?From Wanem Wol Long Taem Blong Noa i Lus?

BIGFALA Wota we i kavremap fulwol i no wan disasta. Hem i wan jajmen we i kamaot long God. God i givim woning, be plante man oli no obei long woning ya. ?From wanem? Jisas i eksplenem se: “Long taem ya, taem we wota i no ron bigwan yet, ol man oli stap kakae, mo oli stap dring, mo oli stap mekem mared, go kasem taem we Noa i go insaed long bigfala sip blong hem. Mo olgeta ya oli no (“wantem save,” NW ) se bambae trabol i kam, gogo wota i ron bigwan, i tekemaot olgeta.”​—Matiu 24:​38, 39.

Ol Man We Oli Gat Waes Mo Save

Ol man we oli laef bifo we Bigfala Wota i ron, oli gat sam gudfala samting we yumi no gat tede. Wan eksampol se, olgeta evriwan oli toktok long wan lanwis nomo. (Jenesis 11:1) Hemia wan bigfala janis from we hem i mekem we olgeta man oli save joenem ol defdefren waes blong olgeta mo wok tugeta blong faenem moa save long saed blong sayens mo wei blong wokem ol naes samting. Mo tu, long taem ya bighaf blong ol man oli laef blong plante handred yia. Taswe ol man oli save go moa long waes mo save we oli gat finis.

Sam man oli talem se long taem ya bifo, ol man oli no rili laef blong plante handred yia. Oli talem se ol yia we Baebol i tokbaot, oli no rili yia be oli manis nomo. ?Samting ya i tru? Tingbaot stori ya blong Mahalalel. Baebol i talem se: “Mahalalel i gat sikisti faef yia blong hem, nao i bonem Jared. . . . Taem hem [Mahalalel] i ded, hem i gat eit handred naenti faef yia blong hem.” (Jenesis 5:​15-17) !Sipos wan yia i minim wan manis, i minim se Mahalalel i gat faef yia nomo taem hem i bonem pikinini boe blong hem! Taswe wanem we ol man ya i talem i no tru. Be samting we i tru se ol man long taem ya oli bon smoltaem nomo biaen long faswan man ya Adam, we hem i gat paoa blong laef blong olwe,  taswe bodi blong olgeta i strong gud yet. Tru ya, ol man ya oli laef blong plante handred yia. ?Wanem samting we ol man ya oli wokem?

Plante handred yia bifo we Bigfala Wota i ron, namba blong ol man long wol i go antap bigwan mekem se pikinini boe blong Adam, hemia Ken, i wokem wan taon we nem blong hem Inok. (Jenesis 4:​17) Long taem ya bifo we Bigfala Wota i ron, ol man oli wokem plante defren samting. I gat ol blaksmit blong “wokem ol samting long aean mo bras.” (Jenesis 4:​22) I sua se oli wokem ol tul ya blong bildim ol haos, mekem wok blong kapenta, somap ol klos, mo wok long garen. Ol stori blong laef blong ol faswan man long wol oli tokbaot ol defren kaen wok ya we oli bin mekem.

Ol save we ol man ya oli hivimap blong plante yia i givhan long ol pikinini blong olgeta blong kam antap moa long save blong mekem ol defren wok blong yusum aean, wokem garen, lukaot ol sipsip mo ol buluk, fasin blong raet, mo fasin blong wokem ol naes samting. Wan eksampol, Jabal hem i “waes gud blong kilim gita mo blong blu long bambu.” (Jenesis 4:​21) Waes mo save blong ol man long taem ya i kam antap bigwan. Be wantaem nomo, olgeta samting ya oli lus. ?From wanem?

?Wanem i Bin Hapen?

Nating se olgeta man we oli laef bifo we Bigfala Wota i ron, oli gat save long plante samting, be oli gat wan stamba we i nogud. Stamba blong olgeta hemia Adam, mo hem i rebel agens long God. Ken, man ya we i bin wokem faswan taon we Baebol i tokbaot, hem i kilim i ded stret brata blong hem. !Taswe yumi no sapraes we rabis fasin i kam antap bigwan long taem ya! Mo nogud frut we oli kamaot from sin we Adam i pasem long ol pikinini blong hem, oli kam antap bigwan.​—Rom 5:​12.

Ating ol man oli stap bitim mak tumas taem Jeova i tekem disisen se bambae hem i letem olgeta oli laef kasem 120 yia nomo. (Jenesis 6:3) Baebol i talem se: “Olgeta man long wol oli stap mekem i nogud tumas, mo oltaem, tingting blong olgeta i fulap nomo long ol rabis fasin. . . . Olbaot long evri ples, oli stap faet mo oli stap kilim man i ded.”​—Jenesis 6:​5, 11.

Biaen, God i talem long Noa se bambae hem i mekem bigfala wota i kam long wol ya blong spolem olgeta samting we i laef. (Jenesis 6:​13, 17) Nating se Noa hem “i wan prija we i stap talemaot stret fasin,” be ol man oli faenem i had blong bilif we evri samting raonabaot long olgeta bambae i lus i no longtaem. (2 Pita 2:5) I gat eit man nomo we oli lesin long woning, mo oli sef. (1 Pita 3:​20) ?From wanem eksampol blong olgeta i impoten long yumi tede?

?Stori Ya i Minim Wanem Long Yumi Tede?

