Sipos Yumi Gat Wan Hat We i Tru—?Hemia i Naf?

I GUD blong gat wan hat we i tru long laef blong evri dei? Wan man we hat blong hem i tru, hem i no gat tu fes, hem i no giaman, hem i tru long olgeta fasin blong hem. Yes, gudfala fasin ya i givhan blong frengud wetem ol narafala. Aposol Pol i givim advaes ya se: “Oltaem yufala i mas obei long olgeta ya we oli masta blong yufala long laef ya long wol. Bambae yufala i no mekem we yufala i obei long olgeta, long taem ya nomo we olgeta oli stap lukluk yufala. Hemia i olsem we yufala i stap wok blong mekem ol man nomo oli glad long yufala. Yufala i mas wok we tingting [“hat,” NW ] blong yufala i tru olgeta, olsem we yufala i stap ona long Masta blong yumi.” (Kolosi 3:22) Ating evri bos i glad blong gat wan man blong wok we hat blong hem i tru. Tede, ol man we oli gat fasin ya oli naf moa blong faenem mo holem wan wok.

Be i gat wan stamba risen we i mekem se fasin ya blong gat wan hat we i tru i wan nambawan fasin, hemia se: wan hat we i tru i gat paoa long fasin fren blong yumi wetem God. God i blesem ol man Isrel bifo sipos oli folemgud ol loa mo ol lafet blong hem. Pol i stap tokbaot fasin klin blong kongregesen, mo i talem long ol Kristin se: “I gud yumi joen blong mekem lafet ya. Be sipos yumi gat sin i stap yet long yumi, we yumi stap mekem ol fasin we i no stret, hemia i olsem olfala is ya, mo bambae yumi no save joen long lafet ya. Blong mekem lafet ya, yumi mas folem ol fasin we oli klin gud, mo oli tru [no, “wetem wan hat we i tru mo trutok,” NW ], nao bambae yumi olsem bred we i no gat is long hem.” (1 Korin 5:8) Blong God i agri long wosip blong yumi, i impoten we yumi gat wan hat we i tru. Be i no naf yet. Makemgud we hat ya we i tru i mas laenap wetem trutok.

Ating ol man we oli bildim bigfala sip ya Titanic wetem ol man we oli stap long hem tu, hat blong olgeta i tru nomo taem oli talem se bambae sip ya i no save draon. Be long 1912, sip ya i mekem faswan trip blong hem, i sperem wan aesbeg, mo 1,517 man oli ded. Sam long ol man Jiu long faswan handred yia oli bilif wetem wan hat we i tru se God i glad long wosip blong olgeta, be wok we oli mekem wetem strong tingting “i no stanap long stret save.” (Rom 10:2, NW ) Blong God i haremgud long wosip blong yumi, yumi mas bilif fulwan wetem wan hat we i tru, be bilif ya i mas stanap long stret save. Ol Witnes blong Jeova long komuniti blong yu bambae oli glad blong halpem yu blong save olsem wanem blong wosipim God wetem wan hat we i tru, mo wetem trutok.