Stap Glad From Save Blong Jeova

“Man we i harem tok blong God mo i obei long hem, hem i save harem gud moa.”—LUK 11:28.

1. ?Wetaem Jeova i stat blong givim save blong hem long ol man?

 JEOVA i lavem ol man mo i intres bigwan long ol nid blong olgeta. Taswe, yumi no sapraes se Jeova i givim save blong hem long olgeta. Fasin ya i stat long garen blong Iden. Jenesis 3:8 i talem se, wan taem “long sapa,” tufala ya, Adam mo Iv, “i harem noes blong hem [“voes blong Jeova God,” NW ].” Samfala oli talem se, hem i kastom blong Jeova blong toktok wetem Adam long sapa, mo maet hem i bin mekem olsem evri dei. Nating se i olsem wanem, Baebol i soemaot klia se Jeova i tekem taem blong givim advaes long faswan man. Be i no hemia nomo. Jeova i tektaem tu blong tijim faswan man ya long ol samting we hem i nidim blong save mekem wok blong hem.—Jenesis 1:28-30.

2. ?Olsem wanem fasfala man mo woman i tanem baksaed long Jeova we i lidim tufala, mo wanem frut i kamaot from?

² Jeova i stamba blong laef blong Adam mo Iv. Hem i givim wok long tufala blong bos long ol anamol mo long ful wol. Wan samting nomo Jeova i putum tabu long hem se tufala i no mas kakae frut blong tri ya we i save mekem man i save ol fasin we i gud mo ol fasin we i nogud. Be, Adam mo Iv, tufala i letem Setan i lidim tufala blong brekem loa ya. (Jenesis 2:16, 17; 3:1-6) Tufala i wantem folem tingting blong tufala nomo. Tufala i wantem mekem prapa disisen blong tufala long saed blong samting we i stret no samting we i no stret blong mekem. Be taem tufala i mekem olsem, tufala i tanem baksaed long Man ya we i Wokem tufala, we i stap lidim tufala, mo we i lavem tufala tumas. Fasin ya i krangke nomo. Frut blong fasin ya i mekem bigfala trabol i kamaot long tufala mo long ol pikinini blong tufala we oli no bon yet. Adam mo Iv i kam olfala mo biaen tufala i ded. Tufala i no gat hop blong laef bakegen long ded. Ol man we oli kamaot biaen long tufala oli bon wetem sin mo frut blong samting ya, hemia ded.—Rom 5:12.

3. ?From wanem Jeova i givim save blong hem long Ken, mo Ken i mekem wanem?

³ Nating se fasin rebel i kamaot long Iden, Jeova i gohed blong givim save blong hem long ol man we hem i wokem. Bifo we sin i winim Ken, fasbon pikinini blong Adam mo Iv, Jeova i givim woning long hem se sipos hem i mekem sin bambae hem i kasem trabol. Jeova i pulum hem blong mekem ‘fasin blong hem i stret.’ Be Ken i no lesin long gudfala advaes ya mo i kilim brata blong hem i ded. (Jenesis 4:3-8) Taswe, trifala faswan man long wol, trifala ya i sakemaot advaes we Man ya we i stamba blong laef blong olgeta i givim blong lidim olgeta. Trifala i no wantem lesin long God ya we i tijim ol man blong hem blong givhan long olgeta. (Aesea 48:17) !Ating Jeova i bin harem nogud tumas!

Jeova i Soemaot Hem Long Ol Man Blong Bifo

4. ?Jeova i sua se sam long ol pikinini blong Adam bambae oli mekem wanem, mo from samting ya hem i talemaot wanem mesej we i givim hop?

⁴ Sipos Jeova i wantem, hem i gat raet blong neva givim save blong hem bakegen long ol man, be hem i no mekem olsem. Jeova i sua fulwan se sam long ol pikinini blong Adam bambae oli gat waes fasin mo letem Hem i lidim olgeta. Taswe, taem Jeova i talemaot jajmen blong hem long Adam mo Iv, hem i talem se bambae i gat wan “laen” i kamaot we i agensem Snek ya, Devel Setan. Mo bambae Setan i ded taem laen ya i smasem hed blong hem. (Jenesis 3:15) Profet tok ya i givim hop mo glad long olgeta ‘we oli harem tok blong God mo oli obei long hem.’—Luk 11:28.

