Oli Gohed Nating Se Nil Aranis i Stikim Olgeta

“Trabol ya i olsem nil blong aranis, we i stap stikim mi, i olsem man blong karem tok blong Setan, we oltaem i stap kilim mi.”​—2 KORIN 12:7.

1. ?Wanem sam long ol problem we i stap kasem ol man tede?

 ?YU YU stap traehad blong faet agensem wan traem we maet i gohed longtaem finis? Sipos yes, yu mas tingbaot se i no yu nomo we i fesem hadtaem olsem. Yumi stap long wan taem we ‘laef long wol i kam strong tumas.’ Ol trufala Kristin oli fesem hadtaem from ol man we oli agensem olgeta, oli gat problem long famle, ol sik, ol wari long saed blong mane, ol filing we oli trabol, oli lusum fren no famle long ded, mo plante narafala hadtaem. (2 Timoti 3:1-5) Long sam kantri, evri dei laef blong ol man i stap long denja from ol wo mo from kakae i sot.

2, 3. ?Ol problem we oli olsem nil blong aranis oli save mekem i nogud long yumi olsem wanem, mo wanem denja blong samting ya?

² Ol problem ya oli save mekem man i harem se hem i no moa gat paoa, antap moa sipos hem i kasem plante defren problem long sem taem. Makem wanem we Ol Proveb 24:10 (NW ) i talem i se: “?Yu yu letem tingting blong yu i foldaon long dei blong trabol? Paoa blong yu bambae i smol nomo.” Yes, taem tingting blong yumi i foldaon from ol traem, yumi save lusum paoa we yumi nidim blong stanap strong gogo kasem en. ?Olsem wanem samting ya i save hapen?

³ Taem tingting blong yumi i foldaon yumi lusum klia tingting. Eksampol, i isi blong luk ol hadtaem blong yumi olsem we oli bigwan bitim mak ale yumi stat sore long yumi wan bakegen. Samfala maet oli stat krae i go long God se, “?From wanem yu letem samting ya i hapen long mi?” Sipos tingting olsem i mekem ples blong hem long hat blong wan man, hem i save lusum glad blong hem mo hem i save ting se hem i no naf blong gohed. Wan man blong God we i letem tingting blong hem i foldaon olgeta bambae hem i save lego “gudfala faet ya blong bilif.”​—1 Timoti 6:12, NW.

4, 5. ?Long wanem rod Setan i stamba blong ol problem we oli kasem yumi, be yumi sua long wanem?

⁴ Yumi save se Jeova God i no stamba blong ol traem we oli kasem yumi. (Jemes 1:13) Sam traem we oli agensem yumi oli kamaot jes from we yumi stap traehad blong holem bilif long hem. Yes, olgeta man we oli wantem kam man blong Jeova bambae oli pulum bigfala enemi blong hem, hemia Devel Setan, i kam agensem olgeta. “Setan we i rabis god blong wol ya” i gat smol taem nomo i stap taswe hem i traem pulum ol man we oli lavem Jeova blong oli kam slak mo lego wosip blong Hem. (2 Korin 4:4) Setan i traem olkaen rod blong mekem kampani blong olgeta brata blong yumi raon long wol i safa. (1 Pita 5:9) I tru se ol problem we yumi kasem i no evriwan we oli kamaot long Setan nomo. Be, hem i save yusum sam long ol problem we yumi kasem, blong mekem yumi slak moa.

⁵ !Nating se Setan mo ol tul we hem i yusum oli strong olsem wanem, yumi save winim olgeta! ?Weswe yumi sua long samting ya? Yumi sua from we Jeova God nao i faet long ples blong yumi. Hem i givim save long ol man blong hem blong oli no blaen long ol trik blong Setan. (2 Korin 2:11) Yes, Tok blong God i tokbaot plante traem we ol trufala Kristin oli save kasem. Olsem eksampol blong aposol Pol. Baebol i yusum tok ya “nil blong aranis” blong tokbaot hadtaem we Pol i fesem. ?From wanem? I gud yumi luk olsem wanem Tok blong God i talem mining blong tok ya. Nao bambae yumi luk se i gat plante narafala man olsem yumi we oli nidim help blong Jeova blong winim ol traem.

