?Yu Yu Wan Long Olgeta We God i Lavem?

“Man we i kasemgud ol tok blong mi, mo i stap obei long olgeta, man ya nao i lavem mi. Mo man we i lavem mi, Papa blong mi bambae i lavem hem.”—JON 14:21.

1, 2. (a) ?Olsem wanem Jeova i soemaot se hem i lavem ol man? (b) ?Wanem lafet we Jisas i stanemap long Naesan 14, 33 K.T.?

 JEOVA i lavem ol man we hem i wokem. Yes, hem i ‘lavem tumas ol man long wol, nao hem i givim stret Pikinini blong hem, wan nomo we hem i gat, blong olgeta man we oli bilif long hem bambae oli no save lus, oli gat laef we i no save finis.’ (Jon 3:16) Taem dei blong Memoriol blong ded blong Kraes i kam klosap, ol trufala Kristin oli mas tingbaot moa se Jeova i ‘lavem yumi, nao i sanem Pikinini blong hem, blong i ded blong mekem rod blong tekemaot ol sin blong yumi.’—1 Jon 4:10.

² Long naet blong Naesan 14, 33 K.T., Jisas mo ol 12 aposol blong hem oli kam wanples blong mekem lafet blong Pasova long wan rum antap long wan haos long Jerusalem. Lafet ya i blong tingtingbak long taem ya we ol man Isrel oli kam fri long Ijip. (Matiu 26:17-20) Afta we oli mekem lafet ya blong ol man Isrel, Jisas i sanemaot Judas Iskariot. Nao, hem i mekem wan narafala smol lafet we bambae ol aposol blong hem oli mas rimemba. Smol lafet ya hem i Memoriol blong ded blong Kraes we olgeta Kristin oli mas mekem. * Jisas i yusum bred we i no gat yis long hem mo red waen olsem pija blong bodi mo blad blong hem. Hem i mekem ol 11 aposol we oli stap yet wetem hem oli joen long lafet ya. Ol man blong raetem Gospel, hemia Matiu, Mak, mo Luk, oli tokbaot olsem wanem Jisas i mekem lafet ya, mo aposol Pol i tokbaot lafet ya olsem “Kakae blong Masta blong yumi.”—1 Korin 11:20; Matiu 26:26-28; Mak 14:22-25; Luk 22:19, 20.

3. ?Olsem wanem stori blong Jon long saed blong ol laswan aoa we Jisas i spenem wetem ol disaepol blong hem long rum antap long haos, i defren long ol narafala?

³ Yumi intres blong luk se, aposol Jon i no tokbaot bred mo waen we Jisas i pasem i go long ol aposol blong hem. Maet hemia from we long taem we Jon i raetem Gospel blong hem (samwe long 98 K.T.), ol faswan Kristin oli lan finis blong mekem lafet ya. (1 Korin 11:23-26) Be, tabu spirit i pusum Jon nomo blong tokbaot sam impoten save long saed blong wanem we Jisas i talem mo mekem bifo mo afta we Hem i stanemap Memoriol blong ded blong Hem. Faef long ol buk blong Gospel blong Jon oli tokbaot ol nambawan save ya. Ol buk ya oli soemaot klia wanem kaen man nao we God i lavem. Naoia bambae yumi luk long Jon japta 13 kasem 17.

Lan From Gudfala Eksampol Blong Jisas Long Saed Blong Lav

4. (a) ?Olsem wanem Jon i makem stamba tok blong miting we Jisas i mekem wetem ol disaepol blong hem, taem hem i stanemap Memoriol? (b) ?Talem wan impoten risen from wanem Jeova i lavem Jisas?

