Rod Blong Wokem Wan Hapi Wol
Rod Blong Wokem Wan Hapi Wol
NIUSPEPA ya Time i talem se: “Wan man nomo i gat moa paoa—i no long tu taosen yia we i jes pas nomo, be long ful histri blong man. Man ya hem i Jisas blong Nasaret.” Taem Jisas i stap long wol, plante taosen man we hat blong olgeta i stret oli luksave we hem i wan man we i hae, be i no hemia nomo. Oli luksave tu se hem i intres long ol narafala man. Taswe, yumi no sapraes we oli wantem putumap hem i kam king. (Jon 6:10, 14, 15) Be olsem we yumi talem long faswan haf, Jisas i no wantem joen long ol bisnes blong politik.
DISISEN ya we Jisas i tekem blong no joen long politik, i stanap long tri samting: Hem i save tingting blong Papa blong hem long saed blong fasin fri we ol man oli gat blong jus, olsem fasin fri blong rul; Jisas i save se i gat sam strong paoa we yumi no save luk oli stap wok agensem traehad blong ol man blong rul, nating sipos samtaem ol traehad ya oli gud; mo hem i save stamba tingting blong God blong stanemap wan gavman long heven blong rul antap long ful wol. Taem yumi lukluk moa long trifala poen ya, bambae yumi kasem save from wanem ol man oli no naf blong mekem wol ya i kam moagud, nating sipos oli traehad. Mo tu, bambae yumi luk olsem wanem wol ya bambae i kam moagud.
?Man i Naf Blong Rulum Ol Man?
Taem God i wokem ol man, hem i givim raet long olgeta blong bos antap long evri anamol long wol. (Jenesis 1:26) Be ol man oli stap aninit long rul blong God. Faswan man mo woman, tufala i mas soemaot se tufala i stap daon long God. Blong mekem olsem, tufala i mas obei mo no kakae frut blong “tri ya blong save wanem samting i gud mo wanem samting i nogud.” (Jenesis 2:17) Sore tumas, Adam mo Iv i no yusum gud fasin fri we tufala i gat blong jus, mo tufala i no obei long God. Taem tufala i tekem tabu frut ya, tufala i stil, be hem i minim tu se tufala i rebel agens long hae rul blong God. Wan futnot blong Jenesis 2:17 long New Jerusalem Baebol, i talem se Adam mo Iv i askem blong “kam independen, hemia i min se [tufala] i no wantem nating blong luksave se God i wokem [tufala] . . . Faswan sin ya i go agens long hae rul blong God.”
From we i gat sam impoten kwestin blong ansarem long saed blong bisnes ya, God i letem Adam mo Iv wetem ol pikinini blong tufala oli jusum prapa rod blong olgeta blong laef. Mo oli putumap ol prapa rul blong olgeta long saed blong wanem i gud mo wanem i nogud. (Ol Sam 147:19, 20; Rom 2:14) Long taem ya nao, ol man oli stat blong traem ol defren rod we olgeta nomo oli jusum. ?Fasin ya i karem gudfala frut? !Taem yumi luk ol samting we oli bin hapen long ol taosen yia we oli pas finis, yumi save talem stret se i nogat gudfala frut nating! Prija 8:9 (NW ) i talem se: “Man i rulum ol man blong spolem olgeta nomo.” Ol tok ya, we i soem se man i no naf blong rul long hem wan, i pruvum se tok we i stap long Jeremaea 10:23 (NW ) i tru: “O Jeova, mi mi save gud we man blong graon i no masta blong rod blong hem. Man i no naf blong jusum wanem rod hem i mas wokbaot long hem.” Histri i bin pruvum se ol man oli no naf blong kasem gudfala frut long rul blong olgeta sipos oli stap independen long Man we i Wokem olgeta.
Jisas i agri fulwan long samting ya. Long tingting blong hem fasin ya blong kam independen long God hem i nogud we i nogud tumas. Hem i talem se: “Mi mi no mekem wan samting nating mi wan. Oltaem mi stap mekem ol samting we [God] i wantem.” (Jon 4:34; 8:28, 29) Taswe, Jisas i no agri taem ol man oli wantem mekem hem i kam king, from we God i no givim raet long hem blong mekem olsem. Be hemia i no minim we hem i no wantem givhan long ol narafala man. Defren olgeta, hem i yusum olgeta paoa blong hem blong givhan long ol man blong oli faenem trufala glad long laef naoia mo long fiuja. Hem i givim laef blong hem tu blong sevem ol man long wol. (Matiu 5:3-11; 7:24-27; Jon 3:16) Be Jisas i save se “evri samting i gat wan taem we i stret long hem.” Taswe, i gat wan stret taem tu blong bambae God i soemaot se hem i gat raet blong rul antap long olgeta man long wol. (Prija 3:1, NW; Matiu 24:14, 21, 36-39) Be yumi mas tingbaot se long garen blong Iden, faswan papa mama blong yumi tufala i kam aninit long paoa blong wan rabis spirit man we i yusum wan snek blong toktok long tufala. Hemia i lidim yumi i go long namba tu risen from wanem Jisas i no joen long ol bisnes blong politik.
