Laef Stori

Wan Laef We i Rij Long Wok Blong God

RUSSEL KURZEN I TALEM STORI YA

Mi bon long Septemba 22, 1907, seven yia bifo long stat blong faswan bigfala faet blong wol. Famle blong mifala i rij long ol samting we oli impoten moa. Ating bambae yu agri long samting ya afta we yu save moa long stori blong mifala.

TAEM bubu woman Kurzen i wan smol gel, hem i wantem save trutok long saed blong God. Bifo we hem i kasem 13 yia, hem i go long plante defren jos long naesfala taon blong hem, Spiez, long Swiselan. Long 1887, sam yia afta we hem i mared, Kurzen famle i joenem plante narafala man we oli muv aot long kantri blong olgeta, blong laef long Yunaeted Stet.

Famle ya i go stap long Ohio, mo samwe long yia ya 1900, bubu woman i faenem sas samting we hem i bin lukaotem. Sas samting ya hem i faenem long ol pej blong wan buk, long lanwis blong Jemani, we Charles Taze Russell i raetem. Nem blong buk ya The Time Is at Hand. Taem hem i stap rid, kwiktaem nomo hem i kasem save se buk ya i tijim trutok blong Baebol. Nating se bubu i no save ridimgud Inglis, hem i mekem sabskripsen long Wajtaoa magasin long lanwis ya. From samting ya, hem i lanem ol trutok blong Baebol mo Inglis lanwis long sem taem. Bubu man i neva intres long ol samting long saed blong spirit olsem woman blong hem.

Bubu woman Kurzen i gat 11 pikinini, be 2 boe blong hem, we nem blong tufala John mo Adolph, tufala nomo i laekem tumas ol sas samting we hem i bin faenem. John hem i papa blong mi, mo hem i bin baptaes long yia 1904 long asembli blong ol Baebol Studen, nem we ol Witnes blong Jeova oli bin karem bifo, long taon blong St. Louis, long Missouri. Long taem ya, i bin gat wan bigfala maket long St. Louis. Long maket ya oli soemaot ol samting we oli kamaot long ol defren ples  long wol. Fulap man blong wol oli kam long maket ya, mo from samting ya praes blong tren i godaon. Nao asembli i stap long sem taem ya, blong ol Baebol Studen we oli nogat naf mane oli save pem tren long spesel praes ya. Samtaem biaen, long 1907, angkel blong mi Adolph i baptaes long wan asembli long Niagara Falls, New York. Wetem strong tingting, papa mo angkel blong mi, tufala i go talemaot olgeta samting we oli lanem long Baebol, mo biaen tufala i kam ol fultaem minista (we naoia oli kolem ol paenia).

Taswe, taem mi mi bon long 1907, famle blong mi i rij finis long saed blong spirit. (Ol Proveb 10⁠:22) Long 1908, taem mi bebi yet, papa mama blong mi, John mo Ida, tufala i tekem mi mi go long wan asembli we stamba tok blong hem “On to Victory” (Go Blong Win), long Put-in-Bay, Ohio. Joseph F. Rutherford, we i wan seket elda long taem ya, i jeaman blong asembli ya. Sam wik bifo, hem i bin kam long Dalton, Ohio, mo hem i visitim haos blong mifala mo i givim sam tok long ol Baebol Studen we oli stap long ples ya.

I tru se, mi mi no save rimemba olgeta samting we i hapen long taem ya, be mi rimemba wan asembli long taon blong Mountain Lake Park, long Maryland, long yia 1911. Long ples ya, mi wetem smol sista blong mi, Esther, mitufala i bin mitim Charles Taze Russell, we i bin lukaot long wok blong prij blong ol Baebol Studen long ful wol.

Long Sarajevo, long Jun 28, 1914, oli kilim i ded prins Ferdinand blong Ostria wetem waef blong hem. Samting ya nao i statem Faswan Bigfala Faet blong Wol. Be long dei ya, mi wetem famle blong mi, mifala i stap long pis long wan asembli long Columbus, Ohio. Stat long taem ya bifo kam kasem naoia, mi gat janis blong stap long plante asembli blong ol man blong Jeova. Long sam asembli ya i gat wan handred man nomo oli hivap. Long sam narafala i gat ol bigfala hip blong man we oli hivap long sam long ol bigbigfala stad blong wol.