⁴ Long ol japta ya, i klia se lav nao hem i stamba toktok long laswan advaes we Jisas i givim long ol man blong hem. Yes, ol japta ya oli yusum tok ya “lav” long ol defren rod, 31 taem. Dip lav we Jisas i gat long Papa blong hem, Jeova, mo long ol disaepol blong hem, i klia moa long ol japta ya i winim olgeta narafala haf blong Baebol. Olgeta Gospel blong laef blong Jisas oli soemaot se hem i lavem Papa blong hem. Be, Jon nomo i raetemdaon tok blong Jisas se: “Mi lavem Papa blong mi.” (Jon 14:31) Jisas i talem tu se Jeova i lavem hem mo hem i talemaot from wanem. Hem i se: “Papa blong mi i lavem mi tumas, mo long sem fasin, mi mi lavem yufala. Oltaem yufala i mas joen gud long mi blong mi mi save lavem yufala olwe. Sipos yufala i stap obei long ol tok blong mi, bambae mi mi lavem yufala olwe, stret olsem we mi mi stap obei long ol tok blong papa blong mi, nao oltaem hem i stap lavem mi.” (Jon 15:9, 10) Yes, Jeova i lavem Pikinini blong hem from we hem i obeigud long Hem. !Hemia wan gudfala lesen we ol man blong Jisas Kraes oli save lanem!

5. ?Olsem wanem Jisas i soemaot we hem i lavem ol disaepol blong hem?

 ⁵ Long stat blong stori blong Jon long saed blong laswan miting blong Jisas wetem ol aposol blong hem, hem i makemgud dip lav we Jisas i gat long ol man blong hem. Jon i talem se: “Nao i kam kasem dei ya we long tumora blong hem ol laen blong Isrel oli mekem lafet ya blong Pasova. Mo Jisas i save we taem blong hem i kam finis blong hem i aot long wol ya, i gobak long Papa blong hem. Oltaem hem i stap lavem ol man blong hem, we olgeta oli stap long wol ya, mo hem i stap lavem olgeta olwe, gogo hem i givim laef blong hem from olgeta.” (Jon 13:1) Long naet ya, hem i tijim wan lesen long olgeta long saed blong fasin blong givhan long ol narafala wetem lav. Lesen ya oli neva save fogetem. Hem i wasem leg blong olgeta. Hemia wan samting we wanwan long olgeta i mas rere blong mekem long Jisas mo ol brata blong olgeta, be oli no mekem. Wetem tingting daon, Jisas i mekem wok ya mo biaen hem i talem long ol disaepol blong hem se: “From we mi, mi Masta mo mi Tija blong yufala, mi wasem leg blong yufala, yufala tu i mas waswasem leg blong yufala. Mi mi putum wan eksampol blong yufala, blong bambae yufala i save mekem sem fasin ya nomo we mi mi mekem long yufala.” (Jon 13:14, 15) Ol trufala Kristin oli mas rere mo glad blong givhan long ol brata blong olgeta.—Matiu 20:26, 27; Jon 13:17.

Obei Long Niufala Loa

6, 7. (a) ?Wanem wan impoten samting we Jon nomo i tokbaot long saed blong Memoriol we Jisas i stanemap? (b) ?Wanem niufala loa we Jisas i givim long ol disaepol blong hem, mo olsem wanem loa ya i niu?

⁶ Taem Jon i tokbaot wanem we i hapen long rum ya antap long haos, long naet blong Naesan 14, hem nomo i talem se Jisas i sanemaot Judas Iskariot. (Jon 13:21-30) Taem yumi joenemgud olgeta stori blong Gospel, i klia se Jisas i stanemap Memoriol blong ded blong hem, afta we Judas i aot, from we hem i man ya we bambae i letem Jisas i go long han blong ol enemi. Ale nao, Jisas i toktok plante wetem ol aposol blong hem we oli stap tru long hem, i givim ol laswan advaes mo tijing long olgeta. Taem yumi mekem yumi rere blong joen long Memoriol ya, i gud yumi intres tumas long wanem we Jisas i bin talem long taem ya. Samting ya i tru moa, sipos yumi wantem stap long medel blong ol man we God i lavem olgeta.

