Tu Brata We Fasin Blong Tufala i Defren Olgeta

OL DISISEN we papa mama i tekem oli save gat paoa long pikinini. Hemia i tru tede, olsem we i tru long garen blong Iden bifo. Stronghed fasin blong Adam mo Iv i spolem olgeta man long wol. (Jenesis 2:​15, 16; 3:​1-6; Rom 5:12) Nating se i olsem, olgeta man wanwan oli gat janis blong kam fren blong God ya we i Wokem yumi, sipos oli wantem. Yumi luk samting ya long stori blong Ken mo Ebel, tufala brata ya long stat blong histri blong man.

Baebol i no talem sipos God i toktok bakegen wetem Adam mo Iv afta we hem i sakemaot tufala long Iden. Be, Jeova i toktok long tufala pikinini blong tufala. I sua se Adam mo Iv tufala i talemaot long Ken mo Ebel wanem we i bin hapen long tufala. Ken mo Ebel tufala i save luk ‘ol jerubim we oli stap gad long gudfala ples ya long Iden,’ mo ‘wan longfala naef blong faet we faea i stap laet long hem, mo i stap saksakem hem i go olbaot blong blokem rod we i go long tri ya we frut blong hem i save givim laef.’ (Jenesis 3:24) Mo tu, tufala i luk wetem prapa ae blong tufala we tok blong God i kamtru, se bambae oli mas swet mo harem nogud long laef.​—Jenesis 3:​16, 19.

Ating Ken mo Ebel, tufala i save ol tok ya we Jeova i bin talem long snek se: “Bambae mi mi mekem we yu mo woman ya, yutufala i enemi blong yutufala, mo laen blong yu mo laen blong hem, tufala i enemi blong tufala. Hem bambae i smasem hed blong yu, mo yu bambae yu smasem bak blong leg blong hem.” (Jenesis 3:​15, NW ) Ol save ya we Ken mo Ebel i gat long saed blong Jeova, i save halpem tufala blong frengud wetem Hem.

Sipos Ken mo Ebel tufala i tingting gud long profet tok blong Jeova mo ol nambawan fasin blong Jeova we i gat lav mo we i wantem mekem i gud long man, ating tufala i mas wantem blong mekem God i glad long tufala. ?Be bambae tufala i traehad olsem wanem blong wokem filing ya blong wantem mekem God i glad? ?Bambae tufala i lesin long tingting ya we tufala i bon wetem, hemia blong wantem wosipim God mo blong wantem ol samting long saed blong spirit we oli save mekem se tufala i gat bilif?​—Matiu 5:3.

Presen We Tufala Brata i Givim

Samtaem i pas nao Ken mo Ebel tufala i mekem sakrefaes i go long Jeova. Ken i givim ol kakae blong garen blong hem, mo Ebel i givim ol fasbon sipsip blong hem. (Jenesis 4:​3, 4) Ating long taem ya, tufala ya i gat samting olsem 100 yia finis, from we Adam i gat 130 yia taem hem i kam papa blong boe ya Set.​—Jenesis 4:25; 5:3.

Ol presen ya we Ken mo Ebel i givim i go long God oli soemaot se tufala i luksave we tufala i sinman mo tufala i wantem we God i glad long tufala. I luk olsem we tufala i bin tingting smol long promes we Jeova i mekem long saed blong snek mo Laen blong woman. Yumi no save hamas taem mo paoa we Ken mo Ebel tufala i spenem blong traem kam fren blong Jeova. Be, samting we God i mekem afta we tufala i givim sakrefaes blong tufala long hem finis, i soemaot wanem i stap haed long tingting blong tufala.

Sam man blong stadi long Baebol, oli talem se Iv i ting se Ken nao hem i “Laen” we bambae i spolem snek ya, from we taem Ken i bon, hem i talem se: “Hae God i givhan long mi, nao mi mi kasem wan pikinini we i boe.” (Jenesis 4:1) Sipos Ken i gat tingting olsem mama blong hem, hem i rong olgeta. Ebel i defren, hem i mekem sakrefaes long God from we hem i gat bilif. Yes, “from we Ebel i stap bilif strong long God, taswe hem i givim wan presen i go long God, we i gud moa, i winim presen blong Ken.”​—Hibrus 11:4.