From Wanem Ol Traem Oli Olsem Nil Blong Aranis

6. ?Pol i minim wanem taem hem i tokbaot wan “nil aranis we i stap stikim” hem, mo wanem ol samting we maet oli olsem wan nil aranis?

⁶ Afta we Pol i gotru long ol strong traem, tabu spirit i pulum hem blong raetem se: “[God] i letem wan  trabol i stap kam long mi oltaem. Trabol ya i olsem nil blong aranis, we i stap stikim mi, i olsem man blong karem tok blong Setan, we oltaem i stap kilim mi. Hemia i blong blokem mi, blong tingting blong mi i no go antap tumas.” (2 Korin 12:7) ?Wanem ya nil blong aranis we i stap stikim Pol? Tingbaot sipos wan nil aranis i go dip aninit long skin blong wan man, hemia i mas soa bigwan. Taswe nil aranis i minim wan samting we i stap mekem Pol i harem i soa bigwan​—maet hemia wan soa long bodi, no wan soa long filing, no maet tufala samting ya tugeta oli stap mekem hem i harem nogud. Maet Pol i stap safa from wan problem blong ae no sam narafala problem long helt. No maet nil aranis ya i minim ol man we oli stap tokbaot Pol se hem i no naf blong mekem wok blong aposol mo oli stap givim tingting se wok blong hem blong prij mo tij i hafhaf. (2 Korin 10:​10-​12; 11:​5, 6, 13) Nomata wanem ya nil aranis, i luk olsem se hem i stap long Pol oltaem mo i no gat rod blong hem i karemaot.

7, 8. (a) ?Tok ya “stap kilim” i soemaot wanem? (b) ?From wanem i impoten tumas we yumi stanap strong nomata wanem nil aranis we i stap stikim yumi naoia?

⁷ Yumi makem we nil aranis ya i stap kilim Pol. Yumi intres blong save se Grik veb we Pol i yusum long ples ya i kamaot long wan tok we i minim “joen blong fingga.” Yumi faenem ol tok we oli sem mak long Matiu 26:67 (NW ) mo 1 Korin 4:​11 (NW ). Long ol vas ya, yumi kasem tingting ya se man i taetem han blong hem blong kilim narafala. Yumi save se Setan i no laekem, we i no laekem nating, Jeova mo ol man blong Hem. Taswe yumi no sapraes we Devel ya i glad blong luk se wan nil aranis i stap kilim Pol. Tede tu, Setan i glad taem yumi trabol from wan nil aranis we i stap stikim yumi.

⁸ From samting ya, yumi mas olsem Pol we i save olsem wanem blong gohed nating se i gat ol nil aranis ya. !Yumi mas mekem olsem, sipos yumi wantem kasem laef! Yumi mas tingbaot oltaem se, Jeova i wantem mekem laef blong yumi i longfala gogo i no save finis long niufala wol blong hem. Long ples ya nomo, ol problem we oli olsem nil aranis bambae oli neva mekem trabol long yumi bakegen. God i givhan long yumi blong yumi save kasem nambawan praes ya. Hem i givim plante stori long tabu Tok blong hem, Baebol, blong soem se ol man blong hem oli bin stanap strong nating se nil aranis i stap stikim olgeta. Ol man ya oli olsem yumi nomo, oli sin man. Sipos yumi tingbaot sam long olgeta ‘witnes ya we oli plante we plante’ hemia i save halpem yumi blong “resis long rod ya we i stap long fes blong yumi.” (Hibrus 12:1) Taem yumi tingting dip long wanem we oli bin gotru long hem, bambae yumi save sua moa se yumi tu yumi save stanap strong nomata wanem kaen nil aranis we Setan i yusum blong spolem yumi.

