Ol Yangfala We Oli Mekem Hat Blong Jeova i Glad

Tufala stadi ya, mifala i wokem speseli blong ol yangfala Witnes Blong Jeova. From samting ya, mifala i leftemap tingting blong ol yangfala blong oli ridim gud mo rere gud long tufala stadi ya, mo no fraet blong givim ansa long hem long miting blong Wajtaoa Stadi.

“Pikinini boe blong mi, yu mas waes, mo yu mas mekem hat blong mi i glad, blong bambae mi save ansa long hemia we i stap jikim mi.”—OL PROVEB 27:11, NW.

1, 2. (a) ?Sipos yu yu intres smosmol long ol samting long wol ya, hemia i min se yu no stret nating blong stap olsem wan Kristin? Eksplenem. (Rom 7:21) (b) ?Eksampol blong Asaf i tijim yu long wanem? (Lukluk bokis long pej 13.)

 TINGBAOT se yu go long stoa blong pem wan klos. Taem yu stap lukluk olgeta klos wanwan, ae blong yu i fas long wan we, wantaem nomo, yu yu laekem. Long tingting blong yu, kala mo stael blong hem i stret long yu nomo. Praes blong hem tu, i no sas tumas. Be nao, taem yu lukluk gud long klos ya yu makem sam samting. I luk olsem se kaliko blong hem i olfala mo yu luk tu se ol tred blong hem oli stat kamkamaot mo oli somap olbaot nomo. Maet klos ya i luk naes fastaem, be i klia se hem i no gud nating blong yu spenem mane blong yu long hem. ?Olsem wanem? ?Bambae yu gohed nomo, yu westem mane blong yu long wan klos olsem?

² Pijatok ya i laenap stret long samting we i stap fored long yu, yangfala Kristin. Hemia ol samting blong wol ya. Fastaem, maet ol samting ya oli luk naes, olsem klos ya long stoa. Ating ol fren blong yu long skul oli stap go danis, oli stap tekem drag, oli drong, oli gat boefren no gelfren, mo plante long olgeta oli mekem seks finis. ?Sam samtaem, yu yu intres long ol samting ya we oli stap mekem? ?Yu yu wantem traem smol nomo, ol samting ya we oli talem se hemia nao fasin fri? Maet yu ansa se yes. ?Ale, olsem wanem? ?Hemia i min se yu yu nogud, mo i no stret nating blong yu stap olsem wan Kristin? Yu no mas hareap blong tingting olsem. Baebol i talemaot finis se ol samting blong wol ya bambae oli save gat bigfala paoa long olgeta man—mo long ol man tu we oli wantem mekem samting we God i glad long hem.—2 Timoti 4:10.

3. (a) ?From wanem man we i ronem ol samting blong wol ya i westem taem nomo? (b) ?Wan Kristin woman i talem se fasin blong ronem ol samting blong wol i olsem wanem?

³ Naoia, traem lukluk gud long ol samting ya we wol i wantem givim long yu. Mekem olsem we yu lukluk gud long klos ya we yu wantem pem long stoa. Ale, askem kwestin ya long yu wan se: ‘?Ol samting blong wol ya oli strong gud, bambae oli save stap longtaem? ?No oli olsem ol tred blong klos ya we oli brobrok mo oli somap olbaot?’ Baebol i talem se “wol ya wetem ol samting we ol man blong hem oli wantem, oli stap lus.” (1 Jon 2:17) Gud taem we wol ya i givim blong mekem yu yu harem gud hem i blong smoltaem nomo. Antap long samting ya, taem yu mekem fasin we God i no laekem, yu yu save kasem nogud frut from, i olsem we yu westem mane blong yu blong pem wan klos we i rabis. Wan Kristin woman i westem yangtaem blong hem long ol samting we oli nogud nomo, mo hem i  stap harem nogud yet. Hem i se: “Taem yu lukluk wol, i olsem we hem i naes tumas mo i mekem we yu yu wantem go long hem. Wol ya i wantem mekem yu yu ting se ol pleplei blong hem oli no save givim soa. Be hemia i no tru nating. Wol ya bambae i yusumgud yu, mo afta we hem i spolemgud yu, bambae hem i sakem yu olsem wan doti nomo.” * ?From wanem yu wantem westem yangtaem blong yu long wan laef we i no gud nating?

