Laef Stori

Mifala i Traem Jeova

PAUL SCRIBNER I TALEM STORI YA

“Gud moning, Misis Stackhouse. Long moning ya mi stap tekem oda blong ol Ista kek, mo mi sua se bambae yu yu wantem wan kek blong famle blong yu.” Hemia long 1938, taem ol tri oli jes stat blong karem flaoa, mo mi mi sta long Atco, New Jersey, Yunaeted Stet. Mi stap ron long trak blong salem ol kakae we General Baking Kampani i kukum. Long taem ya, mi kam long haos blong wan gudfala woman we oltaem i pem kakae long mifala, mo mi toktok wetem hem. Mi sapraes tumas we Misis Stackhouse i no wantem tekem wan kek.

MISIS Stackhouse i talem se: “Bambae mi no tekem wan kek. Mifala i no stap selebretem Ista.”

Mi no save se bambae mi talem wanem. !Mi no bilif se hem i no stap selebretem Ista! Be, wan long ol faswan rul taem mifala i salem samting hemia se, neva agiu wetem kastoma. ?Taswe naoia bambae mi mekem wanem? Mi girap mi talem se: “Hemia i wan nambawan kek ya, mo mi save se yu yu laekem ol kakae we mifala i kukum. ?Yu no ting se famle blong yu bambae i laekem, nating se yufala no stap selebretem Ista?”

Hem i ansa se: “Mi no ting, be mi bin wantem blong tokbaot wan samting long yu Masta Scribner, mo mi ting se hemia i stret taem blong tokbaot samting ya.” !Storian ya i jenisim laef blong mi fulwan! Misis Stackhouse, wan memba blong Kampani (no kongregesen) blong Ol Witnes blong Jeova long Berlin, New Jersey, i eksplenem stamba blong Ista mo i givim tri buklet long mi. Nem blong ol buklet ya hemia, Safety, Uncovered, mo Protection. Mi karem ol buklet ya i go wetem mi long haos. Mi wantem kasem save moa long olgeta be mi fraet lelebet tu. Misis Stackhouse i talem wan samting we mi bin harem taem mi pikinini yet.

Faswan Taem We Mi Mitim Ol Baebol Studen

Mi mi bon long Jenuware 31, 1907, mo long 1915, papa blong mi i ded long kansa, taem mi gat eit  yia nomo. Nao, mi mo Mama mitufala i go stap wetem papa mama blong hem long wan bigfala haos long Malden, Massachusetts. Angkel Benjamin Ransom, brata blong mama blong mi wetem waef blong hem, tufala tu i laef long ples ya, long namba tri stori blong haos ya. Bifo long ol yia 1900, Angkel Ben i bin joen wetem ol Intenasnal Baebol Studen, hemia ol Witnes blong Jeova long taem ya. Mi mi lavem Angkel Ben tumas, be ol famle blong Mama, we oli Metodis, oli ting se Ben i krangke lelebet. !Sam yia biaen, bifo we waef blong Angkel Ben i mekem divos long hem, hem i mekem se oli putum Angkel Ben long wan hospital blong stretem tingting blong hem from ol bilif blong skul blong hem! Ol dokta oli faenem se i no gat wan samting i rong long tingting blong Angkel Ben. From samting ya, kwiktaem nomo oli letem hem i go fri, mo oli talem sore from samting we oli mekem.

Plante taem, Angkel Ben i tekem mi mi go wetem hem long miting blong ol Intenasnal Baebol Studen long Boston, antap moa, taem sam brata oli kam visitim olgeta mo taem i gat ol narafala spesel miting. Wan taem, brata we i visitim olgeta, hem i Charles Taze Russell, we i stap lukaot long wok blong prij long taem ya. Wan narafala spesel dei, hemia taem ya we oli soem wan sinema we nem blong hem “Photo-Drama of Creation.” Nating se hemia long 1915, kam kasem naoia mi rimemba yet pija blong Ebraham taem hem i tekem Aesak i go long hil blong mekem sakrefaes i go long God. (Jenesis, japta 22) Mi save luk yet we Ebraham mo Aesak, tufala i stap wokbaot i go antap long hil wetem bandel faeawud, Ebraham i trastem Jeova fulwan. From we mi no gat papa, stori ya i kasem hat blong mi bigwan.