Nil Aranis We i Stap Stikim Mefiboset

9, 10. (a) ?Wanem samting i hapen mekem se Mefiboset i gat wan nil aranis we i stap stikim hem? (b) ?Olsem wanem King Deved i soem kaen gud fasin long Mefiboset, mo olsem wanem yumi save folem fasin blong Deved?

⁹ Tingbaot Mefiboset, pikinini boe blong Jonatan we hem i gudfala fren blong Deved. Taem Mefiboset i gat faef yia nomo, ol man oli kilim i ded papa blong hem, Jonatan, mo bubu man blong hem, King Sol. Taem woman we i stap lukaot long smol boe ya i harem nius ya hem i fraet. Ale “hem i holem pikinini ya, . . . nao tufala i ronwe. Be from we woman ya i hareap tumas, pikinini i foldaon, i brekem tufala leg blong hem, mo from samting ya hem i no moa save wokbaot.” (2 Samuel 4:4) Ating trabol ya i olsem wan nil aranis we Mefiboset i mas laef wetem taem hem i stap gruap.

¹⁰ Sam yia biaen, King Deved i soem kaen gud fasin long Mefiboset from we hem i lavem tumas Jonatan. Deved i givimbak olgeta graon blong Sol i go long Mefiboset mo i putumap Jiba we i man blong wok blong Sol fastaem, blong hem i lukaot long graon ya. Mo tu, Deved i talem long Mefiboset se: “Mi glad tumas blong yu yu kam kakae wetem mi oltaem long haos blong mi.” (2 Samuel 9:​6-​10) Ating kaen gud fasin mo lav we Deved i soem oli mekem Mefiboset i harem gud lelebet mo i givhan smoltaem long hem blong i no tingting tumas long trabol ya we hem i gat se hem i no save wokbaot. !Hemia wan nambawan lesen long yumi! Yumi tu, yumi mas soem kaen gud fasin long olgeta we oli mas faet strong from we wan nil aranis i stap stikim olgeta.

11. ?Jiba i talem wanem long saed blong Mefiboset, mo olsem wanem yumi save se hem i giaman nomo? (Lukluk futnot.)

¹¹ Biaen, wan narafala trabol i kasem Mefiboset olsem nil aranis we i stikim hem. Long taem ya we King Deved i stap ronwe from we pikinini blong hem Absalom i rebel agensem hem, Jiba, man blong wok blong Mefiboset, i kam long Deved blong talem sam giaman ripot long saed blong Mefiboset. Jiba i talem se Mefiboset i stap long Jerusalem from we hem i  wantem tekem ples blong king. * Deved i bilivim giaman ripot blong Jiba ale hem i givim olgeta samting we i blong Mefiboset, i go long man ya blong giaman.​—2 Samuel 16:1-4.

12. ?Wanem fasin blong Mefiboset long traem we hem i kasem, mo wanem gudfala eksampol we hem i givim long yumi?

¹² Taem Mefiboset i mitim Deved, hem i talemaot long king ya wanem samting we i rili hapen. Mefiboset i bin rere blong go joenem Deved be Jiba i trikim hem mo i se bambae hem nomo i go long ples blong Mefiboset. ?Deved i stretem rong ya? Hem i stretem long wan fasin we i narakaen. Hem i seraotem olting blong Mefiboset i go haf blong Jiba, haf blong Mefiboset. Hemia wan narafala samting we i save kam olsem nil aranis blong stikim Mefiboset. ?Olsem wanem? ?Hem i harem nogud from? ?Hem i tok agensem disisen blong Deved, mo i krae se disisen ya i no stret nating? No gat. Hem i soem tingting daon, i folem nomo wanem we king i talem. Hem i putum tingting blong hem i stap long ol gudfala samting olsem bigfala glad ya we ol man Isrel oli gat from we king blong olgeta i kambak sef. Mefiboset i rili soem wan naesfala eksampol blong stanap strong nating se hem i handikap mo man i talem giaman ripot long saed blong hem, mo nating se i gat sam samting we oli mekem hem i harem nogud.​—2 Samuel 19:24-​30.

