“?Wanem i Stap Hapen Long Franis?”

“Fasin fri, yumi laekem fasin fri.” Ol tok ya oli kamaot long singsing blong flag blong Franis. I tru, fasin fri i wan samting we ol man oli tinghae long hem. Be, ol samting we oli hapen long Franis long ol yia we oli jes pas, i mekem plante man oli wari se maet bambae i no moa gat fasin fri we evri man i gat raet long hem. Taswe, long Fraede, Novemba 3, 2000, plante taosen Witnes blong Jeova oli joen long wok blong seremaot 12 milian spesel traket, we nem blong hem “Que se trame-t-il en France? Les libertés pourraient-elles régresser?” (?Wanem i Stap Hapen Long Franis? ?Yumi Save Lusum Fasin Fri?)

BLONG sam yia nao, sam man blong gavman wetem sam grup we oli agensem ol smosmol grup blong skul, oli stap mekem trabol long ol Witnes blong Jeova long Franis. Samting ya i givim hadtaem long ol wanwan Witnes, ol kongregesen, mo long ogenaesesen blong ol Witnes long kantri ya. Be, long namba 23 Jun, 2000, Conseil d’État, we hem i hae kot blong Franis, i mekem wan bigfala disisen. Disisen ya i sapotem bighaf blong ol disisen we 31 kot oli mekem finis long saed blong 1,100 kes blong ol Witnes blong Jeova. Hae kot i talem bakegen se wosip blong ol Witnes blong Jeova i folem loa blong Franis mo hem i talem se ol Witnes, olsem ol narafala skul, oli no nid blong pem takis from Haos Kingdom blong olgeta.

Be, Ministri blong Faenans long Franis i no folem disisen ya. Hem i gohed blong traem fosem ol Witnes blong pem takis, nating se fasin ya i agensem loa blong kantri we i talem se ol skul oli no nid blong pem takis. Ministri ya i talem se olgeta Witnes mo ol fren blong olgeta we oli stap long 1,500 kongregesen long Franis, oli mas givim 60 pesen blong ol presen mane blong olgeta i go long gavman olsem takis. Naoia, kes ya i stap long kot bakegen.

Ol Witnes oli seremaot spesel traket ya, blong soemaot klia se oda ya i go agensem loa. Traket ya i makemgud denja we i save kamaot sipos  gavman i stanemap sam niufala loa blong fosem ol skul blong pem takis. Mo hem i soemaot se samting ya bambae i spolem fasin fri we ol man oli gat long saed blong wosip. *

Wan Longfala Dei

Ol Witnes long sam kongregesen oli stat seremaot traket ya long tu klok long moning. Oli go long ol stesen blong tren, ol faktri mo biaen long ol epot. Long sikis klok, taon blong Paris i stat fulap long man. Samwe long 6,000 volontia oli stap finis olbaot long ol rod blong seremaot traket long ol man we oli wokbaot i go long wok. Wan yangfala woman i talem se: “Wok we yufala i mekem blong leftemap fasin fri blong wosip i nambawan. Samting ya i no jes givhan long ol Witnes blong Jeova nomo.” Long Marseilles, bitim 350 Witnes oli stap seremaot traket ya long ol stesen blong tren mo long ol rod. Bifo wan aoa i pas, ol man oli harem nius long radio se oli no mas sapraes sipos wan Witnes blong Jeova i givim wan spesel traket long olgeta. Long Strasbourg, we hem i ples blong European Court of Human Rights, ol man we oli wet long tren oli stanap long laen blong kasem traket blong olgeta. Nating se hem i no gat semfala bilif, wan loea i talem se hem i intres tumas long kes blong ol Witnes blong Jeova, from we faet blong yumi hem i impoten mo i folem stret fasin.

Nating se i ren bigwan long eit klok long moning, long taon ya Grenoble, we i stap long ol hil blong Alpaen, 507 Witnes oli joen blong seremaot traket ya long ol rod mo oli putum wan long evri bokis blong leta long haos blong ol man. Ol man we oli draevem ol trak mo bas oli stop blong askem wan traket. Long Poitiers, wan taon long wes blong kantri, ol man we oli kamtru long tren stesen long naen klok, oli gat traket finis. Long sem taem ya, long Mulhouse, klosap long boda blong Jemani, oli seremaot 40,000 traket finis.

Taem ten klok i kam, fulap kongregesen oli seremaot bitim haf blong ol traket blong olgeta finis. Taem oli kasem en blong moning ya, i gat smol man nomo we oli no wantem karem traket, mo plante man oli intres blong storian long saed blong traket ya. Long Besançon, wan taon 80 kilometa longwe long boda blong Swiselan, wan Witnes i faenem wan yangfala man we i intres tumas long Baebol, mo we i askem kwestin ya from wanem God i letem ol fasin nogud oli stap. Witnes ya i singaot yangfala i kam long Haos Kingdom, blong tufala i save gohed long storian ya. Kwiktaem nomo tufala i statem wan Baebol stadi long buklet ya ?Wanem Samting We God i Wantem Yumi Blong Mekem?