Biaen, Angkel Ben mo waef blong hem, tufala i muf i go long Maine, mo Mama i mared bakegen mekem se mifala i muf i go long New Jersey. Taswe mi no moa luk Angkel Ben blong longtaem. Long New Jersey, taem mi mi wan yangfala nomo, mi mitim Marion Neff. Marion i blong wan famle we i gat eit pikinini. Oli blong Presbiterian jos, mo oltaem mi go luk olgeta. Klosap evri Sande naet, mi spenem taem wetem famle ya mo grup blong ol yangfala blong jos, mekem se mi kam wan Presbiterian. Nating se i olsem, sam long ol samting we mi lanem long ol miting blong ol Baebol Studen i stap long tingting blong mi. Mi mo Marion mitufala i mared long 1928, mo tufala gel blong mitufala, Doris mo Louise, tufala i bon long 1935 mo long 1938. From we mitufala i gat wan smol pikinini mo wan niufala bebi we i jes bon long famle, mitufala i ting se mitufala i nidim ol advaes long saed blong spirit blong bildimap famle blong mitufala.

Faenem Trutok Insaed Long Ol Buklet Ya

Mi mo Marion, mitufala i stap lukaot wan jos blong joen long hem. Ale, mitufala i plan se, evri Sande, wan long mitufala i lukaot long tufala pikinini, mo wan i go long jos we hem i ting se i gud. Long wan Sande hem i taem blong Marion blong stap long haos, be mi talem se mi glad blong tekem ples blong hem. Long rod ya, mi save ridim buklet ya Safety, hemia faswan long ol trifala buklet we Misis Stackhouse i bin givim long mi. !Taem mi stat ridim buklet ya, mi no moa save stop! Mi bilif fulwan se mi faenem save ya we wan narafala jos i no save givim. Long wik we i kam biaen, mi mekem sem samting. Mi wantem stap long haos blong lukaot long ol pikinini olsem nao, mi save ridim namba tu buklet ya, Uncovered. I luk olsem se mi save finis sam samting we mi stap ridim. Ating hemia nao ol samting we Angkel Ben i bilif long hem. Famle blong mi i ting se hemia wan krangke skul. ?Bambae Marion i tingting olsem wanem? Mi no nid blong wari.  Sam dei afta we mi ridim buk ya Uncovered, mi kambak long wok, nao Marion i mekem mi sapraes taem hem i talem se, “Mi ridim ol buklet ya we yu karem i kam long haos. Mi intres tumas long olgeta.” !Samting ya i mekem se mi haremgud tumas!

Biaen long ol buklet ya, i gat smol tok we i pulum man blong ridim buk ya Enemies we i jes kamaot. Enemies i tokbaot klia ol samting long saed blong giaman skul. Mitufala i tingting blong odarem buk ya. Be bifo we mitufala i save odarem, wan Witnes i kilkilim doa blong mitufala mo i givim buk ya long mitufala. !Buk ya i halpem mitufala bigwan! Mitufala i no moa go long ol jos mo mitufala i stat blong go long ol miting blong Camden, New Jersey, long Kampani blong ol Witnes blong Jeova. Sam manis nomo bifo, long Sande Julae 31, 1938, samwe 50 long mifala i hivap wanples long yad blong Sista Stackhouse, hemia long haos ya we mi traem blong salem kek blong Ista long hem. Mo mifala i lesin long wan tok long saed blong baptaes we Jaj Rutherford i givim we oli rikodem. Biaen mifala i jenisim klos insaed long haos ya, mo mifala 19 i tekem baptaes long wan krik we i stap klosap.

Wantem Tumas Blong Kam Paenia

Smoltaem afta we mi tekem baptaes, wan sista long kampani blong mifala i storian wetem mi long saed blong ol man we oli kolem olgeta ol paenia. Olgeta  ya, oli mekem wok blong prij i impoten samting long laef blong olgeta. Kwiktaem nomo mi wantem kasem moa save long saed ya, mo i no longtaem biaen, mi mitim wan famle we olgeta evriwan oli paenia. Wan olfala man, nem blong hem Brata Konig, wetem waef blong hem, mo bigfala gel blong tufala, trifala i stap paenia long wan kongregesen klosap. From mi mi wan yangfala papa, mi sapraes long bigfala glad we famle Konig i gat long wok blong prij. Plante taem, taem mi luk olgeta long wok blong prij, mi putum trak blong wok blong mi i stap, mo mi joen wetem olgeta blong prij long ol haos wanwan. Smoltaem biaen, mi tu mi wantem kam wan paenia. ?Be bambae mi mekem olsem wanem? Mi mo Marion, mitufala i gat tu smol pikinini, mo wok blong mi i tekem tumas taem. Taem Seken Wolwo i stat long Yurop, plante yangfala man long Yunaeted Stet oli joenem ami. From samting ya, mifala we i no joen long ami, mifala i gat plante wok. Olgeta we mi mi wok wetem olgeta, oli wantem se mi mas ron i go long plante moa ples blong salem ol bred we mifala i kukum. Be mi save se wok olsem bambae i no givim janis long mi blong paenia.