5, 6. ?Bifo long faswan handred yia K.T., Jeova i yusum wanem rod blong givim save blong hem long ol man blong hem, mo olsem wanem samting ya i givhan long olgeta?

⁵ Jeova i talemaot long ol man blong bilif blong bifo, olsem Noa, Ebraham, Aesak, Jekob, mo Job,  ol samting we hem i wantem mekem. (Jenesis 6:13; Eksodas 33:1; Job 38:1-3) Biaen, Jeova i yusum Moses blong givim ol loa blong hem long nesen blong Isrel. Loa ya blong Moses i givhan olgeta long plante defren rod. Taem ol man Isrel oli obei long Loa ya, oli kam olsem spesel nesen blong God we i seraot long ol narafala nesen. God i mekem ol man Isrel oli sua se, sipos oli obei long Loa blong hem, bambae hem i blesem olgeta long saed blong bodi mo long saed blong spirit tu. Bambae oli kam olsem wan kingdom blong ol pris, wan tabu nesen. Mo tu, Loa i tokbaot ol fasin blong stap klin mo ol kakae we i stret blong tekem blong givhan long olgeta blong gat gudfala helt. Be, Jeova i givim woning tu se bambae ol nogud frut oli kamaot sipos oli no obei long Loa ya.—Eksodas 19:5, 6; Dutronome 28:1-68.

⁶ Samtaem biaen, God i pulum ol man blong raetem sam narafala buk we oli kam haf blong Baebol. Sam long ol buk ya oli talem fulap stori long saed blong ol wok we Jeova i bin mekem long olgeta man mo olgeta nesen. Sam narafala buk oli yusum ol naesfala tok blong talemaot ol nambawan fasin blong Jeova. Mo tu, i gat ol buk blong ol profet we oli talemaot olsem wanem Jeova bambae i mekem wil blong hem i kamtru. Ol man blong bifo we oli holemstrong long bilif, oli stadi dip long ol buk ya mo oli mekem ol tabu raeting ya oli wok long laef blong olgeta. Wan long olgeta i talem se: “Tok blong yu i olsem laet. Oltaem hem i stap soemaot rod blong mi, mo i stap lidim mi.” (Ol Sam 119:105) Yes, Jeova i givim tijing mo laet long saed blong spirit long olgeta we oli wantem lesin.

Save i Kam Klia Moa

7. ?Nating se Jisas i wokem merikel, ol man oli save hem moa olsem wanem, mo from wanem?

⁷ Long faswan handred yia, ol skul blong ol man Jiu oli ademap fulap kastom blong man long Loa blong Moses. Oli yusum Loa ya folem tingting blong olgeta nomo, mekem se Loa ya i no moa olsem wan laet, be i kam wan hevi baden nomo. (Matiu 23:2-4) Be, long 29 K.T. * Jisas i kamtru olsem Mesaea. Hem i kam long wol, blong givim laef blong hem blong sevem ol man, mo tu, blong “talemaot ol tok we i tru.” Nating se hem i wokem merikel, ol man oli singaot hem se “Tija.” Ol tijing blong hem oli olsem wan laet we i saen long tudak ya long saed blong spirit we i stap blaenem tingting blong ol man. Jisas i talem tru se: “Mi nao, mi olsem laet blong ol man long wol.”—Jon 8:12; 11:28; 18:37.

8. ?Wanem ol buk we tabu spirit i pusum ol man blong raetem long faswan handred yia K.T., mo ol buk ya oli givhan long ol faswan Kristin olsem wanem?