Nehemaea i Stanap Strong Long Traem We Hem i Kasem

13, 14. ?Taem Nehemaea i gobak blong bildimap stonwol blong Jerusalem, wanem samting olsem nil blong aranis we i stap stikim hem?

¹³ Long ol yia fo handred B.K.T., * Nehemaea i gobak long taon blong Jerusalem we stonwol blong hem i brobrok olgeta. Samting we hem i luk i mekem we hem i harem nogud tumas long filing blong hem, olsem we nil aranis i stap stikim hem. Hem i luk we taon ya i no moa gat stonwol blong hem, mo ol man Jiu we oli kambak finis long ples ya oli no gat plan blong wok, tingting blong olgeta i foldaon, mo oli no klin long fes blong Jeova. King Atakseses hem wan i bin givim raet long Nehemaea blong bildimap bakegen stonwol blong Jerusalem. Nating se i olsem, Nehemaea i faenemaot se ol lida blong ol narafala kantri klosap, oli no wantem samting ya nating. “Taem [oli] harem nius we [Nehemaea i] kam blong mekem ol samting blong leftemap laef blong . . . ol laen blong Isrel, [oli] kros we [oli] kros.”​—Nehemaea 2:10.

¹⁴ Ol lida ya we oli agensem Nehemaea oli traem eni samting long paoa blong olgeta blong stopem wok blong hem. Oli tok strong long hem, oli giaman, oli tok nogud long saed blong hem, mo oli talem samting blong mekem hem i fraet. Oli sanem sam spae i go blong traem mekem tingting blong hem i foldaon. Olgeta samting ya oli olsem ol nil aranis we oli stap stikim hem bakegen mo bakegen. ?Hem i letem ol trik blong ol enemi ya i winim hem? !No gat! Hem i trastem God fulwan, hem i no kam slak. Ale, wok blong bildimap stonwol blong Jerusalem i finis, mo hemia i pruvum klia nomo se Jeova i stap biaenem Nehemaea wetem lav.​—Nehemaea 4:​1-​12; 6:​1-​19.

15. ?Wanem problem we i kamaot long medel blong ol man Jiu we i mekem tingting blong Nehemaea i trabol bigwan?

 ¹⁵ From we Nehemaea i wok olsem wan lida blong ol man Isrel, hem i mas dil wetem plante problem we i stap kamaot long medel blong ol man blong God. Ol problem ya oli mekem tingting blong Nehemaea i trabol bigwan olsem nil aranis we i stikim hem, from we hem i save se ol man ya oli stap spolem fasin fren we oli gat wetem Jeova. Olgeta we oli rij oli stap askem ol brata blong olgeta blong pembak samting we i bigwan moa long wanem we oli bin givim. Ol brata ya we oli pua oli no save pembak ol kaon ya we long semtaem oli stap pem takis i go long gavman blong Pesia. Taswe oli stap salem ol graon blong olgeta, mo ol pikinini blong olgeta tu, oli stap salem olgeta blong kam slef. (Nehemaea 5:1-10) Plante man Jiu oli stap brekem loa blong Sabat mo oli no stap givim presen long ol Livaet mo haos prea. Mo tu, i gat sam long olgeta we oli stat mared long ol woman “Asdod, mo long ol woman Amon, mo long ol woman Moab.” !Ol samting ya oli mekem Nehemaea i harem nogud we i nogud! Be ol nil aranis ya, oli no winim hem. Bakegen mo bakegen hem i stretem ol problem ya we tingting blong hem i strong blong leftemap ol stretfala loa blong God. Yumi mas olsem Nehemaea. I nogud blong letem slak fasin blong ol narafala i winim yumi nao yumi no moa stap tru long wok blong Jeova.​—Nehemaea 13:10-​13, 23-​27.

Plante Narafala Man Blong Bilif We Oli Stanap Strong

16-18. ?Olsem wanem ol trabol insaed long famle oli givim hadtaem long Aesak mo Rebeka, Ana, Deved, mo Hosea?