“Blokem Man Nogud Ya Setan”

4, 5. (a) ?Smoltaem bifo we Jisas i ded, hem i askem wanem long prea blong hem i go long Jeova? (b) ?From wanem i stret we hem i askem samting ya?

⁴ Ol yangfala Witnes Blong Jeova oli luksave se wol ya i no gat wan samting we i gud blong givim long olgeta. Taswe oli no wantem fren wetem wol ya. (Jemes 4:4) ?Yu yu wan long ol yangfala ya we oli wantem stap tru long Jeova? Sipos yes, mifala i glad long ol traehad blong yu. I tru se i no isi blong talem no long ol fren we oli traem pulum yu blong folem olgeta. Mo i no isi tu blong folem fasin we i defren olgeta long fasin we ol man raonabaot long yu oli stap mekem. Be i gat sam samting i stap we oli save halpem yu.

⁵ Smoltaem bifo we Jisas i ded, hem i prea long Jeova blong “blokem man nogud ya Setan, blong i no kam spolem” ol disaepol blong hem. (Jon 17:15) I gat wan gudfala risen from wanem Jisas i prea olsem. Hem i save se bambae i no isi nating long ol disaepol blong hem blong stap tru long God nomata se oli yangfala no olfala. ?From wanem? Wan risen se, Jisas i luksave we ol disaepol blong hem bambae oli mas faet agensem spirit man ya we i gat bigbigfala paoa, hemia “man nogud ya” Devel Setan. Baebol i talem se rabis spirit man ya i “olsem wan laeon we i stap singaot bigwan, i stap lukaot man blong i kakae.”—1 Pita 5:8.

6. ?Olsem wanem yumi save se Setan i no gat sore nating long ol yangfala?

⁶ Long ful histri blong wol ya, Setan i bin harem gud tumas blong karem ol trabol we i nogud we i nogud olgeta i kam long laef blong ol man. Tingbaot ol rabis samting we Setan i mekem long Job mo famle blong hem. (Job 1:13-19; 2:7) Yu wan maet yu save tingbaot nius blong sam bigbigfala trabol we oli bin kamaot taem yu stap gruap we oli soemaot se Setan i laekem raf fasin. Yes, Devel Setan i stap lukluk olbaot, hem i lukaot man blong i kakae, mo hem i no gat sore nating long ol yangfala. Tingbaot wanem we i hapen long faswan handred yia K.T. * King Herod i wokem wan plan blong kilim i ded olgeta pikinini boe long Betlehem we oli no bitim tu yia yet. (Matiu 2:16) I sua se Setan nomo i stap biaenem Herod long rabis plan ya. !Hem i wantem tumas blong kilim i ded pikinini ya we wan dei bambae i kam Mesaea ya we God i promes blong sanem i kam.  Mesaea ya nao bambae i mekem jajmen blong God i kamtru agensem Setan! (Jenesis 3:15) Ol samting ya oli soemaot klia se Setan i no gat lav mo sore nating long ol yangfala. Hem i gat wan mak nomo, hemia blong spolem olgeta man we hem i naf blong spolem. Mo hem i traehad moa naoia from we olgeta long heven oli sakemaot hem finis, hem i kamdaon long wol, mo “hem i kros tumas, from we hem i save se i gat smol taem nomo blong hem i stap yet.”—Revelesen 12:9, 12.

7. (a) ?Wanem samting we i mekem se Jeova i defren we i defren olgeta long Setan? (b) ?Wanem tingting blong Jeova long saed blong fasin blong harem gud long laef?