Mekem Miting Long Haos Blong Mifala

I stat long 1908 go kasem 1918, wan smol kongregesen blong ol Baebol Studen i holem ol miting long haos blong mifala long Dalton​—⁠we i stap long medel bitwin Pittsburgh, Pennsylvania, mo Cleveland, Ohio. Haos blong mifala i open oltaem long ol brata we oli stap goraon blong givim ol tok. Taem oli kam, oli fasem hos blong olgeta we i stap pulum kat, biaen long haos blong anamol. Biaen, oli storian wetem ol man we oli hivap  long haos blong mifala, mo oli tokbaot ol gudfala ekspiriens blong olgeta mo ol narafala sas samting long saed blong spirit. !Ol taem ya oli rili leftemap tingting blong mifala!

Papa i wan skul tija, be hat blong hem i stap long wok ya blong tijim man we i bigwan moa, hemia Kristin minista wok. Hem i mekem sua se hem i tijim famle blong hem blong oli save Jeova, mo evri sapa mifala i prea tugeta olsem wan famle. Long 1919, taem we ol tri oli putum flaoa, Papa i salem hos blong mifala wetem kat blong hem, nao hem i pem wan trak blong 175 amerikan dola. Trak ya i blong mekem se hem i save kasem moa man long wok blong prij. Long 1919 mo 1922 bakegen, trak ya i karem famle blong mifala i go long tufala bigfala asembli blong ol Baebol Studen long Cedar Point, Ohio.

Ful famle blong mifala​—⁠Mama; Papa; Esther; mo smol brata blong mi John​—⁠mifala evriwan i joen long wok blong prij. Mi tingbaot yet faswan taem we wan man i askem wan kwestin long mi long saed blong Baebol. Long taem ya, mi bin gat samwe seven yia nomo. Man ya i askem se: “?Smol boe, Amagedon hem i wanem?” Papa i halpem mi blong mi save ansa long man ya wetem Baebol.

Statem Wok Blong Prij Fultaem

Long 1931, famle blong mifala i joen long asembli long Columbus, Ohio. Long ples ya mifala i glad tumas blong tekem niufala nem ya, ol Witnes blong Jeova. John i glad we i glad, nao hem i tekem disisen se mitufala i mas joen long wok blong paenia. * Mitufala i joen long wok ya, ale Mama, Papa, mo Esther tu oli mekem olsem. !Hemia i wan sas samting we mifala i gat​—⁠wan famle we i joen gud mo i glad long wok blong talemaot gud nius blong Kingdom blong God! Bambae mi neva taed blong talem tangkiu long Jeova from blesing ya. Nating se mifala i glad finis, be bambae mifala i glad moa from ol samting we oli kamaot biaen.

Long Febuwari 1934, mi statem wok long wol hedkwota blong ol Witnes blong Jeova long Brooklyn, New York (we oli kolem Betel). Sam wik afta, John i kam joenem mi long ples ya. Mitufala i slip long sem rum gogo kasem we hem i maredem gudfala waef blong hem, Jessie, long 1953.

Afta we mi mo John i go long Betel, papa mama blong mifala, tufala i go mekem wok blong paenia long plante defren haf blong kantri mo Esther wetem hasban blong hem, George Read, tufala i folem tufala. Papa mama blong mifala, tufala i gohed blong mekem wok blong paenia gogo kasem we tufala i finisim laef blong tufala long wol ya, long 1963. Esther mo hasban blong hem, tufala i gat ol pikinini mo famle blong tufala i naes tumas. Mi mi glad long ol pikinini blong tufala, we mi laekem olgeta tumas.

Wok Mo Ol Fren Long Betel

John i gat gud save long ol mesin, mo hem i yusum save ya long Betel.Tugeta wetem sam narafala long ples ya, hem i wokem sam samting olsem ol gramafon we man i save karem. Plante taosen Witnes blong Jeova oli bin yusum ol gramafon ya long wok blong prij long ol haos wanwan. John i bin givhan tu blong wokem mesin we i kavremap ol magasin wetem pepa, mo mesin we i putum nem long ol magasin blong sabskripsen.

