Ripot Long Wok Blong Kingdom

Kasem Help Blong Stanap Strong Long Tingting Ya Se Blad i Tabu

LONG olgeta ples blong wol, ol man blong Jeova oli bin soemaot se oli stap tru long God, taem oli stanap strong long tingting ya se blad i tabu. (Ol Wok 15:28, 29) Slef we i stret mo waes i bin givhan bigwan long ol Kristin blong oli holem tingting ya. (Matiu 24:45-47) Bambae yumi luk wanem frut i kamaot long kantri ya Filipin.

Hed ofis blong ol Witnes long Filipin i raetem ripot ya: “Long 1990, mifala i kasem nius se sam brata blong Bruklin Betel bambae oli kam mekem wan miting long Filipin. Oli singaot sam brata blong ol hed ofis blong sam kantri blong Esia, olsem Koria, Taewan, mo Hong Kong, blong olgeta tu oli kam. Risen blong samting ya, i blong putumap Hospital Infomesen Sevis long ol hed ofis blong ol kantri ya, mo tu blong mekem plan blong ol Hospital Liaison Committee. Fastaem, oli putumap ol komiti long fo bigfala taon blong Filipin.” Ol komiti ya oli mas traehad blong faenem ol dokta we oli rere blong respektem bilif blong ol Kristin long saed blong blad. Mo tu, oli mas givhan long ol brata we oli kasem trabol taem oli no letem dokta i putum blad long bodi blong olgeta.

Long taon ya Baguio, oli jusumaot brata Remegio blong wok long Hospital Liaison Committee. Sloslo ol dokta oli lukluk ol gudfala wok blong komiti ya. Remegio i stap tingbaot yet wan taem we sam dokta oli miting wetem Hospital Liaison Committee, nao oli wantem save olsem wanem oli mas mekem long wan Witnes we hem i no wantem blad. Remegio i talem se: “Ol dokta ya oli askem plante kwestin, mo tingting blong mi i fasfas from we ol kwestin ya oli long saed blong ol rod we ol dokta oli yusum.” Remegio i prea i go long Jeova blong i givhan long hem blong ansa long ol strong kwestin ya. Hem i gohed i talem se: “Afta long ol wanwan kwestin, sam dokta oli putum han blong olgeta antap, mo oli talemaot olsem wanem oli bin mekem taem oli fesem trabol ya.” Remegio i glad tumas we oli givhan long hem olsemia, antap moa, from we ol kwestin ya oli gohed blong tu aoa.

Naoia, i gat 21 komiti long kantri ya, mo 77 brata oli wok long ol komiti ya. Danilo, we hem i wan Witnes mo wan dokta tu, i talem se: “Ol dokta oli luksave se ol Witnes we oli sik oli stap insaed long wan ogenaesesen we i rere oltaem blong givhan long olgeta mo we i gat lav mo fasin kea.” Wan dokta i no wantem katem wan brata from we brata ya i talem long hem se i no wantem blad. Brata ya i stanap strong, ale dokta i agri blong katem hem, mo brata ya i kamgud bakegen. Hospital Infomesen Sevis i talem se: “Dokta ya i sapraes we brata ya i kamgud hareap. Hem i se: ‘From samting ya we mi mi luk, mi glad blong katem eni man long jos blong yufala we oli gat sik ya, mo bambae mi no putum blad long olgeta.’”