Ale mi toktok wetem Brata Konig, mi talemaot long hem se mi wantem mekem wok blong paenia. Nao hem i talem long mi se: “Yu gohed nomo blong wokhad long wok blong Jeova, mo prea long hem oltaem from mak we yu wantem kasem. Bambae hem i givhan long yu blong kasem mak ya.” Mi gohed blong mekem samting ya blong bitim wan yia. Plante taem, mi tingting long ol vas olsem Matiu 6:8, we i mekem yumi sua fulwan se Jeova i save gud ol nid blong yumi bifo we yumi askem long hem. Mo oltaem, mi traehad blong folem advaes we i stap long Matiu 6:33, blong putum Kingdom blong God mo stret fasin blong hem long fasples oltaem. Brata Melvin Winchester, wan son elda (naoia yumi kolem seket elda), hem tu i bin leftemap tingting blong mi.

Mi tokbaot ol mak blong mi long Marion. Mitufala i tokbaot Malakae 3:10, we i leftemap tingting blong mitufala blong testem Jeova, mo luk sipos bambae hem i no openem doa blong heven blong givim ol blesing long mitufala. Ol tok we Marion i talem i leftemap tingting blong mi se: “Sipos yu wantem paenia, yu no wet long mi. Mi save lukaot long tufala gel, mo yu save mekem paenia. Yumi no nidim tumas samting long saed blong bodi.” Afta long 12 yia we mitufala i mared, mi kasem save se Marion i wan waef we i savegud olsem wanem blong spenem mane long waes fasin. Long ol yia we i pas, hem i wan nambawan fren long wok blong paenia. Wan long ol nambawan samting we i mekem se mitufala i gohedgud long ol 60 yia blong fultaem wok, hemia se Marion i glad long wanem samting we mifala i gat, nating se i gat smol nomo, be long lukluk blong hem, hemia fulap.

Long 1941, ples i kam hot. Plante manis finis mitufala i bin prea mo mekem plan, mo mitufala i sevem sam mane finis. Nao mitufala i gat janis blong pem wan kat we trak i save pulum. Longfala blong kat ya i kasem 5.5 mita, mo hem i stret long famle blong mitufala. Mi lego wok blong mi mo mi kam wan fultaem paenia long Julae 1941, mo kam kasem tede mi stap wok yet olsem wan fultaem paenia. Faswan ples we mi go wok long hem, hemia long Route 50, wan ples we i stap bitwin long New Jersey mo St. Louis, Missouri. Hemia ples we long stat blong Ogis long taem ya, bambae mifala i holem asembli blong mifala. Oli sanem nem mo ol adres blong ol brata we bambae mi mitim olgeta taem mi go long ples ya, mo mi raet i gobak long olgeta blong talem wetaem bambae mi kasem olgeta. Taem mifala i kasem ples blong asembli, oli talem long mi blong go long ofis blong ol paenia blong oli talem narafala ples we bambae mi go wok long hem.

‘Bambae Mi Testem Jeova’

Mifala i fulumap ol buk long smol kat we trak blong mifala i pulum, mo mifala i go long laswan miting blong mifala long Camden blong talem tata long ol brata sista. Mitufala i mas lukaot long tu smol gel blong mitufala mo mitufala i no save weples bambae mifala i go long hem afta long asembli. From samting ya, sam brata oli ting se plan blong mifala i no save stanap. Oli talem se: “I no longtaem bambae yufala i kambak.” Mi rimemba we mi talem long olgeta se: “Be, mi mi no talem se bambae mi no moa save kambak. Jeova i talem se bambae hem i lukaot long mi, mo bambae mi testem Hem.”

