!Kakae i Stap Kam Long Ol Man We Oli Hanggri!

MAET yu yu askem se: ‘?Ol man oli hanggri from wanem kaen kakae?’ !Hemia kakae long saed blong spirit! Wan man Hibru long taem bifo i bin talemaot se: “I gat taem i stap kam we bambae mi mekem we yufala i gat hadtaem blong kasem kakae. Bambae yufala i hanggri tumas, mo yufala i tosta tumas, be i no from wota. Long taem ya, bambae yufala i wantem tumas blong harem tok blong mi, olsem we man we i hanggri tumas i wantem kakae, mo man we i tosta tumas i wantem dring.” (Amos 8:11) Ol 48 memba blong namba 112 klas blong Wajtaoa Baebol Skul blong Gilead, we i stap long Patterson, New York, bambae oli go long 19 kantri mo aelan blong givhan long ol man we oli hanggri long saed blong spirit.

Kakae we oli karem i go long ol kantri ya, i no kakae olsem mit mo bred, be bambae oli givhan long ol man wetem save, ekspiriens, mo trening we oli bin kasem. Ol studen ya oli spenem faef manis blong stadi dip long Baebol. Stadi ya i mekem bilif blong olgeta i strong moa, blong oli save mekem wok olsem misinari long ol narafala kantri. Long Maj 9, 2002, i gat 5,554 man we oli glad tumas blong lesin long program blong givim setifiket long ol studen ya.

Stephen Lett, we i wan memba blong Hed Kampani blong ol Witnes blong Jeova, i statem program ya. Fastaem hem i welkamem ol famle mo fren we oli kam long ol defren kantri blong wol. Biaen hem i soem olsem wanem tok blong Jisas se, “yufala i olsem laet long ol man blong wol” i go stret long olgeta we bambae oli mekem wok olsem misinari. (Matiu 5:14) Hem i eksplenem se: ‘Long ol ples we bambae yufala i go long hem, bambae yufala i mekem ol nambawan wok blong Jeova oli “saenaot,” mekem se ol man we hat blong olgeta i stret oli save luk we Jeova mo ol stamba tingting blong hem oli gud tumas.’ Brata Lett i leftemap tingting blong ol misinari ya blong yusum Tok blong God olsem wan laet long tudak, blong soemaot klia ol giaman tijing mo blong lidim ol man we oli wantem faenem trutok.

I Nidim Stret Tingting Blong Karem Frut Long Wok Ya

Afta we jeaman i openem miting ya, Baltasar Perla, wan memba blong Branj Komiti long Yunaeted Stet, i givim faswan long ol tok ya we oli halpem ol studen blong kam ol gudfala misinari. Hem i tokbaot stamba tok ya se “Yu Mas Gat Strong Tingting Mo Yu Mas Strong Mo Mekem Wok.” (1 Kronikel 28:20) Jeova i askem King Solomon blong Isrel bifo blong mekem wan wok we i strong tumas, mo we Solomon i neva mekem bifo—hemia blong bildim tempol long Jerusalem. Solomon i mekem wanem we Jeova i askem, mo wetem help blong Jeova hem i finisim tempol ya. Brata Perla i soem long ol studen ya olsem wanem oli save mekem i sem mak, hem i se: ‘Yu yu kasem wan niufala wok, hemia blong mekem wok olsem misinari, mo yu nidim fasin blong no fraet mo blong stanap strong.’ Ol studen oli haremgud long promes ya se, sipos oli gohed blong stap klosap long Jeova, bambae hem i no save lego olgeta. Brata Perla i tajem hat blong olgeta we oli lesin, taem hem i talem lastok ya se: ‘Yufala ol misinari, yufala i save mekem wan gudfala wok. !Ol misinari nao oli karem trutok i kam long mi mo famle blong mi!’

 Samuel Herd, wan narafala memba blong Hed Kampani, i givim wan tok we stamba blong hem se: “Lukluk i Go Long Jeova Blong Karem Frut.” Ol studen ya oli statem wan niufala wok olsem misinari, mo gudfala frut we oli save karem long wok ya i dipen long fasin fren blong olgeta wetem Jeova. Brata Herd i givim advaes long olgeta se: ‘From ol stadi we yufala i mekem long Gilead Skul, yufala i kasem plante save long Baebol. Yufala i glad blong kasem save ya. Be blong karem gudfala frut, yufala i mas stat naoia blong givimaot wanem we yufala i lanem.’ (Ol Wok 20:35) Ol misinari bambae oli gat plante janis blong mekem samting ya taem oli givim olgeta wan ‘olsem wan presen’ blong givhan long ol narafala.—Filipae 2:17.

?Wanem laswan advaes we ol brata oli givim long ol studen ya? Stamba tok we Mark Noumair i tokbaot i stanap long Rut 3:18, se “I Gud Yu Wet Nomo Blong Luk Ol Samting We Bambae i Kamtru.” Brata ya i yusum eksampol blong Nomi mo Rut. Hem i leftemap tingting blong ol studen blong trastem fulwan ol plan we ogenaesesen blong God long wol i stanemap mo blong respektem tiokratik oda. Brata Noumair i tajem hat blong olgeta taem hem i talem se: ‘Samtaem maet yu no kasem save from wanem [ogenaesesen blong Jeova] i tekem wan disisen long saed blong yu we yu harem nogud from, mo maet yu yu gat strong filing long saed blong wan samting we yu ting se oli mas mekem long wan rod we i defren. ?Bambae yu mekem wanem? ?Bambae yu traem jenisim disisen  ya, no bambae yu “wet nomo,” mo trastem se God i lidim wok ya, mo long stret taem blong hem, bambae hem i mekem gud frut i kamaot? (Rom 8:28) Wan gudfala advaes we bambae i givhan bigwan long ol misinari ya taem oli stap long narafala kantri hemia se, ‘putum tingting i stap strong blong mekem ol wok blong Kingdom i go moa, mo lukluk wanem we ogenaesesen blong Jeova i stap mekem, i no wanem we ol brata oli stap mekem.’