Rula Blong Wol We Plante Man Oli No Save
Baebol i talem long yumi we Setan i wantem givim “olgeta kantri long wol ya wetem ol gudgudfala samting we oli gat” long Jisas. Be, fastaem Jisas i mas bodaon mo wosip long hem. (Matiu 4:8-10) Sipos Jisas i mekem wanem we Setan i wantem, bambae Setan i givim wol ya long hem blong hem i rulum. Jisas i no foldaon long traem ya. ?Be, hemia i rili wan traem? ?Setan i save givimaot wan samting we i bigfala olsem? Yes, from we Jisas hem wan i singaot Setan se “masta blong wol ya,” mo aposol Pol i tokbaot hem se “god blong wol ya.”—Jon 14:30; 2 Korin 4:4; Efesas 6:12.
Jisas i save we Setan i no intres long ol man. Hem i tokbaot Setan se hem i wan “man blong kilim man” mo se hem i “papa blong giaman mo blong olgeta samting we i no tru.” (Jon 8:44, The Amplified Bible) I klia nomo se wol ya i neva save kasem trufala glad taem hem “i stap aninit long paoa” blong wan rabis spirit olsem. (1 Jon 5:19, NW ) Be bambae Setan i no save holem paoa ya blong olwe. Jisas hem i wan spirit man we i kasem bigfala paoa finis, mo i no longtaem bambae hem i tekemaot Setan mo finisim paoa we hem i gat long ol man.—Hibrus 2:1-3.
Setan hem wan i save se taem blong hem blong rul antap long wol ya i stap kam sot moa. Taswe, hem i traehad long evri rod blong spolem ol man bitim mak, olsem we hem i bin mekem long taem blong Noa, bifo we Bigfala Wota i ron. (Jenesis 6:1-5; Jud 6) Revelesen 12:12 i talem se: “Sore tumas long yu graon, mo long yu solwota, from we Setan i kamdaon finis long yufala. Mo hem i kros tumas, from we hem i gat smol taem nomo blong hem i stap yet.” Ol profet tok blong Baebol mo ol samting we oli stap hapen long wol oli soemaot we yumi laef klosap long en blong “smol taem” ya. (2 Timoti 3:1-5) I no longtaem nao bambae yumi save haremgud.
Wan Gavman We i Save Karem Glad
Namba tri risen from wanem Jisas i no joen long ol bisnes blong politik, hemia from we hem i save se long wan stret taem long fiuja, God bambae i stanemap wan gavman long heven blong i rul antap long wol. Baebol i singaotem gavman ya se Kingdom blong God, mo olgeta tijing blong Jisas oli laenap wetem Kingdom ya. (Luk 4:43 ; Revelesen 11:15) Jisas i tijim ol disaepol blong hem blong prea from Kingdom ya. Tru long rul blong Kingdom ya nomo, bambae ‘God i mekem ol samting we hem i wantem oli kamaot long wol, olsem we oli kamaot finis long heven.’ (Matiu 6:9, 10, NW ) Maet yu stap askem se, ‘?Sipos Kingdom ya i rul antap long ful wol, wanem bambae i hapen long ol gavman we man i stanemap?’
Ansa i stap long Daniel 2:44 (NW ) we i talem se: “Long taem blong ol king ya [we oli stap rul long taem blong en], God blong heven bambae i stanemap wan Kingdom we neva i save brokdaon. Mo bambae Kingdom ya i no save go long han blong narafala nesen. Bambae hem i smasem mo finisim olgeta kingdom ya [we ol man oli stanemap], mo hem nomo bambae i stanap olwe.” ?From wanem Kingdom blong God bambae i “smasem” ol gavman blong man? From we olgeta ya oli gohed nomo blong folem tingting we Setan i statem long garen blong Iden, hemia blong yusum fasin fri blong olgeta blong go agensem God. Ol man we oli gohed blong soemaot tingting ya, oli no mekem samting blong givhan long ol narafala. Defren olgeta, oli stap go agens long Man ya we i Wokem olgeta samting. (Ol Sam 2:6-12; Revelesen 16:14, 16) Taswe, yumi mas askem long yumi wan se: “?Yumi agri long rul blong God no yumi agens long hem?”
