Yu Save Win Nating Se Yu Gruap Long Wanem Famle

TAEM Nicholas i wan pikinini yet hem i stronghed tumas. * Sloslou, stronghed fasin blong hem i pusum hem blong yusum drag mo dring bitim mak. Nicholas i eksplenem se: “Papa blong mi i stap dipen long alkol, mo mi mo sista blong mi i safa bigwan from samting ya.”

I luk olsem se, ol man long komuniti blong Malinda oli respektem papa mama blong hem from we tufala i stap go oltaem long jos. Be tufala i stap joen tu wetem wan narafala smol grup blong skul. Malinda, we naoia i gat 30 yia, i krae taem hem i talem se: “Sam long ol samting we tufala i stap mekem folem fasin blong smol grup ya blong skul, oli spolem tingting blong mi taem mi mi wan pikinini yet.” Hem i gohed i se: “Oltaem mi harem se mi no moa gat hop, mi olsem nating nomo. Ol filing ya oli stat taem mi smol, i kam kasem naoia yet.”

I tru nomo se raf fasin, fasin blong mekem nogud long pikinini, ol papa mama we oli no kea long pikinini, mo ol narafala nogud fasin olsem, oli bin spolem laef blong plante pikinini. Ol trabol we i mekem wan pikinini i harem nogud oli save stap longtaem. Be i no minim se ol trabol soa long tingting bambae i spolem laef blong wan pikinini blong olwe. Hem i gat janis yet blong lanem trutok long Tok blong God mo faenem wan glad we i bigwan olgeta. ?Nicholas mo Malinda, tufala i save win olsem ol man blong holem strong long God, nating se tufala i bin gruap long laef we i nogud? Fastaem i gud blong tingbaot eksampol blong King blong Juda, hemia Josaea.

Wan Eksampol Long Baebol

Josaea i rulum Juda blong 31 yia long ol yia sikis handred B.K.T. * (659-​629 B.K.T.) Oli putumap Josaea olsem King stret afta we oli kilim papa blong hem i ded. Long taem ya laef long Juda i kam nogud. Juda mo Jerusalem oli fulap wetem ol man we oli wosipim Bal mo olgeta we oli stap talem ol strong tok promes long bigfala god blong ol man Amon, hemia Malkam [Molek]. Sefanaea, wan profet blong God long taem ya, i talem se ol haeman blong Juda oli olsem “laeon we i hanggri i stap singaot bigwan,” mo ol jaj blong hem oli olsem “wael dog we i hanggri tumas.” From samting ya, raf fasin mo fasin blong giaman oli kam antap long kantri ya. Plante oli stap talem long hat blong olgeta se: “Hae God i no save mekem wan samting we i gud long yumi, mo hem i no save mekem wan samting we i nogud long yumi tu.”​—⁠Sefanaea 1⁠:​3–2:3; 3⁠:​1-5.

?Josaea i pruvum se hem i wanem kaen lida? Esra wan man we i save gud histri blong ol taem insaed long Baebol, i raetem se: “[Josaea] i stap mekem ol samting we Hae God i glad long hem, mo oltaem i stap folem ol gudfala fasin blong olfala bubu ya blong hem bifo King Deved, we i no gowe nating long rod blong hem.” (2 Kronikel 34:​1, 2) I klia se, Josaea i kasem gudfala frut from hem i mekem samting we i stret ae blong God. ?Be laef blong famle blong hem i olsem wanem?

?Wan Pikinini We i Gat Gud Laef No Laef We i Nogud?

Taem Josaea i bon long 667 B.K.T., papa blong hem Amon, i gat 16 yia nomo, mo bubu blong hem Manase i stap rul antap long Juda. Manase i wan king we i rabis moa i winim ol narafala king we oli rulum Juda. Hem i stanemap ol olta blong wosipim Bal, “hem i stap mekem plante samting we i nogud long fes blong Hae God.” Hem i stap bonem ol pikinini boe blong hem long faea, hem i mekem majik, i stap wokem fasin blong faenemaot ol samting long fiuja, i leftemap fasin blong wok wetem ol rabis spirit, mo i kilim plante man i ded blong nating nomo. Manase i karem aedol blong tabu pos we hem i wokem i kam insaed long haos blong Jeova. Hem i pulum Juda mo Jerusalem blong mekem “i nogud moa, i winim ol rabis fasin blong ol hiten man ya bifo we Hae God i bin kilim olgeta long taem ya we hem i tekem ol bubu blong olgeta oli kam stap long kantri ya.”​—⁠2 Kronikel 33⁠:​1-9.

