‘?God, From Wanem Yu Yu Letem Samting Ya i Hapen?’

RICARDO i stap tingbaot dei we hem wetem woman blong hem Maria, tufala i stap wet long hospital. * Tufala tugeta i fraet blong ridim leta we i talem risal blong ol laswan tes we dokta i mekem. Sloslo, Ricardo i openem leta ya, mo tufala i hareap blong ridim ol tok blong dokta we i eksplenem sik blong woman blong hem. Ae blong tufala i fas long tok ya “kansa.” Taem bigfala mining blong tok ya i kasem tingting blong tufala, tufala i stat krae.

Ricardo i tingtingbak i se: “Dokta ya i kaen tumas. Hem i save se Maria i sik bigwan, taswe hem i talem bakegen mo bakegen long mitufala se mitufala i mas trastem God.”

Bifo we dokta i stat givim meresin long Maria, hem i luk se raetsaed leg blong Maria i stap mufmuv hem wan, olsem we Maria i no moa bos long hem. Dokta i mekem sam moa tes, mo hem i faenemaot se kansa i kasem bren blong Maria finis. Afta we hem i givim meresin long Maria blong wan wik, hem i stop. Smoltaem biaen, Maria i slip we i no moa save wekap. Tu manis biaen, hem i ded. Ricardo i talem se: “Taem hem i ded, mi mi tingbaot se i gud we hem i no moa safa. Be mi harem nogud bitim mak from we hem i no moa stap wetem mi. Mi bin wantem nomo we laef blong mi tu i finis. Plante taem, mi krae i go long God se: ‘?From wanem yu yu letem samting ya i hapen?’ ”

Trabol i Mekem Plante Kwestin i Stanap

Fulap man long wol oli fesem sem traem olsem Ricardo. Oli stap safa no oli mas luk wan narafala we i stap safa. Plante man we oli safa, oli ol gudfala man we oli no bin mekem wan samting blong pulum trabol i kam long olgeta. Tingbaot bigfala soasore we i spolem hat blong plante man, from ol faet we oli stap kamaot long plante ples long wol. Mo tingbaot soa we i stap long hat blong ol woman we ol man oli repem olgeta, mo ol pikinini we wan bigman i fosem olgeta blong slip wetem hem, mo ol famle we oli fulap long raf fasin, mo plante narafala we oli stap safa long han blong ol man. Long ol yia we oli pas finis, i luk olsem se i no gat mak blong ol rabis fasin mo kil we ol man mo woman oli mekem no kasem. (Prija 4:1-3) Antap long hemia, i gat ol wari mo trabol we i kamaot taem graon i seksek no hariken i kilim wan ples, mo taem yumi kasem wan sik long bodi no tingting, no yumi harem nogud long filing blong yumi. Yumi no sapraes we, from samting ya, ol man oli askem kwestin se: “?From wanem God i letem ol man oli safa?”

Nating we yumi gat wan skul, i no isi yet blong stanap strong taem yumi safa no yumi luk narawan i safa. Maet yu tu yu wantem save from wanem God we i gat lav mo olgeta paoa i letem ol man oli safa. I impoten we yumi faenem wan ansa we i stret mo i mekem tingting blong yumi i kwaet long saed blong strong kwestin ya. Samting ya i save mekem yumi haremgud mo i save givhan long yumi blong fren moa wetem God. Baebol i givim stret ansa ya. Plis ridim nekis haf blong luk wanem we Baebol i talem.

[Futnot]

[Tok blong pija long pej 3]

Dokta i talem bakegen mo bakegen se mitufala i mas trastem God