“Mi No Save Plante Samting Long Saed Blong God”

“LONG yia we i pas finis, ol Witnes Blong Jeova oli bin visitim mi mo oli serem ol gudfala nius long saed blong Kingdom Blong God. Mi mi wan memba blong Katolik jos blong eit yia finis, be mi no save plante samting long saed blong God. Be long yia ya nomo, mi lanem plante samting.” Man we i raetem leta ya i laef long Kerala, India. Hem i ademap se: “Mi glad blong save we yufala i prentem Wajtaoa long 139 lanwis [146 lanwis naoia]. Hem i wan samting blong sapraes we olgeta grup blong man we oli toktok ol defren lanwis oli gat janis blong save mesej blong God.”

Nating se plante waes man oli talem se ol man oli no naf blong save God, be aposol Pol i talem klia se yes, ol man oli naf blong save God. Pol i stap toktok long wan grup blong ol man Atens, we sam blong olgeta oli stap mekem wosip long wan olta blong ‘wan god we olgeta oli no save hem.’ Pol i talem long olgeta se: “God ya we yufala i stap mekem wosip long hem, we yufala i no save hem, hemia nao God ya we mi mi stap talemaot long yufala. God ya nao i mekem wol ya, mo olgeta samting we oli stap long hem . . . hem nomo i stap mekem yumi evriwan i laef, mo hem i stap givim olgeta samting long yumi. Bifo we bifo olgeta, hem i mekem wan man nomo, nao olgeta man long wol oli kamaot long man ya, mo hem i putum olgeta oli stap long evri ples long wol.”—Ol Wok 17:23-26.

Pol i singaot ol man we oli stap lesin se oli mas traem save God ya we i Wokem olgeta samting, from we hem “i no stap longwe long yumi nating.” (Ol Wok 17:27) Ol Witnes Blong Jeova bambae oli glad blong givhan long yu blong yu save trufala God mo ol naesfala fasin blong hem.