⁷ Jeova i defren olgeta long Setan. Setan i wan man we “i kros tumas,” be Jeova hem i “kaen tumas mo hem i gat sore long yumi.” (Luk 1:78) Jeova hem i nambawan eksampol blong lav. Tru ya, lav blong hem i bigman tumas mekem se Baebol i talem se: “God i stamba blong fasin ya blong lavem man.” (1 Jon 4:8) !Tru tumas, rabis god blong wol ya i defren olgeta long God we yu yu gat janis blong wosipim! Setan i lukaot ol man blong spolem olgeta nomo, be Jeova i “no wantem se bambae wan man i lus.” (2 Pita 3:9) Long lukluk blong Jeova, laef blong evri man i sas tumas—laef blong yu tu i sas. Taem Jeova i putum tok ya long Baebol se yu no mas joen long wol ya, hem i no traem spolem glad blong yu no blokem yu blong harem gud long laef. Nogat. (Jon 15:19) Hem i mekem olsem from we hem i wantem blokem yu long rabis man ya, Setan. Papa blong yu long heven i wantem we yu yu kasem wan samting we i gud moa i winim olgeta pleplei blong wol ya we bambae oli lus i no longtaem. Hem i wantem we yu yu kasem “laef ya we i prapa wan”—hemia laef we i no save finis long paradaes long wol. (1 Timoti 6:17-19) Jeova i wantem se yu win long laef, mo hem i stap pusum yu yu go blong kasem mak ya. (1 Timoti 2:4) Antap long hemia, Jeova i stap singaot yu blong yu mekem wan spesel samting. ?Wanem samting ya?

“Mekem Hat Blong Mi i Glad”

8, 9. (a) ?Wanem presen we yu yu save givim long Jeova? (b) ?Wanem samting we Setan i talem blong jikim Jeova, olsem we hem i mekem long Job?

⁸ ?Samtaem yu bin pem wan presen blong wan gudfala fren blong yu nao yu luk we taem hem i kasem presen ya hem i glad mo i tangkiu bigwan long yu from? Bifo we yu pem presen ya, ating yu bin tingting plante long wanem samting we i stretgud long fren blong yu. Ale, tingbaot kwestin ya: ?Wanem kaen presen we yu save givim long Jeova God we i Wokem yu? Maet yu ting se kwestin ya i narakaen. God ya we i gat Olgeta Paoa i no nidim wan samting long yumi. ?Wanem samting we yu yu save givim long hem we hem i no gat yet? Baebol i ansa long kwestin ya long Ol Proveb 27:11 (NW ) i se: “Pikinini boe blong mi, yu mas waes, mo yu mas mekem hat blong mi i glad, blong bambae mi save ansa long hemia we i stap jikim mi.”

⁹ Tru long stadi blong Baebol we yu yu mekem, ating yu save finis se Devel Setan nao hem i man ya we i stap jikim Jeova. Setan i strong blong talem se ol man oli mekem wok blong God from we oli wantem kasem samting nomo be i no from we oli lavem God. Setan i wantem pruvum se sipos ol man oli safa, ale, kwiktaem nomo, bambae oli lego trufala wosip. Tingbaot samting we Setan i talem long Jeova long saed blong stret man ya Job. Hem i se: “Oltaem yu stap lukaot gud long hem wetem ol pikinini blong hem mo olgeta samting blong hem, mo yu stap blokemgud olgeta. Evri samting we hem i stap mekem, be yu yu stap blesem olgeta, mo ol anamol ya we yu givim long hem, kantri ya i fulap gud long olgeta. Be sipos yu tekemaot ol samting ya, bambae hem i tok nogud long yu, stret long fes blong yu.”—Job 1:10, 11.

10. (a) ?Olsem wanem yumi save se Setan i tokbaot ol narafala man tu taem i talem se Job i no save stap tru long God? (b) ?Olsem wanem yu tu yu insaed long bisnes ya long saed blong hae rul blong God?

