!Yumi Traem Mekem Bes Blong Yumi!

“TRAEM mekem bes blong yu.” Wan memba blong Hed Kampani blong ol Witnes blong Jeova i bin givim gudfala advaes ya long wan misinari brata. ?Be from wanem hem i givim advaes ya long wan brata we i gat plante ekspiriens finis? ?I no tru se, bighaf blong ol misinari oli gohed wetem strong tingting, nating se evri dei oli prij long ples we i gat snek, hot taem, sik, ol smolsmol bebet, mo sam narafala hadtaem bakegen?

Blong talem stret, ol misinari blong ol Witnes blong Jeova oli ol man olsem yumi. Dip lav we oli gat long Jeova mo long ol narafala man i pusum olgeta blong mekem wok blong Jeova long ol narafala kantri. Oli traem bes blong olgeta taem oli stap mekem wok blong Jeova, mo oli lukluk i go long hem blong kasem paoa.​—⁠Efesas 6⁠:⁠10.

Blong kasem save moa long wok blong misinari, folem mifala i go long wan haos blong ol misinari long Wes Afrika.

Spenem Wan Dei Long Wok Blong Misinari

Naoia i klosap 7 klok moning. Mifala i kasem misinari haos long stret taem blong joen long storian blong vas blong dei. Ol ten misinari brata mo sista oli mekem gudfala welkam long mifala, mo oli mekem naf rum blong mifala i save sidaon raon long tebol wetem olgeta. Taem mifala i stap storian, wan sista we i mekem wok blong misinari plante yia finis, i tokbaot wan fani stori we i kamaot long minista wok blong hem. Be storian blong mifala i stop taem brata we i jeaman long dei ya i talem long mifala se hem i taem nao blong tokbaot vas blong dei. Storian ya bambae i stap long Franis lanwis. Nating se mifala i no save toktok Franis, be mifala i luksave se ol misinari we oli no blong ples ya oli wok had blong lanem lanwis ya from we oli toktok gud long hem.

Afta long vas blong dei, wan brata i mekem wan prea wetem fulhat blong hem, mo biaen mifala i dring ti. Taem mifala i stap tekem kakae blong mifala, misinari we i sidaon klosap long mifala i talem se mifala i mas putum sam pis banana antap long kakae ya. Mifala i eksplenem se mifala i no laekem tumas banana, be hem i talem se bambae mifala i jenisim tingting blong mifala sipos mifala i testem ol banana we oli gru long ples ya. Nao mifala i putum sam pis blong frut ya i go long kakae blong mifala. !Brata ya i tru! !Ol banana ya oli swit gud​—⁠olsem aes krim nomo! Oli eksplenem long mifala se bred we i stap long tebol i kam long wan stoa narasaed rod nomo long misinari haos, mo oli kukum bred ya long eli moning.

Afta we mifala i dring ti, bambae mifala i spenem dei wetem wan brata mo waef blong hem we tufala i misinari. Bambae yumi putum nem blong tufala se Ben mo Karen. Mifala i harem finis se teritori ya blong Wes Afrika i stap karem plante gudfala frut, be naoia mifala i wantem tumas blong luk samting ya stret long ae blong mifala.

 Taem mifala i kasem bas stop, mifala i faenem samwe twelef man we oli stap wet finis. I no longtaem afta, tufala misinari fren blong mifala i stat blong storian wetem wan woman mo boe blong hem long saed blong Baebol. From we mifala i no save toktok Franis, mifala i jes stanap nomo mo smael. !Woman ya i agri blong tekem tufala kopi blong Wajtaoa mo Wekap! magasin, ale bas i kam, nao evri man i traem blong go insaed long sem taem! Taem mifala i klaem i go insaed long bas, ol man we oli stap kam biaen oli stap pusum mifala. Mifala i mas traehad blong no foldaon taem mifala i wokbaot i go biaen long bas. Taem draeva i statem bas mo i stat ron, mifala i mas holem strong. Wanwan taem, bas i stop, ale plante moa man oli kam insaed gogo ples i fasfas gud. Mifala i smael long ol narafala pasenja, mo oli smael bak long mifala. Mifala i wantem tumas blong toktok wetem olgeta.

