Trastem Jeova God Ya We i Laef

?Samtaem yu bin lukluk i go antap long skae long wan naet we i no gat klaod? ?Ating yu bin luk plante handred sta? ?Yu ting se ol sta ya oli kamaot olsem wanem?

KING Deved blong Isrel bifo, i bin lukluk ol sta long naet, taem ples i kwaet. Ol sta ya oli gat paoa long filing blong hem, nao hem i raetem se: “Oltaem skae i stap soemaot bigfala paoa blong God, mo olgeta samting we oli stap long hem oli stap soemaot ol gudgudfala wok we God i mekem.” (Ol Sam 19:1) Yes, Man we i Wokem olgeta samting, ‘i stret nomo blong ol man oli leftemap nem blong hem, mo blong oli bodaon, oli ona long hem.’ Be i no stret we oli mekem olsem long ol samting we Hem i wokem.​—Revelesen 4:​11; Rom 1:​25.

Baebol i talem se: “God i wokem olgeta samting we i stap.” (Hibrus 3:4) Yes, trufala God ‘we nem blong hem Jeova, hem nomo i Hae King blong olgeta ples blong wol.’ (Ol Sam 83:​18, NW ) Hem i no wan giaman samting we yumi luk long tingting blong yumi nomo. Nogat. Jisas Kraes i tokbaot Papa blong hem long heven, Jeova, i se: “God i sanem mi mi kam, mo hem i tru.”​—Jon 7:​28.

Jeova i Mekem Ol Tingting Blong Hem Oli Kamtru

Spesel nem ya blong God, Jeova, i stap klosap 7,000 taem long Oltesteman nomo. Nem ya hem wan i soemaot se God ya i laef i stap. Nem ya i minim “Hem i Mekem i Kamaot.” Jeova God i soemaot, tru long nem blong hem, se hem i Man blong mekem ol tingting blong hem oli kamtru. Taem Moses i askem long God blong talemaot nem blong hem, Jeova i mekem mining blong nem ya i klia moa taem hem i se: “Bambae Mi Stap Olsem We Bambae Mi Stap.” (Eksodas 3:​14, NW ) Baebol blong Rotherham i talem tok ya se: “Bambae Mi Mekem Olsem We Mi Mi Wantem.” Yes, Jeova i stap olsem hem i wantem, no i jusum blong kam olsem hem i wantem, blong mekem ol stret tingting mo promes blong hem oli kamtru. Taswe, i gat plante taetel we oli stret long God, olsem: Man we i Wokem Olgeta Samting, Papa, Masta mo King, Man blong Lukaot long Sipsip, Jeova blong ol Ami, Man blong Harem Prea, Jaj, Bigfala Tija, Man blong Pemaot yumi.​—Jajes 11:27; Ol Sam 23:1; 65:2; 73:28; 89:26; Aesea 8:​13; 30:20; 40:28; 41:14.

Trufala God nomo i gat raet blong karem nem ya Jeova from we ol man oli no save sua se ol plan blong olgeta bambae oli kamtru. (Jemes 4:​13, 14) Jeova nomo i save talem se: “Tok blong mi i olsem sno mo ren, we i aot long skae, i folfoldaon long graon blong wasem ol ples, blong mekem ol garen oli gru gud, nao i gat plante kakae i stap blong ol man oli kakae, mo blong oli planem garen bakegen. Tok blong mi bambae i wok long sem fasin. Bambae hem i mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.”​—Aesea 55:​10, 11.

Jeova i savegud se ol tingting blong hem bambae oli kamtru. Taswe, samting we ol man oli luk olsem we i no kamtru, Jeova i luk olsem we i kamtru finis. Longtaem afta we Ebraham, Aesak, mo  Jekob i ded, Jisas i tokbaot trifala ya, i se: “God ya [“Jeova,” NW ] i God blong man we i laef, hem i no God blong man we i ded. Mo hem i stap luk olgeta man se oli no ded, oli stap laef.” (Luk 20:​37, 38) Trifala olfala ya we oli onagud long God, oli ded finis. Be tingting blong God blong mekem trifala ya oli laef bakegen, i sua blong kamtru. Taswe, hem i luk trifala ya olsem we oli laef i stap. I no strong tumas long Jeova blong mekem ol olfala man ya blong hem oli laef bakegen. Bambae hem i mekem i sem mak olsem hem i bin mekem taem i tekem graon nao i wokem faswan man long hem.​—Jenesis 2:7.

Aposol Pol i tokbaot wan moa samting we i soemaot se God i save mekem tingting blong hem i kamtru. Baebol i talem se Ebraham i “stamba blong ol man blong plante ples.” (Rom 4:​16, 17) Taem Ebram i no gat pikinini yet, God i jenisim nem blong hem i kam Ebraham we i minim “Papa blong Plante Man (Bigfala Hip Man).” Jeova i mekem mining blong nem ya i kamtru, taem hem i mekem wan merikel long olfala Ebraham mo olfala woman blong hem Sera, nao tufala i kam naf blong karem pikinini.​—Hibrus 11:​11, 12.