Yumi laef long wan taem we i sem mak olsem taem blong Noa. Evri dei, yumi harem ol nogud nius long saed blong ol teroris, ol man we oli kilimaot wan ful laen blong man, sam man we oli sutum i ded plante man blong nating nomo, mo raf fasin insaed long famle we i kam antap bigwan. Bakegen wol ya i fulap long faet, mo olsem bifo, God i givim wan woning long olgeta man long wol, se bambae hem i jajem olgeta. Jisas hem wan i talem se God i putumap hem olsem wan Jaj we bambae i seraotem ol man, olsem wan man blong lukaot long sipsip i stap seraotem ol sipsip blong hem long ol nani blong hem. Jisas i talem se olgeta we oli no stret long fes blong God, “olgeta ya bambae oli go blong kasem panis ya we i no save finis.” (Matiu 25:​31-​33, 46) Be Baebol i talem se long taem ya bambae i gat plante milian man oli stap laef​—wan bigfala hip blong man we oli wosip long trufala God. Long niufala wol, olgeta man bambae oli stap gud, mo oli gat pis mo seftaem blong olwe, olsem oli neva gat bifo.​—Maeka 4:​3, 4; Revelesen 7:​9-17.

Plante man oli stap jikim ol tok blong Baebol mo ol woning long saed blong jajmen we bambae i kam. Be aposol Pita i eksplenem se ol man ya we oli no bilif, oli no luksave wanem i hapen. Hem i raetem se: “Long taem blong Lasdei, bambae sam man oli save kamtru, . . . Olgeta ya bambae oli laf long yufala, oli talem se, ‘?Olsem wanem nao? ?Hem i promes finis blong kam, be hem i stap wea?’ . . . Olgeta oli stap tok olsem be oli no wantem tingbaot we bifo longtaem, God i tok, nao skae mo graon tufala i kamaot. Hem i mekem graon ya i kamaot long medel blong ol wota, mo hem i yusum wota ya blong wokem olgeta ples long wol. Mo long sem fasin, hem i yusum wota bakegen blong spolem, long taem ya we hem i spolem wol ya we i stap bifo, long wota ya we i ron bigwan. Be skae mo graon we i stap naoia, tok blong God i blokem tufala, tufala i stap wet blong bambae faea i kasem tufala. Tok ya bambae i stap holem tufala, gogo i kasem bigfala Dei ya we God bambae i jajem ol man we oli no obei long hem, nao bambae oli lus.”​—2 Pita 3:​3-7.

 Tede yumi obei long oda we Jisas i givim long profet tok blong hem taem yumi wok strong blong talemaot woning long saed blong dei blong jajmen we bambae i kam, mo gud nius long saed blong taem blong pis we i kam biaen. (Matiu 24:14) Yumi no mas ting nating long woning ya. God we i gat Olgeta Paoa i mekem ol promes blong hem i kamtru oltaem.

Niufala Wol We Bambae i Kam

Yumi save finis we bambae i gat bigfala jenis long wol ya. ?Wanem bambae i hapen long fiuja blong ol man long wol ya? Jisas i mekem promes ya long fastok blong hem long Bigfala Toktok antap long Hil i se: “Olgeta we oli kwaet man oli save glad, from we bambae wol ya i blong olgeta.” Biaen hem i tijim ol disaepol blong hem blong oli prea long God se: “Mekem ol samting we yu yu wantem oli kamaot long wol, olsem we oli kamaot finis long heven.” (Matiu 5:5; 6:​10, NW ) Yes, Jisas hem wan i tijim se olgeta man we oli stap tru long God, bambae oli gat wan nambawan fiuja long wol ya. Hem i tokbaot wol ya i se bambae hem i wan “niufala wol.”​—Matiu 19:28.

Taswe taem yu tingbaot fiuja ya, yu no mas letem ol man oli jikim yu mo mekem we yu no moa trastem woning blong God. I tru we i luk olsem se ol samting raonabaot long yumi oli strong, mo i naf blong stap plante taosen yia yet. Be nating se i olsem, yumi no mas trastem ol samting ya. God i jajem finis wol blong ol man. Taswe, laswan tok ya blong aposol Pita i save leftemap tingting blong yu, i se:

“Nao from we olgeta samting ya bambae oli lus olsem, yufala i mas luklukgud long laef blong yufala. Taem yufala i stap wet long Dei ya blong God blong i kamtru, yufala i mas tabu, yufala i man blong God, mo yufala i mas mekem ol fasin we hem i wantem. . . . From ol samting ya, taem yufala i stap wet long Dei ya, yufala i mas traehad blong mekem we long fes blong God, laef blong yufala i klin gud, mo we i no gat wan samting i rong long laef blong yufala. Nao long fasin ya, yufala i gat pis wetem God. . . . Oltaem yufala i mas kam strong moa long Kristin laef blong yufala, we Jisas Kraes, we i Masta mo Sevia blong yumi, i stap givhan moa long yufala long gladhat blong hem, mo we yufala i save hem moa.” (2 Pita 3:​11, 12, 14, 18) Taswe, yu mas lan from samting we i bin hapen long taem blong Noa. Yu mas stap klosap long God. Yu mas kasem moa save long saed blong Jisas Kraes. Yu mas wokem fasin blong fasgud long God oltaem. Nao yu save kam wan long ol milian man we oli jusum blong laef taem wol ya i lus, mo haremgud long niufala wol we i stap kam, we i gat pis long hem.

[Tok blong pija long pej 5]

Ol man oli gat save blong wokem aean bifo we Bigfala Wota i ron

[Tok blong pija long pej 7]

Wan nambawan fiuja bambae i kam