Laef Stori

Mi Givhan Long Wok Blong Tijim Baebol Long Fulwol

ROBERT NISBET I TALEM STORI YA

King Sobhuza 2 blong Swasilan i welkamem mi wetem George, brata blong mi, long bigfala haos blong king. Samting ya i hapen long 1936, be mi rimemba gud storian blong mitrifala. ?Olsem wanem mi gat janis blong toktok wetem wan king? Samting ya i hapen from we mi joen longtaem finis long wok blong tijim Baebol long fulwol. Naoia mi gat 95 yia blong mi, mo mi glad tumas taem mi rimemba olsem wanem mi joen long wok blong prij long faef bigbigfala aelan.

STORI ya i stat long 1925, taem Dobson, wan man blong salem ti, i stat visitim famle blong mifala long Edinburgh, Skotlan. Long taem ya mi mi gat klosap 20 yia blong mi, mo mi stap lanem blong wok long wan drag stoa. Mi mi yangfala yet, be nating se i olsem, mi wari long ol bigbigfala samting we wol wo blong 1914-1918 i jenisim long laef blong ol famle mo long bilif blong olgeta long saed blong God. Wan dei, Masta Dobson i givim wan buk long mifala, nem blong hem The Divine Plan of the Ages. Buk ya i tokbaot wan God we i waes, we i Wokem olgeta samting, mo i gat wan “plan” blong hem. Mi mi glad tumas blong ridim buk ya, from we mi harem se hem i tokbaot kaen God ya we mi mi wantem wosipim.

Sot taem biaen, mi wetem Mama mitufala i stat go long ol miting blong ol Baebol studen, hemia nem blong ol Witnes Blong Jeova long taem ya. Long Septemba 1926, mi mo Mama, mitufala i givim laef blong mitufala i go long Jeova mo mitufala i tekem baptaes long wan asembli long Glasgow. Evri man we i wantem tekem baptaes i kasem wan longfala klos we i gat ol smol strap daon blong fasem long leg blong man, olsem nao,  klos ya i no save kam antap taem mifala i draon long wota. Mifala i mas putum klos ya antap long ol klos blong swim blong mifala. Long taem ya, mifala i ting se hemia nao stret klos we mifala i mas putum long wan impoten taem olsem baptaes.

Trutok i jes stanap, so mifala i nid blong kliarem plante poen yet. Eksampol, klosap evriwan long kongregesen i stap selebretem Krismas. I no gat plante man we oli prij. Mo sam elda tu oli talem se mifala i no mas seremaot ol buk we oli tokbaot Baebol long Sande, from we oli ting se fasin ya i brekem loa blong Sabat. Nating se i olsem, ol Wajtaoa blong 1925 oli stat blong givim plante moa advaes long saed blong ol vas olsem Mak 13:10 we i talem se: “Gud nius ya i mas go long olgeta man long wol fastaem.”

?Olsem wanem wok blong prij bambae i save kavremap fulwol? Fastaem we mi mi traem prij long ol haos wanwan, mi talem long ol man se mi stap salem sam gudfala buk blong skul, afta mi soem buk ya The Harp of God. Buk ya i eksplenem ten impoten tijing blong Baebol we oli olsem ol ten string blong wan hap. Biaen, mifala i stap yusum wan testimony card we i gat wan sot tok blong Baebol i stap long hem, ale, mifala i askem long ol man blong oli ridim kad ya. Mo tu, mifala i yusum wan fonograf we mifala i karem wetem mifala, taswe ol man oli save lesin long rikod blong wan smol tok blong 4 menet haf. Ol faswan fonograf we mifala i yusum oli hevi lelebet, be biaen mifala i yusum sam fonograf we oli no hevi tumas mo oli hae.

Stat long 1925 go kasem ol yia 1930, mifala i mekem bes blong mifala blong talemaot gud nius. Biaen, long stat blong ol yia 1940, oli stanemap Tiokratik Skul long olgeta kongregesen. Skul ya i tijim mifala olsem wanem blong talemaot gud nius blong Kingdom stret long ol man, we mifala i no nid blong yusum wan kad no wan rikod blong prij. Mo tu, mifala i lanem we i impoten blong stadi long Baebol wetem ol man we oli intres. Blong yusum wan pijatok, mi save talem we long taem ya wok blong prij i olsem wan smol pikinini nomo.