From we Jisas Kraes i kasem bigfala paoa mo haenem, hem i save tokbaot ol samting we oli hapen long fasin we i hae moa i winim tingting blong man. Taem Lasaros, we i gudfala fren blong Jisas, i ded, Jisas i talem long ol disaepol blong hem se: “Gudfala fren ya blong yumi Lasaros hem i stap slip. Be bambae mi mi go blong wekemap hem.” (Jon 11:11) ?From wanem Jisas i talem se man ya we i ded i stap slip nomo?

Taem Jisas i kamtru long taon ya Betani we i ples blong Lasaros, hem i go long beregraon. Nao hem i talem long ol man blong oli tekemaot ston we i blokem gref blong Lasaros. Hem i prea long bigfala voes, nao hem i singaot se: “!Lasaros! !Yu kamaot!” Ol man oli stap wajemgud hol blong ston ya. “Nao [Lasaros] i kamaot, mo ol kaliko ya we oli fasemtaet han mo leg mo fes blong hem long hem, oli stap yet.” Jisas i talem se: “Yufala i tekemaot ol kaliko ya, blong hem i save wokbaot.” (Jon 11:​43, 44) Jisas i mekem Lasaros i laef bakegen. !Hem i girapem wan man we i ded fo dei finis! Jisas i no giaman taem hem i talem se fren blong hem i stap slip nomo. Jeova mo Jisas tufala i luk dedman ya Lasaros olsem we i stap slip nomo. Yes, Jisas mo Papa blong hem long heven, tufala i stap mekem ol wok we i tru nomo.

Jeova i Save Mekem Samting We Yumi Wantem, i Kamtru

!God ya we i laef i defren olgeta long ol giaman aedol! Ol man blong wosip long aedol oli giaman se ol god ya oli gat paoa. Be, nating se oli ona long olgeta olsem wanem, ol aedol ya oli no save kam naf blong mekem merikel. Long defren fasin, Jeova God i save talem stret se ol man blong hem we oli ded finis, oli olsem we oli laef i stap. ?From wanem? From we hem i save mekem olgeta oli laef bakegen. Yes, “Jeova hem i rili God.” Hem i neva giaman long ol man blong hem.​—Jeremaea 10:​10, NW.

!Yumi harem gud tumas blong save se long stret taem blong Jeova, bambae hem i givim laef bakegen long ol dedman we hem i tingbaot olgeta yet! (Ol Wok 24:15) Yes, laef bakegen i min se hem i girapem olgeta blong oli gohed long laef ya we oli gat fastaem. I no had long Man ya we i Wokem olgeta samting blong rimemba laef blong ol man we oli ded finis, mo blong mekem olgeta oli laef bakegen. Waes mo paoa blong hem i no gat mak blong hem. (Job 12:13; Aesea 40:26) Fasin blong Jeova blong rimemba, i stret gud olgeta. Taswe from bigfala lav blong hem, bambae hem i mekem ol dedman oli laef bakegen long paradaes long wol ya, wetem ol semfala fasin we oli gat bifo we oli ded.​—1 Jon 4:8.

 Naoia we yumi kam klosap finis long en blong wol blong Setan, i gat wan gudfala fiuja i stap blong olgeta we oli trastem trufala God. (Ol Proveb 2:​21, 22; Daniel 2:​44; 1 Jon 5:​19) Man blong raetem Ol Sam i promes se: “Bambae i no longtaem, ol man nogud oli lus. . . . Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.” (Ol Sam 37:​10, 11) Fasin stil mo fasin blong kilim man bambae oli fasin blong bifo nomo. Bambae i gat stret fasin nomo i stap, mo i no moa gat hadtaem blong kasem ol samting blong laef. (Ol Sam 37:6; 72:​12, 13; Aesea 65:​21-​23) Olgeta tingting ya se wan laen, kala, kantri, no posisen i gud moa long narawan, bambae oli lus. (Ol Wok 10:​34, 35) Bambae i no moa gat ol faet mo ol tul blong faet. (Ol Sam 46:9) Long taem ya, “bambae i no moa gat man olbaot long kantri ya we i save talem se hem i sik.” (Aesea 33:24) Helt blong olgeta man evriwan bambae i nambawan. (Revelesen 21:​3, 4) I no longtaem, paradaes bambae i kamtru long wol ya. !Hemia stamba tingting blong Jeova!

Yes, i no longtaem, olgeta promes blong Baebol bambae oli kamtru. I moagud we yumi trastem Jeova fulwan i winim we yumi letem ol samting blong wol we oli olsem aedol, oli giaman long yumi. Jeova i wantem “sevem olgeta man, mo i wantem we olgeta man bambae oli save trutok blong hem.” (1 Timoti 2:​3, 4) Bitim we yumi westem taem mo paoa blong yumi long ol drim mo ol giaman samting blong wol ya wetem ol god blong hem, i moa gud we yumi kasem save moa long God ya we i laef, mo yumi trastem hem fulwan long hat blong yumi.​—Ol Proveb 3:​1-6; Jon 17:3.

[Tok blong pija long pej 6]

Jeova mo Jisas tufala i luk Lasaros olsem we hem i stap slip nomo

[Tok blong pija long pej 7]

I no longtaem, paradaes bambae i kamtru long wol ya