Trufala Wosip i Mekem Ol Man Oli Joengud

I TRU se bighaf blong ol skul oli stap seraotem ol man. Be wosip blong trufala God ya we i wan nomo, i gat paoa blong mekem ol man oli joen gud. Taem Isrel i stap olsem nesen we God i jusumaot, plante Hiten man we oli wantem trutok, oli kam joen long trufala wosip. Eksampol, Rut i lego ol giaman god blong ol manples blong hem long Moab. Nao hem i talem long Nomi se: “Ol man ples blong yu bambae oli man ples blong mi, mo God blong yu bambae i God blong mi.” (Rut 1:16) Long faswan handred yia, wan bigfala namba blong ol Hiten man oli joen long wosip blong trufala God. (Ol Wok 13:48; 17:4) Biaen, taem ol aposol blong Jisas oli stat wokbaot i go long ol ples farawe blong talemaot gud nius, plante moa man oli joen long wosip blong trufala God. Aposol Pol i raetem se: “Yufala i lego ol narafala god blong kam biaen long God blong mifala . . . naoia yufala i man blong God ya we i tru mo i laef, i stap we i stap.” (1 Tesalonaeka 1:9) ?Olsem wanem tede? ?Wosip blong trufala God i save mekem ol man oli joengud?

Ol man we oli no bilif, oli strong blong talem se i rong blong yusum tok ya “ol trufala man blong wosip” no “trufala God.” Maet oli ting olsem from we oli no save se i gat trutok i stap we oli save lanem. Be ol man we oli traem faenem trutok, nomata oli kamaot long wanem ples, oli luksave se man i no mas jusum wan fasin blong wosip folem wanem we olgeta nomo i laekem. Tru tumas, i gat wan man nomo we i stret blong yumi wosipim. Hemia Man ya we i Wokem olgeta samting, nem blong hem Jeova God. (Revelesen 4:11) Hem i trufala God, mo hem i gat raet blong talem wanem fasin blong wosip we hem i wantem ol man oli mekem.

Jeova i givhan long yumi blong save wanem we hem i wantem yumi blong mekem. Hem i yusum Tok blong hem, Baebol, blong givim save long yumi. Klosap evriwan long wol tede oli save kasem fulwan Baebol no wan haf blong hem. Mo tu, Pikinini blong God i talem se: “Sipos yufala i obei long ol tok ya blong mi, . . . bambae yufala i save trutok.” (Jon 8:31, 32) Taswe, i gat rod blong save trutok. Mo plante milian man we hat blong olgeta i stret, oli stap lego ol defren kaen skul mo oli no fraet blong folem trutok. Olgeta ya, naoia, oli stap joengud long trufala wosip.—Matiu 28:19, 20; Revelesen 7:9, 10.

!Ol Man We Oli Joengud Long Fulwol Tede!

Long Baebol, nambawan profet tok blong Sefanaea i tokbaot ol man blong ol defdefren ples we bambae oli joen tugeta. Hem i se: “Long taem ya, [mi Jeova] bambae mi jenisim lanwis blong ol man i kam klin lanwis. Nao olgeta oli save singaot nem blong Jeova, blong mekem wok blong hem, we solda blong wan i joen long solda blong narawan.” (Sefanaea 3:9, NW ) !I gud tumas blong tingbaot se plante man oli jenisim fasin blong olgeta nao oli joen wanples blong wosipim God!

?Samting ya bambae i mas hapen wetaem? Sefanaea 3:8 i talem se: “!Yufala i lukaot! Dei ya blong mi i stap kam we mi bambae mi talemaot we olgeta kantri oli mas kasem panis. Mi mi tingbaot finis blong tekem ol man blong olgeta kantri wetem ol king blong olgeta oli kam wanples, nao bambae oli haremsave paoa blong kros blong mi. Olgeta ples long wol ya, bambae mi spolem olgeta evriwan long paoa blong kros blong mi, we bambae i laet olsem faea.” Yes, taem Jeova i stap hivimap ol nesen oli kam wanples, mo bifo we hem i mekem kros blong hem i kamaot long olgeta, bambae hem i givim janis long ol man long wol ya we oli gat tingting daon, blong oli lanem wan klin lanwis. Taem ya hemia naoia, from we ol nesen oli stat hivap finis blong faet long bigfala dei blong God ya we i gat Olgeta Paoa, hemia Amagedon.—Revelesen 16:14, 16.

Jeova i givim wan klin lanwis long ol man blong hem blong mekem se oli joengud. Niufala lanwis ya hemia stret save blong ol trutok blong Baebol, long saed blong God mo ol stamba tingting blong hem. Taem man i toktok klin lanwis ya i min se hem i bilif long trutok, i tijim trutok ya long ol narafala, mo i mekem laef blong hem i laenap wetem ol loa mo rul blong God. I minim se man ya i no joen long  politik we i stap seraotem ol man, mo hem i sakemaot ol fasin blong tingbaot hem wan nomo, olsem fasin blong no laekem man blong defren kala mo fasin blong flas from kantri blong hem. (Jon 17:14; Ol Wok 10:34, 35) Olgeta man we hat blong olgeta i stret mo we oli lavem trutok, oli save lanem lanwis ya. Tingbaot ol faefala man mo woman ya we yumi tokbaot olgeta finis. Fastaem oli seraot from ol defdefren bilif, be naoia oli joengud long wosip blong trufala God ya Jeova.

