No Letem Man i Trikim Yu

FASIN ya blong trikim man i stat finis long taem blong faswan man mo woman. Wan long ol fasfala stori long histri blong man, hem i stori we i kamaot from wan trik. Hemia taem we Setan i trikim Iv long garen blong Iden.—Jenesis 3:13; 1 Timoti 2:14.

I tru se stat long taem ya, oltaem i bin gat sam man we oli trikim narafala long wol ya, be tede fasin ya i kam antap moa. Baebol i tokbaot taem blong yumi mo i givim woning ya se: “Ol man nogud wetem ol man blong giaman, bambae oli save gohed blong mekem i mowas olgeta. Bambae oli save giaman moa long ol man, mo olgeta tu oli save bilif long ol giaman toktok blong olgeta bakegen.”—2 Timoti 3:13.

I gat plante defren kaen wei we man i yusum blong trikim ol narafala. I gat olgeta ya we oli stap trikim mo mekem ol giaman promes blong kasem mane blong narafala. Sam man blong politik oli giaman long ol man we oli vot long olgeta, from we oli wantem tumas blong holem paoa. I gat sam man we oli trikim olgeta wan tu. Oli no wantem harem man i tok tru long olgeta, ale oli giaman long olgeta wan se i no gat denja sipos oli gohed long ol nogud fasin blong olgeta, olsem fasin blong smok, tekem drag, no mekem nogud long saed blong seks.

Mo tu, i gat ol trik we i kamaot long jos. Long taem blong Jisas, ol lida blong jos oli bin trikim ol man. Jisas i stap tokbaot ol man ya blong trikim narafala i se: “Olgeta oli lida, be oli blaen nomo. Mo sipos wan blaenman i stap lidim narafala blaenman, bambae tufala evriwan i mas foldaon long hol.” (Matiu 15:14) Antap long samting ya, sam man oli trikim olgeta wan bakegen long saed blong ol bilif blong olgeta. Ol Proveb 14:12 i talem se: “I gat rod i stap we man i ting se i stret gud, be hem i rod blong ded nomo.”

!Yumi no sapraes se tede, olsem long taem blong Jisas, plante man oli foldaon long ol trik long saed blong bilif blong olgeta! Aposol Pol i bin talem se Setan “hem i satem tingting blong olgeta finis, nao oli stap long tudak. Hem i stap blokem olgeta, blong oli no luk laet ya we i stap saenaot i go long olgeta. Laet ya i kamaot long gud nius blong Jisas Kraes, we hem i gat olgeta paoa, mo hem i stret pija blong God.”—2 Korin 4:4.

Sipos wan bisnes man i giaman long yumi, yumi save lusum mane. Sipos wan man blong politik i trikim yumi, maet yumi lusum fasin fri blong yumi. !Be sipos Setan i trikim yumi mo yumi sakemaot trutok long saed blong Jisas Kraes, yumi save lusum laef we i no save finis! Taswe, no letem man ya i trikim yu. I gud yu openem tingting mo hat blong yu long Baebol, we hem nomo i namba wan stamba blong ol trutok long saed blong wosip. Bambae yu lusum plante gudfala blesing sipos yu no mekem olsem.—Jon 17:2, 3.