¹⁶ Long Baebol i gat plante narafala stori blong ol man we oli gohed nating se oli laef wetem sam trabol we oli olsem nil blong aranis. Wan long ol nil aranis ya hemia ol problem insaed long famle. Tufala waef blong Esao, tufala i stap ‘mekem Aesak mo Rebeka, i harem nogud tumas.’ Rebeka i talem stret se hem i wantem ded nomo i winim we hem i laef wetem tufala woman ya. (Jenesis 26:34, 35; 27:46) Mo tu tingbaot Ana ya, we Penina hemia narafala waef blong man blong hem, i stap “jikim hem mo mekem hem i harem nogud tumas” from we hem i no save karem pikinini. Maet Ana i stap harem nogud from ol tok jik ya oltaem long haos blong hem. Be tu, Penina i mekem Ana i sem​—maet long fored blong ol famle mo ol fren​—taem olgeta evriwan oli stap go long haos prea blong God long Silo. Samting ya i olsem we hem i stap pusum nil aranis i go dip moa long skin blong Ana.​—1 Samuel 1:​4-7.

¹⁷ Tingbaot hadtaem we Deved i fesem from we papa blong woman blong hem, hemia King Sol, i jalus nogud long hem. Deved i mas ronwe blong sevem laef blong hem. Ale, hem i go laef long ol hol blong ston long draeples ya Enkedi, we ol rod blong hem oli fulap long ol stip hil mo sap ston. Deved i no bin mekem wan nogud samting agensem Sol. Taswe, ating Deved i harem nogud bigwan from we Sol i mekem i no stret nating long hem. Deved i mas laef plante yia long fasin haed jes from we Sol i jalus long hem.​—1 Samuel 24:14, 15; Ol Proveb 27:4.

¹⁸ Tingbaot trabol we i kamaot long famle blong profet Hosea. Woman blong hem i stap slip wetem ol narafala man. Fasin blong hem ating i stikim hat blong Hosea olsem nil blong aranis. Mo tingbaot filing blong hem taem woman blong hem i bonem tu pikinini we tufala i no pikinini blong hem. !Ating hem i harem i soa moa!​—Hosea 1:2-9.

19. ?Wanem nogud samting we i hapen long profet Mikaea?

 ¹⁹ Wan narafala nil blong aranis hemia taem ol man oli kilim no ronem yumi. Tingbaot stori blong profet Mikaea. Mikaea i laekem stret fasin, mo hem i harem nogud tumas blong luk se rabis King Ehab i frengud wetem ol giaman profet mo i bilivim evri giaman toktok blong olgeta. Ale, Mikaea i talem long Ehab se olgeta profet ya oli stap “giaman nomo.” ?Lida blong ol giaman profet ya i mekem wanem? !Hem i kam i “slavem [Mikaea] long fes blong hem”! Be Ehab i mekem nogud moa taem hem i harem woning we Jeova i givim se bambae oli lusum faet blong olgeta agensem Ramot. Ehab i givim oda blong oli sakem Mikaea long kalabus mo fidim hem wetem drae bred nomo mo wota. (1 King 22:​6, 9, 15-​17, 23-​28) Mo tu, tingbaot hadtaem we Jeremaea i kasem from ol man ya we oli wantem kilim hem i ded.​—Jeremaea 20:1-9.

20. ?Wanem nil blong aranis we Nomi i harem nogud long hem, mo wanem blesing we hem i kasem?

²⁰ Wan narafala hadtaem we i olsem nil blong aranis, hemia taem we wan fren no famle i ded. Nomi i gotru long hadtaem ya taem hem i lusum hasban blong hem wetem tufala pikinini blong hem long ded. Hem i stap harem i soa yet taem hem i gobak long Betlehem. Hem i talem long ol fren blong hem se oli no mas singaot hem se Nomi, be Mara, blong soem se hadtaem we hem i kasem i mekem hem i harem nogud tumas. Be biaen, from we hem i stanap strong Jeova i givim blesing long hem. Hem i jusum laen blong smol bubu blong Nomi olsem laen we Mesaea bambae i bon long hem.​—Rut 1:​3-5, 19-​21; 4:​13-​17; Matiu 1:​1, 5.