Taem mi statem wok long Betel, mi wok long ples we oli wokem ol buk. Long taem ya, i gat sam narafala yangfala man tu we oli wok long faktri mo kam kasem tede oli stap wok yet long Betel. Long olgeta ya, i gat Carey Barber mo Robert Hatzfeld. Mi rimemba gud sam narafala we naoia oli ded finis, olsem Nathan Knorr, Karl Klein, Lyman Swingle, Klaus Jensen, Grant Suiter, George Gangas, Orin Hibbard, John Sioras, Robert Payne, Charles Fekel, Benno Burczyk, mo John Perry. Ol brata ya oli stap tru long wok blong olgeta yia afta yia, oli neva komplen mo oli neva ting se oli mas kasem wan hae posisen. Be, taem ogenaesesen i stap gru bigwan moa, sam long ol Kristin ya we tabu spirit i makemaot olgeta mo we oli stap tru, oli kasem moa responsabiliti. Sam long olgeta oli wok long Hed Kampani blong ol Witnes blong Jeova.

Taem mi wok wetem ol brata ya we oli rere blong lego ol samting we olgeta nomo oli wantem, mi lanem wan impoten lesen. Long wol, ol man oli kasem mane from wok we oli mekem.  Hemia pei blong olgeta. Be, olgeta we oli wok long Betel, oli kasem ol rij samting long saed blong spirit olsem pei blong olgeta. Ol man mo woman we oli strong long saed blong spirit nomo oli gat fasin tangkiu from ol blesing ya.​—⁠1 Korin 2:​6-​16.

Long 1923, Nathan Knorr, we i gat 18 yia nomo, i kam wok long Betel. Long ol yia 1930, hem i lukaot long wok long faktri. Evridei hem i wokbaot long ful faktri mo i talem halo long olgeta man wanwan we oli wok long ples ya. Sam long mifala we i jes kam nomo long Betel, i glad mo gat tangkiu long fasin ya blong hem blong soem intres long olgeta man wanwan. Long 1936, mifala i kasem wan niufala mesin blong prentem buk, we i kam long Jemani. Sam long ol yangfala brata oli gat had taem blong joenem ol pat blong mesin ya. Nao Brata Knorr i wok wetem ol yangfala brata ya bitim wan manis, gogo kasem we oli mekem mesin ya i wok.

Brata Knorr i wan man we i wok strong mo sam long mifala i no save wok olsem hem. Be hem i glad tu blong spel. Long Jenuware 1942, hem i kasem responsabiliti blong lukaot long wok blong prij blong ol Witnes blong Jeova long ful wol. Be nating se hem i bisi tumas long wok ya, samtaem hem i pleplei besbol wetem ol memba blong famle blong Betel mo ol studen blong misinari skul blong Gilead long ples we skul i stap long hem, long South Lansing, New York.

Long Eprel 1950, famle blong Betel i muv i go long wan niufala ten stori haos we oli jes bildim long 124 Columbia Heights, Brooklyn, New York. Niufala ples blong kakae long haos ya i bigwan moa, mo mifala evriwan i save sidaon wanples blong kakae. Oli tekem samwe tri yia blong bildim niufala haos ya, mo long olgeta taem ya, mifala i no save folem program blong moning wosip. !Bigfala glad i stap taem mifala i save folem program ya bakegen! Brata Knorr i mekem mi sidaon wetem hem long tebol blong jeaman, blong mi save givhan long hem blong rimemba nem blong olgeta niufala memba blong Betel famle. Blong 50 yia, mi sidaon long semfala jea ya long moning wosip. Biaen, long 4 Ogis, 2000, oli klosem ples ya blong kakae, mo mi mas kakae long wan narafala ples blong kakae we oli wokem gud bakegen, long haos we bifo hem i Towers Hotel.