Long medel dei, plante Witnes oli yusum taem blong spel blong olgeta blong prij wan no tu aoa. Long aftenun, wok blong seremaot traket i gohed. Plante kongregesen oli finisim olgeta traket blong olgeta long tri no fo klok. Long taon blong Reims, sam man we oli bin stadi mo joen wetem ol Witnes blong Jeova bifo, oli talem se oli wantem stadi bakegen. Long Bordeaux ol Witnes oli statem tri Baebol stadi. Long sem taon ya, wan Witnes i go long wan stoa blong pem wan niuspepa mo hem i luk wan hip blong ol traket i stap long stoa ya. Woman blong stoa, we bifo hem i wan Witnes, i ridim traket ya mo i luksave impoten mesej we i stap insaed. Ale, hem i mekem plante kopi blong traket ya mo hem i seremaot olgeta long ol man we oli kam long stoa blong hem.

Long Le Havre, Normandie, wan woman we hem i Protestan i sek taem hem i harem radio i talem se gavman i traem fosem ol Witnes blong Jeova blong pem takis long ol presen mane we oli kasem. Hem i glad tumas blong kasem traket blong  hem mo i presem ol Witnes from we oli tokbaot agens long fasin ya we i no stret. Long 20 menet pas 7 long naet, nius blong televisin long Lyons i tokbaot wok blong seremaot traket ya, se: “Long moning ya i moa isi blong man i haed long wota blong ren i bitim we hem i haed long ol traket blong ol Witnes blong Jeova.” Biaen, man blong televisin i askem kwestin long tu Witnes blong Jeova mo tufala i tokbaot wok blong traket ya.

Sam Witnes oli wantem seremaot traket ya long sapa afta we oli finis long wok. Ale, oli seremaot sam traket long ol man we oli stap long bas mo tren wetem olgeta mo oli putum ol traket long ol bokis blong leta long haos blong ol man. Long tufala taon blong Brest mo Limoges—we ol man oli savegud from ol naesfala poselen plet mo kap we oli stap wokem long ples ya—ol man we oli laswan blong kasem spesel traket ya, hemia olgeta we oli aot long sinema long 11 klok long naet. Olgeta traket we oli no seremaot long dei ya, oli seremaot evri wan long nekis moning.

Frut We i Kamaot

Wan Witnes i raetem se: “Ol enemi blong yumi oli wantem daonem paoa blong yumi. Be, samting we i defren olgeta i kamaot.” Long bighaf blong ol kongregesen, bitim 75 pesen blong ol Witnes oli joen long wok blong prij long dei ya. Sam oli spenem 10, 12 no 14 aoa long wok ya. Long taon blong Hem, long not blong Franis, afta we wan Witnes i wok ful naet, hem i joen long wok blong seremaot traket i stat long faef long moning go kasem tri klok long aftenun. Long taon ya Denain, we kongregesen blong hem i stat long yia 1906, 75 Witnes oli spenem 200 aoa tugeta blong seremaot traket ya long Fraede. Ol narafala long kongregesen ya, nating se oli olfala, oli sik, mo weta i nogud, olgeta tu oli joen long wok ya wetem strong tingting. Eksampol, long Le Mans, tri olfala we trifala i gat bitim 80 yia finis, trifala i spenem tu aoa blong putum ol traket long ol bokis blong leta long haos blong ol man. Mo wan Witnes we i stap long wan wiljea i seremaot ol traket long wan tren stesen. !Mo tu, i rili leftemap tingting blong ol Witnes blong luk se sam we bifo oli no moa joen long wok blong prij, oli joen long spesel wok ya!

Tru ya, wok blong seremaot traket ya i givim wan bigfala witnes. Olkaen man oli kasem traket ya, mo sam oli man we i had blong faenem olgeta long haos. Plante man oli talem se wok ya i mekem i gud long evri man, i no long ol Witnes nomo. Oli tingting se, traket ya i sapotem fasin fri we olgeta man long Franis oli gat blong folem tingting blong olgeta mo blong jusum wosip blong olgeta. From samting ya, plante man we oli no Witnes, oli askem sam moa traket bakegen blong givim long ol fren, ol man we oli wok wetem olgeta, mo ol famle tu.

Yes, ol Witnes blong Jeova long Franis oli glad blong joen long wok ya blong talemaot nem blong Jeova mo sapotem wok blong Kingdom. (1 Pita 3:15) Oli hop se ‘bambae oli stap gud, oli gat pis, mo oli stap ona gud long God, . . . mo oli save folem ol stret fasin.’ Mo oli hop we plante taosen narafala man bambae oli joen wetem olgeta blong presem Papa blong olgeta long heven, Jeova.—1 Timoti 2:2.

[Futnot]