21, 22. ?Wanem ol samting we Job i lusum, mo hem i mekem wanem long saed ya?

²¹ Tingbaot Job. Ating hem i sek bigwan blong harem se ol ten pikinini blong hem oli ded evriwan wantaem, mo olgeta anamol blong hem wetem ol man blong wok blong hem tu, evriwan oli lus. !Ating hem i harem se laef blong hem i finis stret! Ale, taem Job i stap harem nogud yet long olgeta trabol ya, Setan i kilim hem bakegen wetem wan nogud sik. Maet Job i ting se rabis sik ya nao bambae i kilim hem i ded. Soa blong hem i bigwan gogo, hem i harem se ded nomo bambae i save karemaot hem long hadtaem ya.​—Job 1:​13-​20; 2:​7, 8.

²² Be ol samting ya oli no naf yet. Woman blong hem tu, we maet i stap sore mo i stap harem nogud, i kam long hem mo i singaot se: “!I moa gud yu tok nogud long [God] blong yu yu ded!” !Hemia wan nil aranis stret we i stikim Job! Biaen bakegen, trifala fren blong Job i kam. Trifala i no leftemap tingting blong hem nating, trifala i stap talem se hem i nogud. Oli tok long hem se hem i stap haedem sam sin we hem i mekem mo oli se, samting ya nao i pulum trabol i kam long hem. Ol toktok blong olgeta oli rong olgeta, mo i olsem we oli stap pusum nil aranis i go dip moa long skin blong Job. Mo tu, tingbaot se, Job i no save from wanem ol nogud samting ya oli stap hapen long hem, mo hem i no save tu se bambae hem i no ded. Be nating se i olsem, “hem i no mekem sin nating, mo i no tok nogud long God from ol samting ya.” (Job 1:​22; 2:​9, 10; 3:3; 14:13; 30:17) Tru ya, plante nil aranis oli stikim Job wantaem, be hem i neva lego God. !Fasin blong hem i rili leftemap tingting blong yumi!

23. ?From wanem ol man blong God we yumi storebaot olgeta oli naf blong gohed nating se plante defren kaen nil aranis i stikim olgeta?

²³ I gat plante eksampol antap long olgeta ya we yumi jes tokbaot. Baebol i tokbaot plante moa stori olsem. Olgeta man blong God ya, evriwan oli gat samting olsem nil aranis we i stikim olgeta. !Mo ol problem we olgeta ya oli fesem i defdefren evriwan! Be i gat wan samting we i sem mak long laef blong olgeta evriwan. I no gat wan long olgeta we i lego wosip blong Jeova. Oli fesem ol traem we i mekem se oli harem nogud, be oli winim Setan from paoa we Jeova i givim. ?Oli mekem samting ya olsem wanem? Nekis stadi bambae i ansa long kwestin ya mo bambae i soem olsem wanem yumi tu, yumi save gohed nomata wanem kaen nil aranis we i stap stikim yumi.

[Ol Futnot]

?Bambae Yu Yu Ansa Olsem Wanem?

• ?From wanem ol problem we yumi fesem oli olsem ol nil aranis we oli stikim yumi?

• ?Wanem sam nil aranis we oli stikim Mefiboset mo Nehemaea?

• ?Weswan stori blong Baebol we yu laekem long saed blong olgeta man mo woman ya we oli gotru long hadtaem olsem nil blong aranis?

[Kwestin]

[Tok blong pija long pej 15]

Mefiboset i gohed nating se hem i handikap mo man i mekem giaman ripot long saed blong hem, mo nating se i gat sam samting we oli mekem hem i harem nogud

[Tok blong pija long pej 16]

Nehemaea i gohed strong nating se ol man oli agensem hem