?Bambae Yu Jusum Rul Blong Hu?
Ol man oli mas tekem wan disisen we i stanap long stret save long saed blong rul. Blong givhan long olgeta, Jisas i givim oda long ol disaepol blong hem se oli mas go talemaot “gud nius ya blong Kingdom long olgeta ples long wol blong givim witnes long olgeta nesen bifo we en blong rabis fasin blong wol ya i kam.” (Matiu 24:14, NW ) ?Hu i stap talemaot Kingdom blong God long olgeta ples blong wol tede? Ol Witnes Blong Jeova. Longtaem finis, Wajtaoa magasin i karem toktok ya long fored blong hem se: “Wajtaoa i Talemaot Kingdom Blong Jeova.” Tede, samwe sikis milian Witnes we oli stap long bitim 230 kantri oli stap givhan long ol man blong oli kasem stret save long saed blong Kingdom ya. *
Ol Blesing Blong Olgeta We Oli Laef Aninit Long Kingdom
Oltaem Jisas i mekem ol samting we God i wantem. Taswe, hem i no jusum blong tekem wan narafala rod mo yusum politik blong givhan no jenisim ol fasin blong wol ya blong oli kam moagud. Be, hem i wok had blong mekem se wok blong Kingdom blong God i go moa, from we hemia nomo rod blong stretem olgeta problem blong wol. From we hem i stap tru long God, hem i kasem blesing blong sidaon long jea blong king long heven, olsem trufala King blong Kingdom ya. !Hem i kasem wan nambawan praes from fasin blong hem blong letem God i lidim hem!—Daniel 7:13,14.
Tede, ol milian man we oli folem fasin blong Jisas blong putum Kingdom blong God fastaem long laef blong olgeta, mo folem wanem we God i wantem, olgeta tu bambae oli kasem wan nambawan presen. Yes, bambae oli gat janis blong stap aninit long Kingdom blong God long wol. (Matiu 6:33) Aninit long rul blong hem we i gat lav, bambae oli kam ol man we oli stretgud olgeta, mo oli gat hop blong laef olwe. (Revelesen 21:3, 4) 1 Jon 2:17 i talem se: “Mo wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” Taem Setan mo ol man blong hem oli no moa stap, ful wol ya bambae i kam wan paradaes. Bambae i no moa gat fasin blong seraot from man we i leftemap wan kantri bitim narafala, mo i no moa gat ol kruked fasin blong bisnes, mo ol giaman skul tu. !Bambae yumi glad tumas blong stap long wol ya blong olwe!—Ol Sam 37:29; 72:16.
Yes Kingdom blong God i trufala rod blong kasem wan hapi wol, mo mesej we i talemaot Kingdom ya hem i rili wan gudfala nius. ?Sipos yu no harem gud nius ya yet, from wanem yu no lesin long hem nekis taem wan Witnes i kam long haos blong yu?
[Futnot]
^ From we ol Witnes blong Jeova oli leftemap Kingdom blong God, oli no joen long politik mo oli no pusum narafala blong go agensem gavman, nating sipos oli laef long wan ples we ol man oli agensem ol Witnes no gavman i putum tabu long wok blong olgeta. (Taetas 3:1) Defren olgeta, oli traem mekem wok blong olgeta, we i no joen wetem politik, blong givhan long ol man long saed blong spirit olsem we Jisas mo ol disaepol blong hem oli mekem long faswan handred yia. Ol Witnes oli faenem ol man we oli rere blong lesin, long ol vilej blong olgeta, nao oli traehad blong givhan long ol man ya blong oli folem ol gudfala rul blong Baebol, olsem lav insaed long famle, no giaman mo no stil, ol fasin we i klin, mo fasin blong wokhad. Faswan samting we oli traehad blong mekem, hemia blong lanem ol man ya olsem wanem blong folem ol rul blong Baebol mo blong lukluk i go long Kingdom blong God olsem trufala hop blong ol man.
[Tok blong pija long pej 5]
Histri i pruvum we taem ol man oli stap independen long God, oli no kasem gudfala frut long rul blong olgeta
[Tok blong pija long pej 5]
From we Setan i rulum wol tede, hem i save givim “olgeta kantri blong wol ya” long Jisas sipos hem i wantem
[Tok blong pija long pej 7]
Jisas i tijim se aninit long Kingdom blong God, bambae wol i kam wan naesfala ples