Wallace Liverance, we bifo hem i wan misinari mo naoia i wok olsem tija long Gilead Skul, i givim wan tok we stamba blong hem se “No Jenisim Tingting, Gohed Long Wok Blong God.” Hem i soem se profet Daniel i luksave taem Babilon i foldaon mo from ol tok we Jeremaea i talemaot, se bambae i no longtaem ol man Isrel oli gofri long kalabus. (Jeremaea 25:11; Daniel 9:2) Daniel i kasem save se Jeova i mekem olgeta samting long stret taem blong hem. Save ya i givhan long Daniel blong wet long God blong i mekem stamba tingting blong hem i kamtru. Ol man Isrel we oli laef long taem blong profet Hagae oli defren olgeta long Daniel, oli stap talem se: “I no taem yet.” (Hagae 1:2) Olgeta oli no tingbaot impoten taem we oli laef long hem. Jeova i bin letem olgeta oli gofri long Babilon blong bildim tempol bakegen, be tingting blong olgeta i no stap long wok ya. Tingting blong olgeta i stap long ol samting long saed blong bodi nomo mo ol samting we olgeta nomo oli haremgud long hem, taswe oli lego wok ya. Brata Liverance i finisim tok blong hem se: “Sipos yu no wantem se wan narafala samting i pulum yu, yu mas putum tingting blong yu i stap oltaem long stamba tingting blong Jeova.”

Biaen, wan narafala tija blong Gilead Skul, Lawrence Bowen, i lidim wan haf we stamba blong hem se “Jeova i Blesem Olgeta We Oli Yusum Tok Ya We i Laef.” (Hibrus 4:12) Long haf ya oli tokbaot ol ekspiriens we ol studen blong klas ya oli kasem long wok blong prij. Ol ekspiriens ya oli makemgud olsem wanem Jeova i blesem ol man we oli yusum Baebol long wok blong prij mo tij. Brata we i lidim haf ya i tokbaot gudfala eksampol we Kraes Jisas i soem long olgeta minista blong God se: ‘Jisas i talem tru nomo se ol tok we hem i stap tijim ol man long hem, oli no blong hem, be hem i talemaot Tok blong God nomo.’ Ol man we hat blong olgeta i stret oli luksave trutok mo oli glad blong lesin long Jisas. (Jon 7:16, 17) Samting ya i tru tede tu.

Gilead Skul i Trenem Olgeta Blong Mekem Ol Gudfala Wok

Biaen, tu brata, Richard Abrahamson mo Patrick LaFranca, we tufala i stap longtaem finis long Betel, tufala i askem kwestin long sikis man we oli bin mekem Gilead Skul bifo, mo we naoia oli stap mekem ol defren wok blong Jeova fultaem. Ol studen blong namba 112 klas oli glad blong harem we ol sikis brata ya, nating se plante yia oli pas mo nomata wanem wok we oli stap mekem naoia, be oli yusum yet trening we oli kasem long Gilead. Trening ya i givhan long olgeta taem oli stadi long Baebol, taem oli mekem dip stadi long sam poen, mo tu, hem i givhan long olgeta blong joengud wetem ol man.

Theodore Jaracz, wan memba blong Hed Kampani, i givim bigfala tok blong program ya. Nem blong tok ya se “Frut We i Kamaot Taem Yumi Stanap Strong Agensem Setan We i No Laekem Yumi.” Long ol faef manis we i pas, ol studen oli stap laef long wan ples we i sefgud mo we ol man long hem oli folem tiokratik oda. Be, long ol stadi we oli mekem long klas blong olgeta, oli lanem se wol ya we yumi stap long hem, hem i enemi blong yumi. Long evri ples long wol ya, ol man blong Jeova oli kasem strong traem. (Matiu 24:9) Brata Jaracz i yusum sam stori long Baebol mo i makem se ‘Devel Setan i stap traem yumi oltaem. Yumi mas mekem fasin fren blong yumi wetem Jeova i kam strong moa mo mekem yumi strong blong fesem ol traem ya.’ (Job 1:8; Daniel 6:4; Jon 15:20; Revelesen 12:12, 17) Ol laswan tok we brata Jaracz i talem, hemia se ol man bambae oli gohed blong no laekem ol man blong God. Be Aesea 54:17 i talem se, ‘olgeta samting blong mekem faet bambae oli no save mekem se yumi karekil, yumi man blong wok blong Jeova, mo bambae hem i blokemgud yumi, i mekem yumi win.’

Ol studen blong namba 112 klas blong Gilead oli “savegud ol rod blong mekem ol gudfala wok.” Long ol kantri we bambae oli mekem wok olsem misinari, i sua se bambae oli givhan bigwan long ol man we oli hanggri long saed blong spirit. (2 Timoti 3:16, 17) Yumi wantem tumas blong harem olsem wanem bambae oli karem gudfala mesej i go long ol man long ol kantri ya.

[Bokis blong pija long pej 23]

KAONTEM KLAS YA

Oli kamaot long hamas kantri: 6

Oli go wok long hamas kantri: 19

Hamas studen: 48

Oli gat hamas yia: 33.2

Hamas yia long trutok: 15.7

Hamas yia finis oli prij fultaem: 12.2

[Tok blong pija long pej 24]

Klas Namba 112 Long Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo stat long lefsaed i go long raetsaed.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather , A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.