¹⁰ Stori blong Job long Baebol i soemaot we Setan i wantem pruvum se Job mo ol narafala man blong God—hemia i minim yu tu—oli no save stap tru long God. I olsem we Setan i stap minim olgeta man long wol ya, taem hem i talem tok ya long Jeova se: “Olgeta samting we man i gat [i no Job nomo be olgeta man] bambae hem i givim blong sevem sol blong hem.” (Job 2:4, NW ) ?Yu yu luksave se yu yu gat wok blong mekem insaed long bisnes ya? Olsem vas blong Ol Proveb 27:11 i soem, Jeova i talem se i gat wan samting we yu yu save givim long hem. Samting ya hemia wan pruf we hem i save yusum blong agensem tok we Setan i sakem long hem. Tingbaot samting ya: Haefala Masta Blong Heven mo Wol i stap singaot yu blong talemaot tingting blong yu long wan kwestin we i bigwan moa i bitim ol narafala kwestin long histri blong man. !Hemia wan bigfala wok ya mo blesing tu we yu yu gat! ?Yu ting se  yu yu naf blong mekem samting ya we Jeova i askem long yu blong mekem? Job i naf. (Job 2:9, 10) Long ol handred yia we oli pas, Jisas mo plante narafala man, wetem ol yangfala tu, oli bin naf blong mekem samting ya. (Filipae 2:8; Revelesen 6:9) Ale, yu tu yu save mekem sem mak. Be yu no mas mastik long samting ya. I no gat man we i save ting se hem i no nid blong joen long bisnes ya sipos hem i no wantem. Nogat. Evri man oli stap insaed long bisnes ya. Yes, long ol samting we yu yu mekem, bambae yu soem sipos yu sapotem tok blong Setan no ansa blong Jeova. ?Weswan nao we bambae yu yu jusum blong leftemap?

!Jeova i Kea Long Yu!

11, 12. ?Jeova i rili kea long disisen we yu yu mekem, blong wosipim hem no nogat? Eksplenem.

¹¹ ?Jeova i rili intres long wanem jus we bambae yu mekem? ?Plante man oli stap tru long God finis, ating hemia i naf blong God i givim wan ansa long Setan, no? I tru, plante man oli pruvum finis se Setan i giaman nomo taem hem i talem se i no gat man we i mekem wok blong Jeova wetem lav. Nating se i olsem, Jeova i wantem we yu yu stanap long saed blong hae rul blong hem from we hem i kea long yu wan. Jisas i talem se: “Papa blong yufala long heven, hem i no wantem we bambae wan long ol pikinini ya i lus.”—Matiu 18:14.

¹² I klia se Jeova i intres long jus we yu yu mekem. Hem i save harem gud no i save harem nogud from jus blong yu. Baebol i soemaot we Jeova i gat filing mo ol man oli save mekem hem i harem i soa sipos oli mekem fasin we i nogud no oli save mekem hem i glad sipos oli mekem fasin we i gud. Eksampol, taem ol man Isrel oli mekem stronghed bakegen mo bakegen, oli mekem Jeova i “harem nogud.” (Ol Sam 78:40, 41) Bifo we Bigfala Wota i ron long taem blong Noa, Jeova “i stap harem nogud tumas” from we “olgeta man long wol oli stap mekem i nogud tumas.” (Jenesis 6:5, 6) ?Ol eksampol ya oli soem wanem? Oli soem se sipos yu yu jusum rong rod, yu save mekem God i harem nogud tumas. Hemia i no min se God i wan slak man we ol filing blong hem oli bos long hem. Nogat. Hem i wan God we i lavem yu mo i wantem se yu yu stap gud. Taem yu mekem samting we i stret, yu mekem Jeova i glad. Hem i hapi from we i gat wan moa man bakegen we i pruvum se tok blong Setan i giaman, be tu, hem i hapi from we naoia hem i save mekem i gud long yu. Mo hem i wantem tumas blong mekem olsem. (Hibrus 11:6) !Yu yu mas glad tumas blong gat wan Papa olsem Jeova God we i lavem yu tumas!

Plante Bigfala Blesing Naoia

13. ?Olsem wanem man we i wok blong Jeova i save kasem blesing naoia?