⁷ Faswan tijing we Jisas i givim long ol disaepol blong hem afta we hem i stanemap Memoriol blong ded blong hem, i wan niufala tijing. Hem i talem se: “Mi mi givim wan niufala loa long yufala se, ‘Yufala i mas lavlavem yufala.’ Olsem we mi mi lavem yufala, ale long sem fasin, yufala i mas lavlavem yufala. Nao from we yufala i stap lavlavem yufala, bambae olgeta man oli luksave se yufala i man blong mi.” (Jon 13:34, 35) ?Loa ya i niufala olsem wanem? Smol taem biaen, long sem naet ya, Jisas i mekem tok blong hem i kam klia, taem hem i talem se: “Loa blong mi i olsem, se yufala i mas lavlavem yufala, olsem we mi mi lavem yufala. I no gat man we i lavem ol fren blong hem moa, i winim man we i lusum laef blong hem blong i sevem ol fren blong hem.” (Jon 15:12, 13) Loa blong Moses i talem long ol man Isrel se “yufala i mas lavem ol man we oli stap raonabaot long yufala, mo yufala i mas mekem i gud long olgeta, olsem we yufala i stap mekem i gud long yufala nomo.” (Levitikas 19:18) Be loa blong Jisas i go moa. Ol Kristin oli mas lavlavem olgeta olsem we Jisas i lavem olgeta, oli mas rere blong lusum laef blong sevem ol brata blong olgeta.

8. (a) ?Lav ya we man i no tingbaot hem wan i minim wanem? (b) ?Olsem wanem ol Witnes blong Jeova oli soemaot lav ya tede?

⁸ Long taem blong Memoriol, i gud we yumi skelem fasin blong yumi wanwan mo blong yumi olsem wan kongregesen. Long rod ya, bambae yumi luksave sipos yumi rili gat mak ya blong trufala Kristin skul—hemia lav, we Jisas i soem. Samtaem lav ya, we man i no tingbaot hem wan, i save minim se wan Kristin i rere blong lusum laef blong hem, blong no letem brata blong hem i go long han blong ol enemi blong hem. Be plante taem, lav ya i minim se yumi mas rere blong lego sam samting we yumi nomo i wantem blong givhan long ol brata blong yumi mo  ol narafala tu. Aposol Pol i soem nambawan eksampol long saed ya. (2 Korin 12:15; Filipae 2:17) Ol man raonabaot long wol oli save ol Witnes blong Jeova from fasin ya we oli no tingbaot olgeta nomo. Oli rere blong givhan long ol brata blong olgeta mo ol man raonabaot long olgeta tu. Mo oli rere blong yusum taem mo olting blong olgeta blong talemaot trutok blong Baebol long ol narafala man. *—Galesia 6:10.

Gudfala Fasin Fren We i Sas Tumas

9. ?Blong gohed blong stap frengud wetem God mo Pikinini blong hem, yumi glad blong mekem wanem?

⁹ I no gat wan samting we i sas moa i winim save ya se Jeova mo Pikinini blong hem, Jisas Kraes, tufala i lavem yumi. Be blong save mo filim lav ya, yumi mas mekem wan samting. Long laswan naet we Jisas i stap wetem ol disaepol blong hem, hem i talem se: “Man we i kasemgud ol tok blong mi, mo i stap obei long olgeta, man ya nao i lavem mi. Mo man we i lavem mi, Papa blong mi bambae i lavem hem. Mo mi bambae mi lavem hem, nao bambae mi save soemaot mi long hem, blong hem i savegud mi.” (Jon 14:21) Yumi glad blong obei long ol loa blong tufala, from we yumi tinghae long fasin fren blong yumi wetem God mo wetem Pikinini blong hem. Obei long ol loa blong tufala, i minim se yumi obei long niufala loa ya blong lav, we yumi no tingbaot yumi wan. Mo tu, yumi obei long oda ya we Kraes i givim afta we hem i laef bakegen long ded, hemia blong “talemaot gud nius blong hem long ol man,” mo blong pulum ol man we oli lesin long gud nius, ‘oli kam man blong hem.’—Ol Wok 10:42; Matiu 28:19, 20.

10. ?Wanem gudfala fasin fren we ol tabu man mo “ol narafala sipsip” oli save gat?