Oli Joengud Long Trufala Wosip

Fidelia we hem i joen long Katolik Jos, i pem wan Baebol blong givhan long smol gel blong hem long skul. Nao hem i askem pris blong soem long Baebol, wanem i hapen long ol faef pikinini blong hem we oli ded. Tingting blong Fidelia i foldaon bigwan from we hem i no kasem ansa blong kwestin blong hem. Ale, taem ol Witnes blong Jeova oli pas long haos blong hem, hem i askem sem kwestin long olgeta. Taem hem i ridim trutok blong Baebol long saed blong ol dedman, hem i luksave se jos blong hem i bin giaman long hem. Hem i lanem se ol dedman oli no save wan samting nating, taswe oli no stap safa long Limbo no wan narafala ples olsem. (Ol Sam 146:4; Prija 9:5) Fidelia i sakemaot olgeta pija mo aedol blong hem, hem i lego jos blong hem, mo i stat stadi Baebol. (1 Jon 5:21) Naoia i mekem ten yia finis we hem i stap harem gud tumas blong tijim trutok blong Baebol long ol narafala man.

Tara we i blong Kathmandu, i muf i go long wan kantri we i no gat plante haos wosip blong ol Hindu. Taswe, hem i go long wan jos blong ol Metodis blong traem faenem wanem we hem i nidim blong wosip long trufala fasin. Be hem i no kasem ansa long kwestin ya se from wanem ol man oli stap safa. Biaen, ol Witnes blong Jeova oli faenem hem mo askem hem blong stadi Baebol. Tara i talem se: “Mi stat luksave se, sipos God i gat lav, hem i no save mekem ol man long wol oli safa. . . . Mi glad tumas blong lanem se bambae i gat wan niufala wol we pis i stap long hem mo ol man oli joengud.” (Revelesen 21:3, 4) Tara i sakemaot olgeta aedol blong skul Hindu mo i no moa folem ol kastom blong skul blong kantri blong hem. Naoia hem i wan Witnes blong Jeova mo hem i faenem trufala glad taem hem i halpem ol narafala man we oli gat nid long saed blong spirit.

Panya, we i joen long skul blong ol Budis, i stap mekem wok blong talemaot fiuja blong ol man, taem ol Witnes blong Jeova oli mitim hem long Bangkok. Hem i intres bigwan long ol profet tok blong Baebol. Panya i storian se: “Mi lanem from wanem laef tede i defren olgeta long wanem we God i bin wokem fastaem, mo mi lanem olsem wanem bambae hem i finisim ol trabol we oli kamaot long olgeta we oli sakemaot hem mo hae rul blong hem. Taem mi lanem ol samting ya, i olsem we oli karemaot wan kaliko we i bin fasem ae blong mi. Evri samting long Baebol i laenap gud nomo. Mi luk Jeova olsem wan trufala man, mo mi laekem hem tumas. Samting ya i givim paoa long mi blong folem wanem we mi save se i stret. Mi wantem tumas blong halpem ol narafala man blong luksave se waes blong man i defren olgeta long waes blong God. Trufala waes i rili jenisim laef blong mi.”

Virgil, i stat blong gat tingting we i hafhaf long ol tijing blong skul blong hem. Hem i no prea blong askem God blong i halpem ol blak man, mo blong i halpem grup ya we i luk olsem oli agensem ol waet man from kala blong olgeta nomo. Be, hem i prea long God blong soemaot se wanem ya trutok, mo weples hem i save faenem trutok ya. Virgil i tingtingbak i se: “Afta long prea ya we mi mi mekem, mi wekap long nekis dei mo mi faenem wan Wajtaoa long haos blong mi. . . . Ating wan man i bin pusum magasin ya i kam aninit long doa.” I no longtaem biaen, hem i stap stadi Baebol wetem ol Witnes blong Jeova. Hem i gohed i se: “Hemia fastaem we mi harem se laef blong mi i gat mining. . . . I olsem we wan laet i saen i kam long mi mo i mekem mi mi gat hop long fiuja.” I no longtaem, Virgil i joen wetem ol man ya blong talemaot gudfala fiuja we Baebol i stap tokbaot mo we ol man oli save kasem.

 Charo, long Latin Amerika, i faenem i had from we hem i gat ol smosmol pikinini blong lukaot. Be hem i sapraes tumas taem wan Witnes we nem blong hem Gladys, i kam halpem hem blong go long maket. Smoltaem biaen, Charo i agri long fri Baebol stadi we Gladys i askem hem blong mekem. Charo i sapraes tumas blong ridim long Baebol blong hem se i no olgeta gudfala man evriwan we bambae oli go long heven. Hem i lanem se Jeova bambae i blesem plante man we oli stap long wol ya mo i givim laef we i no save finis long olgeta. (Ol Sam 37:11, 29) Charo i spenem 15 yia nao blong serem trutok ya wetem ol narafala man.

!I gud tumas blong tingbaot wan wol we bambae i fulap long ol gudfala man we oli joengud blong wosipim Jeova, we hem nomo i trufala God! Hemia i no wan drim. Jeova i promes se samting ya bambae i kamtru. Profet Sefanaea i talemaot tok blong God i se: “Be yufala we tingting blong yufala i stap daon, bambae mi letem yufala nomo i stap long ples ya, nao bambae yufala i stap kam long mi blong mi givhan long yufala. . . . Bambae yufala i no moa save mekem i nogud long narafala man, mo bambae yufala i no moa save talem ol giaman toktok, mo yufala i no moa save giaman long man blong trikim hem. . . . Mo bambae i no moa gat man blong mekem yufala i fraet.” (Sefanaea 3:12, 13) Sipos yu intres long promes ya, yu mas lesin long advaes ya blong Baebol se: “Yufala i mas lukaot Jeova, yufala olgeta kwaet man blong wol we tingting blong yufala i stap daon, we yufala i obei long ol jajmen blong hem. Yufala i mas lukaot stret fasin, yufala i mas lukaot tingting daon. Maet bambae yufala i haed long dei blong kros blong Jeova.”—Sefanaea 2:3, NW.