Taem bas i stap spid i go, mifala i luk tru long windo mo wajem ol samting we ol man oli stap mekem long saed blong rod. Tu woman tufala i stap wokbaot mo tufala i karem sam hevi samting long hed blong tufala. Wan long tufala i karem wan bigfala dis blong wota. Wan man i openem wan blangket long saed blong rod mo i putum sam smolsmol samting long hem we hem i wantem salem. Long evri ples i gat sam man we oli stap pem no salem enikaen samting.

Ben i stanap klosap long mi nao hem i harem wan samting i stap stik stikim leg blong hem. ?Wanem ya? Ples i fasfas gud insaed long bas ya, be samting ya i stik stikim hem bakegen. Ale, Ben i lukluk i godaon. Wan basket i stap klosap long leg blong hem, mo i gat wan dakdak insaed long hem we i stap pusum hed blong hem i go afsaed. !Hemia nao wanem we i stap stik stikim leg blong Ben! Ben i eksplenem se maet wan man i karem dakdak ya i go long maket blong salem.

Taem mifala i kasem teritori blong mifala, mifala i glad blong harem se ol man we bambae mifala i visitim, oli blong Afrika. Taem mifala i go klosap long faswan haos, Ben i klapem han blong hem strong blong man blong haos i harem. Hemia nao wei we ol man oli stap “kilkilim doa” long kantri ya. Wan yangfala man i kamaot i talem long mifala se hem i bisi be i askem mifala blong kambak sam aoa afta.

Long nekis haos, mifala i mitim wan woman we i toktok wan lanwis we Ben i no save. Woman ya i singaot boe blong hem i kam mo i askem long hem blong i transletem samting we Ben i talem. Taem Ben i toktok finis, woman ya i akseptem wan buk we i tokbaot Baebol, mo boe blong hem i promes se bambae hem i eksplenem buk ya long mama blong hem. Long namba tri haos, i gat sam yangfala we oli stap sidaon long fored blong yad. Kwiktaem nomo tu long olgeta oli girap mo givim jea blong tufala blong mifala i save sidaon. Mifala i storian plante long saed blong fasin blong wosip wetem kros. Nao mifala i mekem plan blong kambak nekis wik blong storian moa long saed ya. Naoia i taem blong gobak long yangfala man ya long faswan haos, we bifo i bisi. Mifala i no save olsem wanem, be hem i harem finis storian blong mifala wetem ol yangfala. Hem i askem plante kwestin long saed blong Baebol mo i askem blong stadi Baebol. Afta we Ben i jekem kalenda blong hem, hem i agri blong kambak long sem taem nekis wik. Taem mifala i stap gobak long misinari haos blong kakae long dina, Ben mo Karen i eksplenem se taem tufala i mekem plan blong mekem ol Baebol stadi, tufala i mas lukaot gud from sipos no, tufala i save statem plante Baebol stadi be tufala i no naf blong mekem evriwan.

Mifala i presem tufala from tufala i toktok gud Franis. Ben i talem se hem mo Karen i mekem wok blong misinari sikis yia finis, mo tufala i jes stat blong yusum gud Franis lanwis. Tufala i talem se i no isi blong lanem wan niufala lanwis, be taem oli gohed oltaem blong lanem oli kasem gudfala frut.

Long haf pas 12 medel dei, evri misinari i sidaon raon long tebol blong kakae. Oli talem long mifala se evri dei, wan defren misinari i mekem rere kakae blong moning mo medel dei mo i wasem plet afta kakae. Tede, wan  long ol misinari sista i kukum wan gudfala kakae. Hem i katkatem sam tomato blong mifala i kakae wetem wan faol we hem i rusum mo sam poteto we hem i fraenem​—⁠!hemia spesel kuk blong hem!

