Laef Stori

Jeova i Tijim Mifala Blong Stanap Strong Mo Gohed Oltaem

ARISTOTELIS APOSTOLIDIS I TALEM STORI YA

Pyatigorsk i stap long ol smosmol hil long not blong ol Bigfala Hil ya Caucasus. Hem i wan taon blong Rasia we plante man oli savegud from ol springwota mo naes weta blong hem. Mi mi bon long ples ya long 1929, papa mama blong mi, tufala i blong Gris, mo tufala i refuji. * Ten yia biaen, afta we ol man oli safa bigwan from gavman blong Stalin we i klinimaot wan ful laen blong man, mifala i kam refuji bakegen, ale mifala i mas muf i go long Gris.

AFTA we mifala i muf i go long Piraiévs, long Gris, mifala i kasem save nao se “refuji” i minim wanem. Mifala i harem se mifala i strenja nomo. Nating se mi mo brata blong mi i karem nem blong tu waesman blong Gris we plante man oli savegud, hemia Socrates mo Aristotle, be i no plante taem we oli yusum nem ya. Evriwan oli stap singaot mitufala se ol smol man Rasia.

Jes afta we Seken Wolwo i stat, mama blong mi we mi laekem tumas i ded. Hem i bin wan nambawan mama, mo mifala i harem nogud bitim mak taem hem i lus. From we hem i bin sik longtaem, hem i lanem mi blong mekem ol wok insaed long famle. Biaen, trening ya i givhan plante long laef blong mifala.

Wo Mo Taem Blong Kam Fri

Ol Nasi oli rul long kantri, mo ol plen blong kantri blong Wes oli saksakem plante bom, taswe evri dei, mi ting se hemia lasdei blong mi. Plante man oli pua, oli hanggri, mo oli ded. Stat long taem we mi gat 11 yia, mi mas wokhad wetem papa blong mi blong lukaot long famle  blong mitrifala. Mi no gat gud save long Grik lanwis, mo wo wetem ol hadtaem blong hem oli mekem we mi no skul gud.

Ol ami blong Jemani oli aot long Gris long Oktoba 1944. Mo sot taem biaen, mi mitim ol Witnes blong Jeova. Long taem ya we tingting blong plante man i foldaon mo oli safa tumas, hop ya blong Baebol se bambae ol man oli gat wan gudfala fiuja aninit long Kingdom blong God i kasem hat blong mi. (Ol Sam 37:29) Promes blong God se bambae yumi save laef blong olwe long wan wol we i gat pis long hem, hemia i olsem wan gudfala meresin blong hilim mi. (Aesea 9:7) Long 1946, mi mo papa blong mi mitufala i givim laef blong mitufala i go long Jeova, mo mitufala i soemaot samting ya long baptaes.

Wan yia biaen, mi glad blong kasem faswan wok blong mi olsem man blong lukaot long ol magasin, long namba tu kongregesen blong Piraiévs. Teritori blong mifala i stat long Piraiévs i godaon kasem Eleusis, wan eria blong raonabaot 50 kilometa. Long taem ya, plante long olgeta we oli stap wok long ol kongregesen oli ol Kristin man we tabu spirit i makemaot olgeta. Mi gat janis blong wok mo lanem plante samting wetem olgeta. Mi glad blong kampani wetem olgeta, from we oltaem oli talem plante stori long saed blong ol hadwok we oli mekem blong gohed long wok blong prij. Laef blong olgeta i soem klia se blong stanap strong long wok blong Jeova, yu mas gat longfala tingting mo fasin blong gohed oltaem. (Ol Wok 14:22) !Mi haremgud tumas from we, tede, i gat bitim 50 kongregesen blong ol Witnes blong Jeova long ples ya!

Wan Niufala Traem

Sam taem biaen, mi fren wetem Eleni, wan naesfala yang woman we i strong long ol Kristin wok. Hem i stap long taon blong Patras. Long en blong 1952, mitufala i mekem promes blong mared. Be, sam manis i pas, nao Eleni i kam sik tumas. Ol dokta oli talem se hem i gat kansa blong bren, mo hem i save ded from. Oli mas katem hem kwiktaem. Mifala i traehad blong faenem wan dokta, mo mifala i faenem wan long Athens, we—nating se oli no save wokgud olsem naoia—be hem i agri blong folem ol bilif blong mifala, mo no yusum blad taem hem i katem Eleni. (Levitikas 17:10-14; Ol Wok 15:28, 29) Afta we oli katem Eleni, ol dokta oli gat positif tingting long saed blong helt blong hem, be oli no sua se sik ya i finis fulwan.