Long ol yia 1950, mi bin wok long wan mesin we oli kolem Linotype, hemia i samting olsem wan taepraeta, we i mekem ol leta long aean, blong man i yusum blong prentem buk long hem. Mi mi no laekem wok ya tumas, be William Peterson, we i lukaot long ol mesin, i kaen tumas long mi, mekem se mi gat gudfala taem long wok ya. Biaen, long 1960, i nidim sam volontia blong pentem niufala haos long 107 Columbia Heights. Mi glad tumas blong givhan blong mekem rere niufala haos ya blong famle blong Betel we i kam bigwan moa i stap long hem.

I no longtaem afta we mifala i finis blong pentem bilding blong 107 Columbia Heights, mi sapraes mo mi glad we oli givim wok long mi blong mekem welkam long ol visita we oli kam long Betel. Ol laswan 40 yia we mi spenem long wok ya, oli nambawan olsem ol narafala yia we mi spenem long Betel. Nomata hu i kamtru long doa, sipos hem i visita, no wan niufala memba blong Betel famle, mi rili glad tumas blong toktok wetem olgeta long saed blong frut we i kamaot taem yumi traehad blong mekem wok blong Kingdom i gohed moa.

Ol Gudfala Studen Blong Baebol

Famle blong Betel i stap gud long saed blong spirit from we ol memba blong hem oli laekem Baebol. Taem mi jes kam long Betel, mi askem long Emma Hamilton, se hamas taem finis hem i ridim Baebol. Emma, we wok blong hem i blong ridim ol atikol blong faenem mastik, i ansa se: “Mi kaontem kasem toti faef, afta mi no moa gohed blong kaontem.” Wan narafala Kristin, Anton Koerber, we i strong long saed blong spirit, mo we i wok long Betel klosap sem taem ya, i talem toktok ya oltaem se: “Baebol i mas stap klosap long han blong yu oltaem.”

Afta we Brata Russell i ded long 1916, Joseph F. Rutherford i tekem ol responsabiliti we Russell i bin karem long saed blong ogenaesesen. Rutherford i wan strong spika we i naf gud. Hem i wan loea we i toktok plante long saed blong ol Witnes blong Jeova long fored blong Saprim Kot blong Yunaeted Stet. Afta we Rutherford i ded long 1942, Brata Knorr i tekem ples blong hem. Hem i wok had blong i kam gud moa blong toktok long fored  blong ol man. From we rum blong mi i stap klosap long rum blong hem, plante taem mi harem hem i stap lanem ol tok blong hem bakegen mo bakegen. Traehad blong hem i mekem se sloslou hem i kam wan man we i gat gudhan blong givim tok.

Long Febuwari 1942, Brata Knorr i givhan blong stanemap wan program we i blong halpem olgeta brata long Betel blong oli kam gud moa long toktok mo tij. Skul ya i halpem ol brata blong mekem dip Baebol stadi mo blong mekem ol pablik tok. Long stat, wanwan blong mifala i mas givim wan sotfala tok long saed blong wan man long Baebol. Faswan tok we mi mekem, hem i long saed blong man ya Moses. Long 1943, oli statem wan skul long ol kongregesen blong ol Witnes blong Jeova we i sem mak, mo hem i gohed yet tede. I impoten yet long Betel, blong kasem save long Baebol mo lan blong gat gud han blong tij.

Long Febuwari 1943, faswan misinari skul blong Gilead i stat. !Mo olgeta we oli stap long namba 111 klas blong Gilead oli jes kasem stefeket blong olgeta naoia! Skul ya i stap 58 yia finis, mo hem i givim trening long bitim 7,000 man blong oli wok olsem misinari raon long wol. I gud blong makem se, long 1943, taem skul ya i stat, i gat bitim 100,000 Witnes blong Jeova raon long wol. !Tede, i gat bitim 6,000,000 man we oli stap talemaot gud nius blong Kingdom blong God!