Ebel i defren long brata blong hem Ken, be i no from risen ya nomo se hem i gat moa bilif. Tufala brata ya tufala i defren tu long fasin blong tufala. Taswe, “God i glad long fasin ya we Ebel i mekem,  mo long presen ya we i givim i go long hem, be i no glad long fasin we Ken i mekem, mo long presen ya blong hem.” Ating Ken i no tingting gud long wanem presen we bambae hem i givim be i jes givim nomo. God i no agri long fasin ya blong wosip we i no kamaot long hat. Long taem we i pas, ol tingting long hat blong Ken oli kam nogud, mo Jeova i luksave se hem i gat rong tingting. Taem God i no glad long presen blong Ken, taem ya nao, Ken i soem trufala fasin blong hem. Be Ken i no traem stretem fasin blong hem mo kamgud moa. No gat. Hem “i kros tumas, mo fes blong hem i kam nogud.” (Jenesis 4:5) Fasin ya i mekem se hem i no save haedem rabis tingting blong hem mo rabis plan we hem i mekem.

Woning Mo Fasin Blong Ken

From we Jeova i save fasin blong Ken, hem i givim advaes long hem se: “?From wanem yu yu kros olsem? ?Weswe fes blong yu i kam nogud olsem? Sipos fasin blong yu i stret [“sipos yu tanraon mo mekem fasin we i stret,” NW ], bambae mi mi glad long yu, be fasin blong yu i no stret. Mo from samting ya, sin blong yu i olsem wan wael anamol we i stap klosap long doa, i rere blong kakae yu. Fasin nogud ya i wantem tumas blong winim yu, be yu yu mas winim hem.”​—Jenesis 4:​6, 7.

I gat wan lesen we yumi save lanem long ples ya. I tru se, sin i rere enitaem blong pulum yumi blong mekem nogud. Be, God i letem yumi i fri blong jusum wanem we yumi wantem mekem, mo yumi naf blong jusum samting we i gud. Jeova i askem long Ken blong i “tanraon mo mekem fasin we i stret,” be Hem i no fosem Ken blong jenisim fasin blong hem. Ken nomo i mekem jus blong hem wan.

Stori ya i gohed olsem: “Ken i talem long brata blong hem se, ‘Ei, yumitufala i go long garen.’ Nao taem tufala i go stap long garen, hem i girap, i kilim brata ya blong hem i ded.” (Jenesis 4:8) Yes, Ken i kam wan man we i no obei, i no gat sore, mo i kilim narafala man i ded. Hem i no soem nating we hem i sore long wanem we hem i mekem taem Jeova i askem se: “?Wehem brata blong yu, Ebel?” Defren olgeta, Ken i ansa long fasin we hem i no kea nating mo i flas, i se: “Mi no save. ?Yu ting se i wok blong mi blong lukaot long brata blong mi?” (Jenesis 4:9) Ken i giaman nomo mo i talem se hem i no gat fol from samting we i hapen, hemia i soem klia nomo we hat blong hem i kam nogud.

Jeova i panisim Ken mo i ronemaot hem i go longwe long Iden. I luk olsem se, panis we God i bin talemaot finis agensem graon bambae i nogud moa long ples we Ken i go long hem, mo graon ya bambae i no karem plante kakae, nating se hem i wokem olsem wanem. Bambae hem i wan man blong wokbaot olbaot nomo, wan man we i no gat prapa ples blong hem. Ken i tok agensem God from we panis blong hem i strong tumas. Ating hem i mekem  olsem from we hem i fraet se bambae oli kilim hem i ded olsem we hem i bin kilim brata blong hem i ded. Nating se i olsem wanem, be hem i no tanem tingting blong hem nating from sin blong hem. Jeova i putum “wan mak” long Ken​—ating hemia wan loa we ol man oli save long hem mo we oli folem, blong blokem Ken long eni man we maet i wantem kilim hem i ded from trabol we hem i mekem.​—Jenesis 4:​10-15.

Ale, Ken i “aot long fes blong [God], i go long narasaed Iden long saed i go long is, mo i go stap long wan ples we nem blong hem Nod, we i min se ‘Ples we man i no save stap kwaet.’ ” (Jenesis 4:16) Hem i tekem wan sista blong hem, no wan gel blong ol brata sista blong hem, blong i kam woman blong hem, ale hem i bildim wan taon. Hem i putum nem blong fasbon pikinini blong hem, Inok, long taon ya. Wan long ol smol bubu blong Ken, hemia Lamek, i wan man we fasin blong hem i raf olsem abu blong hem we i no obei long God. Fulwan laen blong Ken i lus long Bigfala Wota we i ron long taem blong Noa.​—Jenesis 4:​17-24.