?Bambae mi mekem wanem nao? ?From bigfala sik ya we i kamaot, mi save brekem promes blong mi blong mared mo kam fri bakegen? !Nogat! Mi mekem promes finis, mo taem mi talem yes, mi mas talem yes nomo. (Matiu 5:37) Mi neva gat wan defren tingting. Bigfala sista blong Eleni i lukaotgud long hem, nao klosap Eleni i kamgud fulwan, mo mitufala i mared long Disemba 1954.

Tri yia biaen, sik blong Eleni i kambak, mo semfala dokta i mas katem hem bakegen. Long taem ya hem i mas go dip insaed long bren blong katemaot kansa ya olgeta. From samting ya, haf bodi blong waef blong mi i ded, mo hem i no moa save toktokgud. Naoia mitufala tugeta i mas fesem sam bigfala traem. Ol samting we i isi nomo blong mekem, naoia oli kam olsem samting we i hadwok tumas long gudfala waef blong mi. From helt blong hem i stap kam moa nogud, mitufala i mas mekem bigfala  jenis long laef blong mitufala. Antap moa, mitufala i rili nidim fasin blong stanap strong mo fasin blong gohed oltaem.

Long taem ya nao, trening we Mama i givim long mi i givhan bigwan. Evri dei, eli long moning, mi rerem ol kakae, nao Eleni i kukum kakae ya. Plante taem mifala i singaot ol man i kam kakae long haos, olsem ol fultaem paenia, ol man we mifala i mekem Baebol stadi wetem olgeta, mo olgeta Kristin we oli gat nid long kongregesen. !Olgeta evriwan i talem se kakae ya i rili tesgud! Mi wetem Eleni, mitufala i wokgud tugeta tu blong klinim haos. Mitufala i mas gohed long laef ya blong 30 yia.

Stap Wok Strong Long Taem Blong Sik

I no gat wan samting i daonem lav mo strong tingting we waef blong mi i gat long Jeova mo wok blong hem. Samting ya i rili kasem hat blong mi mo ol narafala. Taem i pas, mo Eleni i traehad gogo hem i naf blong storian smol, wetem sam tok nomo. Hem i laekem tumas blong talemaot gud nius blong Baebol long ol man long rod. Taem mi mas go longwe from bisnes blong mi, hem i kam wetem mi, i stap long trak, klosap long saed blong rod we plante man i pas long hem. Hem i openem windo mo i singaot ol man blong karem sam Wajtaoa mo sam Wekap! Wan dei, hem i givimaot 80 magasin long tu aoa. Plante taem, hem i yusum olgeta olfala magasin we oli stap long kongregesen. Eleni i stap joen tu long ol defdefren haf blong wok blong prij.

Long olgeta yia we bodi blong waef blong mi i haf ded, oltaem hem i kam wetem mi long ol miting. Hem i neva mestem wan asembli, nating sipos mifala i mas go long wan narafala kantri from we oli agensem ol Witnes blong Jeova long Gris. Hem i sik bigwan, be hem i glad blong go long ol asembli long Ostria, Jemani, Saepras, mo ol narafala kantri tu. Eleni i neva komplen, mo i neva askem tumas taem blong mi, nating we biaen mi kasem plante moa responsabiliti long wok blong Jeova mo samtaem i no isi blong hem.

Long saed blong mi, traem ya i olsem wan longfala edukesen we i tijim mi blong stanap strong mo gohed oltaem. Plante taem, mi luk we Jeova i givhan. Ol brata sista oli rere blong lego samting we olgeta wan i wantem blong givhan long mitufala long plante defren rod, mo ol dokta oli sapotem mitufala. Nating se ol hadtaem ya oli mekem se mi no save wok fultaem, be mitufala i neva sot long wan samting long laef. Oltaem mitufala i putum ol wok blong Jeova long faswan ples.—Matiu 6:33.