⁸ Biaen oli raetem ol fo Gospel, we oli tokbaot laef blong Jisas, mo buk blong Ol Wok, we i tokbaot histri blong Kristin skul we i kam antap bigwan  afta long ded blong Jisas. Mo tu, tabu spirit i pusum ol disaepol blong Jisas blong raetem ol leta, wetem profet tok blong Revelesen. Olgeta hanraet ya, tugeta wetem Hibru haf blong Baebol, oli mekemap fulwan Baebol. Olgeta tabu hanraet ya oli givhan long ol Kristin blong save we trutok “i bigwan olsem wanem, mo i longfala olsem wanem, mo i hae olsem wanem, mo i dip olsem wanem.” (Efesas 3:14-18) Oli save gat “tingting blong Kraes.” (1 Korin 2:16) Be, ol faswan Kristin ya oli no save olgeta samting long saed blong stamba tingting blong Jeova. Aposol Pol i raet long ol Kristin se: “Naoia yumi save luk fasin blong God, olsem we yumi stap luk long wan glas we i no klia gud.” (1 Korin 13:12) Long wan glas olsem, oli save luk sam samting, be i no klia gud. Save long saed blong Tok blong God bambae i mas kam klia moa sam taem biaen.

9. ?Wanem save i kam klia long taem blong “Lasdei”?

⁹ Tede, yumi stap long taem blong “Lasdei.” Laef long wol ya “i kam strong tumas.” (2 Timoti 3:1) Profet Daniel i talemaot se long taem ya nao “bambae trufala save i kam fulap.” (Daniel 12:4, NW ) Taswe, Jeova, Nambawan Man blong Talemaot Tok, i bin givhan long ol man we oli gat gudhat blong oli kasem save long Tok blong hem. Naoia, plante man oli kasem save, se Jisas Kraes i kam King finis long heven, long 1914. Ol man ya oli kasem save tu se i no longtaem bambae Jisas i spolem olgeta fasin nogud mo bambae hem i mekem wol ya i kam wan paradaes. Hemia wan impoten haf blong gud nius blong Kingdom we tede, ol man oli stap talemaot long olgeta ples long wol.—Matiu 24:14.

10. ?Long ol handred yia we oli pas, ol man oli mekem wanem taem oli harem advaes we Jeova i givim?

¹⁰ Yes, longtaem finis i kam, Jeova i talemaot wil blong hem mo stamba tingting blong hem long ol man long wol. Baebol i fulap long ol stori blong ol man we oli lesin long waes blong God, nao oli mekem waes ya i wok long laef blong olgeta, mo kasem blesing from. Mo Baebol i tokbaot sam narafala man we oli sakemaot advaes we God i givim wetem lav, mo oli folem nogud eksampol blong Adam mo Iv. Jisas i talem wan pijatok blong tokbaot tufala rod ya we man i save folem. Wan rod i blong go lus. Rod ya i bigwan, mo i isi nomo long olgeta we oli sakemaot Tok blong God blong oli wokbaot long hem. Narafala rod i blong go kasem laef. Rod ya i smol mo i strong blong folem. Be rod ya i blong olgeta we oli agri se Baebol i Tok blong God, mo oli wantem laef folem wanem we Baebol i talem.—Matiu 7:13, 14.

Soem Tangkiu From Ol Blesing We Yumi Gat

11. ?Save we yumi gat mo bilif blong yumi long Baebol i pruvum wanem?

¹¹ ?Yu yu wan long olgeta we i jusum rod blong go kasem laef? Sipos yes, ating yu wantem gohed long rod ya. ?Olsem wanem yu save mekem samting ya? Wetem fasin tangkiu, tingbaot oltaem olsem wanem trutok blong Baebol i bin givhan long laef blong yu. From we yu lesin long gud nius ya fastaem, samting ya i pruvum se God i agri long yu mo i stap blesem yu. Jisas i soemaot samting ya taem hem i prea long Papa blong hem se: “Papa. Yu yu Hae God, yu Masta blong olgeta samting long heven mo long wol. Mi mi talem tangkiu long yu, from we yu yu haedem ol samting ya long fes blong ol man we oli waes, mo ol man we oli skul gud, be yu soemaot olgeta long ol man we oli olsem smol pikinini nomo, blong oli save gud.” (Matiu 11:25) Ol man blong pulum fis mo ol man blong tekem mane blong takis oli kasem save long tijing blong Jisas, be ol lida blong skul we oli skul gud oli no kasem save long hem. Jisas i gohed i se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.” (Jon 6:44) Sipos yu kasem save finis long Baebol mo yu bilif mo obei long ol tijing blong hem, samting ya i pruvum se Jeova i pulum yu yu kam. Hemia wan gudfala risen blong stap glad.

12. ?Long wanem rod Baebol i givim save we i klia moa?

