?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:

• ?From wanem aposol Pol i putum “hop” i stap daon olgeta long lis blong ol fasin we hem i tokbaot long Rom 5⁠:​3-5?

Pol i tokbaot lis blong ol samting we i stap kamaot long laef blong ol Kristin olsem ol hadtaem, fasin blong stanap strong longtaem, mekem God i glad long yumi, mo hop. “Hop” ya i no faswan hop we man i faenem insaed long Baebol. Be hemia wan hop we i kam moa strong, i gru i kam bigwan, mo long taem we i kam, hem i save kam haf blong laef blong wan Kristin.​—⁠12/15, pej 22-23.

• ?From wanem wan Kristin tede i intres long ol gem we oli bin holem long Gris bifo?

I gud blong yumi kasem save long fasin mo kastom blong ol gem ya. Samting ya i save givhan long yumi blong kasem save long sam vas long Baebol. Sam long ol vas ya oli tokbaot fasin blong “obei long ol rul blong resis,” ‘lego ol samting we oli stap blokem yumi, mo lukluk eksampol blong Jisas,’ ‘ron long resis ya go kasem en,’ mo winim hat blong resis, no praes. (2 Timoti 2⁠:5; 4:​7, 8; Hibrus 12:​1, 2; 1 Korin 9:​24, 25; 1 Pita 5:⁠4)​—⁠1/1, pej 28-​30.

• ?Wanem niufala rod blong talemaot gud nius i kamaot long Jenuware 1914?

Long taem ya oli mekem “Sinema Blong Ol Samting We God i Wokem” (Photo-Drama of Creation). Sinema ya i gat fo defren haf blong hem wetem ol pija we i muvmuf. Oli mekem plante handred glas slaed we i soem ol pija we i kala. Samtaem ol brata oli givim tok no oli plei long ol toktok we oli rikodem finis long fonograf, taem oli soem ol slaed ya. Oli rerem twanti haf blong drama evriwan mo oli yusum long plante ples blong tijim ol man long ol mesej blong Baebol.​—⁠1/15, pej 8-9.

• ?Olsem wanem Hed Kampani i defren long wan kampani we loa i agri long hem?

Ol memba blong wan kampani we loa i agri long hem oli vot from ol memba blong olgeta. Be Kraes hem i jusumaot ol memba blong Hed Kampani. I no nid blong ol daerekta blong ol narafala kampani blong ol Witnes blong Jeova oli kam memba blong Hed Kampani. Long wan miting we oli jes mekem i no longtaem, long Watch Tower and Tract Society of Pensylvania, ol memba blong Hed Kampani we oli stap wok olsem ol daerekta mo memba blong komiti oli rere blong lego wok blong olgeta. Ol brata blong ol “narafala sipsip” we oli bigman long saed blong spirit, oli tekem ples blong olgeta. (Jon 10⁠:16) Long rod ya Hed Kampani i save spenem moa taem blong rerem ol kakae long saed blong spirit, mo lukaotgud long ol nid long saed blong spirit blong ol brata long fulwol.​—⁠1/15, pej 29, 31.

• ?Wanem tufala eksampol long Baebol we oli save tijim yumi olsem wanem blong winim tingting we i foldaon?

Wan hemia Hana, mama blong Samuel. Maet Hana i save letem tingting blong hem i foldaon taem Eli, hae pris blong Isrel, i talem se hem i drong. Be Hana i no mekem olsem. Hem i talemaot klia wetem respek, wanem ya we hem i stap mekem. Antap moa, Hana i no holemtaet kros longtaem agensem Eli. Seken eksampol hemia Mak, we maet tingting blong hem i bin foldaon taem aposol Pol i no wantem blong tekem hem i go long wan misinari trep. Mak i no harem nogud se hem i lusum janis ya, hem i gohed strong blong prij, hem i folem Banabas long ol trep we Banabas i mekem.​—⁠2/1, pej 20-22.

• ?From wanem wan Kristin i mas lukaot gud taem hem i givim no kasem sam kopi blong ol sofware program blong kompiuta?

Plante long ol program blong kompiuta (we i minim tu ol gem) oli gat laesens blong hem, we i mekem se man we i pem program ya i gat raet blong yusum program ya long wan kompiuta nomo. Yumi brekem loa blong kopiraet sipos yumi mekem sam kopi blong wan program olsem blong givim long ol narafala, nating se yumi givim fri nomo long olgeta. Ol Kristin oli wantem obei long loa ya se, ‘samting we i blong Sisa, yumi givimbak long Sisa.’ (Mak 12⁠:17)​—⁠2/15, pej 28-29.

• ?Hu ya Cyril mo Methodius, mo olsem wanem wok blong tufala i givhan blong mekem se ol man oli save stadi long Baebol?

Tufala brata ya tufala i bon long Tesalonaeka, long aelan blong Gris, long ol yia eit handred. Tufala i wokem wan niufala alfabet blong lanwis blong ol Slavik, mo tufala i tanem bighaf blong Baebol i go long lanwis blong ol Slavik.​—⁠3/1, pej 28-29.

• ?Wanem mining blong tok ya “tingting blong man i fas gud long ol gudfala fasin ya we [“tabu spirit,” NW ] i wantem”?​—⁠Rom 8:⁠6.

Hem i minim se paoa blong Jeova i bos long yumi, yumi stap aninit long hem, mo i pusum yumi blong mekem ol samting we Jeova i wantem. Yumi save letem spirit blong God i wok long yumi taem yumi ridim mo stadi long Baebol, obei long loa blong God long ful laef blong yumi mo prea from tabu spirit blong God.​—⁠3/15, pej 15.

• ?Yumi save mekem wanem sipos yumi harem olsem we narafala i gat rong tingting long yumi?

I impoten blong faenem rod blong stretem bisnes ya wetem lav. Sipos yu luk se rod ya i no wok, tingting blong yu i no mas foldaon. Askem Jeova blong givim save long yu mo blong givhan long yu, from we hem nao “i stap jekem hat blong ol man.” (Ol Proveb 21:​2, NW; 1 Samuel 16:⁠7)​—⁠4/1, pej 21-23.