¹⁰ Taem naet ya klosap i finis, Jisas i ansa long wan kwestin we gudfala aposol Judas (Tadeas) i askem long hem. Jisas i talem se: “Man we i lavem mi, hem bambae i save obei long ol tok blong mi. Mo Papa blong mi bambae i lavem hem, nao bambae mi wetem Papa blong mi, mitufala i save kam stap wetem hem, mitufala i save mekem hom blong mitufala wetem hem.” (Jon 14:22, 23) Taem oli stap yet long wol, ol tabu Kristin we bambae oli rul wetem Kraes long heven, oli gat wan gudfala fasin fren wetem Jeova mo wetem Pikinini blong hem. (Jon 15:15; 16:27; 17:22; Hibrus 3:1; 1 Jon 3:2, 24) Be ol fren blong ol tabu Kristin ya hemia “ol narafala sipsip” we oli gat hop blong laef foreva long wol ya, olgeta tu oli save gat wan gudfala fasin fren wetem ‘man blong lukaot long olgeta,’ Jisas Kraes, mo wetem God blong olgeta, Jeova. Be blong mekem olsem oli mas soem fasin obei.—Jon 10:16; Ol Sam 15:1-5; 25:14.

“Yufala i No Man Blong Wol Ya”

11. ?Jisas i givim wanem woning long ol disaepol blong hem?

¹¹ Long laswan miting we Jisas i mekem wetem ol gudfala disaepol blong hem bifo we hem i ded, Jisas i givim wan woning long olgeta se: Sipos God i lavem wan man, ol man blong wol ya bambae oli no laekem hem nating. Hem i talem se: “Sipos ol man blong wol ya oli no laekem yufala oli agens long yufala, yufala i mas tingbaot we fastaem, olgeta oli no laekem mi oli agens long mi. Sipos yufala i man blong wol ya, bambae ol man blong wol ya oli save lavem yufala, from we yufala i man blong wol ya. Be yufala i no man blong wol ya, mi mi jusumaot yufala finis, mo mi tekemaot yufala long ol man blong wol ya. Taswe ol man blong wol ya oli no laekem yufala, oli agens long yufala. Yufala i mas tingbaot  tok ya we mi talem finis long yufala, se i no gat man blong wok we i hae moa long masta blong hem. Nao from we ol man blong wol ya oli stap mekem i nogud tumas long mi, i klia gud we bambae oli save mekem sem fasin nomo long yufala. Sipos olgeta oli stap obei long ol tok blong mi, bambae oli save obei long ol tok blong yufala tu, be olgeta oli no obei long ol tok blong mi nating.”—Jon 15:18-20.

12. (a) ?From wanem Jisas i givim woning long ol disaepol blong hem se bambae ol man long wol oli no laekem olgeta? (b) ?Taem Memoriol i stap kam klosap, i gud yumi tingting long wanem?

¹² Jisas i givim woning ya blong mekem se tingting blong ol 11 aposol wetem ol trufala Kristin we oli kam biaen long olgeta i no foldaon mo oli no lego hem from we wol i no laekem olgeta. Hem i talem tu se: “Mi, mi stap talemaot ol samting ya long yufala blong bambae bilif blong yufala i no save foldaon. Bambae olgeta oli save ronemaot yufala long ol haos blong prea blong olgeta. Mo i gat taem i stap kam we bambae ol man we oli kilim yufala, oli ting se oli stap mekem gudfala wok blong God. Bambae oli save mekem ol samting ya from we oli no save Papa blong mi, mo oli no save mi tu.” (Jon 16:1-3) Wan Baebol diksonari i eksplenem se tok ya we long vas ya oli tanem i kam “foldaon” i karem mining se “pulum wan man blong i no moa trastem mo folem wan narafala man we hem i mas trastem mo folem; pulum wan man blong lego narafala man.” Taem dei blong Memoriol i kam klosap, i gud yumi tingbaot fasin blong laef blong ol man we oli stap tru long God long taem bifo mo tede tu, mo i gud yumi folem eksampol blong olgeta ya blong stanap strong long hadtaem. Taem yu kasem fasin agens no taem man i ronem yu, yu no letem samting ya i mekem we yu yu lego Jeova mo Jisas. Mekem tingting blong yu i strong blong trastem mo obei long tufala.