¹² Tok blong God i fulap long ol trutok we oli mekem man i fri mo hem i givim save we i klia.  Olgeta we oli laef folem save blong Baebol, oli no moa stap kalabus long ol kastom mo giaman tijing we oli holem plante milian man oli stap long tudak. Eksampol, from we yumi save trutok long saed blong sol, yumi no fraet se ol dedman oli save spolem yumi mo yumi no harem nogud from tingting ya se famle mo fren blong yumi we i ded i stap safa. (Esikel 18:4) Trutok long saed blong ol rabis enjel i blokem yumi blong no joen long wok blong ol rabis spirit. Tijing long saed blong laef bakegen long ded, i leftemap tingting blong olgeta we oli lusum wan fren no famle long ded. (Jon 11:25) Ol profet tok blong Baebol oli soemaot wanem taem we yumi stap long hem naoia, mo oli mekem yumi trastem ol promes blong God long saed blong fiuja. Mo tu, ol profet tok oli mekem hop we yumi gat blong laef foreva i strong moa.

13. ?Olsem wanem fasin blong obei long tok blong God i givhan long helt blong yumi?

¹³ Ol rul blong God long Baebol oli tijim yumi blong laef long wan fasin we i givhan long helt blong yumi. Eksampol, yumi lan blong blokem ol samting we i save mekem bodi i doti, olsem tabak mo ol narafala drag. Yumi no dring alkol bitim mak. (2 Korin 7:1) Fasin blong obei long ol loa blong God, i blokem yumi blong no kasem ol sik we oli kamaot from ol nogud fasin long saed blong seks. (1 Korin 6:18) Taem yumi folem advaes blong God blong no laekem mane tumas, yumi no spolem pis long tingting blong yumi, olsem plante man oli mekem taem oli wantem kam rij. (1 Timoti 6:10) ?Yu yu luk se helt blong yu i kam moagud taem yu folem Tok blong God long laef blong yu?

14. ?Tabu spirit i gat wanem paoa long laef blong yumi?

¹⁴ Sipos yumi folem Tok blong God long laef blong yumi, bambae yumi kasem tabu spirit blong Jeova. Yumi wokem ol fasin olsem Kraes, olsem nambawan fasin blong fogif mo sore. (Efesas 4:24, 32) Spirit blong God i givhan long yumi tu blong wokem ol fasin olsem lav, glad, pis, longfala tingting, kaen fasin, gud fasin, bilif, kwaet fasin,  mo bos long tingting. (Galesia 5:22, 23) Ol fasin ya oli givhan long yumi blong glad mo blong fren gud wetem ol narafala mo ol memba blong famle tu. Yumi kasem paoa insaed long yumi we i halpem yumi blong no fraet taem yumi fesem ol traem. ?Yu yu luksave we taem tabu spirit i gat paoa long laef blong yu, laef blong yu i moa gud?

15. ?Taem yumi mekem laef blong yumi i laenap wetem wanem we God i wantem, olsem wanem samting ya i givhan long yumi?

¹⁵ Taem yumi mekem laef blong yumi i laenap wetem wanem we God i wantem, fasin fren blong yumi wetem Jeova i kam strong moa. Yumi sua fulwan se Jeova i kasem save long yumi mo i lavem yumi. From ol samting we oli hapen long laef blong yumi, yumi luksave se Jeova i stap sapotem yumi long taem blong trabol. (Ol Sam 18:18) Yumi luksave se hem i rili lesin long ol prea blong yumi. (Ol Sam 65:2) Yumi lan blong dipen long Jeova blong lidim yumi, mo yumi sua se fasin ya bambae i givhan long yumi. Mo yumi gat nambawan hop ya se long stret taem blong hem, God bambae i mekem ol man blong hem oli kam stret gud olgeta mo bambae hem i givim presen ya long olgeta, hemia laef we i no save finis. (Rom 6:23) Disaepol Jemes i talem se: “Stap klosap long God, nao hem bambae i kam stap klosap long yufala.” (Jemes 4:8) ?Yu yu faenem se fasin fren blong yu wetem Jeova i kam strong moa from we yu kam klosap long hem?

Wan Samting We i Sas Tumas

16. ?Sam Kristin blong faswan handred yia oli bin jenisim wanem samting long laef blong olgeta?