Afta long 60 yia we mifala i paenia long 20 taon, stat long Massachusetts go kasem Mississippi, mifala i save talem se Jeova i mekem i gud tumas long mifala, i bitim we hem i bin promes. Ol blesing we hem i kafsaedem i kam long mi, Marion, mo tufala gel blong mitufala, oli bitim enikaen samting we mitufala i bin wantem blong kasem long 1941. Sam long ol blesing ya, hemia se tufala gel blong mitufala oli joen long wok blong fultaem paenia long ol kongregesen klosap, mo mitufala i gat samwe long wan handred pikinini long saed blong spirit oli stap  olbaot long Is Kos blong Yunaeted Stet. Mi bin stadi wetem 52 man we biaen, oli givim laef blong olgeta long Jeova God mo Marion i bin stadi wetem 48 man.

Long Ogis 1941, mifala i go long St. Louis. Long ples ya, mi mitim Brata T. J. Sullivan, we hem i stap wok long Betel. Hem i holem leta we i makemaot mi blong mekem fultaem wok, mo mi nidim leta ya from we faet i stap kam klosap mo tu gavman i stap jusum ol man blong joen long faet. Mi talem long Brata Sullivan se waef blong mi i stap spenem plante aoa long wok blong prij mo mi askem sipos hem i save joen wetem mi long wok blong paenia. Nating se oli no stanemap ofis blong paenia yet, Brata Sullivan i agri se Marion i save kam wan paenia mo hem i askem long mitufala se: “?Weples nao yutufala i wantem go paenia long hem afta long asembli?” Mitufala i no save. Hem i talem se: “Yutufala i no wari. Bambae yutufala i mitim wan man long asembli we i kamaot long wan ples we oli nidim ol paenia, nao bambae yutufala i save ples we bambae yutufala i go paenia long hem. Yutufala i jes raet long mifala blong talem weples yutufala i stap wok long hem mo bambae mifala i sanem wan leta blong soem se mifala i agri blong yutufala i wok long ples ya.” Hemia nao samting we i kamaot. Mifala i faenem se Brata Jack DeWitt, we i wan seket elda bifo, i save sam man long New Market, Virginia, we oli gat wan haos paenia mo oli nidim sam moa paenia. Taswe afta long asembli ya, mifala i go long New Market.

Long New Market, i gat wan samting we i mekem mitufala i glad tumas. Paenia we bambae i aot long Philadelphia, i kam joenem mitufala, hemia Benjamin Ransom. !Yes, Angkel Ben! !Afta long ol 25 yia we hem i bin planem ol sid blong trutok long hat blong mi long Boston, mi glad tumas blong prij wetem hem long ol haos wanwan! Nating se ol man oli no laekem mifala, oli jikim mifala, mo famle tu i mekem trabol long mifala, Angkel Ben i no lusum lav we hem i gat long Jeova mo wok blong hem.

Mifala i glad blong stap tugeta eit manis long haos paenia long New Market. Long taem ya, mifala i lanem olsem wanem blong jenjenisim ol buk blong mifala wetem faol mo eg long ol man. Biaen, oli sanem mi, Angkel Ben, mo Marion wetem tri narafala paenia blong wok olsem spesel paenia long Hanover, long Pennsylvania. Hemia faswan long sikis eria we mifala i mas prij long hem long Pennsylvania stat long 1942 kasem 1945.

Spesel Paenia Long Taem Blong Seken Wolwo

Long Seken Wolwo, ol man oli agensem mifala from we mifala i no joen long faet, be neva Jeova i lego mifala. Wan taem, long Provincetown, Massachusetts, olfala trak (Buick) blong mifala i no moa wok, mo mi mas wokbaot sam kilometa i go tru long wan ples we ol Katolik oli agensem mifala. Mi stap go blong mekem wan visit. Mi pas klosap long wan grup blong ol stronghed yangfala. Oli luksave mi, nao oli stat blong singaot long mi. Oli stap stonem mi, we ol ston ya oli stap glisim sora blong mi nomo. Mi wokbaot hareap mo mi hop se oli no biaenem mi blong ronem mi. Mi kasem haos blong man ya we i intres, we mi no kasem kil. Man ya, hem i wan memba blong ami blong Amerika, we ol man oli respektem hem. Hem i talem sore, mo i gohed se: “Mi no save spenem taem wetem yu tunaet from we mifala i mas go lukluk sinema.” Mi harem nogud tumas taem mi tingbaot se ol yangfala ya we oli wantem stonem mi, oli stap wet blong mekem trabol long mi taem mi gobak. Be, mi glad taem man ya i gohed i se: “?Yu no wantem kam wetem mifala? Yumi save storian taem yumi stap wokbaot i go.” Long rod ya, mi prij long hem, mo mi save wokbaot sef i go bitim ol yangfala ya we oli wantem mekem trabol long mi.

