Wan Kwestin

?Hem i minim wanem blong wosipim Jeova “wetem spirit”?

Taem Jisas i prij long wan woman Sameria we i kam blong kasem wota long wel blong Jekob klosap long taon blong Saeka, hem i talem se: “God hem i spirit, mo olgeta we oli mekem wosip long hem oli mas mekem wetem spirit mo trutok.” (Jon 4:24, NW ) Trufala wosip i mas stanap long “trutok.” Hemia i min se, trufala wosip i mas laenap wetem wanem we Jeova God i talem long Baebol long saed blong hem, mo stamba tingting blong hem. Mo tu, yumi mas wosipim God wetem spirit, we i minim se yumi mekem wok blong God wetem strong tingting, mo hat blong yumi we i pusum yumi blong wok, i mas fulap long bilif mo lav. (Taetas 2:14) Be, ol vas raonabaot long tok ya we Jisas i bin talem long saed blong ‘wosip long God wetem spirit’ oli no minim tingting ya nomo we yumi gat taem yumi mekem wok blong Jeova, be hem i karem wan mining we i dip moa.

Taem Jisas i storian wetem woman ya long wel, hem i no talem se i nidim strong tingting blong wosipim God. Tru ya, ol man blong giaman skul oli save mekem wosip tu wetem strong tingting mo wetem ful laef blong olgeta. Defren olgeta, Jisas i talem se bambae man i no moa wosipim Papa long wan ples olsem bigfala hil blong Sameria no tempol blong Jerusalem. Be hem i gohed i tokbaot wan niufala fasin blong wosip we i laenap long fasin blong God olsem wan spirit man. (Jon 4:21) Jisas i talem se: “God, hem i spirit.” (Jon 4:24) Yes, trufala God i no gat bodi olsem yumi mo yumi no save luk hem no tajem hem. Wosip blong God i no nidim blong stap long wan spesel tempol no bigfala hil long wol ya. From samting ya, toktok blong Jisas i laenap long wan fasin blong wosip we man i no save luk wetem prapa ae blong hem.

Trufala wosip i mas stanap long trutok. Be antap long hemia, man we i mekem wosip we God i agri long hem, hem i mas letem tabu spirit i lidim hem—hemia bigfala paoa blong God we yumi no save luk. Aposol Pol i bin raetem se: “[Tabu] spirit ya blong God i save lukaot olgeta samting we i haed. Ol tingting blong God we man i no save faenemaot, be spirit ya i save faenemaot olgeta.” Mo hem i gohed se: ‘Nao spirit ya we yumi kasem finis, hem i no wan spirit we i kamaot long wol. Hem i spirit blong God ya, we hem nomo i sanem i kam long yumi blong yumi save olgeta samting we hem i givim long yumi.’ (1 Korin 2:8-12) Blong mekem wosip we God i agri long hem, yumi mas gat tabu spirit blong hem mo letem spirit ya i lidim yumi. Taswe, i impoten tumas we tingting blong yumi i laenap wetem spirit blong Jeova taem yumi stadi mo mekem Tok blong hem i wok long laef blong yumi.

[Tok blong pija long pej 28]

Wosipim God “wetem spirit mo trutok”