‘Oltaem Tingting Blong Yufala i Mas Klin Gud’

“PLANTE man oli ting se i stret nomo we yumi letem tingting ya we i stap jajem yumi, i lidim yumi.” Be sipos yumi wantem suagud se tingting ya we i jajem yumi bambae i lidim yumi i go long stret rod, fastaem yumi mas trenemgud tingting ya blong hem i naf blong luksave ol samting we i gud mo ol samting we i nogud. Mo biaen yumi mas lesin taem tingting ya i jajem yumi long wan samting.

Traem tingbaot samting we i hapen long man ya, Sakias, we stori blong hem i stap long Baebol. Sakias i stap long Jeriko. Hem i bos blong ol man blong tekem mane blong takis, mo hem i wan rijman. Hem wan i talem se hem i bin kasem ol sas samting blong hem tru long ol kruked fasin—wan fasin we i spolem narafala. ?Olsem wanem? ?Tingting blong Sakias i jajem hem, no i stikim hem se hem i stap mekem i rong? Sipos yes, i luk olsem we Sakias i neva wantem lesin long tingting ya.—Luk 19:1-7.

Nating se i olsem, wan samting i hapen we i pulum Sakias blong tingting gud laef blong hem. Jisas i kam long Jeriko. Sakias i wan sotfala man, mo i wantem luk Jisas be i no save luk hem from we ol man oli hivap long fored blong hem. Ale, Sakias i resis i go fastaem mo i klaem long wan tri blong i save luk Jisas taem hem i pas. Jisas i sapraes long strong tingting blong man ya. Taswe Jisas i talem long Sakias se bambae hem i kam long haos blong Sakias. Sakias i glad tumas blong welkamem bigfala man ya long haos blong hem.

Ol samting we Sakias i luk mo i harem taem hem i stap wetem Jisas, oli rili tajem hat blong hem, mo oli pulum hem blong jenisim laef blong hem. Hem i talem se: “Masta, yu lesin. Bambae mi seraot olgeta samting blong mi long tu haf, wan haf i blong mi, mo nara haf i blong ol puaman. Mo sipos i gat man we mi bin stilim samting long hem, bambae mi givimbak fo samting long hem bakegen.”—Luk 19:8.

Tok blong Jisas i tijim tingting blong Sakias blong luksave samting we i nogud. Nao, Sakias i lesin long tingting ya, mo i letem tingting ya i lidim hem. Sakias i kasem plante blesing from. Traem tingbaot filing blong Sakias taem Jisas i talem long hem se: “Tede God i sevem ol man blong haos ya.”—Luk 19:9.

!Eksampol blong Sakias i leftemap tingting blong yumi! Hem i pruvum se, nomata wanem laef we yumi gat bifo, be yumi save jenis. Olsem Sakias, yumi save folem ol tok blong Jisas—we oli stap long Baebol— mo lanem blong luksave samting we i gud mo samting we i nogud. Biaen, olsem aposol Pita i talem, yumi save stap olsem man we ‘oltaem tingting blong yumi i klin gud’ i no stikim yumi. Yes, yumi save trenem tingting blong yumi mo mekem samting we i stret.—1 Pita 3:16.