Skelem Ol Wok Blong Famle Mo Wok Blong Prij

Afta we faet i finis, mifala i mekem sam moa wok long Virginia. Mifala i wok eit yia olsem ol spesel mo fultaem paenia long Charlottesville. Kam kasem 1956, tufala gel blong mitufala oli kam bigwan mo oli mared. Ale mi mo Marion, mitufala i go paenia long Harrisonburg, Virginia, mo mitufala i wok olsem spesel paenia long Lincolnton, Not Carolina.

Long 1966, mi kam wan seket elda. Mi mas wokbaot i go long ol wanwan kongregesen mo leftemap tingting blong ol brata sista, olsem we Brata Winchester i bin leftemap tingting blong mi long New Jersey long ol yia 1930. Mi wok tu yia long ol kongregesen long seket blong Tennessee. Biaen oli askem mi mo Marion blong mekem samting ya we mitufala i laekem tumas, hemia wok blong spesel paenia. Stat long 1968 kasem 1977, mitufala i wok olsem spesel paenia long Deep Saot, wan eria we i kavremap Georgia mo Mississippi.

Long Eastman, Georgia, mi kam presiden elda blong kongregesen. Mi tekem ples blong Powell Kirkland,  wan gudfala olfala brata we i bin wok blong plante yia olsem seket elda be hem i sik. Hem i glad mo i sapotem mi bigwan. Hem i givhan long mi bigwan from i bin gat sam raorao insaed long kongregesen mo sam long olgeta we oli gat responsabiliti oli joen long rao ya. Rao ya i kam bigwan, mo mi spenem plante taem blong prea long Jeova blong stretem. Mi tingbaot ol vas olsem Ol Proveb 3:5, 6, we i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” From we mifala i traehad blong toktokgud tugeta, mifala i naf blong mekem se kongregesen i joengud bakegen mo evriwan i kasem gudfala frut.

Long 1977, mitufala i stat harem se mitufala i olfala, mo oli sanem mitufala i go bakegen long Charlottesville, hemia ples we tufala gel blong mitufala wetem ol famle blong tufala oli laef long hem. Long ol laswan 23 yia we i pas, mifala i bin glad blong wok long eria ya. Mifala i givhan blong stanemap kongregesen blong Ruckersville, long Virginia, mo ol Baebol stadi blong mifala wetem pikinini blong olgeta oli gru long saed blong spirit, nao oli kam ol elda, ol paenia, mo sam oli wok long Betel. Mi mo Marion, mitufala i gohed blong folem wan gudfala program long wok blong prij, mo mi gat janis blong wok strong olsem wan elda long kongregesen blong  Is Charlottesville, blong lidim wan grup blong buk stadi mo blong givim ol pablik tok.

Long olgeta yia we i pas finis, mifala i bin fesem ol problem, olsem ol narafala. Eksampol, nating se mitufala i mekem bigfala traehad, Doris i bin kam slak lelebet long saed blong spirit taem we hem i gat klosap twanti yia. Hem i maredem wan man we i no wan Witnes. Be hem i neva lusum fulwan lav we hem i gat long Jeova, mo boe blong hem Bill i bin wok 15 yia long Betel blong Wallkill, long New York. Naoia Doris mo Louise tufala i wido, be tufala i wok klosap long tufala olsem ol fultaem paenia.

Ol Samting We Mifala i Bin Lanem

Mi lanem blong folem sam isi rul blong karem gudfala frut long wok blong Jeova: Holem wan laef we i isi. Soem gudfala eksampol long evri samting we yu mekem. Folem advaes blong “Man blong wok we i gat hed [“slef we i stret mo waes,” NW ].”—Matiu 24:45.

Marion i bin raetemdaon wan lis blong ol samting we i save givhan bigwan long hem long wok blong paenia, we long semtaem hem i stap lukaot long tufala pikinini. Ol samting long lis ya hemia: Wokem mo folem wan gudfala program. Mekem wok blong paenia olsem prapa wok blong yu. Kakaegud oltaem. Spel gud oltaem. No pleplei bitim mak. Mekem trutok, mo wok blong prij, i kam nambawan samting long laef blong pikinini blong yu. Mekem wok blong prij i kam beswan samting long laef blong olgeta oltaem.

