se, “Plis talem long hemia we i lukaot long yufala se mi  mi rere blong pem wan haosgel blong i tekem ples blong yu, blong mekem wok ya.” Mi talem long hem se mi glad from kaen fasin we hem i soem, nating se i olsem, mi mi glad blong mekem eni wok we oli givim blong mi mekem long ogenaesesen blong Jeova.

!Raonabaot long taem ya, oli singaotem Lloyd mo mi blong mitufala i joen long klas namba 39 blong Gilead! !Hem i wan blesing blong gobak long skul bakegen long 1964, taem mi gat 46 yia! Kos ya i blong halpem olgeta we oli stap wok long ol branj ofis blong oli lukaot gud long ol wok blong olgeta. Afta long kos ya we i tekem ten manis, oli sanem mitufala i gobak long Japan. Long taem ya, i gat 3,000 man blong talemaot Kingdom long Japan.

Namba ya i gru hareap mekem se long 1972 i gat moa long 14,000 Witnes, mo oli bildim wan niufala faef stori branj ofis long Numazu, long saot blong Tokyo. Long Betel, mifala i save lukluk gud Bigfala Hil blong Fuji. Niufala mesin blong prentem buk, we mifala i kasem, i prentem moa long wan milian magasin long lanwis blong Japan evri manis. Be, i no longtaem, wan jenis bambae i kamaot long mitufala.

Klosap long en blong 1974, Lloyd i kasem wan leta long hedkwota blong ol Witnes blong Jeova long Brooklyn. Leta ya i singaot hem blong go wok long Hed Kampani. Fastaem mi gat tingting ya se: ‘Bambae mitufala i no moa save laef tugeta nao. Lloyd i gat hop blong laef long heven mo mi mi gat hop blong laef long wol, wan dei bambae mitufala i mas seraot. Maet i gud Lloyd hem wan nomo i go long Brooklyn we mi no folem hem.’ Be i no longtaem mi jenisim tingting blong mi mo mi glad blong go wetem Lloyd long Maj 1975.

Ol Blesing Long Hedkwota

Wok blong prij long Japan i rili stap strong long hat blong Lloyd, mo nating se mitufala i stap long Brooklyn, oltaem hem i tokbaot ol ekspiriens we mifala i bin gat long Japan. Be naoia mitufala i gat janis blong givhan long plante moa kongregesen. Long ol laswan 24 yia long laef blong Lloyd, oli yusum hem plante blong mekem wok blong son elda, taswe hem i mas mekem trep i go long ol narafala kantri. Mi mi go wetem hem raon long wol bitim tu taem finis.

Taem mitufala i visitim ol Kristin brata blong mifala long ol narafala kantri, samting ya i givhan long mi blong kasem save fasin blong laef mo wok blong olgeta. Bambae mi no save fogetem fes blong Entellia, wan smol gel we i gat ten yia we mi mitim long not Afrika. Hem i laekem nem blong God mo hem i wokbaot wan aoa haf blong go mo kambak long ol Kristin miting. Nating se ol famle blong hem oli mekem trabol long hem, Entellia i givim laef blong hem i go long Jeova. Taem mitufala i visitim kongregesen blong hem, i gat wan smol laet nomo i stap hang antap long ples we brata i stanap blong givim tok. Be, ol ples insaed long haos miting ya i tudak gud. Long bigfala tudak ya, i naes tumas blong harem ol naesfala singsing blong ol brata mo sista.

Wan spesel taem long laef blong mitufala hemia long Disemba 1998 taem mi mo Lloyd mitufala i stap wetem ol brata long Distrik Asembli ya “Fasin Blong Laef We God i Glad Long Hem” long Kuba. !Mifala i sapraes tumas long fasin tangkiu mo glad we ol brata mo ol sista long Kuba oli soem from we sam memba blong hedkwota long Brooklyn oli kam visitim olgeta! Mi no save fogetem olgeta taem ya we mi mitim ol gudfala man mo woman we oli strong blong singaot bigwan blong presem Jeova.

Mifala i Harem Gud Long Kampani Blong Olgeta Man Blong God

Nating se kantri blong mi hem i Ostrelia, mi laekem ol man long eni ples we ogenaesesen blong Jeova i sanem mi mi go long hem. Naoia mi stap 25 yia long Yunaeted Stet, mo mi faenem se hem i sem mak olsem taem we mi stap long Japan. Taem mi lusum hasban blong mi, tingting blong mi i no blong gobak long Ostrelia, be blong stap long Betel blong Brooklyn, long ples ya we Jeova i bin sanem mi blong wok long hem.

Naoia mi gat moa long 80 yia finis. Afta we mi spenem 61 yia long fultaem minista wok, mi glad yet blong mekem wok blong Jeova long eni ples we hem i luk se i stret long tingting blong hem. Hem i rili lukaot gud long mi. Olgeta 57 yia ya we mi bin serem wetem wan nambawan fren we i lavem Jeova, oli rili sas. Mi mi trastem se Jeova bambae i gohed blong blesem yumi, mo mi save se bambae hem i no fogetem wok blong yumi mo lav we yumi soemaot from nem blong hem.​—⁠Hibrus 6:​10.

[Futnot]

[Tok blong pija long pej 25]

Wetem mama long 1956

[Tok blong pija long pej 26]

Wetem Lloyd mo grup blong ol pablisa blong Japan long stat blong ol yia 1950

[Tok blong pija long pej 26]

Wetem faswan studen, Miyo Takagi long Japan, long stat blong yia 1950 mo long 1999

[Tok blong pija long pej 28]

Wetem Lloyd long wok blong seremaot magasin long Japan