Wan Kwestin

?Sin we i stap long vejin Meri, i kasem Jisas taem hem i stap yet long bel blong hem?

Baebol i tokbaot taem we ‘Jisas i bon,’ i se: ‘Mama blong hem, Meri, mo fastaem, olgeta oli bin mekem promes, se bambae hem i mared long wan man, nem blong hem Josef. Be taem tufala i no mared yet, tabu spirit i mekem we Meri i gat bel.’ (Matiu 1:18) Yes, tabu spirit blong God i mekem wan impoten wok taem Meri i gat bel.

?Be, olsem wanem long Meri? ?Eg blong woman i joen long wok blong mekem pikinini ya i gru insaed long bel blong hem? Ol promes we God i mekem long ol bubu blong Meri​—Ebraham, Aesak, Jekob, Juda, mo King Deved​—oli talem se pikinini ya i mas wan trufala laen blong olgeta. (Jenesis 22:18; 26:24; 28:​10-14; 49:10; 2 Samuel 7:16) Sipos no, pikinini ya we Meri i bonem bambae i no save stap olsem stret man blong laen ya we God i mekem promes long hem. Hem i mas wan prapa pikinini blong Meri.​—Luk 3:​23-34.

Taem enjel blong Jeova i kamtru long yangfala gel ya Meri, hem i talem se: “Meri, yu no fraet. God i mekem i gud tumas long yu. Bambae yu yu gat bel, mo bambae yu save bonem wan pikinini boe blong yu, mo bambae yu putum nem blong hem, se Jisas.” (Luk 1:​30, 31) Bifo we wan woman i gat bel, eg blong woman i mas rere blong karem pikinini. I luk olsem se taem Jeova God i tekemaot laef blong pikinini blong hem long heven, mo i putum i kam long wol, hem i mekem we wan eg long bel blong Meri i rere.​—Galesia 4:4.

?Taem wan woman we i gat sin i bonem pikinini, bambae pikinini ya i save stret gud we i no gat sin long bodi blong hem? ?Taem wan laef we i stret i joen wetem wan laef we i no stret, pikinini we i kamaot bambae i olsem wanem? Rimemba se tabu spirit i joen long wok ya blong karem stretfala laef blong Pikinini blong God mo putum i go long bel blong Meri. Samting ya i naf blong blokem paoa blong sin we i stap long eg blong Meri, nao pikinini we i bon i stret gud olgeta.

Nating se i olsem wanem, yumi save sua se wok blong tabu spirit nao i mekem stamba tingting blong God i kamtru long taem ya. Enjel Gabriel i eksplenem long Meri se: ‘Tabu spirit bambae i kam long yu, mo paoa blong God ya we i hae we i hae, bambae i kavremap yu olsem wan sado. Nao from samting ya, pikinini ya blong yu bambae i tabu, i blong God, mo ol man bambae oli save singaot hem, se Pikinini blong God.” (Luk 1:35) Yes, tabu spirit blong God i blokem pikinini ya, nao sin mo ol narafala samting nogud oli no save spolem hem long taem we hem i stap gru long bel.

I klia nomo se, laef we Jisas i gat olsem wan man we i stret gud olgeta, i kamaot long Papa blong hem long heven, be i no long wan man long wol ya. Jeova i “mekem wan bodi” i rere blong Jisas, nao taem hem i jes stat nomo long bel blong mama blong hem mo biaen tu, hem ‘i no gat sam samting we i spolem hem, hem i narafala olgeta long ol [sin man].’​—Hibrus 7:26; 10:5.

[Tok blong pija long pej 19]

“Bambae yu yu gat bel”