Wan Lesen Blong Yumi

Stori blong Ken mo Ebel i save tijim gud yumi. Aposol Jon i talem long ol Kristin se oli mas lavlavem olgeta, mo se ‘i nogud yumi kam olsem man ya Ken bifo, [we] hem i wan man blong Setan, nao hem i kilim brata blong hem i ded.’ Pol i gohed i se: “Fasin blong brata blong hem i stret, be [Ken], fasin blong hem i no stret.” Mo tu, Jon i talem se: “Man we i no laekem Kristin brata no sista blong hem, i stap agensem hem, hem i man blong kilim man i ded. Mo yufala i save finis, se ol man olsem, oli no gat laef ya we i no save finis.” Yes, fasin we yumi mekem long ol Kristin brata sista blong yumi i save spolem fasin fren we yumi gat wetem God mo i save spolem fiuja laef blong yumi. Sipos yumi no laekem Kristin brata no sista blong yumi, God i no save glad long yumi.​—1 Jon 3:​11-15; 4:20.

Ken mo Ebel tufala i gruap long semfala tijing, be Ken i sot long bilif long God. Hem i soem sem tingting olsem Devel Setan, faswan ‘man blong kilim man mo stamba blong ol giaman toktok.’(Jon 8:44) Stori blong Ken i soem se yumi evriwan i fri blong jus. Mo i soem se man we i jusum blong mekem sin hem i gowe long God, mo se Jeova bambae i jajem man we i no tanem tingting blong hem from sin blong hem.

Ebel i defren olgeta. Hem i soemaot bilif long Jeova. Yes, “from we Ebel i stap bilif strong long God, taswe hem i givim wan presen i go long God, we i gud moa, i winim presen blong Ken. Mo from we hem i stap bilif strong long God olsem, taswe God i soemaot long hem se hem i wan stret man, nao i glad blong tekem presen blong hem.” Nating se i no gat toktok blong Ebel long Baebol, be from bilif blong hem i olsem we hem “i stap toktok long yumi yet.”​—Hibrus 11:4.

Ebel i faswan long plante man we oli holemstrong long God. Blad blong hem ‘i ron i go long graon, mo blad ya i stap krae long Jeova yet,’ hemia i minim se God i no fogetem hem. (Jenesis 4:10; Luk 11:​48-51) Sipos yumi gat bilif olsem Ebel, bambae yumi tu yumi save kam wan gudfala fren blong Jeova blong olwe.

[Bokis blong pija long pej 22]

MAN BLONG GAREN MO MAN BLONG LUKAOT SIPSIP

Sam long ol faswan wok we God i givim long Adam hemia blong wokem garen mo blong lukaot long ol anamol. (Jenesis 1:28; 2:15; 3:23) Pikinini blong hem, Ken, i kam wan man blong wokem garen, mo Ebel i kam wan man blong lukaot long sipsip. (Jenesis 4:2) ?Be from wanem hem i lukaot long sipsip? Long taem ya, bifo we Bigfala Wota i ron, ol man oli stap kakae ol frut mo ligim nomo.​—Jenesis 1:29; 9:​3, 4.

Ol sipsip oli nidim man blong lukaot long olgeta. Wok blong Ebel i pruvum se longtaem bifo, taem ol man oli stat blong fulumap wol, oli mekem wok blong lukaot long ol anamol. Baebol i no talem sipos ol faswan man mo woman ya oli dring melek blong ol anamol ya. Be nating sipos oli kakae ligim nomo, maet oli bin yusum skin blong sipsip. Taem ol sipsip oli ded, ol man oli save yusum skin blong olgeta blong mekem plante samting. Tingbaot taem ya we Jeova i putum klos long Adam mo Iv, Baebol i talem se hem i “mekem klos blong tufala long ol skin blong anamol.”​—Jenesis 3:21.

Nomata se i olsem wanem, i klia se fastaem, Ken mo Ebel tufala i wok tugeta. Tufala i givim ol kakae mo klos we famle blong tufala i nidim.

[Tok blong pija long pej 23]

“Fasin blong [Ebel] i stret, be [Ken], fasin blong hem i no stret.”