¹³ Ol blesing we Jeova i save givim long man we i wok blong hem, oli no blong fiuja nomo. Plante yangfala Witnes Blong Jeova oli kasem blesing naoia finis. Ol blesing ya hemia glad mo filing blong harem gud. Man blong raetem Sam i talem se: “Ol loa we [Jeova] i stap tijim yumi long hem oli  stret, mo olgeta we oli stap obei long ol loa ya, oli stap harem gud.” (Ol Sam 19:8) Jeova i savegud moa i bitim eni man, wanem samting nao we i save mekem i gud long yumi. Jeova i toktok long yumi, tru long profet Aesea i se: “Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem. Sipos yufala i bin obei long ol tok blong mi, ol gudgudfala samting we mi mi save mekem long yufala, bambae oli save kam long yufala, olsem wan gudfala reva we i stap ron. Bambae mi save mekem we yufala i win oltaem nomo, olsem solwota we i stap brok long sanbij mo rif, we neva i save spel.”—Aesea 48:17, 18.

14. ?Olsem wanem ol rul blong Baebol oli save halpem yu blong yu no kasem trabol we i kamaot taem yu gat kaon olbaot?

¹⁴ Taem yu folem gud ol rul blong Baebol bambae yu blokem yu wan long plante soa mo trabol. Baebol i givim wan eksampol blong samting ya taem hem i tokbaot ol man we oli lavem mane tumas. Hem i se ol man olsem, “oli stap mekem ol samting we olgeta tu oli harem nogud tumas from.” (1 Timoti 6:9, 10) ?I gat sam fren blong yu we ol tok blong vas ya oli kamtru finis long laef blong olgeta? Sam yangfala man mo woman oli gat bigbigfala kaon olbaot from we oli wantem tumas blong pem ol sas klos we oli karem nem blong sam spesel kampani no ol narafala samting olsem ol niufala teknoloji blong wol. !Tru ya, man we i wantem samting we i sas tumas, nao hem i stap pem samting ya smosmol evri manis, samtaem hem i spenem bigfala mane moa, mo i mas pembak samting ya blong longtaem! Hemia wan samting we i mekem man i kam slef nomo.—Ol Proveb 22:7.

15. ?Olsem wanem ol rul blong Baebol oli blokem yu long trabol we i save kamaot from nogud fasin long saed blong seks?

¹⁵ Mo tu, tingbaot ol frut we oli kamaot from nogud fasin long saed blong seks. Evri yia, plante yangfala gel raon long wol oli gat bel we oli no mared yet. Sam long olgeta ya oli no wantem bebi blong olgeta no oli no naf nating blong lukaot long bebi ya. Sam narafala yangfala oli traem kilim bebi long bel mo oli kasem nogud frut blong samting ya biaen from we tingting blong olgeta i stikim olgeta. Plante yangfala oli kasem ol nogud sik from fasin blong slip olbaot, olsem sik ya AIDS. Be long wan yangfala we i save Jeova, samting we i moa nogud, we i save hapen sipos hem i mekem ol rabis fasin ya, hemia se hem i lusum fasin fren blong hem wetem Jeova. * (Galesia 5:19-21) Taswe i stret nomo we Baebol i talem se: “Bambae yufala i no moa mekem fasin nogud wetem woman [mo man tu].”—1 Korin 6:18.

 Mekem Wok Blong “Hapi God Ya”

16. (a) ?Olsem wanem yumi save se Jeova i wantem we yu harem gud long yang taem blong yu? (b) ?From wanem Jeova i putum sam rul blong yu yu folem?

¹⁶ Baebol i tokbaot Jeova se hem i wan “hapi God.” (1 Timoti 1:11, NW ) Mo hem i wantem we yu tu yu hapi. Tru ya, Tok blong hem i talem stret se: “Ol yangfala, naoia we yufala i yangfala yet, i gud yufala i stap mekem ol fasin we yufala i save harem gud long hem.” (Prija 11:9) Be Jeova i lukluk i go moa long samting we i stap naoia mo hem i save wanem frut we bambae i kamaot from gudfala fasin mo rabis fasin. From samting ya nao hem i givim advaes ya long yu se: ‘God i mekem yu, mo naoia we yu yu yangfala yet, oltaem yu mas tingbaot hem. I nogud yu stap wet go kasem taem ya we evri dei, ol trabol bambae oli stap kam kasem yu, mo evri yia, bambae yu stap talem se, “Mi mi no glad nating long laef ya.” ’—Prija 12:1.