Brata Rutherford i Leftemap Tingting Blong Mi

Mi wantem mekem moa long wok blong prij taswe long 1931 mi joen long wok blong fultaem paenia. Mi mas statem wok blong paenia jes afta long wan asembli we oli holem long London. Be long wan dei blong asembli ya, long medel dei, Brata Joseph Rutherford i kam toktok wetem mi. Long taem ya hem i stap lukaot long wok blong prij, mo hem i plan blong sanem wan paenia i go long Afrika. Hem i askem long mi se: “?Olsem wanem? ?Yu yu wantem go longwe?” Nating se mi mi sapraes lelebet long kwestin ya, mi talem wetem strong tingting se: “Yes, bambae mi go.”

Long taem ya, bigfala samting we mifala i wantem mekem i blong seremaot plante buk, mo blong mekem samting ya, oltaem mifala i mas muv i go long plante defren ples. Oli leftemap tingting blong mi blong mi no mared, olsem bighaf blong ol brata we oli gat ol bigfala wok long taem ya. Teritori blong mi i stat long Cape Town long saot blong Afrika i go folem is kos, wetem ol aelan blong Indian Si. Long saed i go long wes, mi krosem hot sanbij blong Drae Ples Blong Kalahari go kasem stamba blong Nael Reva Long Bigfala Lugun blong Victoria. Mi mo brata we i prij wetem mi, mitufala i mas stap sikis manis evri yia long wan long ol kantri blong Afrika we oli stap long bigfala eria ya.

Tu Handred Bokis Blong Ol Buk

Taem mi kasem Cape Town, oli soem long mi 200 bokis blong ol buk we oli blong Is Afrika. Oli prentem ol buk ya long fo lanwis blong Yurop wetem fo lanwis blong Esia, be i no gat wan long olgeta we i stap long wan lanwis blong Afrika. Mi wantem save olsem wanem ol buk oli stap finis long ples ya, bifo we mi mi kasem taon. Taem mi askem kwestin ya, oli ansa long mi se ol buk ya i blong tufala paenia we oli go prij long Kenya i no longtaem i pas. Nem blong tufala Frank mo Gray Smith. Be taem tufala i kasem Kenya, klosap long sem taem oli kasem malaria tu, mo Frank i ded from.

Mi harem nogud long nius ya, be tingting blong mi i no foldaon. Mi wetem patna blong mi David Norman, mitufala i tekem wan sip i aot long Cape Town i go long Tansania, hemia faswan teritori blong mitufala samwe 5,000 kilometa longwe. Long Mombasa, Kenya, wan man we i wok long ofis blong pem tikit blong sip i lukaot long ol buk blong mitufala, mo biaen man ya i sanem ol bokis  blong buk oli go long ol ples we mitufala i askem long hem blong sanem. Fastaem, mitufala i prij nomo long ol ples we oli mekem bisnes long olgeta—olsem ol stoa mo ol ofis long evri taon. Long ol buk we mitufala i stap seremaot, i gat 9 buk we mitufala i seremaot evriwan tugeta mo 11 smol buk we bakegen mitufala i seremaot evriwan tugeta. Oli gat ol defdefren kala blong olgeta, taswe ol man oli kolem ol buk ya se ol renbo buk.

Afta, mitufala i go prij long aelan ya Zanzibar, we i stap samwe 30 kilometa longwe long is kos blong Afrika. Blong plante handred yia, Zanzibar i stamba ples blong salem ol man Afrika olsem slef, be tu ol man oli save gud aelan ya from ol cloves we smel blong hem i fulumap taon. I no isi blong faenem rod blong mitufala long taon, from we taem oli wokem taon ya i no gat plan blong hem. Ol smol rod oli tanem i go olbaot nomo, mo mitufala i faenem se i isi blong lus long wan ples olsem. Hotel blong mitufala i oraet, be i gat aean long olgeta doa mo ol stonwol oli tik tumas, mekem se hotel ya i luk olsem wan kalabus stret. Mitufala i prij gud long Zanzibar, mo mitufala i glad blong faenem ol man Arab, India, mo sam narafala bakegen we oli glad blong ridim ol buk.

Ol Tren, Ol Bot, Mo Ol Trak

Long taem ya, i no isi blong mekem ol trip long Is Afrika. Eksampol, taem mitufala i aot long Mombasa i go antap long ol hil blong Kenya, ol lokis oli blokem tren blong mifala. Plante milian lokis oli kavremap graon mo ol aean blong rod blong tren, mekem se ol aean ya oli glis tumas mo tren i no moa save ron. I gat wan rod nomo blong stretem problem ya: Oli mas kafsaedem hot wota blong tren long ol aean long fored blong tren, blong tren i save ron folem ol aean ya. Sloslou tren i gohed, gogo mifala i bitim finis ol milian lokis we oli stap blokem rod. !Mo mifala i haremgud tumas taem tren i stat go antap long ol hil, from we ples i kolkol moa!