Plante man oli wantem save wanem i givhan long mitufala long ol hadtaem ya. Naoia, taem mi tingtingbak, mi luksave se fasin blong stadi Baebol, fasin blong prea long God wetem fulhat, fasin blong go long olgeta Kristin miting, mo fasin blong wokhad long wok blong prij, hemia nao i mekem mitufala i stanap strong mo gohed oltaem long wok blong Jeova. Oltaem, mitufala i rimemba nambawan tok ya blong Ol Sam 37:3-5 we i talem se: “Yu mas trastem Hae God, mo yu mas mekem ol fasin we i gud, . . . Yu mas luk long Hae God blong i mekem yu yu glad . . . Yu  mas givim laef blong yu long Hae God, yu mas trastem hem, nao bambae hem i halpem yu.” Wan narafala vas we i givhan long mitufala hemia Ol Sam 55:22 we i se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala.” Olsem wan pikinini we i trastem fulwan papa blong hem, mitufala i putum ol trabol blong mitufala long Jeova.—Jemes 1:6.

Long Eprel 12, 1987, waef blong mi i stap long fored blong haos blong mitufala, i stap prij, nao wan bigfala aean doa i sat biaen long hem, i sakem hem i go long saed blong rod, mo hem i kasem bigfala kil. From samting ya, hem i stap slip blong tri yia we hem i no save wekap. Hem i ded long stat blong 1990.

Givim Beswan Blong Mi Long Wok Blong Jeova

Long 1960, oli putum mi long wok blong lukaot long kongregesen blong Nikaia, Piraiévs. Stat long taem ya, mi gat janis blong mekem wok ya long plante defren kongregesen long Piraiévs. Mi mi neva gat pikinini, be mi gat janis blong givhan long plante pikinini long saed blong spirit blong oli kam strong long trutok. Tede, sam long olgeta oli elda long kongregesen, oli man blong givhan, oli paenia, no oli wok long Betel.

Long 1975, demokratik gavman i stanap bakegen long Gris, mo i mekem we ol Witnes blong Jeova oli fri blong holem ol asembli, oli no moa nid blong haed long bus. Bifo, mifala i mas aot long kantri blong go long ol asembli. Long ol taem ya, plante long mifala i lanem olsem wanem blong mekem ol plan blong ol asembli, mo naoia save ya i givhan bigwan long mifala. Ale, mi mi glad long janis ya blong wok plante yia long ol komiti blong plante defren asembli.

Long 1979, oli mekem plan blong bildim faswan Haos Asembli long Gris, jes afsaed long Athens. Oli putum mi long wok blong ogenaesem mo lidim bigfala wok ya blong bildim haos asembli. Long wok ya tu mi mas gat fasin blong stanap strong mo blong gohed oltaem. Blong tri yia, mi wok wetem plante handred brata mo sista we oli volontia, mo samting ya i mekem mifala i joengud wetem lav. Bambae mi neva fogetem wok ya blong bildim haos asembli, nambawan taem ya i stap long hat blong mi blong olwe.

Givhan Long Ol Presina Long Saed Blong Spirit

Sam yia biaen, mi gat janis blong mekem wan narafala wok. Klosap long teritori blong kongregesen blong mi, long Korydallos, i gat wan kalabus we i bigwan moa i bitim ol narawan long Gris. Stat long Eprel 1991, oli singaot mi blong visitim ol presina evri wik, olsem wan man blong wok blong ol Witnes blong Jeova. Long ples ya mi save lidim sam Baebol stadi mo mekem Kristin miting wetem olgeta presina we oli intres. Plante long olgeta oli mekem bigfala jenis, mo oli pruvum se paoa blong Tok blong God i bigwan olgeta. (Hibrus 4:12) Ol man blong wok long kalabus mo ol presina oli sek taem oli luk ol jenis ya. Sam blong ol presina we mi bin mekem stadi long olgeta oli bin gofri, mo naoia oli stap talemaot gud nius.

Blong sam taem, mi bin stadi wetem tri bigfala man blong salem drag we ol man oli savegud trifala. Trifala i gohedgud long saed blong spirit, nao taem trifala i kam blong mekem Baebol stadi, trifala i katem mustas blong trifala, hea blong trifala i kom gud, mo trifala i werem sot wetem nektae, nating se hemia long manis Ogis—!wan manis we i hot bitim mak long Gris! Daerekta blong kalabus ya, wetem jif blong ol gad, mo sam man blong wok, evriwan oli aot long ofis blong olgeta blong luk samting ya we i narakaen. !Oli no save bilivim se samting we oli stap luk i tru!