13. ?Long prea, Jisas i askem Papa blong hem blong mekem wanem blong givhan long ol man blong hem?

¹³ Bifo we Jisas i aot long rum ya antap long haos long Jerusalem, hem i prea long Papa blong hem se: “Mi mi talemaot ol tok blong yu long olgeta. Mo ol man blong wol ya oli no laekem olgeta, oli stap agens long olgeta, from we olgeta oli no man blong wol, olsem we mi mi no man blong wol. Mi mi no askem long yu blong yu tekemaot olgeta long wol ya. Mi wantem blong yu blokem man nogud ya Setan, blong i no kam spolem olgeta, yu holem olgeta oli stap gud oli sef. Mi mi no man blong wol ya, mo long sem fasin, olgeta tu oli no man blong wol ya.” (Jon 17:14-16) Yumi save sua se Jeova i lukaot long olgeta we hem i laekem olgeta. Taem oli seraot long wol ya, hem i mekem olgeta oli strong moa.—Aesea 40:29-31.

Mekem We Oltaem Papa Mo Pikinini Tufala i Lavem Yu

14, 15. (a) ?Defren long ‘rop ya blong grep we i kam nogud olgeta’ Jisas i tokbaot hem wan olsem wanem? (b) ?Hu ya “ol han” blong “gudfala rop ya grep”?

¹⁴ Long Naesan 14, taem Jisas i storian wetem ol disaepol blong hem we oli stap tru long hem, hem i tokbaot hem wan olsem “prapa rop ya grep,” mo nesen blong Isrel we i no stap tru olsem ‘nogud rop ya.’ Hem i talem se: “Mi nao, mi olsem prapa rop ya grep, mo Papa blong mi, hem i olsem man blong lukaot long rop ya.” (Jon 15: 1) Plante handred yia bifo, profet Jeremaea i raetem ol tok we Jeova i talem long ol man blong hem we oli lego hem se: “Mi mi putum yufala i stap gud long ples ya, mo yufala i olsem wan gudfala rop ya grep, . . . Be naoia, fasin blong yufala i kam nogud we i nogud olgeta, i olsem wael grep we kakae blong hem i konkon nomo.” (Jeremaea 2:21) Mo profet Hosea i raetem se: “Isrel i olsem wan rop blong grep we i kam nogud we i nogud olgeta.  Hem i gohed blong stap karem plante frut. . . . Tingting blong hem i fulap long ol fasin blong giaman nomo.”—Hosea 10:1, 2, NW.

¹⁵ Isrel i no karem ol gudfala frut blong trufala wosip. Defren olgeta, hem i lego trufala wosip mo i wokem prapa frut blong hem. Tri dei bifo we Jisas i mekem laswan miting wetem ol trufala disaepol blong hem, hem i tok long ol lida blong ol man Jiu we oli gat tu fes i se: “Bambae God i putumaot yufala, bambae hem i no moa King blong yufala. Nao bambae hem i openem rod long ol narafala man we oli save mekem i stret long hem, blong oli kam we hem bambae i King blong olgeta.” (Matiu 21:43) Niufala nesen ya hem i “Isrel blong God,” we ol 144,000 tabu Kristin nao oli mekemap. Olgeta ya oli olsem “ol han” blong “gudfala rop ya grep,” Jisas Kraes.—Galesia 6:16; Jon 15:5; Revelesen 14:1, 3.

16. ?Jisas i pulum ol 11 aposol we oli stap tru long hem blong mekem wanem, mo yumi save talem wanem long saed blong smol kampani we oli stap tru long God long taem blong en?