Fasin blong Manase i nogud olgeta mekem se Jeova i letem ol man oli tekem hem i go kalabus long  wan long ol bigfala taon we Asiria i rulum, hemia Babilon. Taem Manase i stap long kalabus, hem i tanem tingting blong hem, mo i askem Jeova blong fogivim hem. God i harem prea blong Manase mo i putumap hem olsem king bakegen long Jerusalem. Biaen sam gudfala frut i kamaot from we Manase i stat blong karemaot sam giaman wosip long Juda.​—⁠2 Kronikel 33:​10-​17.

?Nogud fasin blong Manase we i mekem se biaen hem i tanem tingting blong hem, i gat wanem paoa long pikinini blong hem Amon? Fasin blong Amon i kam rabis olgeta. Fasin blong Manase we i tanem tingting blong hem mo i mekem bigfala traehad blong klinim kantri ya long olgeta doti samting we hem wan i bin statem, i no gat paoa nating long Amon. Biaen taem Amon i gat 22 yia mo i stat rul olsem king, hem “i stap mekem sin agens long Hae God, olsem we papa blong hem King Manase i mekem.” Amon i no gat tingting daon fored long Jeova. Defren olgeta, “hem i stap mekem ol samting we i nogud we i nogud olgeta, i bitim we papa blong hem i bin mekem bifo.” (2 Kronikel 33:​21-​23) Josaea i gat sikis yia nomo taem Amon i kam king blong Juda. !Laef long taem we Josaea i pikinini yet i nogud olgeta!

Rabis rul blong Amon i finis taem ol man blong wok blong hem oli mekem plan agens long hem, mo oli kilim hem i ded. Be ol man long kantri ya, oli kilim i ded olgeta ya we oli agensem Amon, mo oli putumap pikinini blong hem, Josaea, i kam king.​—⁠2 Kronikel 33:​24, 25.

Ol samting we oli kamaot long laef blong Josaea taem hem i pikinini, oli nogud. Nating se i olsem, hem i gohed blong mekem wanem we i gud long ae blong Jeova. Plante gudfala frut i kamaot long rul blong hem taswe Baebol i talem se: “I stat bifo olgeta, i kam kasem taem ya, i no gat wan king nating we i olsem king ya. Hem i stap ona long Hae God long olgeta tingting blong hem, mo long olgeta paoa blong hem, mo long olgeta laef blong hem, mo i stap obei long olgeta loa we Hae God i givim long Moses. Mo biaen long hem tu, i no gat wan king olsem hem bakegen, kam kasem tede.”​—⁠2 King 23:​19-​25.

!Hemia i wan nambawan eksampol we Josaea i soem long olgeta we oli gotru long wan nogud laef taem oli pikinini yet! ?Yumi save lanem wanem long eksampol ya? ?Wanem i givhan long Josaea blong jusum mo folem stret rod?

 Traehad Blong Save Jeova

Wan gudfala eksampol we i gat paoa long laef blong Josaea taem we hem i pikinini yet, hemia fasin blong bubu blong hem, Manase, we i tanem tingting blong hem from sin blong hem. Baebol i no bin tokbaot hamas taem we tufala i bin spenem tugeta, mo hamas yia we Josaea i gat taem Manase i stretem ol nogud fasin blong hem wan. Ol famle blong ol man Jiu oli joengud tugeta. From samting ya maet Manase i traehad blong blokem smol bubu blong hem long ol rabis fasin blong ol man we oli stap raonabaot long hem. Hem i tijim smol bubu blong hem blong respektem trufala God, Jeova, mo Tok blong hem. Sloslou gudfala frut i kamaot long laef blong Josaea from ol sid blong trutok we Manase i bin planem long hat blong hem, mo tu maet hem i folem ol gudfala eksampol blong sam narafala man. Long namba eit yia we Josaea i king long Juda, taem hem i gat 15 yia, hem i wantem save Jeova mo mekem samting we Jeova i wantem.​—⁠2 Kronikel 34⁠:​1-3.