?Ben mo Karen i gat wanem plan blong aftenun? Tufala i talem se long 1 klok kasem 3 klok aftenun, ol man oli no wokbaot from san i strong, mekem se plante taem ol misinari oli yusum taem ya blong stadi no blong slip smol. !Mifala i no sapraes taem Karen i talem se ol niufala misinari oli kwik blong lanem kastom ya!

Afta we mifala i spel smol, mifala i gobak long wok blong prij. Wan man we i bin soem intres, we Ben i traem plante taem blong faenem, i no stap long haos blong hem bakegen, be tu yangfala man i kamaot taem Ben i klapem han blong hem. Tufala i talem se man blong haos i tokbaot we Ben i bin visitim hem mo man ya i talem strong long tufala se tufala i mas karem buk ya Save Blong Lidim Yu Long Laef We i No Save Finis. Mifala i glad blong givim buk ya long tufala. Biaen, mifala i tekem bas blong go long wan Baebol stadi we Karen i mekem wetem wan woman we i intres.

Taem bas i stap ron i go long rod, Karen i talem se hem i bin faenem woman ya wan dei taem tufala, wetem sam narafala pasenja, i stap long wan taksi. Karen i givim wan traket long hem blong hem i ridim taem oli stap ron long taksi. Woman ya i ridim traket ya, afta i askem wan narawan. Hem i intres tumas long tufala traket ya. Ale, taem oli kamaot long taksi ya, Karen i mekem plan blong visitim woman ya long haos blong hem mo hem i statem wan Baebol stadi wetem hem long buklet ya ?Wanem Samting We God i Wantem Yumi Blong Mekem? Tede, Karen bambae i mekem stadi namba faef long buklet ya.

Mifala i glad tumas long dei ya we mifala i spenem long wok blong prij, be i gat sam kwestin yet we mifala i wantem askem long saed blong wok blong misinari. Ben mo Karen, tufala i talem se taem we bambae mifala i gobak, bambae oli mekem rere wan smol kakae blong mifala. Afta bambae oli ansa long ol kwestin blong mifala.

Olsem Wanem Oli Stap Gohed Yet

Taem mifala i stap kakae eg we oli fraenem, wetem bred, mo jis, mifala i lanem moa long saed blong laef blong ol misinari. Plante taem, mande nao i dei we ol misinari oli spel no oli stap mekem ol prapa wok blong olgeta. Bighaf blong olgeta oli spenem sam taem long dei ya blong raetem ol leta i go long famle mo fren blong olgeta. I impoten tumas blong oli kasem nius blong ples blong olgeta, mo oli glad blong sanem mo kasem ol leta.

From we ol misinari oli laef mo wok wanples, i impoten blong oli gat gudfala fasin joen wetem ol narafala misinari fren blong olgeta, mo storian tugeta long ol samting long saed blong spirit. Blong kasem mak ya, olgeta wanwan oli folem wan program blong stadi Baebol evri wik, mo evri Mande naet olgeta misinari oli stadi Baebol tugeta wetem Wajtaoa. Ben i poenemaot se, taem ol misinari we oli kamaot long ol defren ples oli laef tugeta, bambae i save hapen we oli no agri long sam samting. Be kakae long saed blong spirit we olgeta evriwan oli stadi long hem olsem wan famle, i halpem olgeta blong joen gud mo gat pis. Mo tu, hem i talem se wan narafala samting we i givhan long olgeta hemia blong no tingbaot yu wan olsem se yu impoten moa long ol narafala.

 I impoten tu blong gat tingting daon. Ol misinari oli go long narafala kantri, i no blong ol man oli mekem wok blong olgeta, be blong olgeta oli mekem wok blong ol man. Ol misinari fren blong mifala oli talem se samting we i hadwok tumas blong talem long eni lanwis, hemia tok ya se, “mi sore,” antap moa taem hemia we i talem sore i no bin minim blong mekem no talem samting we i spolem narafala. Ben i mekem mifala i tingbaot eksampol blong Abigel long Baebol, we i bin talem sore long Deved from strong fasin blong hasban blong hem. Long rod ya, woman ya i blokem wan bigfala trabol. (1 Samuel 25⁠:​23-28) I impoten tumas blong “gat pis wetem ol narafala,” blong stap olsem wan gudfala misinari.​—⁠2 Korin 13⁠:⁠11.