¹⁶ Jisas i talem long ol 11 aposol blong hem we oli stap wetem hem long rum antap long haos se: “Evri han blong rop ya we oli no save karem frut, hem i stap katemaot olgeta. Mo evri han we oli stap karem frut, hem i stap klinim olgeta blong bambae oli save karem plante frut moa. Laef blong yufala i mas joen long laef blong mi, olsem we laef blong mi i joen long laef blong yufala. Olsem we han blong rop i no save karem frut sipos i no joen gud long stamba blong hem, oraet, long sem fasin, yufala i no save karem frut long laef blong yufala, sipos yufala i no joen gud long mi.” (Jon 15:2, 4) Ol samting we oli kamaot long ol Witnes blong Jeova long ol yia we oli pas, oli soemaot se laef blong smol kampani blong ol tabu Kristin we oli stap tru long God i joengud long Jisas Kraes, we i Hed long olgeta. (Efesas 5:23) Hem i katemaot ol nogud han long olgeta mo i klinim olgeta. (Malakae 3:2, 3) I stat long 1919, oli karem plante frut blong Kingdom, we fastaem hemia ol narafala tabu Kristin mo, stat long 1935, hemia wan “bigfala hip” blong man we namba blong olgeta i stap kam antap bigwan.—Revelesen 7:9; Aesea 60:4, 8-11.

17, 18. (a) ?Wanem tok we Jisas i talem i givhan long ol tabu brata mo ol narafala sipsip blong stap oltaem olsem man we God i lavem? (b) ?Memoriol bambae i givhan long yumi olsem wanem?

¹⁷ Ol tok blong Jisas i go stret long olgeta tabu Kristin mo ol fren blong olgeta se: “Taem yufala i karem plante frut long laef blong yufala, samting ya i save leftemap nem blong Papa blong mi, mo long fasin ya yufala i kam man blong mi. Papa blong mi i lavem mi tumas, mo long sem fasin, mi mi lavem yufala. Oltaem yufala i mas joen gud long mi blong mi mi save lavem yufala olwe. Sipos yufala i stap obei long ol tok blong mi, bambae mi mi lavem yufala olwe, stret olsem we mi mi stap obei long ol tok blong papa blong mi, nao oltaem hem i stap lavem mi.”—Jon 15:8-10.

¹⁸ Yumi evriwan i wantem gohed oltaem blong stap olsem man we God i lavem, mo samting ya i pusum yumi blong karem plante frut. Yumi mekem olsem taem yumi tekem evri janis blong talemaot “gud nius blong Kingdom.” (Matiu 24:14, NW ) Mo tu yumi traehad blong soemaot ol “frut blong tabu spirit” long laef blong yumi. (Galesia 5:22, 23, NW ) Tingting blong yumi i strong moa blong mekem ol samting ya, taem yumi joen long Memoriol blong ded blong Kraes. Lafet ya i mekem yumi rimemba se God mo Kraes, tufala i lavem yumi tumas.—2 Korin 5:14, 15.

19. ?Wanem help bakegen we bambae yumi tokbaot long nekis stadi?

¹⁹ Afta we Jisas i stanemap Memoriol, hem i promes we Papa blong hem bambae i sanem ‘tabu spirit’ blong givhan long ol man blong hem. (Jon 14:26) Long nekis stadi bambae yumi tokbaot olsem wanem spirit ya i givhan long ol tabu brata mo ol narafala sipsip, blong oli stap oltaem olsem man we Jeova i lavem olgeta.

[Ol Futnot]

Ol Kwestin Blong Tingtingbak

• ?Wok we Jisas i mekem long ol disaepol blong hem wetem lav i tijim yumi long wanem?

• ?Long taem blong Memoriol i stret blong skelem wanem fasin long saed blong yumi wan?

• ?From wanem woning blong Jisas se ol man blong wol bambae oli no laekem yumi i no mas mekem yumi foldaon?

• ?Hu ya “gudfala rop ya grep?” ?Hu ya “ol han,” mo Jisas i askem wanem long olgeta?

[Kwestin]

[Tok blong pija long pej 15]

Ol aposol oli neva save fogetem lesen blong Jisas long saed blong fasin blong givhan long narafala wetem lav

[Tok blong pija long pej 16]

Ol disaepol blong Kraes oli obei long oda blong hem taem oli soem lav we oli no tingbaot olgeta nomo