¹⁶ Pol i mekem ol tabu Kristin blong faswan handred yia oli tingbaot se bifo sam long olgeta oli gat ol fasin olsem: oli slip olbaot, oli stilim hasban mo waef blong narafala, oli man we i stap slip wetem man, oli stil, oli wantem plante samting tumas, oli dring we oli lusum hed, oli spolem nem blong narafala man, mo oli mekem ol bisnes blong stilim mane. (1 Korin 6:9-11) Trutok blong Baebol nao i pulum olgeta blong jenisim fasin blong olgeta. ‘God i wasemaot ol sin blong olgeta finis blong mekem oli klin.’ Traem tingbaot laef blong yu sipos yu no bin lanem trutok ya blong Baebol we i mekem yu yu fri. Yes, trutok i wan sas samting, i sas moa i winim ol narafala samting. !Yumi glad tumas we Jeova i stap givim save blong hem long yumi!

17. ?Long ol Kristin miting, ol Witnes blong Jeova oli bin tekem wanem kakae long saed blong spirit?

¹⁷ Antap long samting ya, tingbaot blesing we yumi kasem taem yumi joen long wan kampani blong ol brata we oli kamaot long olgeta kantri. “Slef we i stret mo waes” i givim kakae long saed blong spirit long stret taem blong hem. Hem i wokem ol Baebol, ol magasin mo narafala buk we oli kamaot long plante defren lanwis. (Matiu 24:45-47, NW ) Long yia 2000, ol Witnes blong Jeova long plante kantri oli joen long ol miting blong kongregesen blong tokbaot sam bigfala poen long eit impoten buk blong Hibru haf blong Baebol. Oli bin tingting dip long laef blong 40 man blong Baebol we buk ya Insight on the Scriptures i tokbaot olgeta. Sam long olgeta oli stadi haf blong buk ya Spesel Rod Blong Mekem Famle i Hapi mo bighaf blong buk ya Man We i Hae Moa Long Olgeta Man. Mo tu, oli tokbaot 52 stadi atikol long Wajtaoa wetem 36 narafala haf bakegen. Antap long samting ya, ol man blong Jeova oli haremgud long kakae long saed blong spirit we i kamaot long 12 Kingdom Wok Blong Yumi mo evri wik oli harem wan pablik tok we i tokbaot ol defren poen long saed blong Baebol. !Tru ya, ol save ya long saed blong spirit we olgeta oli kasem, oli plante tumas!

18. ?Long wanem rod Kristin kongregesen i givhan long yumi?

¹⁸ Raonabaot long wol, i gat bitim 91,000 kongregesen blong ol Witnes blong Jeova we oli mekem miting mo we oli joen wanples. Long ol miting ya mo kampani blong ol brata sista, yumi kasem sapot mo ol tok blong leftemap tingting. Mo tu, yumi haremgud from sapot blong ol Kristin  brata we oli bigman. Olgeta ya oli glad blong givhan long yumi long saed blong spirit. (Efesas 4:11-13) Yes, yumi kasem plante blesing from we yumi gat save long trutok. Yumi glad tumas blong save Jeova mo mekem wok blong hem. Tok blong man we i raetem Sam i tru tumas se: “Hae God i God blong yumi, mo from samting ya, yumi save harem gud.”—Ol Sam 144:15.

[Futnot]

?Yu Yu Rimemba?

• ?Bifo long Kristin taem, Jeova i givim save blong hem long hu?

• ?Olsem wanem save long saed blong spirit i kam klia moa long ol faswan handred yia, mo long taem blong yumi?

• ?Wanem ol blesing we yumi kasem taem yumi mekem save blong Jeova i wok long laef blong yumi?

• ?From wanem yumi glad long save blong God?

[Kwestin]

[Tok blong pija long pej 8]

Jeova i talemaot long Moses, Noa, mo Ebraham, ol samting we hem i wantem mekem

[Tok blong pija long pej 9]

Long taem blong yumi, Jeova i givim klia save long saed blong Tok blong hem

[Tok blong pija long pej 10]

Tingbaot blesing we yumi gat blong joen long wan kampani blong ol brata we oli kamaot long olgeta kantri