Wan narafala gudfala ekspiriens i kamaot long haf blong kalabus we i gat ol woman long hem. Mi stat mekem wan Baebol stadi wetem wan woman we i kalabus blong ful laef blong hem, from hem i bin kilim wan man i ded. Ol man oli save gud hem from we hem i wan stronghed. !Be hem i jenis bigwan taem hem i lanem ol trutok blong Baebol, mekem se ol narafala oli talem se hem i olsem wan laeon  we i kam wan sipsip! (Aesea 11:6, 7) Kwiktaem nomo, daerekta blong kalabus i respektem mo i trastem hem. Mi glad tumas from we hem i gohed gud long saed blong spirit, go kasem we hem i givim laef blong hem i go long Jeova.

Givhan Long Ol Man We Oli Sik Mo Ol Olfala

Longfala faet we waef blong mi i mekem agensem sik blong hem, i tijim mi blong haremsave ol nid blong olgeta we oli sik mo ol olfala we oli stap wetem yumi. Mi intres tumas taem i gat sam stori long ol buk blong yumi we oli leftemap tingting blong yumi blong givhan mo soem lav long olgeta ya we oli sik no oli olfala. Mi laekem tumas mo mi kipim olgeta stori ya. Afta we sam yia i pas, mi bin hivimap inaf stori blong fulumap wan folda blong bitim wan handred pej—i stat wetem stori ya “Consideration for Older Persons and Afflicted Ones,” (Lukaotgud Long Ol Olfala Mo Olgeta We Oli Safa) long Wajtaoa blong Julae 15, 1962 (long Inglis). Plante taem ol stori ya oli eksplenem se i nambawan sipos evri kongregesen i putum sam man blong lukaotgud long olgeta we oli sik mo ol olfala.—1 Jon 3:17, 18.

Ol elda oli stanemap wan grup blong brata sista we oli rere blong lukaotgud long ol nid blong olgeta we oli sik mo ol olfala long kongregesen blong mifala. Mifala i putum defren tim blong mekem ol wok—i gat olgeta we oli naf blong givhan long dei, sam narafala long naet, olgeta we oli save givhan long saed blong transpot, mo olgeta we oli save givhan long enitaem nomo. Ol laswan ya oli wan grup we oli mekem wan nambawan wok.

Gudfala frut we i kamaot from hadwok ya i leftemap tingting. Wan eksampol: wan dei, taem mifala i go visitim wan sista we i sik mo i stap hem wan, mifala i faenem hem i foldaon i stap long floa. Mifala i talemaot samting ya long wan sista we i stap klosap mo i gat wan trak. Kwiktaem nomo, hem i karem sista ya i go long wan hospital—!tufala i kasem hospital long ten menet nomo! Ol dokta oli talem se samting ya i sevem laef blong hem.

Fasin tangkiu we olgeta we oli sik mo ol olfala oli soem long ol brata sista we oli wok long ol grup ya, i mekem mifala i haremgud tumas. Mifala i glad tu blong gat hop ya se, long niufala wol blong God, bambae yumi save laef wetem ol brata sista ya, be oli no moa sik mo oli no moa olfala. Mo tu, mifala i hapi blong luksave se taem mifala i sapotem olgeta tru long ol hadtaem we oli fesem, samting ya i givhan bigwan long olgeta blong oli stanap strong.

Fasin Blong Gohed Oltaem i Karem Frut

Tede mi wan elda long wan kongregesen blong Piraiévs. Nating se mi mi olfala mo mi sik, be mi glad yet blong mekem sam wok long kongregesen.

Long laef blong mi, mi fesem hadtaem, bigfala traem, mo plante samting we mi no save se bambae oli kamaot. Olgeta samting ya oli mekem mi mi wokem fasin blong stanap strong mo fasin blong gohed oltaem. Mo oltaem, Jeova i givim paoa long mi blong mi winim ol problem ya. Bakegen mo bakegen, mi luk se ol tok ya blong man we i raetem ol Sam i tru, se: “Hae God. Taem mi talem se, ‘!Mi glis, mi foldaon!’ be yu yu holem mi mi stap gud, from we oltaem yu yu lavem mi tumas. Taem we mi mi wari, mo mi stap tingting tumas, oltaem yu mekem tingting blong mi i kam gud bakegen, yu stap mekem mi mi glad.”—Ol Sam 94:18,19.

[Futnot]

[Tok blong pija long pej 25]

Wetem waef blong mi, Eleni, afta we oli katem hem bakegen, long 1957

[Tok blong pija long pej 26]

Long wan asembli long Nuremberg, Jemani, long 1969

[Tok blong pija long pej 28]

Grup blong ol brata sista we oli givhan long olgeta we oli sik mo ol olfala