I no hadwok blong go kasem ol taon we oli stap klosap long solwota, mifala i save tekem wan tren no wan bot. Be mifala i mas tekem wan trak blong go kasem ol taon long bus. Mi glad taem stret brata blong mi, George, i kam wetem mi, from we naoia mitufala tugeta i naf blong pem wan trak we i bigfala inaf blong gat ol bed, kijin, ples blong putum olting, mo ol windo we moskito net i kavremap olgeta. Mo tu, mitufala i putum ol laod spika antap long ruf blong trak. Olsemia, long dei mitufala i save prij long ol haos wanwan mo singaot ol man, blong oli kam lesin long ol pablik tok we mitufala i givim long ples blong maket long naet. I gat wan tok we plante man oli laekem, we taetel blong hem se, “?Hel i Rili Hot?” Wetem “trak we i pulum wan smol haos biaen,” mitufala i aot long Saot Afrika i go long Kenya, samwe 3,000 kilometa longwe. Long taem ya, mitufala i glad tumas blong gat plante defren smol buk long plante lanwis blong Afrika, we ol manples oli glad blong tekem.

Long ol longfala trip olsem, mitufala i glad tumas blong luk ol wael anamol blong Afrika. Long naet, mitufala i mas stap insaed long trak blong stap sef, be mitufala i gat janis blong luk plante defren anamol we Jeova i bin wokem, mo samting ya i mekem bilif blong mitufala i kam strong moa.

 Oli Stat Agensem Mifala

Mitufala i mas lukaot se ol wael anamol oli no kasem mitufala. Be ol wael anamol oli nating nomo taem mitufala i skelem wetem sam haeman blong gavman mo sam lida blong skul we oli kros tumas long mitufala, nao oli stat agensem mitufala from we mitufala i talemaot Kingdom. Mitufala i mas dil wetem wan bigfala problem we i kamaot from wan man we i krangke long skul blong hem, mo from ol man we oli stap folem hem. Man ya i singaot hem wan se Mwana Lesa, we i min se “Pikinini blong God,” mo grup we i stap folem hem i karem nem ya se Kitawala, be sore tumas, nem ya i minim “Wajtaoa.” Bifo we mifala i kasem ples ya, man ya i bin draonem plante man Afrika, i talem se hem i stap baptaesem olgeta, be ol man ya oli ded. Biaen oli holem hem mo oli hangem nek blong hem. Taem i pas, nao mi gat janis blong toktok wetem man we i bin hangem nek blong man ya, mo mi eksplenem long hem se man ya i no joen nating wetem Watch Tower Society.

Plante waet man oli agensem mifala tu, oli no glad long edukesen we mifala i stap givim long ol manples from we oli fraet blong lusum mane. Wan maneja i bin komplen se: “Sipos ol waet man oli wantem stap long kantri ya, ol man Afrika oli no mas luksave olsem wanem ol waet man oli stap spolem olgeta taem oli pem olgeta smol nomo.” Mi go luk bos blong wan bigfala kampani we i stap digim graon blong faenem gol, mo hem tu i sakemaot mi long ofis blong hem from semfala risen. From we hem i kros tumas, hem i tekem mi i go kasem rod.

Ating ol lida blong skul mo ol bisnesman we oli agensem mifala oli gat bigfala paoa long gavman, nao gavman blong Rodesia (we tede nem blong hem Simbabwe) i talem long mifala se mifala i mas aot long kantri. Mifala i askem strong long gavman blong i jenisim disisen blong hem, mo gavman i agri se mifala i save stap, be wan samting nomo, mifala i no mas prij long ol man Afrika. Wan haeman blong gavman i talem risen blong disisen ya se ol buk blong mifala “oli no stret long tingting blong ol man Afrika.” Nating se i olsem, wok blong mifala blong tijim ol man i gohed gud long sam narafala kantri blong Afrika we ol man oli glad long wok ya. Wan long ol kantri ya, hemia Swasilan.

King i Welkamem Mifala Long Swasilan

Swasilan i wan smol independen kantri we i joenem Saot Afrika, mo i gat 17,364 skwea kilometa blong hem. Long ples ya nao mifala i mitim king ya we i toktok gud tumas, nem blong hem King Sobhuza 2, we mi tokbaot hem long fastok blong stori ya. King ya i toktokgud Inglis, from we hem i bin go long yunivesiti long Inglan. Taem mifala i kam, hem i stap werem ol klos olbaot nomo, mo i welkamem gud mifala.

