?I Sas Blong Holem Wan Tingting We i No Jajem Yu?

“OLI Fosem Gavman Blong Kasembak R$20,000.” Hemia taetel we man i save ridim long niuspepa ya blong Brasil, Correio do Povo. Niuspepa ya i talemaot stori blong wan man we i wok long pos ofis, Luiz Alvo de Araújo. !Hem i salem wan pis lan long gavman, be afta we hem i saenem ol pepa, hem i sapraes blong luk se gavman i givim R$20,000 (klosap 1,152,000 vatu) moa antap long praes we oli agri long hem!

I isi blong talem se Luiz i mas givimbak haf mane ya we oli pem antap, be hemia i no wan isi samting blong mekem. Plante taem Luiz i go long ol defren dipatmen blong gavman, be i no gat wan we i agri blong halpem hem. Ale nao oli talem long hem se hem i mas tekem wan loea blong stretem problem ya long kot. Jaj we i lukaot long bisnes ya blong mekem we gavman i mas kasembak mane mo kam stanap long kot blong stretem bisnes ya, i talem se: “I luk olsem se wan man i bin mekem wan mastik, be from we i gat tumas rul blong folem long saed ya, i no gat man we i save olsem wanem blong stretem bisnes ya. Hemia fastaem we mi luk wan kes olsem.”

Luiz, we i wan Witnes blong Jeova, i eksplenem se: “Tingting we i jajem mi i stanap long Baebol, taswe mi no save kipim wan samting we i no blong mi stret. Mi mas traehad blong givimbak mane ya.”

Maet plante man oli ting se fasin ya i narakaen, mo maet oli no kasem save long hem. Be Tok blong God i soem se ol trufala Kristin oli tinghae long fasin ya blong holem wan tingting we i no jajem olgeta taem oli mekem eni samting we i joen wetem gavman. (Rom 13:5) Ol Witnes blong Jeova oli gat strong tingting blong mekem se oltaem ‘tingting blong olgeta i klin gud nomo, mo oltaem oli stap mekem i stret nomo.’​—Hibrus 13:18.