Sam man taem oli pikinini yet, oli kasem trutok long wan memba blong famle we i stap longwe long olgeta, wan gudfala fren, no wan man we haos blong hem i klosap long olgeta. Be ol sid ya blong trutok we oli planem long hat blong ol pikinini, bambae oli save gru sipos man i lukaotem gud olgeta. Malinda, we yumi tokbaot fastaem, i stap klosap long wan olfala man we i kaengud long hem. Oltaem olfala man ya i karem ol Wajtaoa mo Wekap! i kam long haos blong hem. Malinda i stap tingbaot samting ya, nao i talem se: “Samting we i mekem mi mi sapraes bigwan, hemia se olfala ya i neva mekem ol lafet blong ol holide. Samting ya i makem gud tingting blong mi, from we ol lafet olsem Halloween mo sam long ol narafala holide, oli ol spesel taem long skul blong papa mama blong mi.” Ten yia biaen, wan fren i singaot Malinda blong joen long wan Kristin miting long Haos Kingdom blong ol Witnes blong Jeova. Long taem ya nao hem i tingbaot olfala man ya mo hem i agri blong go long miting. Samting ya i givhan long hem blong hem i faenem trutok.

Holem Tingting Daon Fored Long Jeova

Long taem ya we Josaea i rul, hem i mekem bigfala wok blong karemaot giaman wosip long kantri blong Juda. Afta we Josaea i spenem sikis yia blong brekem daon ol aedol mo mekem kantri blong Juda i kam klin long saed blong wosip, hem i stat blong wokem gud bakegen haos blong Jeova. !Taem wok ya i stap gohed, Hae Pris Hilkia i faenem wan nambawan samting! Hem i faenem hanraet blong “buk ya we nem blong hem Buk blong Loa blong Hae God.” Hilkia i sanem Safan, we i wan sekretari blong king, blong i go talemaot long king se oli faenem wan nambawan samting. ?Josaea we i gat 25 yia, i flas from samting ya we oli faenem?​—⁠2 Kronikel 34:​3-​18.

Esra i raetem se “taem we king i harem ol tok blong buk ya, hem i trabol tumas, mo i fraet tu, nao i terem klos blong hem blong soemaot we hem i harem nogud.” Samting ya i soem se hem i rili harem nogud long hat blong hem from se ol bubu blong olgeta oli no stap folem olgeta loa we God i givim long olgeta. !I tru tumas hemia i soem tingting daon ya! Kwiktaem nomo king i sanem wan grup blong faef man i go long woman profet ya Hulda, blong oli faenemaot tingting blong Jeova. Grup ya i karem strong tok ya i kambak long king se: ‘Trabol bambae i kam from we ol man ya oli no obei long olgeta loa blong Jeova. Be from we yu, King Josaea, yu soem tingting daon, bambae yu yu gat gudfala laef gogo yu ded, nao biaen, panis ya bambae i kamtru.’ (2 Kronikel 34:​19-​28) Jeova i glad long fasin we Josaea i soem.

Yumi naf blong soem tingting daon fored long trufala God, Jeova, mo respektem hem mo Tok blong hem, Baebol, nating se laef we yumi gat taem yumi pikinini i olsem wanem. Nicholas, we yumi tokbaot hem long stat blong haf ya, hem i mekem olsem. Hem i talem se: “Laef blong mi i nogud olgeta from we mi stap tekem ol drag, mo mi stap dring alkol bitim mak. Be mi mi intres long Baebol mo mi wantem tumas blong faenem mining blong laef. Biaen, mi toktok wetem sam Witnes blong Jeova, mi jenisim fasin blong laef blong mi, mo mi folem trutok.” Yes, yumi save soem respek long God mo Tok blong hem nating se yumi kamaot long wanem famle.

Kasem Frut From Rod We Jeova i Yusum

Josaea i gat bigfala respek tu long ol profet blong Jeova. I no tru long woman profet ya Hulda nomo, we Josaea i stap faenemaot samting we Jeova i wantem. I gat plante narafala profet tu long taem ya we oli gat paoa long laef blong hem. Wan eksampol, Jeremaea mo Sefanaea tufala i bisi blong talemaot ol panis we ol man Juda bambae oli kasem from we oli stap wosipim ol aedol. !Ating ol mesej blong tufala ya i givim paoa long Josaea blong mekem bigfala  wok blong agensem giaman wosip!​—⁠Jeremaea 1:​1, 2; 3:​6-​10; Sefanaea 1⁠:​1-6.