Stamba samting we mifala i tokbaot wetem hem, hemia Paradaes long wol we God i promes long olgeta man we hat blong olgeta i stret. Nating se king ya i no intres tumas long toktok blong mifala, hem i talem klia se hem tu i wantem tumas blong mekem samting we klosap i sem mak long promes blong God. King ya i halpem ol puaman mo ol man we oli no gat edukesen, i traehad blong mekem laef blong olgeta i kam moagud. Hem i no laekem nating wok blong plante misinari blong Krisendom, we oli wantem nomo blong pulum plante man oli kam long jos, be oli no traem givim  wan edukesen long ol man Afrika. Nomata se i olsem, king ya i savegud wok blong plante Witnes Blong Jeova we oli paenia, mo hem i presem mifala from wok we mifala i mekem blong tijim Baebol, speseli from we mifala i no askem mane no wan narafala samting blong mekem wok ya.

Wok Blong Tijim Baebol i Kam Antap Bigwan

Long 1943, oli stanemap Wajtaoa Baebol Skul blong Gilead, wan skul blong trenem ol misinari. Oli makemgud poen ya se samting we i impoten moa i blong givhan long ol man we oli intres, i bitim we mifala i seremaot plante buk. Long 1950 oli invaetem mi mo George i go long namba 16 klas blong Gilead. Hemia fastaem we mi mitim Jean Hyde, wan gudfala sista blong Ostrelia we oli sanem hem i go prij long Japan afta we mifala i kasem setifiket blong Gilead skul. Long taem ya, plante man oli stap folem yet fasin ya blong no mared, taswe fasin fren blong mitufala i no kam dip moa.

Afta Gilead skul, oli sanem mi mo George i go prij long Morisas, wan aelan long Indian Si. Mitufala i fren wetem ol manples, lanem lanwis blong olgeta, mo stadi long Baebol wetem olgeta. Biaen, smol brata blong mi William wetem waef blong hem, Muriel, tufala tu i go long Gilead skul. Mo oli sanem tufala i go prij long teritori ya we mi mi prij long hem bifo—hemia Kenya.

Eit yia i pas kwiktaem, mo biaen, long intenasnal asembli long New York long 1958, mi mitim Jean Hyde bakegen. Mitufala i stat fren bakegen, mo biaen mitufala i promes blong mared. Oli jenisim teritori we mi mas prij long hem, mi aot long Morisas blong go long Japan, mo long ples ya, long 1959 mi maredem Jean. Mitufala i glad tumas blong prij olsem misinari long Hiroshima, we long taem ya i gat wan smol kongregesen nomo long hem. Tede, i gat 36 kongregesen long taon ya.

Sayonara Long Japan

Ol yia oli pas, nao mitufala i kasem plante problem long saed blong helt, mekem se i had blong gohed long wok blong misinari. Taswe, mitufala i mas lego Japan mo go laef long Ostrelia, hemia kantri blong Jean. Mitufala i harem nogud long dei we mitufala i aot long Hiroshima. Long tren stesen, mitufala i talem sayonara, no tata, long ol gudfala fren blong mitufala.

Tede mitufala i stap long Ostrelia. Nating se mitufala i no moa save mekem plante wok, mitufala i mekem bes blong mitufala blong gohed blong mekem wok blong Jeova long kongregesen blong Armidale, long New South Wales. !Mi glad we mi glad tumas blong serem ol sas samting blong Baebol wetem plante man, blong klosap 80 yia! Mi mi luk we wok blong tijim Baebol i kam antap bigwan taem ol yia oli stap pas, mo mi luk wetem prapa ae blong mi sam bigfala samting we oli makem histri blong ol Witnes Blong Jeova. I no gat wan man no wan grup we i save talem se hem nao i bin mekem samting ya. Yes, olsem man blong raetem Sam i talem, “samting ya, Hae God i mekem, mo yumi luk we i gud tumas.”—Ol Sam 118:23.

[Tok blong pija long pej 28]

Brata blong mi George, wetem trak blong mitufala we i gat wan smol haos biaen

[Tok blong pija long pej 28]

Mi long Bigfala Lugun blong Victoria

[Tok blong pija long pej 29]

Ol studen blong haeskul oli stap lesin long wan pablik tok long Swasilan long 1938

[Tok blong pija long pej 30]

Mi wetem Jean taem mitufala i mared long 1959, mo tede