17, 18. ?Wan yangfala Kristin i talem wanem blong soemaot glad we hem i gat long wok blong Jeova, mo olsem wanem yu tu yu save kasem glad ya?

¹⁷ Tede, plante yangfala oli faenem bigfala glad long wok blong Jeova. Lina, we i gat 15 yia, i wan long ol yangfala ya. Hem i se: “Mi mi no gat sem mo mi no tingting nogud long mi wan. Mi no smok tabak mo mi no tekem drag, from samting ya, bodi blong mi i helti gud. Kongregesen i givim ol gudfala advaes blong halpem mi blong faet agensem ol rabis traem blong Setan. Fes blong mi i saen from gudfala kampani we mi gat long Haos Kingdom. Be antap long olgeta samting ya, mi mi gat nambawan hop ya blong kasem laef we i no save finis long wol ya.”

¹⁸ Plante yangfala Kristin olsem Lina, oli stap faet strong blong holem bilif blong olgeta, mo samting ya i mekem oli hapi. Oli luksave se laef blong olgeta i no blong nating nomo mo oli gat wan fiuja we i suagud, nating sipos samtaem i gat problem no traem i kamaot. Taswe i gud yu yu gohed blong mekem wok blong God ya we i rili wantem se yu yu harem gud. !Mekem hat blong hem i glad, mo bambae hem i mekem yu yu glad, stat naoia, gogo i no save finis!—Ol Sam 5:11.

[Ol Futnot]

?Yu Yu Tingbaot?

• ?Wanem trabol we “man nogud ya” Setan i save putum long yu?

• ?Olsem wanem yu save mekem hat blong Jeova i glad?

• ?Olsem wanem Baebol i soemaot se Jeova i kea long yu?

• ?Wanem sam blesing we oli kamaot taem yangfala i mekem wok blong Jeova?

[Kwestin]

[Bokis/Foto blong pija long pej 13]

Wan Stret Man Klosap i Foldaon

Long Isrel bifo, i gat wan man we nem blong hem Asaf. Asaf i wan Livaet we i plei miusik long haos tempol blong Jeova mo hem i raetem sam long ol sing ya we ol man Isrel oli yusum long wosip blong olgeta. Nating se Asaf i gat gudfala wok ya long haos blong God, hem i bin intres smoltaem long fasin blong laef blong ol fren blong hem we oli no laekem God. Ol fren ya oli stap brekem ol loa blong Jeova be i luk olsem se oli no stap kasem trabol from. Asaf i luksave se: “Klosap tingting blong mi i no moa stap long [God], bilif blong mi klosap i lus, from we taem mi luk ol man nogud ya we ol samting long laef blong olgeta oli stap ron gud nomo, mo oli stap praod from, mi mi jalus long olgeta.”—Ol Sam 73:2, 3.

Asaf i go long haos prea blong God mo i prea long saed ya. Nao tingting blong hem i kam klia, mo hem i kasem save se Jeova i no laekem nating ol nogud fasin mo long stret taem blong hem bambae ol rabis man mo gudfala man tugeta oli karem frut from fasin blong olgeta. (Ol Sam 73:17-20; Galesia 6:7, 8) Yes ol rabis man oli stap wokbaot long ples we i glis. Long taem we i kam, hemia taem we Jeova i spolem rabis wol ya, ol rabis man ya we oli no wantem obei long hem bambae oli foldaon, oli lus olgeta.—Revelesen 21:8.

[Tok blong pija long pej 15]

Jeova i rili wantem we yu yu harem gud, be Setan i wantem nomo blong spolem yu

[Tok blong pija long pej 16]

Plante yangfala oli faenem bigbigfala glad taem oli mekem wok blong Jeova wetem ol narafala Kristin