“Masta” ya, Jisas Kraes, i putumap grup blong olgeta we tabu spirit i makemaot olsem “slef we i stret mo i waes,” blong oli givim kakae long saed blong spirit long stret taem blong hem. (Matiu 24:​45-​47, NW ) Grup blong slef ya i yusum ol buk we i stanap long Baebol mo ol miting blong kongregesen blong soemaot ol gudfala frut we i kamaot taem man i obei long ol advaes blong Baebol. Mo hem i soemaot olsem wanem blong folem ol advaes blong Baebol evri dei long laef blong yumi. !I stret nomo blong folem rod we Jeova i yusum blong givhan long yumi blong winim enikaen nogud fasin we i stap longtaem finis long yumi! Taem Nicholas i pikinini yet, hem i no laekem nating we narafala i bos long hem. Nating se hem i lanem trutok long Tok blong God, be slak fasin ya i blokem hem blong mekem wok blong Jeova fulwan. I no isi long hem blong jenisim fasin ya. Be sloslou, taem i pas, nao hem i winim slak fasin ya. ?Hem i mekem olsem wanem? Nicholas i eksplenem se: “Tu elda we oli kasem save long filing blong mi oli givhan long mi, ale, mi luksave trabol blong mi mo mi stat blong folem ol nambawan advaes blong Baebol we tufala i givim long mi.” Hem i gohed i se: “Nating se sam samtaem mi kros lelebet yet, be mi stretem fasin stronghed blong mi finis.”

Malinda tu i lukaot advaes blong ol elda, taem hem i stap mekem sam impoten disisen long laef blong hem. Samting we hem i faenem se i nambawan, hemia ol defren haf insaed long Wajtaoa mo Wekap! Hemia i givhan long hem blong winim ol tingting we hem i bin gat bifo, olsem filing ya se i no moa gat hop mo se hem i nating nomo. Hem i talem se: “Samtaem insaed long wan atikol i gat wan paragraf no sam tok nomo we i tajem hat blong mi. Samwe naen yia bifo, mi stat blong kopi sam haf long ol magasin ya i go insaed long wan not buk, long rod ya mi save lukluk bak long olgeta.” !Tede, i gat samwe 400 haf blong ol magasin ya insaed long trifala not buk blong hem!

Ol man oli save aot long rabis fasin we i kamaot from nogud laef we oli gat taem oli pikinini yet. Jeova i save halpem olgeta blong win. Nating se wan man i gruap long wan gudfala famle, samting ya i no min se bambae hem i holem strong long God oltaem. Long sem fasin, wan man we i gruap long wan famle we laef blong hem i nogud, i no min se bambae hem i neva obei long God.

Afta we oli faenem buk blong Loa long taem ya we oli stap wokem gud haos tempol bakegen, Josaea “i mekem wan promes wetem Hae God, se bambae hem i obei long hem, i holem ol loa blong hem, mo ol tok blong hem long olgeta tingting blong hem, mo long evri haf blong laef blong hem.” (2 Kronikel 34⁠:31) Mo tingting blong hem i no kam slak nating long promes ya we hem i mekem, gogo kasem hem i ded. Malinda mo Nicholas tufala i gat strong tingting tu, blong onagud long Jeova God oltaem, mo blong win olsem ol man blong holem strong long God. I gud se yu tu, yu gat strong tingting blong stap klosap long God mo mekem wok blong hem wetem strong bilif. Yu save sua fulwan se bambae yu win, from we Jeova i promes se: “!Yufala i no fraet! !Mi mi stap wetem yufala! !Mi mi God blong yufala! !Yufala i no seksek! !Mi bambae mi mekem yufala i strong! !Mi bambae mi givhan long yufala! !Mi bambae mi blokemgud yufala, mi sevem yufala!”​—⁠Aesea 41:​10, 13.

[Ol futnot]

[Tok blong pija long pej 26]

Josaea i traehad blong save Jeova mo hem i kasem gudfala frut long laef blong hem, nating se hem i gat nogud laef taem hem i pikinini

[Tok blong pija long pej 28]

Ol elda oli save givhan long yu blong winim wan fasin we i stap longtaem long laef blong yu

[Tok blong pija long pej 28]

“Wajtaoa” mo “Wekap!” i save halpem yu blong holem strong long God