Naoia wanwan long mitufala i gat moa long 90 yia. Sikiste tu yia i pas finis we mitufala i bin lesin long tok blong baptaes blong mitufala long yad blong famle Stackhouse, mo mitufala i spenem 60 yia long fultaem wok. Mi mo Marion mitufala i save talem stret se, mitufala i glad bigwan long ol samting we i bin kamaot long laef blong mitufala. Mi glad tumas long ol tok we i bin leftemap tingting blong mi taem mi wan yangfala papa. Olsem nao, mi save putum ol mak long saed blong spirit long fasples mo traehad blong kasem olgeta. Mo mi glad tu from gudfala waef blong mi, Marion, mo tufala gel blong mitufala we oli sapotem mi long ol yia we i pas. Nating se mifala i no gat plante samting long saed blong bodi, oltaem mi mi folem Prija 2:25 we i talem se: “?Sipos God i no stap givim ol samting ya long yumi, bambae yumi save kasem kakae olsem wanem? ?Mo bambae yumi save glad olsem wanem?”

I tru, long saed blong mifala, Jeova i bin mekem promes blong hem i kamtru we i stap long Malakae 3:10 (NW ). Hem i rili, ‘openem doa blong heven blong bambae ol blesing oli kamdaon long mifala mo i givim olgeta samting ya long mifala gogo mifala i no moa nidim.’

[Bokis/Image pej 29]

OL MEMORI BLONG OL YIA BLONG FAET

Klosap 60 yia afta long wolwo, mifala evriwan long famle i tingbaot gud yet ol yia ya.

Doris i talem se: “Pennsylvania i kolkol long taem ya. Wan naet, tempreja i 30 digri aninit long siro.” Louise i gohed i se: “Mi mo Doris mitufala i foldem leg blong mitufala taem mitufala i sidaon long jea blong olfala trak (Buick) blong mifala, blong mekem se leg blong mitufala i no kolkol.”

Doris i gohed i se: “Be mifala i neva kam pua no harem olsem we mifala i lusum wan samting. Mifala i save se mifala i jenisim ples oltaem i bitim ol narafala, be mifala i gat inaf kakae, mo sam fren long Ohio oli givim ol gudfala klos long mifala, we ol klos ya oli niuwan nomo.”

Louise i talem se: “Oltaem Mama mo Papa oli mekem mifala i haremsave we tufala i lavem mo i glad long mifala, mo mifala i spenem plante taem wetem tufala long wok blong prij. Samting ya i mekem mifala i harem olsem se mifala i sas mo i mekem mifala i kam klosap long tufala.”

Paul i talem se: “Mi bin gat wan trak (Buick Special) blong 1936, mo long taem ya ol man oli savegud trak ya from noes we i kamaot long aean we wil i stap tantanem long hem. Mi ting se paoa blong enjin blong hem i strong tumas. I luk olsem se noes ya i stap kamaot evri naet blong manis we i kolkol, mo biaen bambae mi go long woksap blong karem wan narafala aean blong wil. Sloslou mi stat savegud fasin blong jenisim ol aean ya.”

Marion i talem se: “Yu no mas fogetem kad blong karem kakae. Gavman i putum wan stret amaon we ol man oli no mas bitim, long ol samting olsem mit, bensin, ol wil blong trak, evri samting. Evri taem we mifala i kasem wan niufala ples blong wok long hem, mifala i mas go long ofis blong gavman we oli stap givimaot ol kad blong kakae mo askem kad long olgeta. Sam manis i mas pas bifo we mifala i save tekem wan kad, mo i luk olsem se evritaem we mifala i kasem kad blong mifala, sosaeti i sanem mifala i go wok long wan narafala ples, taswe mifala i mas go karem wan narafala kad bakegen. Be oltaem Jeova i lukaotgud long mifala.”

[Foto]

Mi mo Marion wetem Doris (lefsaed) mo Louise, long 2000

[Tok blong pija long pej 25]

Mi wetem mama blong mi long 1918, taem mi gat 11 yia

[Tok blong pija long pej 26]

Mi wetem Louise, Marion, mo Doris long 1948, taem tufala gel i baptaes

[Tok blong pija long pej 26]

Foto blong mared blong mitufala, long Oktoba 1928

[Tok blong pija long pej 26]

Mi mo tufala gel blong mi (lefsaed olgeta mo raetsaed olgeta) long Yankee Stadium, long 1955