Wan taem long wan manis, ol misinari oli holem wan miting blong tokbaot ol samting we i hapen long famle, mo ol samting we i save jenis long program blong olgeta. Biaen, evriwan i glad blong kakae wan swit samting, olsem kek. Mifala i luk olsem we plan ya i wok gud​—⁠mo i tes gud tu.

Taem mifala i finisim kakae, mifala i lukluk raon long haos. Mifala i luk se nating we haos ya i no wan flas haos, be ol misinari oli wok gud tugeta blong kipim hem i klingud. I gat wan aesbokis, wan mesin blong wasem klos, mo wan stof blong kuk. Karen i talem long mifala se long ol hot kantri olsem hemia blong Wes Afrika, oli save yusum eakondisen tu. Ol misinari oli save stap gud long helt mo karem gudfala frut long wok blong olgeta, sipos oli gat wan gudfala ples blong slip, tekem kakae we i bildimap bodi, mo lukaotgud long helt blong olgeta.

Putum Tingting i Stap Strong Long Ol Samting We Oli Gud

Mifala i sapraes tumas long olgeta samting we mifala i luk. ?Maet mifala tu i save mekem misinari wok? ?Olsem wanem bambae mifala i save sua long samting ya? Ol fren blong mifala oli talem sam samting blong mifala i stap tingting long hem.

Fastaem, oli talem long mifala se, ol Kristin misinari oli no go long narafala kantri from we oli wantem traem wan samting we i defren. Oli go lukaotem ol man we hat blong olgeta i stret mo we oli wantem lanem ol nambawan promes blong God. Ol misinari oli spenem olsem 140 aoa evri manis long wok blong prij, taswe i impoten tumas we oli lavem wok ya.

?Be, mifala i stap tingting se, olsem wanem long ol snek, bigae, mo ol smolsmol bebet?’ Ben i talem se nating we ol misinari oli faenem ol samting ya long plante ples we oli wok long hem, be sloslou oli lan long olgeta. Hem i talem se evri ples we ol misinari oli wok long hem i gat sam samting we oli naes, nao sloslou, ol misinari oli lan blong putum tingting blong olgeta long ol gudfala samting ya. Ol samting we fastaem oli faenem se oli “defren,” sloslou oli lan long olgeta, mo samtaem, oli haremgud long ol samting ya. Wan misinari sista i bin wok plante yia long Wes Afrika, nao hem i mas lego ples ya blong gobak long ples blong hem. Sista ya i talem se i had moa long hem blong lego ples we hem i mekem misinari wok long hem i bitim we hem i bin lego prapa kantri blong hem plante yia bifo. Ples we hem i mekem misinari wok long hem i kam olsem hom blong hem.

?Yu Yu Rere?

Ben mo Karen i talem plante samting we i mekem mifala i tingting. ?Olsem wanem long yu? ?Samtaem yu tingbaot blong mekem wok blong misinari long wan narafala kantri? Sipos yes, maet yu sapraes se yu save kasem mak ya kwiktaem nomo. Wan long ol impoten samting we yu mas gat, hemia se yu mas lavem wok blong prij fultaem mo glad long wok ya blong halpem ol man. Yu mas rimemba se ol misinari oli no ol man we oli gat bigbigfala paoa, be oli man mo woman olsem yumi nomo. Oli traem bes blong olgeta blong mekem wan wok we i impoten tumas.

[Tok blong pija long pej 27]

Long stat blong evri dei, oli storian long wan vas blong Baebol

[Tok blong pija long pej 28, 29]

Sam pija blong Afrika

[Tok blong pija long pej 29]

Laef olsem wan misinari i save mekem man i harem gud