Mi Gat Tangkiu From Ol Samting Long Saed Blong Spirit We Mi Kasem

Jes bifo we oli stanemap Gilead Skul, mi wetem tu narafala brata blong Betel i gat wok ya blong visitim ol kongregesen long Yunaeted Stet. Mifala i stap wan no tu dei, samtaem wan wik, blong mekem ol kongregesen ya oli kam strong long saed blong spirit. Oli singaot mifala se ol man blong mekem wok blong ol brata. Biaen nem ya i jenis i kam seket elda. I no longtaem afta we Gilead Skul i open, oli askem mi blong kambak blong tijim sam lesen long skul ya. Mi bin tij fultaem long klas namba 2 kasem klas namba 5, mo tu, mi bin tekem ples blong wan long ol tija long  klas 14. Tangkiu we mi mi gat from ol gudfala samting long saed blong spirit we mi mi kasem, i gru moa taem mi lukluk bakegen wetem ol studen, long ol bigbigfala samting we oli hapen long stat blong histri blong ol Witnes blong Jeova long taem blong yumi. Mo sam long ol samting ya mi mi save tokbaot from prapa ekspiriens blong mi.

Wan narafala gudfala janis we mi bin gat long ol yia ya, hemia blong joen long ol intenasnal asembli blong ol man blong Jeova. Long 1963, mi goraon long wol wetem bitim 500 deleget we oli go long ol asembli ya we stamba tok blong hem se “Everlasting Good News” (Gud Nius Blong Olwe). Sam long ol bigfala asembli ya i bin stap long Warsaw, Polan, long 1989; Berlin, Jemani, long 1990; mo Moscow, Rasia, long 1993. Long ol asembli ya, mi bin gat janis blong mitim sam long ol gudfala brata mo sista blong yumi we oli bin stanap strong long taem blong fasin agens blong ol Nasi, mo ol Komunis. !Ekspiryens blong olgeta ya i rili mekem bilif blong mifala i kam strong!

!Tru nomo, laef blong mi i kam moa rij from we mi mekem wok blong Jeova! Ol blesing long saed blong spirit oli neva finis. Ol gudfala samting long saed blong spirit oli defren olgeta long ol rij samting blong bodi, from we moa yumi serem olgeta wetem ol narafala, moa yumi kam rij. Samtaem mi harem samfala oli talem se oli sore we oli bin gruap i kam ol Witnes blong Jeova. Oli talem se sipos oli no bin stap long ogenaesesen blong God mo oli bin save laef blong wol fastaem, maet oli gat moa tangkiu from ol trutok blong Baebol.

Mi mi harem nogud taem ol yangfala oli toktok olsem, from we oli rili minim se i moa gud sipos oli no bin save ol rod blong Jeova taem oli stap gruap. Be, traem tingbaot olgeta we oli lanem trutok blong Baebol taem oli bigman finis. Olgeta oli mas hadwok blong sakemaot ol rabis fasin mo ol kruked tingting blong olgeta. Mi mi tangkiu bigwan long papa mama blong mi, from we oli tijim mitrifala long rod blong stretfasin. John i stap tru long Jeova gogo kasem we hem i ded long Julae 1980, mo tede, Esther i wan Witnes we i holemstrong yet.

Mi lukluk bakegen wetem dip lav long fasin fren we mi gat wetem ol Kristin brata sista we oli stap tru long Jeova. Tede, mi stap bitim 67 nambawan yia long Betel. Nating we mi no mared, be mi gat plante pikinini boe mo gel wetem ol smol bubu long saed blong spirit. Mo mi glad tumas taem mi tingbaot ol niufala memba blong famle blong yumi long saed blong spirit we bambae mi mas mitim yet. !Ol tok ya we Baebol i talem i tru tumas se: ‘Ol blesing blong Jeova, hemia nao ol samting we i mekem man i rij!’​—⁠Ol Proveb 10⁠:​22, NW.

[Futnot]

[Tok blong pija long pej 20]

Stat long lef i go long raet: Papa blong mi wetem brata blong mi, John, we i sidaon long leg blong hem, Esther, mi, mo mama blong mi

[Tok blong pija long pej 23]

Mi stap tijim wan klas long Gilead Skul long 1945

Antap long raet: ol tija blong Gilead Skul, Eduardo Keller, Fred Franz, mi, mo Albert Schroeder

[Tok blong pija long pej 24]

Mi stap tingbaot rij laef blong mi long wok blong Jeova